Search form

Login - Register | FOLLOW US ON

Logo of Phnom Penh Post newspaper Phnom Penh Post - សមត្ថកិច្ច​រារាំង​មិន​ឲ្យ​យុវជន​ជិះ​កង់​ផ្សព្វ​ផ្សាយ​ពី​អារ៉ែង

ក្រុម​យុវជន (ស្លៀក​ពាក់​ខោ​អាវ​តំណាង​សត្វ) ដើម្បី​ផ្សព្វ​ផ្សាយ​ពី​តំបន់​អារ៉ែង ត្រូវ​បាន​សមត្ថកិច្ច​ធ្វើ​ការ​រារាំង​កាល​ពី​ម្សិល​មិញ។
ក្រុម​យុវជន (ស្លៀក​ពាក់​ខោ​អាវ​តំណាង​សត្វ) ដើម្បី​ផ្សព្វ​ផ្សាយ​ពី​តំបន់​អារ៉ែង ត្រូវ​បាន​សមត្ថកិច្ច​ធ្វើ​ការ​រារាំង​កាល​ពី​ម្សិល​មិញ។ ផា លីណា

សមត្ថកិច្ច​រារាំង​មិន​ឲ្យ​យុវជន​ជិះ​កង់​ផ្សព្វ​ផ្សាយ​ពី​អារ៉ែង

ភ្នំពេញៈ កម្លាំង​សមត្ថកិច្ច​ចម្រុះ រួម​នឹង​ក្រុម​សន្តិសុខ​សាលា ខណ្ឌ​មាន​ជ័យ ជាង ១០០ នាក់​កាល​ពី​រសៀល​ថ្ងៃ​អាទិត្យ​ម្សិល​មិញ បាន​រារាំង​ការ​ប្រមូល​ផ្តុំ​របស់​ក្រុម​យុវជន​ប្រមាណ ៥០ នាក់​ដែល​គ្រោង​ជិះ​កង់​ដើម្បី​សុខភាព និង​បរិស្ថាន និង​ផ្សព្វ​ផ្សាយ​ពី​តំបន់​ទេសភាព​អារ៉ែង។

នៅ​ម៉ោង​ជាង ១ រសៀល​ម្សិល​មិញ​កង​កម្លាំង​សមត្ថកិច្ច​ចម្រុះ​ដឹក​នាំ​ដោយ​អភិបាល​រង ខណ្ឌ​មាន​ជ័យ បាន​ចុះ​ទៅ​ឡោម​ព័ទ្ធ​ស្នាក់ការ អង្គការ​មាតា​ធម្មជាតិ ក្នុង សង្កាត់​បឹង​ទំពុន ខណ្ឌ​មាន​ជ័យ និង​បាន​ចាប់​ឃាត់​រថយន្ត​ដឹក​កង់​របស់​ក្រុម​យុវជន​ដែល​ជួល​សម្រាប់​ជិះ​ប្រមាណ ២០ កង់​ទៅ​ទីស្នាក់ការ​ខណ្ឌ​ផង​ដែរ។ បើ​តាម​ការ​អះអាង​របស់​ក្រុម​យុវជន​កង់​មួយ​មាន​តម្លៃ​ប្រមាណ ៤០ ដុល្លារ។

លោក ហៀក ចាន់លាង អភិបាល​រង ខណ្ឌ​មាន​ជ័យ បាន​លើក​ឡើង​ថា ការ​មិន​អនុញ្ញាត​ឲ្យ​ជិះ​កង់​នេះ គឺ​លោក​ធ្វើ​ទៅ​តាម​បទ​បញ្ជា​របស់​សាលា​រាជធានី​ភ្នំពេញ​តែ​ប៉ុណ្ណោះ។

លោក​ថា៖ «ប្រសិន​បើ​គាត់​ធ្វើ​ឡើង​ដើម្បី​ផល​ប្រយោជន៍​ការពារ​ធន​ធាន​ធម្មជាតិ​របស់​ព្រះ​រាជា​ណាចក្រ​កម្ពុជា យើង​ស្នើ​សុំ​ឲ្យ​គាត់​ស្នើ​សុំ​ច្បាប់​ពី​សាលា​រាជធានី​ភ្នំពេញ ខ្ញុំ​ជឿ​ថា សាលា​រាជធានី នឹង​អនុញ្ញាត​ជូន បើ​សិន​គាត់​មាន​ការ​សុំ​ច្បាប់​ត្រឹម​ត្រូវ និង​ប្រាប់​ពី​តម្រាយ​ផ្លូវ តែ​នេះ​គាត់​មិន​បាន​សុំ​ច្បាប់​ឡើយ»។

សម្រាប់​កង់​ដែល​អាជ្ញាធរ​បាន​ចាប់​នោះ លោក ហៀក ចាន់លាង បាន​ឲ្យ​ដឹង​ថា អាជ្ញាធរ​នឹង​ប្រគល់​ជូន​ពួក​គាត់​វិញ បន្ទាប់​ពី​ធ្វើ​កំណត់​ហេតុ​សុំ​ដក​យក​កង់​វិញ។

អ្នក​នាំ​ពាក្យ​សាលា​រាជធានី​ភ្នំពេញ លោក ឡុង ឌីម៉ង់ មាន​ប្រសាសន៍​ថា ក្រុម​យុវជន​ទាំង​នោះ គ្រាន់​តែ​ជូន​ដំណឹង​ទៅ​អាជ្ញាធរ​ប៉ុណ្ណោះ ដោយ​ពុំ​បាន​ស្នើ​សុំ​តាម​ផ្លូវ​ច្បាប់ និង​ផ្តល់​តម្រាយ​ផ្លូវ​នោះ​ឡើយ។

លោក​ថា៖ «ពាក្យ​ថា ជូន​ដំណឹង ទាល់​តែ​គាត់​ធ្វើ​បាតុកម្ម​ដោយ​សន្តិវិធី នៅ​ទីលាន​ប្រជាធិបតេយ្យ​អី​ជា​ដើម អា​ហ្នឹង​បាន​យើង​អនុញ្ញាត​ជូន​គាត់ ដោយ​ឡែក​ការ​រៀបចំ​កម្មវិធី​បែប​នេះ មិន​អាច​ធ្វើ​ទៅ​បាន​ទេ ព្រោះ​យើង​ត្រូវ​រៀបចំ​ច្រើន​ជូន​គាត់ ដូចជា​សន្តិសុខ សណ្តាប់​ធ្នាប់​អី​ជា​ដើម តែ​អ្វី​ដែល​សំខាន់​គាត់​អត់​អនុវត្ត​តាម​យើង​ទាល់​តែ​សោះ»។

លោក អេឡិច ចាន់ដ្រូ ជនជាតិ​អេស្ប៉ាញ និង​ជា​ប្រធាន​អង្គការ​មាតា​ធម្មជាតិ ដែល​ដឹក​នាំ​កម្មវិធី​នេះ បាន​សម្តែង​ការ​សោក​ស្តាយ​កាល​ដែល​អាជ្ញាធរ​រាជធានី​ភ្នំពេញ រារាំង​ពួក​គាត់​មិន​ឲ្យ​ជិះ​កង់​ផ្សព្វ​ផ្សាយ​ពី​តំបន់ អារ៉ែង ដែល​ជា​តំបន់​ព្រៃ​ឈើ​ចុង​ក្រោយ​របស់​កម្ពុជា ហើយ​កំពុង​រង​ការ​បំផ្លាញ​ធន​ធាន​ធម្មជាតិ​ពី​សំណាក់​ក្រុម​ហ៊ុន​ចិន ស៊ីណូហាយដ្រូ។

លោក​បាន​និយាយ​ថា៖ «តំបន់​អារ៉ែង​នេះ ជា​តំបន់​ដែល​ទទួល​ស្គាល់​ដោយ យូណេស្កូ អ៊ីចឹង​ជា​ទ្រព្យ​សម្បតិ្ត​របស់​ខ្មែរ​ផង និង​ជា​ទ្រព្យ​សម្បត្តិ​របស់​មនុស្ស​ជាតិ​ទាំង​មូល​ផង ដោយ​សារ​តែ​ក្រុម​ហ៊ុន ស៊ីណូហាយដ្រូ មាន​គម្រោង​សាង​សង់​ទំនប់​វារី​អគ្គិសនី ដែល​ប៉ះពាល់​ដល់​ធនធាន​ធម្មជាតិ និង​សត្វ​កម្រ ៣១ ប្រភេទ​និង​ជា​ព្រៃ​ឈើ​ចុង​ក្រោយ​របស់​កម្ពុជា អ៊ីចឹង​បាន​ជា​ខ្ញុំ​ទ្រាំ​មើល​បាន​ទេ មាន​តែ​ការ​តវ៉ា​ដល់​ឈ្នះ»។

ក្រុម​សន្តិសុខ​បាន​រារាំង​មិន​ឲ្យ​យុវជន​ជិះ​កង់​ចេញ​ផ្សព្វ​ផ្សាយ​ពី​តំបន់​អារ៉ែង។
ក្រុម​សន្តិសុខ​បាន​រារាំង​មិន​ឲ្យ​យុវជន​ជិះ​កង់​ចេញ​ផ្សព្វ​ផ្សាយ​ពី​តំបន់​អារ៉ែង។ ផា លីណា

លោក អេឡិច បាន​បន្ត​ថា លោក​បាន​ជូន​ដំណឹង​ទៅ​អាជ្ញាធរ​ហើយ ទៅ​តាម​ច្បាប់​ស្តីពី​ការ​ប្រមូល​ផ្តុំ។ តែ​ទោះ​ជា​យ៉ាង​ណា លោក​បាន​ប្តេជ្ញា​ថា នឹង​បន្ត​ធ្វើ​សកម្មភាព​ផ្សេងៗ​ទៀត ដែល​អាច​ជា​ការ​ដង្ហែ​ក្បួន​ពី​តំបន់​អារ៉ែង មក​កាន់​រាជធានី​ភ្នំពេញ ឬ​ការ​តវ៉ា​នៅ​មុខ​ស្ថានទូត​ចិន និង​ជម្រើស​ចុង​ក្រោយ​អាច​ឈាន​ដល់​ការ​ធ្វើ​បាតុកម្ម ដើម្បី​ទាម​ទារ​ឲ្យ​ក្រុម​ហ៊ុន​ចិន ស៊ីណូហាយដ្រូ បញ្ឈប់​ការ​សាង​សង់​ទំនប់​វារី​អគ្គិសនី​នៅ​តំបន់​នោះ និង​ជំរុញ​ឲ្យ​រដ្ឋាភិបាល​កម្ពុជា ធ្វើ​ការ​អភិរក្ស​តំបន់​អារ៉ែង​នេះ។

យុវជន​ម្នាក់​ដែល​ស្លៀក​សម្លៀក​បំពាក់​ជា​សត្វ​ខ្លា ឈ្មោះ អាដាំ បាន​លើក​ឡើង​ថា ការ​ជិះ​កង់​នេះ មិន​មែន​ធ្វើ​ឡើង​ដើម្បី​កេង​ចំណេញ​នយោបាយ​ឡើយ គឺ​ជិះ​កង់​ដើម្បី​បង្ហាញ​ឆន្ទៈ​របស់​យុវជន​ដែល​ស្រឡាញ់ និង​ការពារ​ព្រៃ​ឈើ​និង​សត្វ​ព្រៃ ដែល​កំពុង​រង​នូវ​ការ​កាប់​បំផ្លាញ និង​វិនាស​ហិន​ហោច​តែ​ប៉ុណ្ណោះ។

នៅ​ម៉ោង​ជាង ៤ រសៀល ក្រុម​យុវជន​បាន​រំសាយ​ការ​ជិះ​កង់​វិញ បន្ទាប់​ពី​ពួក​គេ​ប្រមូល​ផ្តុំ​នៅ​មុខ​ស្នាក់ការ​អង្គការ មាតា​ធម្មជាតិ ហើយ​នាំ​គ្នា​ចុច​កណ្តឹង​កង់​ប្រមាណ ២០ គ្រឿង​ដើម្បី​សុំ​ផ្លូវ ប៉ុន្តែ​អាជ្ញាធរ​ដែល​ស្រាក់​ដៃ​គ្នា​ជា​ច្រើន​ជួរ នៅ​តែ​ពុំ​មាន​ការ​អនុញ្ញាត​ឲ្យ​ពួក​គេ​ចេញ​ពី​ស្នាក់ការ​អង្គការ​ឡើយ។

ការ​រារាំង​នេះ មិន​មាន​ការ​ប៉ះ​ទង្គិច​ណា​មួយ​កើត​ឡើង​ឡើយ។

បើ​តាម​យុវជន​ខ្មែរ មហា​នគរ ឈ្មោះ ហេង សំណាង បាន​ឲ្យ​ដឹង​ថា ការ​រារាំង​នេះ បាន​ធ្វើ​ឡើង​តាំងពី​ថ្ងៃ​សៅរ៍​មក​ម៉្លេះ ដោយ​ក្រុម​អាជ្ញាធរ​សង្កាត់​ប្រមាណ ១០ នាក់​បាន​ឡោម​ព័ទ្ធ​ស្នាក់ការ​នេះ ព្រម​ទាំង​ព្រមាន​ចាប់​ខ្លួន បើ​យុវជន​រូប​នេះ នៅ​បន្ត​ដឹក​នាំ​យុវជន​ផ្សេង​ទៀត​ជិះ​កង់​ជុំវិញ​រាជធានី​ភ្នំពេញ។

លោក អំ សំអាត អ្នក​គ្រប់​គ្រង​បច្ចេកទេស​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ បាន​មាន​ប្រសាសន៍​ថា អាជ្ញាធរ​គួរ​តែ​បើក​ឱកាស​ដល់​ក្រុម​យុវជន​ទាំង​នោះ ដើម្បី​ឲ្យ​ពួក​គេ​បាន​សម្តែង​មតិ និង​បង្ហាញ​ពី​ផល​ប៉ះពាល់​ទៅ​លើ​ធន​ធាន​ធម្មជាតិ​និង​ជនជាតិ​ដើម​ភាគ​តិច​តំបន់​អារ៉ែង​នេះ ទៅ​ដល់​សាធារណជន​បាន​ដឹង។

លោក​បាន​ចាត់​ទុក​ទង្វើ​រារាំង​របស់​អាជ្ញាធរ​ថា ជា​ការ​ធ្វើ​ឲ្យ​ប៉ះពាល់​ដល់​ដំណើរ​ការ​លទ្ធិ​ប្រជាធិបតេយ្យ​នៅ​កម្ពុជា ជា​ពិសេស​សិទ្ធិ​ជា​មូលដ្ឋាន​គ្រឹះ​ក្នុង​ការ​ជួប​ជុំ​សម្តែង​មតិ។

បើ​តាម​លោក អំ សំអាត តាម​ច្បាប់​ស្តី​ពី​បាតុកម្ម​ដោយ​សន្តិវិធី គឺ​អ្នក​រៀបចំ​គ្រាន់​តែ​ជូន​ដំណឹង​ទៅ​អាជ្ញាធរ​ឲ្យ​បាន​មុន ៥ ថ្ងៃ​នៃ​ថ្ងៃ​ប្រារព្ធ​កម្មវិធី​អ្វី​មួយ ឬ​ការ​ធ្វើ​បាតុកម្ម ដោយ​មិន​តម្រូវ​ឲ្យ​សុំ​ច្បាប់​ណា​មួយ​ដូច​ការ​លើក​ឡើង​របស់​អាជ្ញាធរ​ឡើយ។

បើ​តាម​ក្រុម​យុវជន បាន​លើក​ឡើង​ដោយ​អះ​អាង​ថា តំបន់​អារ៉ែង ជា​តំបន់​ដែល​នៅ​សេស​សល់​ធនធាន​ធម្មជាតិ និង​សត្វ​កម្រ​ជាង ៣០ ប្រភេទ​ហើយ​ក៏​ជា​តំបន់​ព្រៃ​ឈើ​ចុង​ក្រោយ​របស់​កម្ពុជា​ផង​ដែរ។ ប្រសិន​បើ​គម្រោង​សាង​សង់​ទំនប់​វារី​អគ្គិសនី​ស្ទឹង​ជាយ​អារ៉ែង របស់​ក្រុម​ហ៊ុន ចិន ស៊ីណូហាយដ្រូ (SinoHydro) ត្រូវ​បាន​អនុម័ត​មែន​នោះ ព្រៃ​ឈើ ព្រៃ​អារក្ស ដី​ស្រែ​ចម្ការ និង​ផ្ទះ​សម្បែង​លើ​ទំហំ​ដី​ចំនួន ២ ម៉ឺន​ហិកតា នឹង​ត្រូវ​បំផ្លាញ៕

0

Comments

Please, login or register to post a comment

ព័ត៌មានពាក់ព័ន្ធ