.jpg)
សពក្មេងរងគ្រោះទាំង ២ នាក់បងប្អូនដែលម្តាយបំពុលស្លាប់។ រូបថត សហការី
កំពតៈ សមត្ថកិច្ចបានដាក់កម្លាំងយាមនៅមន្ទីរពេទ្យខេត្តកំពតដើម្បីរង់ចាំចាប់ខ្លួនស្ត្រីម្នាក់ដែលបានដាក់ថ្នាំបំពុលសម្លាប់កូនប្រុសតូចៗរបស់ខ្លួន ២ នាក់រួចសម្លាប់ខ្លួនឯងតែមិនស្លាប់កាលពីថ្ងៃទី ៣០ ខែមករា ឆ្នាំ ២០១៨ នៅភូមិត្រពាំងខ្វារ ស្រុកអង្គរជ័យដោយសារតែខឹងនឹងប្តីទៅមានស្រីថ្មី។
លោក កែវ យន់ អធិការរងស្រុកអង្គរជ័យឲ្យដឹងថាស្ត្រីសង្ស័យកំពុងសម្រាកព្យាបាលនៅមន្ទីរពេទ្យបង្អែកខេត្តកំពតហើយនៅពេលស្ត្រីសង្ស័យមានអាការធូរស្បើយ សមត្ថកិច្ចនឹងចាប់ខ្លួនតែម្តង។
លោកបញ្ជាក់ថា៖ «ខាងសមត្ថកិច្ចខ្ញុំនឹងនាំខ្លួនគាត់ទៅស្នងការនគរបាលខេត្តកំពតបន្តទៀតព្រោះគាត់សម្លាប់មនុស្ស»។
ស្ត្រីសង្ស័យឈ្មោះ ប៉ាក សុខហេង អាយុ ២៧ ឆ្នាំ ឯកូនប្រុសដែលគាត់បានដាក់ថ្នាំសម្លាប់ កូនបង ឈ្មោះ ហ៊ាល សុវណ្ណាមិ អាយុ ៦ ឆ្នាំ និងកូនប្រុសប្អូនឈ្មោះ ហ៊ាល ក្តាន់ អាយុ ៤ ឆ្នាំ ពួកគេរស់នៅស្រុកទ្រាំងខេត្តតាកែវ។
លោក យន់ ឲ្យដឹងទៀតថា ករណីនេះបើតាមសម្តីស្ត្រីសង្ស័យមុនឈានដល់ការដាក់ថ្នាំបំពុលសម្លាប់កូននោះគឺដោយសារនាងខឹងប្តីរបស់នាងមកធ្វើការនៅភ្នំពេញ ហើយមានប្រពន្ធចុង។ បន្ទាប់ពីដឹងថាប្តីមានប្រពន្ធចុងមកស្ត្រីសង្ស័យបានទូរស័ព្ទសួរប្តីថា តើរវាងប្រពន្ធ កូន និងស្រីក្រោយយកមួយណា? ពេលនោះប្តីឆ្លើយតាមទូរស័ព្ទថា គាត់យកស្រីក្រោយ។ បន្ទាប់ពីស្ត្រីសង្ស័យឈ្លោះគ្នាជាមួយប្តីមកនាងក៏ធ្វើដំណើរនាំកូនប្រុស ២ នាក់ពីស្រុកទ្រាំង ខេត្តតាកែវមកខេត្តកំពតហើយជួលបន្ទប់ផ្ទះសំណាក់យីហោសុខមនោរម្យស្នាក់នៅ។ លុះព្រឹកឡើងថ្ងៃទី ៣០ ខែមករាស្ត្រីសង្ស័យក៏ទិញថ្នាំពេទ្យចំនួន ៤ បន្ទះ និងថ្នាំពេទ្យមួយបំពង់ទៀត ។ បន្ទាប់មកស្ត្រីសង្ស័យក៏យកថ្នាំនោះ ២ បន្ទះលាយជាមួយចំណីឲ្យកូនហូបហើយខ្លួនគាត់ក៏លេបថ្នាំនោះអស់ ២ បន្ទះដែរ។
បន្ទាប់ពីស្ត្រីសង្ស័យ និងកូនពុលថ្នាំមកក៏មានការឆោឡោ និងរាយការណ៍ប្រាប់សមត្ថកិច្ច។ ពេលសមត្ថកិច្ចទៅដល់កន្លែងកើតហេតុក៏ដឹកស្ត្រីសង្ស័យ និងក្មេងរងគ្រោះទៅមន្ទីរពេទ្យខេត្តកំពត តែដល់ពាក់កណ្តាលផ្លូវក្មេងរងគ្រោះដាច់ខ្យល់ស្លាប់ឯស្ត្រីសង្ស័យត្រូវក្រុមគ្រូពេទ្យជួយសង្គ្រោះរួចផុតពីសេចក្តីស្លាប់។
លោក មេធាវី ឡោ គីមហ្គេច បានពន្យល់ថាករណីនេះមិនចាំបាច់មានបណ្តឹងពីសាច់ញាតិទេគឺនគរបាលត្រូវធ្វើរបាយការណ៍ទៅព្រះរាជអាជ្ញា ហើយព្រះរាជអាជ្ញានឹងធ្វើបណ្តឹងបរិហារមួយទៅចៅក្រមស៊ើបដើម្បីចាត់ការលើរឿងនោះ។ រឿងនេះស្ត្រីសង្ស័យអាចនឹងជាប់ពន្ធនាគារអស់មួយជីវិត៕
