Search form

Login - Register | FOLLOW US ON

Logo of Phnom Penh Post newspaper Phnom Penh Post - សមត្ថកិច្ច​ចាប់​ខ្លួន​សកម្មជន​​ការពារ​បរិស្ថាន​ចំនួន ៣ ​នាក់

សកម្មភាព​តវ៉ា​ប្រឆាំង​សាឡង់​បូមខ្សាច់​​ថ្មីៗ​នេះ។
សកម្មភាព​តវ៉ា​ប្រឆាំង​សាឡង់​បូមខ្សាច់​​ថ្មីៗ​នេះ។ រូបថត សហការី

សមត្ថកិច្ច​ចាប់​ខ្លួន​សកម្មជន​​ការពារ​បរិស្ថាន​ចំនួន ៣ ​នាក់

ភ្នំពេញៈ យុវជន​ ៣ ​នាក់​ដែល​ជា​សកម្មជន​ការពារ​បរិស្ថាន​នៃ​អង្គការ​មាតា​ធម្មជាតិ​ត្រូវ​បាន​អាជ្ញាធរ​ខេត្ត​កោះកុង​ចាប់​បញ្ជូន​ទៅ​កាន់​សាលា​ដំបូង​ខេត្ត​កាលពី​ព្រឹក​​ម្សិលមិញ​ពាក់ព័ន្ធ​នឹង​ការ​តវ៉ា​ប្រឆាំង​​​សាឡង់​បូម​ខ្សាច់​​ ៥៨ ​​គ្រឿង​របស់​ក្រុមហ៊ុន​វៀតណាម​បន្ទាប់ពី​ពួកគេ​មិន​​បាន​ចូល​ខ្លួន​ទៅ​បំភ្លឺ​តាម​ការ​កោះ​ហៅ​របស់​អាជ្ញាធរ​។

ការ​ចាប់​ខ្លួន​នេះ​បាន​ធ្វើ​ឡើង​បន្ទាប់ពី​អាជ្ញាធរ​​​ស្រុក​បទុមសាគរ​បាន​ចេញ​លិខិត​កោះ​ហៅ​​យុវជន​ ៣ ​រូប រួម​មាន​លោក សាន់ ម៉ាឡា លោក ទ្រី សុវិគា និង​លោក យឺន ឌីនិត ឲ្យ​ចូល​ទៅ​បំភ្លឺ​ភ្លាមៗ​ជាច្រើន​ដង​កាលពី​ថ្ងៃ​ទី​ ១៤ ​​​សីហា។ លិខិត​កោះ​ហៅ​របស់​អាជ្ញាធរ​​នោះ​ពុំ​បាន​​ប្រាប់​ពី​កម្មវត្ថុ​លម្អិត​​ទេ​ហើយ​​​យុវជន​ទាំង​នោះ​មិន​បាន​ចូល​ទៅ​បំភ្លឺ​​តាម​ការ​កំណត់​ទេ។

សកម្មជន​បរិស្ថាន និង​ជា​អតីត​សហស្ថាបនិក​ចលនា​មាតា​ធម្មជាតិ លោក ម៉េង ហេង បាន​ឲ្យ​ដឹង​ថា​កាលពី​ម៉ោង​​ជាង​​ ៩ ព្រឹក​ថ្ងៃ​ម្សិលមិញ​យុវជន​ ៣ ​នាក់​មាន​ឈ្មោះ សាន់ ម៉ាឡា ទ្រី សុវីគា និង ស៊ឹម សំណាង ត្រូវ​បាន​សមត្ថកិច្ច​ជាង ២០ ​នាក់​ចាប់​ខ្លួន​​​នៅ​ទីតាំង​ដែល​​ពួកគេ​​​​ស្នាក់​​​អាស្រ័យ​ដើម្បី​ឃ្លាំ​មើល​​​ការ​បូមខ្សាច់​ក្នុង​​​ភូមិ​ធ្នង់ ឃុំ​កណ្តោល ស្រុក​បទុមសាគរ​។

លោក​ថា៖«​យើង​បាន​ស្នើ​ឲ្យ​គេ​ [ប៉ូលិស] ​​អាន​ដីកា​នោះ​ដែរ​តែ​គេ​​អាន​​​​​មិន​​ច្បាស់​ហើយ​ក៏​ចាប់​ខ្លួន​យុវជន​យើង​តែ​ម្តង​។ គេ​​បាន​ដក​ហូត​ទូរស័ព្ទ​ដៃ​របស់​​ខ្ញុំ​ និង​សហគមន៍​​​​នៅ​​ទីនោះ​ដែល​​​​​ថត​សកម្មភាព​​ចាប់​​ខ្លួន​​ហ្នឹង​​​ទៀត​​ផង​»។

យុវជន​ដែល​​ត្រូវ​បាន​ចាប់​ខ្លួន​លោក សាន់ ម៉ាឡា ធា្លប់​​បាន​ចាត់ទុក​ការ​កោះ​ហៅ​របស់​អាជ្ញាធរ​ថា​ជា​ការ​គំរាម​កំហែង​ខណៈ​ដែល​ពួកគេ​តវ៉ា​ប្រឆាំង​នឹង​ការ​បូម​ខ្សាច់​របស់​​ក្រុមហ៊ុន​រៀតណាម​ដែល​ពួកគេ​អះអាង​ថា​កំពុង​ប្រតិបត្តិការ​ខុស​ពី​ប្រក្រតី។ យុវជន​រូប​នេះ​និយាយ​​ថា៖ «យើង​មិន​បាន​ធ្វើ​ខុស​ហើយ​សកម្មភាព​​ដែល​​​យើង​កំពុង​ធ្វើ​គឺ​កំពុង​ការពារ​ធនធាន​ធម្មជាតិ»។

ស្នងការ​នគរបាល​ខេត្ត​កោះកុង​លោក សំឃិត វៀន បាន​ថ្លែង​ថា​ការ​ចាប់​ខ្លួន​យុវជន​ទាំង​ ៣ នាក់​នេះ​ធ្វើ​ឡើង​​ទៅ​តាម​ដីកា​របស់​សាលា​ដំបូង​ខេត្ត​ពាក់ព័ន្ធ​នឹង​​បណ្តឹង​ចំនួន​ ២ គឺ​ទី​ ១ បង្ក​ការ​​រំខាន​​ធ្វើឲ្យ​មាន​ការ​ខាត​បង់​ចំពោះ​ការ​​ធ្វើ​អាជីវកម្ម​បូមខ្សាច់​របស់​ក្រុមហ៊ុន​បូមខ្សាច់ និង​បណ្តឹង​មួយ​ទៀត​​​របស់​អាជ្ញាធរ​ស្រុក​ពាក់ព័ន្ធ​នឹង​ការ​រំខាន​ពេល​​អាជ្ញាធរ​ធ្វើ​វេទិកា​ពិគ្រោះ​​យោបល់។

លោក​ថា៖ «ឥឡូវ​យើង​​បញ្ជូន​ពួកគាត់​ទៅ​សាលា​​ដំបូង​​ខេត្ត​ហើយ ហើយ​តួនាទី​បន្ត​គឺ​ចៅក្រម​ស៊ើបសួរ​គាត់​នឹង​ធ្វើ​កិច្ចការ​បន្ត​ទៀត​​»។

កន្លងមក​យុវជន​ចលនា​​មាតា​ធម្មជាតិ និង​ប្រជាសហគមន៍​មួយ​ចំនួន​​បាន​​នាំ​គ្នា​តវ៉ា​ជាច្រើន​សា​ទាមទារ​ឲ្យ​អាជ្ញាធរ​បណ្តេញ​សាឡង់​បូម​ខ្សាច់​ ៥៨ គ្រឿង​របស់​​ក្រុមហ៊ុន​ International Rainbow និង​ក្រុមហ៊ុន Direct Aceess ដែល​​បាន​បូមខ្សាច់​យ៉ាង​គគ្រឹកគគ្រេង​ធ្វើឲ្យ​ប៉ះពាល់​ដល់​បរិស្ថាន ជីវចម្រុះ និង​លំនៅ​ឋាន​របស់​ប្រជាពលរដ្ឋ។ តែ​​អភិបាល​​ស្រុក​បទុមសាគរ​លោក អន ភារៈ ធ្លាប់​ប្រាប់​ថា​ក្រុមហ៊ុន​​ទាំង​​ពីរ​នេះ​មាន​អាជ្ញាប័ណ្ណ​អនុញ្ញាត​​ឲ្យ​បូមខ្សាច់​ត្រឹមត្រូវ​ពី​រាជរដ្ឋាភិបាល។ ព្រះរាជ​អាជ្ញា​សាលា​ដំបូង​ខេត្ត​កោះកុង លោក ប៊ូ ប៊ុនហាង និង​តំណាង​ក្រុមហ៊ុន​វៀតណាម​ទាំង​ពីរ​មិន​អាច​សុំ​អត្ថាធិប្បាយ​បាន​​ទេ។

មន្ត្រី​សម្រប​សម្រួល​សមាគម​ការពារ​សិទ្ធិ​មនុស្ស​អាដហុក​លោក ញៀប សំអឿន យល់​ថា​សកម្មភាព​របស់​យុវជន​ទាំងនោះ​គ្រាន់តែ​ធ្វើ​ឡើង​​ដើម្បី​ការពារ​ធនធាន​ធម្មជាតិ និង​​ទាមទារ​ឲ្យ​បញ្ឈប់​ការ​បូម​ខ្សាច់​យ៉ាង​អនាធិបតេយ្យ​ក្នុង​ដៃ​សមុទ្រ​ប៉ុណ្ណោះ​។

លោក​ថ្លែង​ថា៖ «យើង​គិត​ថា​វា​ដូចជា​អត់​មាន​សកម្មភាព​អី​ខុស​ទៅ​នឹង​ច្បាប់ ខុស​នឹង​នីតិវិធី​ទេ​មាន​តែ​ការ​ជួយ​​ថែរក្សា​ធនធាន​ធម្មជាតិ​ដែល​ជា​សម្បត្តិ​របស់​រដ្ឋ​អ៊ីចឹង​នេះ​ជា​ការ​រឹតត្បិត​សិទ្ធិ​សេរីភាព​របស់​ពួកគាត់»។

លោក អ៊ិន គង់ជិត មន្ត្រី​សម្របសម្រួល​អង្គការ​លីកាដូ​ខេត្ត​កោះកុង​បាន​ឲ្យ​ដឹង​កាលពី​ព្រលប់​ម្សិលមិញ​ថា​ក្រោយពី​ការ​សួរ​ចម្លើយ​​របស់​ព្រះរាជអាជ្ញា​ដែល​​បាន​បញ្ចប់​នៅ​ម៉ោង​ជាង​​ ៦ ​ល្ងាច​យុវជន​ទាំង​​ ៣ ​រូប​​នោះ​ត្រូវ​បាន​ចោទប្រកាន់​ពី​បទ​ «គំរាម​កំហែង​ថា​នឹង​ធ្វើឲ្យ​ខូចខាត​ដែល​​ភ្ជាប់​នូវ​បទបញ្ជា​អ្វី​មួយ» តាម​បណ្តឹង​របស់​ក្រុមហ៊ុន​វៀតណាម Direct Aceess ​និង​អភិបាល​ស្រុក​បទុមសាគរ​គឺ​លោក អន ភារៈ ហើយ​ត្រូវ​បញ្ជូន​ទៅ​ឃុំ​ខ្លួន​បណ្តោះ​អាសន្ន​នៅ​​ពន្ធនាគារ​ខេត្ត៕

0

Comments

Please, login or register to post a comment