.jpg)
ភូមិបណ្តែតទឹក និគមជនជាតិវៀតណាម នៅលើបឹងទន្លេសាប ក្នុងខេត្តកំពង់ឆ្នាំងកាលពីខែធ្នូ ឆ្នាំ២០១៧។ ហេង ជីវ័ន
ភ្នំពេញៈ អគ្គនាយកដ្ឋានអន្តោប្រវេសន៍ នៅតែបន្តធ្វើការដកហូតឯកសារមិនត្រឹមត្រូវពីជនជាតិវៀតណាម ដែលកំពុងរស់នៅក្នុងប្រទេសកម្ពុជា បើទោះបីជាដំណើរការនេះ នៅមិនទាន់បានបញ្ចប់បានមួយខេត្តក្តី។
អនុប្រធាននាយកដ្ឋានអន្តោប្រវវេសន៍ក្រសួងមហាផ្ទៃ លោក សុខ លីហួត បានពន្យល់ថា៖«ពួកគេនៅតែដំណើរការនៅឡើយ។ ផែនការរបស់យើង គឺចំណាយពេលប្រាំពីរខែទៅមួយឆ្នាំ»។
មន្ត្រីអន្តោប្រវេសន៍ បានចាប់ផ្តើមដកហូតឯកសារពីជនជាតិវៀតណាម ដែលរស់នៅក្នុងខេត្តកំពង់ឆ្នាំងកាលពីខែវិច្ឆិកា។
ដំណើរការបង្ក្រាបនេះ បានរីករាលដាលដល់រាជធានីភ្នំពេញ ហើយគ្រោងនឹងធ្វើឡើងនៅគ្រប់ខេត្តទាំងអស់នៅក្នុងប្រទេស។
លោក លីហួត បានថ្លែងថា គ្រប់ខេត្តទាំងអស់ គឺកំពុងអនុវត្តដំណើរនេះ នឹងកំពុងត្រៀមរៀបចំ ដើម្បីអនុវត្ត។
លោកបញ្ជាក់ថា៖«ខេត្តមួយចំនួន កំពុងដកហូត ហើយមួយចំនួនទៀត កំពុងណែនាំ។ នេះគ្រាន់តែជាផែនការប៉ុណ្ណោះ... យើងមិនមានតួលេខអំពីចំនួនអ្នកដែលត្រូវបានដកហូតនៅឡើយទេ»។
ជនជាតិវៀតណាមជាច្រើននាក់ ដែលត្រូវបានសម្ភាស នៅខេត្តកំពង់ឆ្នាំង និងរាជធានីភ្នំពេញ ពួកគេបានប្រាប់កាសែតភ្នំពេញប៉ុស្តិ៍ថា ពួកគេគ្មានឯកសារអ្វីផ្សេងទេ។
ពួកគេបានអះអាងថា ពួកគេបានរស់នៅក្នុងប្រទេសកម្ពុជាអស់រយៈពេលជាច្រើនជំនាន់មកហើយ ប៉ុន្តែបានរត់ភៀសខ្លួនជាបណ្ដោះអាសន្នប៉ុណ្ណោះនៅក្នុងរបបខ្មែរក្រហម ដែលក្នុងពេលនោះ ជនជាតិវៀតណាមគឺជាគោលដៅដែលត្រូវបោសសម្អាត។ ប៉ុន្តែទោះជាយ៉ាងណា ពួកគេខ្លះមិនចេះនិយាយភាសាខ្មែរច្បាស់ទេ។
លោកលីហួតបានឲ្យដឹងថា ដំណើរការនេះ គឺត្រូវចំណាយពេលយូរ ពីព្រោះជនជាតិវៀតណាមខ្លះ នៅមានការស្ទាក់ស្ទើរ ក្នុងការចូលខ្លួន ហើយបានព្រមានថា អ្នកដែលមិនសហការ អាចប្រឈមនឹងការនិរទេស។
លោកបន្ថែមថា៖«អ្នកខ្លះ មានការស្ទាក់ស្ទើរឬភ័យខ្លាច។ អ្នកខ្លះទៀត គាត់យល់ ដូច្នេះហើយពួកគាត់បានចូលមកយ៉ាងឆាប់រហ័ស។ ប្រសិនបើពួកគេ មិនសហការជាមួយយើងទេ នោះយើងនឹងធ្វើតាមនីតិវិធីរបស់យើង។ យើងនឹងនិរទេសពួកគេ។ យើងមិនអាចអនុញ្ញាតឱ្យពួកគេធ្វើអ្វីតាមដែលពួកគេចង់ នោះទេ»។
ប៉ុន្តែទោះជាយ៉ាងណា មន្ត្រីខេត្តស្វាយរៀង ពីមុនធ្លាប់បានត្អូញត្អែរថា នាយកដ្ឋានអន្តោប្រវេសន៍តែងតែពន្យារពេលដំណើរការនេះ។
លោក គង់ សំអឿន ស្នងការរងខេត្តស្វាយរៀង បានឱ្យដឹងកាលពីចុងខែមុនថា៖«យើងកំពុងរង់ចាំមន្ត្រីអន្តោប្រវេសន៍ ពីក្រសួងចុះមក។ ពួកគេតែងតែលុបចោលពេលចុះមក»៕ NS
