កំពង់ធំៈ នគរបាលស្រុកបារាយណ៍កំពុងតាមស្វែងរកចាប់ខ្លួនបុរសជាជនដៃដល់ម្នាក់ដែលចាក់បងថ្លៃ ១ ដាវស្លាប់ និងរត់គេចខ្លួនកាលពីថ្ងៃទី ១១ ខែកុម្ភៈនៅភូមិបឹងខាងត្បូង ឃុំបឹង ស្រុកបារាយណ៍ ខេត្តកំពង់ធំ។
លោក កែ កញ្ចនា អធិការរងនគរបាលស្រុកបារាយណ៍ប្រាប់ពីម្សិលមិញថា ករណីចាក់គ្នាស្លាប់នោះជនដៃដល់បានគេចខ្លួនបាត់ បន្ទាប់ពីចាក់សម្លាប់ជនរងគ្រោះ ប៉ុន្តែសមត្ថកិច្ចកំពុងស្វែងរកចាប់ខ្លួនជនសង្ស័យ។
លោកប្រាប់ថាជនសង្ស័យឈ្មោះ ម៉ោល មុត អាយុ ៣១ ឆ្នាំ រីឯបុរសជាជនរងគ្រោះឈ្មោះ លួន ធូរ អាយុ ៣០ ឆ្នាំត្រូវជាប្អូនថ្លៃ។ ពួកគេរស់នៅផ្ទះជាមួយគ្នាក្នុងភូមិ-ឃុំ កើតហេតុខាងលើ។
លោកបានបញ្ជាក់ថា៖ «រឿងនេះវាពិបាកកំណត់ឲ្យបានជាក់លាក់ណាស់ ព្រោះសាក្សីមិនច្បាស់មានតែម្តាយជនរងគ្រោះតែម្នាក់គត់។ ប៉ុន្តែជនរងគ្រោះជាអ្នកប្រមឹករាល់ថ្ងៃតែងតែអុកឡុកក្នុងគ្រួសារ»។
លោក កែ កញ្ចនា បានរំឭកប្រាប់តាមសម្តីម្តាយជនរងគ្រោះថា មុនកើតហេតុពួកគេទាំង ២ នាក់បានចេញពីផ្ទះទៅផឹកស៊ី។ លុះនៅវេលាម៉ោង ១០ កន្លះយប់ថ្ងៃអាទិត្យទើបត្រឡប់មកផ្ទះវិញ ឯបងថ្លៃបានដេកលើគ្រែ ហើយខណៈនោះក៏មានការឈ្លោះប្រកែកគ្នា។
លោកប្រាប់បន្តថាពេលឈ្លោះនោះជនរងគ្រោះបានគំរាមជនដៃដល់ថានឹងអារកសម្លាប់ចោល ហើយស្របពេលនោះជនរងគ្រោះបានកាន់ដាវទៅរករឿងជនសង្ស័យ។ ពេលនោះពួកគេបានប្រវាយប្រតប់គ្នា ហើយជនសង្ស័យដណ្ដើមបានដាវក៏ចាក់ជនរងគ្រោះត្រូវចំក្រោមក្លៀកឆ្វេង ១ ដាវដោតជាប់នឹងខ្លួនបណ្តាលឲ្យស្លាប់ភ្លាមៗនៅនឹងកន្លែងតែម្ដង។ បន្ទាប់មកជនសង្ស័យបានរត់គេចខ្លួនបាត់ទៅ៕