.jpg)
សមាជិកព្រឹទ្ធសភាសហរដ្ឋអាមេរិកលោក Patrick Leahy។ រូបថត ហ្វេសប៊ុក
ភ្នំពេញៈ កាលពីថ្ងៃទី ៥ ខែកុម្ភៈ ឆ្នាំ ២០១៨ ការិយាល័យសមាជិកព្រឹទ្ធសភាសហរដ្ឋអាមេរិកលោក Patrick Leahy បានបញ្ជាក់ថាច្បាប់ទ្វេភាគីកំពុងត្រូវបានធ្វើសេចក្តីព្រាងដើម្បីដាក់ទណ្ឌកម្មថ្មីប្រឆាំងនឹងរដ្ឋាភិបាលកម្ពុជា។
លោក Tim Rieser មន្ត្រីការិយាល័យជំនួយគោលនយោបាយការបរទេសរបស់លោក Leahy បានថ្លែងតាមរយៈអ៊ីមែលថា៖ «សមាជិកព្រឹទ្ធសភាលោក Leahy និងសមាជិកព្រឹទ្ធសភាដទៃទៀតនៅទីនេះ កំពុងមានការព្រួយបារម្ភកាន់តែខ្លាំងឡើងៗ ចំពោះទង្វើរបស់លោក [នាយករដ្ឋមន្ត្រី] ហ៊ុន សែន និងគណបក្សប្រជាជនកម្ពុជាដែលគាំទ្រដោយរដ្ឋាភិបាលចិនក្នុងការរុះរើស្ថាប័នប្រជាធិបតេយ្យនៅកម្ពុជាដែលសហរដ្ឋអាមេរិក និងបណ្តាប្រទេសដទៃទៀតបានចំណាយពេលអស់ជាច្រើនឆ្នាំដើម្បីជួយកសាងឡើង»។
លោក Rieser បញ្ជាក់ថាអាមេរិកបានទុក «ជម្រើសមួយចំនួនឲ្យជាជាងការបង្កើនទណ្ឌកម្ម»។
គណបក្សប្រឆាំងដ៏ធំដែលមានប្រជាពលរដ្ឋបោះឆ្នោតគាំទ្រស្ទើរពាក់កណ្តាលប្រទេសគឺគណបក្សសង្គ្រោះជាតិត្រូវបានរំលាយដ៏ចម្រូងចម្រាសដោយតុលាការកំពូលកាលពីខែវិច្ឆិកាឆ្នាំមុន។
ជាការឆ្លើយតបសហរដ្ឋអាមេរិកបានកាត់ជំនួយដែលត្រូវផ្តល់ដល់គណៈកម្មាធិការជាតិរៀបចំការបោះឆ្នោតរួមនឹងការដាក់ទណ្ឌកម្មទិដ្ឋាការប្រឆាំងនឹងមន្ត្រីជាន់ខ្ពស់រដ្ឋាភិបាលកម្ពុជា ហើយបានសន្យាថានឹងមានការដាក់ទណ្ឌកម្មបន្ថែមទៀត។
លោក Rieser បានបន្ថែមថា៖ «ការតាក់តែងច្បាប់នេះអាចនឹងបង្កើនការដាក់ទណ្ឌកម្មផ្សេងៗទៀត ហើយលោកបានបញ្ជាក់យ៉ាងច្បាស់ថានឹងមានការខិតខំជាអន្តរជាតិដើម្បីឆ្លើយតបទៅនឹងការបង្ក្រាបលើសិទ្ធិសេរីភាពរបស់ពលរដ្ឋកម្ពុជា»។
ប៉ុន្តែទោះជាយ៉ាងណាក៏ដោយលោក Rieser មិនបានបញ្ជាក់ឲ្យបានច្បាស់ថាតើនឹងមានការដាក់ទណ្ឌកម្មអ្វីបន្ថែមនោះទេហើយក៏មិនបានបញ្ជាក់ថានរណាកំពុងធ្វើសេចក្តីព្រាង និងគាំទ្រដល់ការធ្វើច្បាប់នេះដែរ៕ NS
