Search form

Login - Register | FOLLOW US ON

Logo of Phnom Penh Post newspaper Phnom Penh Post - សមាជិក​សភា​អាស៊ាន ​រិះគន់​ថា ​កម្ពុជា​បន្ត​យាយី​ធ្ងន់ធ្ងរ​លើ​បក្ស​ប្រឆាំង

Content image - Phnom Penh Post
តំណាងរាស្ត្រគណបក្សប្រឆាំង លោក គង់ សុភា ត្រូវ​បាន​នាំ​ទៅ​មន្ទីរពេទ្យ ក្រោយ​ពី​ត្រូវ​កង​អង្គរក្ស​លោក​នាយក​រដ្ឋ​មន្ត្រី ហ៊ុន សែន វាយ​នៅ​ក្រៅ​របង​រដ្ឋសភា កាល​ពី​ឆ្នាំ ២០១៥។ ហេង ជីវ័ន

សមាជិក​សភា​អាស៊ាន ​រិះគន់​ថា ​កម្ពុជា​បន្ត​យាយី​ធ្ងន់ធ្ងរ​លើ​បក្ស​ប្រឆាំង

ភ្នំពេញៈ របាយការណ៍​រិះគន់​មួយ​ចេញ​កាលពី​ម្សិលមិញ ​ដែល​ធ្វើ​ឡើង​ដោយ​សមាជិក​សភា​អាស៊ាន​បាន​ហៅ​ការ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​ដ៏ចម្រូង​ចម្រាស​នាពេល​ថ្មីៗ​នេះ​របស់​កម្ពុជា​ថា​ជា​ការ​យាយី​ផ្លូវ​ច្បាប់​ទៅ​លើ​អ្នក​តំណាងរាស្រ្ត​គណបក្ស​ប្រឆាំង និង​ការ​បង្កើត «បរិយាកាស​ភ័យ​ខ្លាច» ជា​សញ្ញា​នៃ​ការ​រំលាយ​របប​ប្រជាធិបតេយ្យ​ជា​ប្រព័ន្ធ​របស់​រដ្ឋាភិបាល​ក្នុង​ប្រទេស​កម្ពុជា​ហើយ​បាន​ដាក់​ការ​សង្ស័យ​ថា តើ​ការ​បោះឆ្នោត​នាពេល​ខាង​មុខ​នឹង​មាន​លក្ខណៈ​ស្រប​ច្បាប់​ឬ​អត់?

របាយការណ៍​ដែល​មាន​ចំណង​ជើង​ថា «កណ្តឹង​មរណៈ​សម្រាប់​ប្រជាធិបតេយ្យ» បាន​រៀបរាប់​លម្អិត​អំពី​ការ​ប្រើប្រាស់​ប្រព័ន្ធ​តុលាការ និង​រដ្ឋសភា​ពី​សំណាក់​រដ្ឋាភិបាល បន្ទាប់​ពី​ការ​បោះឆ្នោត​ឆ្នាំ ២០១៣ ប្រឆាំង​ទៅ​លើ​គណបក្ស​សង្គ្រោះ​ជាតិ​ដើម្បី​បង្កើត «ស្រមោល​ងងឹត​ពាសពេញ​សង្គម​កម្ពុជា»។

លោក Charles Santiago ប្រធាន​សមាជិក​សភា​អាស៊ាន​សម្រាប់​សិទ្ធិ​មនុស្ស​បាន​ថ្លែង​ថា​ការ​បន្ត​តម្រង់​ទិសដៅ​ទៅ​រក​គណបក្ស​ប្រឆាំង និង​ការ​មិន​មាន​ឆន្ទៈ​បោះបង់​អំណាច​របស់​លោក ហ៊ុន សែន បាន​បង្កើត​ឲ្យ​មាន​នូវ​បរិយាកាស​មួយ​ដែល​នៅ​ឆ្ងាយ​ពី​ការ​បោះឆ្នោត​ដោយ​សេរី និង​យុត្តិធម៌​នា​ខែ​មិថុនា​ខាង​មុខ។ លោក​ថ្លែង​តាម​អ៊ីមែល​ថា៖ «ធាតុ​នៃ​ភាព​ភ័យខ្លាច​គឺ​អំពី​ក្តីបារម្ភ​ក្រៃលែង​ ប្រសិន​បើ​ប្រជាពលរដ្ឋ​បោះឆ្នោត​ ឬ​មិន​បោះឆ្នោត​ផ្អែក​លើ​ភាព​ភ័យខ្លាច​នោះ​មិនមែន​ជា​ការ​ប្រកួត​ប្រជែង​ពិត​ប្រាកដ​ទេ»។

របាយការណ៍​នេះ​បាន​ពិនិត្យ​ទៅ​លើ​បញ្ហា​ច្បាប់​ដែល​ចោទ​ជា​សំណួរ​ដែល​ត្រូវ​បាន​ប្រើ​ប្រឆាំង​ទៅ​លើ​សមាជិក​គណបក្ស​សង្គ្រោះ​ជាតិ​រួម​ទាំង​អតីត​មេដឹកនាំ​គណបក្ស​សង្គ្រោះ​ជាតិ​លោក សម រង្ស៊ី ប្រធាន​គណបក្ស​លោក កឹម សុខា និង​តំណាងរាស្រ្ត​លោក អ៊ុំ សំអាន លោកស្រី ថាក់ ឡានី និង លោក ហុង សុខហួរ ហើយ​របាយការណ៍​នេះ​ក៏​បាន​ចោទ​សួរ​អំពី​ការ​ប្រើប្រាស់​ច្បាប់​ដែល​សរសេរ​មិន​ល្អ និង​នីតិវិធី​រដ្ឋសភា និង​ការ​បង្កើត​បទល្មើស​ដើម្បី​ដក​អភ័យ​ឯកសិទ្ធិ​អ្នក​តំណាងរាស្ត្រ​គណបក្ស​ប្រឆាំង។

របាយការណ៍​បន្ត​ថា​ការ​វាយប្រហារ​យ៉ាង​ព្រៃផ្សៃ​ទៅ​លើ​តំណាងរាស្រ្ត​គណបក្ស​សង្គ្រោះ​ជាតិ ដោយ​សមាជិក​អង្គរក្ស​របស់​លោក ហ៊ុន សែន បាន​ធ្វើ​ឲ្យ​មាន​ការ​ប៉ះពាល់​យ៉ាង​ខ្លាំង​ទៅ​លើ​តំណាងរាស្រ្ត​ដទៃៗ​ទៀត​របស់​គណបក្ស​ប្រឆាំង​ដែល​ឥឡូវ​នេះ​បារម្ភ​អំពី​ការ​វាយប្រហារ​ស្រដៀង​គ្នា។

លោក Santiago បាន​ថ្លែង​បន្ត​ថា ក្តីបារម្ភ​ទាំង​អស់​នេះ​ក៏​ត្រូវ​បាន​រួម​បញ្ចូល​ផង​ដែរ​ដោយ​ការ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​ដែល​ឥឡូវ​នេះ​អាច​ធ្វើ​ឲ្យ​មាន​ការ​រំលាយ​គណបក្ស​នយោបាយ​ណា​ដែល​មេដឹកនាំ​របស់​ខ្លួន​មាន​ទោស។

លោក​បន្ត​ថា៖ «ច្បាប់​ថ្មី​ និង​ការ​វាយប្រហារ​ដទៃៗ​ទៀត​បាន​ធ្វើ​ឲ្យ​ប៉ះពាល់​ទាំង​ស្រុង​ទៅ​លើ​សមត្ថភាព​របស់​ពួកគេ​ក្នុង​ការ​ធ្វើ​ការងារ​របស់​ខ្លួន​ក្នុង​ការ​បម្រើ​ប្រជាជន និង​ផ្តោត​លើ​អនាគត»។

ក្នុង​ចំណោម​អនុសាសន៍​ជាច្រើន​ក្នុង​របាយការណ៍​នេះ​ក៏​បាន​សុំ​ការ​បំភ្លឺ​អំពី​នីតិវិធី​ដក​អភ័យ​ឯកសិទ្ធិ​សភា ការ​ធានា​សុវត្ថិភាព​សមាជិក​សភា ការ​លុប​ចោល​ការ​ធ្វើ​វិសោនកម្ម​ច្បាប់​ស្តីពី​គណបក្ស​នយោបាយ និង​បញ្ហា​ដទៃៗ​ទៀត។

អនុប្រធាន​គណបក្ស​សង្គ្រោះ​ជាតិ​លោកស្រី មូរ សុខហួរ ដែល​ជា​សមាជិក APHR ផង​ដែរ​នោះ​បាន​ថ្លែង​ថា​នេះ​គឺជា​ការ​វាយតម្លៃ​ទៅ​លើ​ការ​វាយប្រហារ​របស់​រដ្ឋាភិបាល​មក​លើ​គណបក្ស​សង្គ្រោះ​ជាតិ​ដែល​អាច​ធ្វើឲ្យ​ប៉ះពាល់​ដល់​ការ​បោះឆ្នោត​ឃុំ សង្កាត់ នា​ខែ​មិថុនា​ខាង​មុខ។ «នេះ​ជា​យុទ្ធសាស្រ្ត​របស់​ពួកគេ។ គោលដៅ​របស់​ពួកគេ​គឺ​តែងតែ​ធ្វើ​ឲ្យ​គណបក្ស​ប្រឆាំង​ខ្សោយ​ និង​បំបិទ​សំឡេង​របស់​បក្ស​ប្រឆាំង»។

ដោយ​ទុក​ការ​គំរាម​កំហែង​ផ្នែក​តុលាការ និង​រាងកាយ​មួយ​ឡែក​លោកស្រី មូរ សុខហួរ ថ្លែង​ថា​ការ​ចេញ​ផ្សាយ​សារ​សន្ទនា​ឯកជន​ថ្មីៗ​របស់​មន្ត្រី​បក្ស​ប្រឆាំង​ និង​ការ​បង្កើន​ការ​ត្រួតពិនិត្យ​គឺ​គ្រាន់​តែ​ជា​ការ​បង្ហាញ​អំពី​អសមត្ថភាព​របស់​ពួកគេ​ក្នុង​ការ​បំពេញ​មុខងារ​តែ​ប៉ុណ្ណោះ។ «វា​ពិតជា​ពិបាក​ខ្លាំង​ណាស់ នៅ​ពេល​ដែល​យើង​ត្រូវ​បាន​គេ​លួច​យក​សំឡេង ​(Hack) ហើយ​យើង​មិន​អាច​ធ្វើការ​ប្រាស្រ័យ​ទាក់ទង​ជាមួយ​មិត្ត​រួម​ការងារ​របស់​យើង​ដោយ​ផ្ទាល់​បាន​ហើយ​មិន​ថា​យើង​ទៅ​កាន់​ទី​ដាច់​ស្រយាល គឺ​ពួកយើង​តែងតែ​ត្រូវ​បាន​គេ​តាម»។

ទោះ​ជា​យ៉ាង​ណា​អ្នក​នាំពាក្យ​គណបក្ស​ប្រជាជន​កម្ពុជា​លោក​ សុខ ឥសាន បាន​ច្រាន​ចោល​ការ​រិះគន់​នៃ​របាយការណ៍​នេះ​ដែល​ថា​រដ្ឋាភិបាល​បាន​ប្រើប្រាស់​ប្រព័ន្ធ​តុលាការ​ដោយ​លោក​បាន​ថ្លែង​ថា​ការ​អនុវត្ត​វិធានការ​ផ្លូវ​ច្បាប់ និង​ច្បាប់​គឺជា​កាតព្វកិច្ច​របស់​ខ្លួន​មិនមែន​ជា​ការ​គាប​សង្កត់​ដល់​គណបក្ស​ណា​មួយ​នោះ​ទេ។

លោក សុខ ឥសាន បាន​ចោទ​សួរ​ថា​ ហេតុ​អ្វី​បាន​ជា​អង្គការ​សមាជិក​សភា​អាស៊ាន (APHR) លើក​ឡើង​ពី​ការ​វាយដំ​សមាជិក​សភា​ពីរ​រូប​កាលពី​ឆ្នាំ ២០១៥ ដែល​លោក​ហៅ​ថា​ជា «ឧបទ្ទវហេតុ​ដែល​បាន​កើតឡើង​កាលពី​ប៉ុន្មាន​ឆ្នាំ​មុន» និង​បាន​លើក​យក​ករណី​លើកលែង​ទៅ​នឹង​ការ​រិះគន់​នៃ​ការ​ផ្លាស់ប្តូរ​ច្បាប់​នាពេល​ថ្មីៗ​នេះ។ «ការ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​គឺ​មិនមែន​ធ្វើ​ឡើង​ដើម្បី​បំពេញ​ចិត្ត​អ្នក​រិះគន់​នោះ​ទេ»។

លោក Phil Robertson អគ្គនាយករង អង្គការ​ឃ្លាំ​មើល​សិទ្ធិ​មនុស្ស Human Rights Watch ថ្លែង​ចំពោះ​ការ​ចេញ​ផ្សាយ​របាយការណ៍​នេះ​ថា​ការ​ជិត​បរាជ័យ​ក្នុង​ការ​បោះឆ្នោត​កាលពី​ឆ្នាំ ២០១៣ និង​ព្រឹត្តិការណ៍​ពិបាកៗ​មួយ​ចំនួន​ដែល​បាន​កើតឡើង​គឺ​វា​បាន​បង្ហាញ​ថា​លោក ហ៊ុន សែន ឥឡូវ​នេះ​មាន​ការ​ស្ទាក់ស្ទើរ​ក្នុង​ការ​ពឹងផ្អែក​តែ​ទៅ​លើ​សារ​អភិវឌ្ឈ​ដោយ​ជំនួស​មក​វិញ លោក​ព្យាយាម​ដក​ថយ​ដើម្បី​សាកល្បង​វិធីសាស្ត្រ​ទាំង​នោះ៕ PS /NS

រាយការណ៍​បន្ថែមៈ ឡាយ សាមាន

0

Comments

Please, login or register to post a comment

ព័ត៌មានពាក់ព័ន្ធ