Search form

Login - Register | FOLLOW US ON

Logo of Phnom Penh Post newspaper Phnom Penh Post - សមត្ថកិច្ច​រារាំង​ក្បួន​ដង្ហែ​របស់​ក្រុម​អង្គការ​សង្គម​ស៊ីវិល

ព្រះ​សង្ឃ ចូលរួម​ក្នុង​ការ​ដង្ហែ​ក្បួន ដើម្បី​ជំទាស់​នឹង​ការ​អនុម័ត​ច្បាប់​សហជីព សមាគម និង​អង្គការ​ក្រៅ​រដ្ឋាភិបាល កាល​ពី​ម្សិលមិញ​​។
ព្រះ​សង្ឃ ចូលរួម​ក្នុង​ការ​ដង្ហែ​ក្បួន ដើម្បី​ជំទាស់​នឹង​ការ​អនុម័ត​ច្បាប់​សហជីព សមាគម និង​អង្គការ​ក្រៅ​រដ្ឋាភិបាល កាល​ពី​ម្សិលមិញ​​។ ម៉ៃ វីរៈ

សមត្ថកិច្ច​រារាំង​ក្បួន​ដង្ហែ​របស់​ក្រុម​អង្គការ​សង្គម​ស៊ីវិល

ភ្នំពេញៈ សមត្ថកិច្ច​ចម្រុះ​ជា​ច្រើន​រយ​នាក់ កាលពី​ថ្ងៃ​ម្សិលមិញ បាន​រារាំង​ក្បួន​ដង្ហែ​របស់​ក្រុម​អង្គការ​សង្គម​ស៊ីវិល និង​សកម្ម​ជន​ដីធ្លី​ដែល​ពួក​គេ​ចេញ​ដំណើរ​ពី​គោល​ដៅ​ចំនួន ៤ ក្នុង​រាជ​ធានី​ភ្នំពេញ​ ទៅ​កាន់​រដ្ឋ​សភា ដើម្បី​ជំទាស់​នឹង​ការ​អនុម័ត​ច្បាប់​សហជីព សមាគម និង​អង្គការ​ក្រៅ​រដ្ឋាភិបាល។

ក្រុម​អង្គការ​សង្គម​ស៊ីវិល​ជាតិ​-អន្តរ​ជាតិ​ សកម្ម​ជន​ដីធ្លី បរិស្ថាន​ និង​ព្រះ​សង្ឃ ដែល​មួយ​ក្រុមៗ​មាន​គ្នា​ជាង ​១០០ ​អង្គ/​នាក់​ បាន​ប្រមូល​ផ្តុំ​គ្នា​នៅ ​៤ ​កន្លែង​ផ្សេង​គ្នា​គឺ​នៅ​ចំណុច​មុខ​វត្ត​និរោធ ​សង្កាត់​ច្បារ​អំពៅ នៅ​សង្កាត់​ចាក់​អង្រែ​លើ ស្ពាន​អាកាស​៧​មករា និង​នៅ​ស្ថាន​ទូត​បារាំង ដើម្បី​ធ្វើ​ដំណើរ​ថ្មើរ​ជើង​ដោយ​សន្តិ​វិធី​ទៅ​កាន់​រដ្ឋ​សភា​។ ​ក្បួន​នីមួយៗ ត្រូវ​បាន​សមត្ថកិច្ច និង​សន្តិ​សុខ​ខណ្ឌ​ប្រដាប់​ដោយ​ខែល និង​ដំបង​ឆក់ ធ្វើ​ការ​រារាំង ដក​ហូត​បដា​និង​សម្ភារ​ផ្សេងៗ បណ្តាល​ឲ្យ​ប៉ះ​ទង្គិច​គ្នា​ដោយ​ពាក្យ​សម្តី និង​រុញ​ច្រាន​គ្នា​ទៅ​វិញ​ទៅ​មក ប៉ុន្តែ​ពុំ​មាន​ហិង្សា​ធ្ងន់​ធ្ងរ​ណា​មួយ​កើត​ឡើង​ទេ។

សកម្ម​ជន​បឹងកក់ កញ្ញា សុង ស្រីលាភ ដែល​ចូលរួម​ក្នុង​ក្បួន​តវ៉ា​នៅ​ស្ថាន​ទូត​បារាំង បាន​សម្តែង​ការ​សោក​ស្តាយ​ចំពោះ​ទង្វើ​របស់​អាជ្ញាធរ​ដែល​បាន​បំបិទ​សិទ្ធិ​សេរី​ភាព​របស់​ពួក​គេ​ ក្នុង​ការ​ជួប​ប្រជុំ​សម្តែង​មតិ​ដោយ​សន្តិវិធី​។

កញ្ញា​ថ្លែង​ថា៖ «​​ច្បាប់​គ្រប់​គ្រង​អង្គការ​មិន​ទាន់​ចេញ​ផង គ្រាន់​តែ​ប្រជា​ពលរដ្ឋ​បញ្ចេញ​មតិ​ សម្តែង​ការ​មិន​ពេញ​​ចិត្ត​​ចំពោះ​​ច្បាប់​នេះ គេ​​បិទ​គ្រប់​ផ្លូវ​​ហើយ ចុះ​ទម្រាំ​ច្បាប់​នេះ​ចេញ​ទៀត តើ​យើង​នឹង​ត្រូវ​គេ​រឹត​ត្បិត​សេរី​ភាព​ប៉ុណ្ណា​ទៅ?»។​

ចំណែក អនុ​ប្រធាន​ផ្នែក​សិទ្ធិ​មនុស្ស​របស់​សមាគម​ការ​ពារ​សិទ្ធិ​មនុស្ស​អាដហុក លោក ណៃ វង់ដា បាន​ស្នើ​ឲ្យ​​អាជ្ញាធរ​ពិចារណា​​ចំពោះ​ទង្វើ​របស់​ខ្លួន​ឡើង​វិញ ព្រោះ​ការ​រារាំង​នេះ មិន​មែន​ជា​ទង្វើ​ល្អ​សម្រាប់​ប្រទេស​ដែល​អះអាង​ថា​ខ្លួន​ប្រកាន់​ប្រជាធិបតេយ្យ​ឡើយ។

លោក​ថា៖«​ក្បួន​ដង្ហែ​នេះ​អត់​មាន​ប៉ះ​ពាល់​ដល់​សន្តិ​​សុខ​ជាតិ​ទេ ​ក្បួន​ដង្ហែ​មាន​តែ​ស្ត្រី និង​កុមារជា​ដើម ហើយ​យើង​ធ្វើ​ដោយ​សន្តិ​វិធី ហើយ​បើ​កម្លាំង​ការ​ពារ​ព្រំ​ដែន មាន​ច្រើន​បែប​នេះ បំពាក់​អាវុធ​គ្រប់​ដៃ​បែប​នេះ ប្រហែល​ជា​ប្រទេស​ជិត​ខាង​មិន​អាច​ជ្រៀត​ចូល​ព្រំ​ដែន​កម្ពុជា​បាន​ទេ»។

សមត្ថកិច្ច​បាន​ធ្វើ​ការ​រារាំង​ក្រុម​សង្គម​ស៊ីវិល​មិន​ឲ្យ​ធ្វើ​ការ​ហែ​ក្បួន​កាល​ពីម្សិល​មិញ​​។
សមត្ថកិច្ច​បាន​ធ្វើ​ការ​រារាំង​ក្រុម​សង្គម​ស៊ីវិល​មិន​ឲ្យ​ធ្វើ​ការ​ហែ​ក្បួន​កាល​ពីម្សិល​មិញ​​។ ម៉ៃ វីរៈ

អភិបាលរង​សាលា​រាជ​ធានី​ភ្នំពេញ លោក ឃួង ស្រេង បាន​មាន​ប្រសាសន៍​ថា ការ​ហាម​ឃាត់​មិន​ឲ្យ​ដង្ហែ​ក្បួន​នេះ គឺ​ដោយ​សារ​ក្រុម​អង្គការ​សង្គម​ស៊ីវិល​ទាំង​នោះ មិន​បាន​សុំ​ច្បាប់​អនុញ្ញាត​ពី​សាលា​រាជ​ធានី​ជា​មុន មុន​នឹង​សម្តែង​មតិ​។

លោក​បាន​បញ្ជាក់​ថា៖«​ការ​ហែ​ក្បួន​នៅ​រាជធានី​ភ្នំពេញ វា​ធ្វើ​ឲ្យ​ប៉ះ​ពាល់​ដល់​សណ្តាប់​ធ្នាប់​សាធារណៈ ហើយ​ច្បាប់​តម្រូវ​ឲ្យ​ធ្វើ​ការ​សុំ​ច្បាប់​ មុន​នឹង​ធ្វើ​ការ​សម្តែង​មតិ មិន​មែន​ចេះ​តែ​ធ្វើ​តាម​ចិត្ត​នឹក​ឃើញ​ទេ ប្រទេស​កម្ពុជា​មាន​ច្បាប់​ទម្លាប់ យើង​មិន​មែន​ឃាត់​ដោយ​សារ​ហេតុ​ផល​នយោបាយ​ទេ»។

បើទោះ​ជាមាន​ការ​រារាំងពី​អាជ្ញាធរ​ក៏​ដោយ​ ក៏​ក្រុម​អង្គការ​សង្គម​ស៊ីវិល និង​​សកម្មជន​ទាំង​នោះ បាន​នាំ​គ្នា​ទៅ​ដល់​​រដ្ឋ​សភា នៅ​ម៉ោង​ជិត​១១​ព្រឹក​ តាម​​ការ​គ្រោង​ទុក ដោយ​​ពួក​គេ​បាន​នាំ​គ្នា​រាំ​​ច្រៀង និង​និយាយ​ថា “ទេ!​ ចំពោះ​ច្បាប់​សហជីព សមាគម និង​អង្គការ​មិន​មែន​រដ្ឋាភិបាល” ព្រម​ទាំង​មាន​ការ​បង្ហោះ​ប៉េង​ប៉ោង​ផង​ដែរ​។

ប្រធាន​គណៈកម្មការ​ទី​៥​នៃ​រដ្ឋសភា លោក ឈាង វុន ដែល​ទទួល​បន្ទុក​ពិនិត្យ​សេចក្តី​ព្រាង​ច្បាប់​នេះ ​បាន​មាន​ប្រសាសន៍​ថា គណៈកម្មការ​ទាំង ​៣ បាន​ពិនិត្យ​ច្បាប់​នោះ​រៀងៗ​ខ្លួន​ហើយ ហើយ​នៅ​ថ្ងៃ​ពុធ​នេះ គណៈ​កម្មការ​ទាំង​ ៣​ នឹង​ពិនិត្យ​រួម​គ្នា​ទៅ​​លើ​សេចក្តី​ព្រាង​ច្បាប់​នេះ ​បន្ទាប់​មក​នឹង​កំណត់​ថ្ងៃ​ជួប​​តំណាង​មន្ត្រី​រាជ​រដ្ឋាភិបាល​ មុន​នឹង​បើក​សិក្ខា​សាលា​ឲ្យ​អ្នក​ពាក់​ព័ន្ធ​ចូលរួម​ផ្តល់​យោបល់ ដែល​គ្រោង​ធ្វើ​នៅ​ថ្ងៃ​ទី​០៨​ខែ​កក្កដា​ខាង​មុខ។

លោក​ថា៖ «​យើង​នឹង​ជួប​គណៈ​កម្មការ​ទាំង ​៣​ ពិភាក្សា​គ្នា​ផ្តាច់​ព្រ័ត្រ​នៅ​ព្រឹក​ស្អែក​[ថ្ងៃ​ពុធ] ព្រោះ​ច្បាប់​នៅ​មិន​វែង​ទេ ហើ​យ​យើង​ដាក់​ស្នើ​សុំ​ទៅ​ប្រធាន​រដ្ឋ​សភា​ ធ្វើ​​សិក្ខា​សាលា​ដើម្បី​​ពិគ្រោះ​យោបល់​ជាមួយ​តួ​អង្គ​ទាំង​អស់​នៅ​ក្នុង​រដ្ឋ នៅ​ថ្ងៃ​ទី៨​កក្កដា ប៉ុន្មាន​ថ្ងៃ​ខាង​មុខ​ទៀត​នេះ​»។

ចំណែក លោក អ៊ុំ សំអាន សមាជិក​គណៈកម្មការ​ទី៦​ដែល​ពិនិត្យ​លើ​ច្បាប់​នេះ​ដែរ បាន​ថ្លែង​ថា គណៈ​កម្មការ​បាន​ពិនិត្យ​ច្បាប់​នេះ ដោយ​ពុំ​មាន​ការ​កែ​ប្រែ​ខ្លឹម​សារ​​ណា​មួយ​ទេ​ ក្រៅ​​តែ​ពី​ការ​កែ​សម្រួល​អក្ខរា​វិរុទ្ធ​ប៉ុណ្ណោះ បើ​ទោះ​ជាមាន​ការ​តវ៉ា​ពី​សមាជិក​មក​ពី​គណបក្ស​សង្គ្រោះ​ជាតិ​ក៏​ដោយ​។

លោក​ថា៖ «ជា​គោលការណ៍ គណបក្ស​សង្គ្រោះ​ជាតិ​មិន​គាំទ្រ​ច្បាប់​នេះ​ទេ ព្រោះ​ជា​ការ​បិទ​សិទ្ធិ​សេរីភាព​ដល់​អង្គការ​សង្គម​​​ស៊ីវិល ហើយ​បើ​ឲ្យ​​យើង​​​លើក​​ដៃគាំទ្រ​អនុម័ត​ច្បាប់​ហ្នឹង​​នេះ គឺ​យើង​មិន​​លើក​ទេ»។

កាល​ពី​ថ្ងៃ​ចន្ទ ប្រធាន​គណបក្ស​សង្គ្រោះ​ជាតិ លោក សម រង្ស៊ី បាន​ស្រង់​ប្រសាសន៍​របស់​លោក​នាយក​រដ្ឋ​មន្ត្រី​ ហ៊ុន សែន ក្រោយ​ជំនួប​នៅ​រដ្ឋ​សភា​ថា កុំ​ឲ្យ​អង្គការ​សង្គម​ស៊ីវិល​ មាន​ការ​បារម្ភ​ខ្លាំង​ពេក អំពី​សេចក្តី​ព្រាង​ច្បាប់​ដែល​មាន​៩​ជំពូក និង​៣៩​មាត្រា​នេះ ព្រោះ​សមាគម និង​អង្គការ​ក្រៅ​រដ្ឋាភិបាល ដែល​មាន​រួច​ហើយ​ នឹង​ត្រូវ​ទទួល​ស្គាល់​ដោយ​ស្វ័យ​ប្រវត្តិ​ ហើយ​នឹង​មិន​តម្រូវ​ឲ្យ​ពួក​គេ​ចុះ​បញ្ជី​ថ្មីទេ៕

0

Comments

Please, login or register to post a comment

ព័ត៌មានពាក់ព័ន្ធ