Search form

Login - Register | FOLLOW US ON

Logo of Phnom Penh Post newspaper Phnom Penh Post - សមាជិក​សភា​អឺរ៉ុប​ជំរុញ​ឲ្យ​មាន​ចំណាត់ការ​ខ្លាំង​ពី​បញ្ហា​កម្ពុជា

Content image - Phnom Penh Post
លោក ​Georgia Edgar ឯកអគ្គរដ្ឋទូត​​សហភាព​អឺរ៉ុប​​ប្រចាំ​កម្ពុជា​ ក្នុង​កំឡុង​ពេល​សន្និសិទសារព័ត៌មាន​កាល​ឆ្នាំ​មុន។ ហេង ជីវ័ន

សមាជិក​សភា​អឺរ៉ុប​ជំរុញ​ឲ្យ​មាន​ចំណាត់ការ​ខ្លាំង​ពី​បញ្ហា​កម្ពុជា

ភ្នំពេញៈ សមាជិក​សភា​​អឺរ៉ុប​ម្នាក់​​​បាន​ដាក់​សំណួរ​​បន្ទាន់​​ទៅ​លោកស្រី Frederica Mogherini ​​ដែល​ជា​តំណាង​ជាន់​ខ្ពស់​​ទទួល​បន្ទុក​​កិច្ចការ​បរទេស​របស់​អឺរ៉ុប​​ដោយ​ជំរុញ​ឲ្យ​មាន​ចំណាត់​ការ​​ខ្លាំងក្លា​​​​​លើ​កម្ពុជា​​ដើម្បី​ឆ្លើយតប​នឹង​ការ​គំរាម​កំហែង​​រំលាយ​គណបក្ស​ប្រឆាំង​​ពី​សំណាក់​លោក​​នាយក​រដ្ឋមន្រ្តី ហ៊ុន សែន។

ច្បាប់​ដែល​ស្នើ​ឡើង​កាលពី​ថ្ងៃ​ចន្ទ​ដោយ​​គណបក្ស​ប្រជាជន​ដែល​កំពុង​​​កាន់​អំណាច​​នឹង​ផ្តល់​​សិទ្ធិ​ដល់​អាជ្ញាធរ​ក្នុង​ការ​រំលាយ​​គណបក្ស​នយោបាយ​​​ណា​ដែល​​បំពាន​ច្បាប់​ ឬ​គំរាម​កំហែង​ដល់​ «​សន្តិសុខ​​រដ្ឋ​» ឬ​ «​ឯកភាព​ជាតិ​» ​ហើយ​នឹង​រារាំង​​ទណ្ឌិត​មិន​ឲ្យ​​កាន់​តំណែង​​មេដឹកនាំ​។

លោក សម រង្ស៊ី ដែល​ជា​មេដឹកនាំ​គណបក្ស​ប្រឆាំង​យូរ​មក​ហើយ​ដែល​ត្រូវ​បាន​ផ្តន្ទាទោស​​ពី​បទ​បរិហារកេរ្តិ៍​ជាច្រើន​​​ប្តឹង​ដោយ​មេដឹកនាំ​បក្ស​កាន់​អំណាច​បាន​លាលែង​ពី​តំណែង​ប្រធាន​គណបក្ស​​កាលពី​ថ្ងៃ​សៅរ៍​​ដើម្បី​​ការពារ​​គណបក្ស​សង្គ្រោះ​ជាតិ​​មិន​ឲ្យ​មាន​ការ​រំលាយ​។

ប៉ុន្តែ​លោក Ramon Tremosa i Balcells ​ដែល​ជា​សមាជិក​សភា​អឺរ៉ុប​​​នៅ​សម្ព័ន្ធ​អ្នក​សេរី​ និង​អ្នក​ប្រជាធិបតេយ្យ​​​ដើម្បី​អឺរ៉ុប (ALDE) បាន​លើក​ទឡ្ហីករណ៍​ថា​ការ​ធ្វើ​ឲ្យ​មេដឹកនាំ​គណបក្ស​មាន​ទោស​​​​នឹង​ធ្វើ​ឲ្យ​ប្រជាធិបតេយ្យ​​​ដែល​កំពុង​​ផុយ​ស្រួយ​នៅ​កម្ពុជា​​ដើរ​ធ្លាក់​ផ្លូវ​ហើយ​លោក​ថា​សហភាព​អឺរ៉ុប​​គួរ​ដើរ​តួ​​ខ្លាំង​ជាង​មុន​ដើម្បី​​រារាំង​មិន​ឲ្យ​មាន​​បញ្ហា​នេះ។

លោក​បាន​បន្ត​ថា៖ «​យើង​បាន​និង​កំពុង​​ព្យាយាម​​ដោះស្រាយ​​​បញ្ហា​នេះ​តាមរយៈ​កិច្ចសន្ទនា​នយោបាយ​ ប៉ុន្តែ​យើង​គិត​ថា​វា​មិន​គ្រប់គ្រាន់​​ទេ​។ ​លោកស្រី Mogherini ត្រូវ​​តែ​ធ្វើការ​ខ្លាំង​ជា​មុន​ដើម្បី​​ផ្លាស់ប្តូរ​បញ្ហា​នេះ​​»។

«​...​យើង​មិន​យល់​​​ហេតុអ្វី​ពួកគេ​ហ៊ាន​គំរាម​​រំលាយ​បក្ស​មួយ​​ដែល​មាន​​សំឡេង​ឆ្នោត​ច្រើន​​នៅ​ឆ្នាំ​ ២០១៣​ បើ​ទោះបី​​មាន​​​​ភាព​មិន​ប្រក្រតី​ និង​ការ​រំលោភ​ក្ដី។ ​សហភាព​អឺរ៉ុប​​ត្រូវ​ដើរ​តួនាទី​បើ​ខ្លួន​ចង់​រក្សា​ភាព​ជឿជាក់​»។

ក្នុង​ឯកសារ​មួយ​ដែល​ភ្នំពេញ​ប៉ុស្តិ៍​ទទួល​បាន​លោក Tremosa ​​បាន​សួរ​ថា​តើ​​​គណៈកម្មការ​អឺរ៉ុប​នឹង​ធ្វើ​អ្វី​ដើម្បី​ធានា​ថា​ការ​បោះឆ្នោត​នៅ​​កម្ពុជា​​អាច​ជឿ​ទុក​ចិត្ត​បាន​​...?

បើ​តាម​​លោក Tremosa សហភាព​អឺរ៉ុប​​គួរ​តែ​ប្រើ​ឥទ្ធិពល​សេដ្ឋកិច្ច​​ដើម្បី​​ធានា​ឲ្យ​មាន​​ពហុបក្ស​​ និង​ការ​គោរព​សិទ្ធិ​មនុស្ស​​។ ​ការ​នាំ​ចូល​ពី​អឺរ៉ុប​​ក្នុង​ឆ្នាំ ២០១៥ ​​មាន​ជិត​​ ៤,៥ ​ពាន់​លាន​​ដុល្លារ​។

នេះ​បើ​តាម​គេហទំព័រ​អឺរ៉ុប​។

ឯកអគ្គរដ្ឋទូត​​សហភាព​អឺរ៉ុប​​ប្រចាំ​កម្ពុជា​លោក ​Georgia Edgar បាន​យល់​ស្រប​ថា​វា​ជា​អត្ថប្រយោជន៍​រយៈពេល​វែង​​របស់​កម្ពុជា​​ក្នុង​ការ​ធានា​​ថា​ការ​បោះឆ្នោត​ផ្តល់​ឲ្យ​ជន​កម្ពុជា​នូវ​ជម្រើស​​ ប៉ុន្តែ​​ថា​សំណួរ​​​លោក Tremosa នឹង​ត្រូវ​​​ឆ្លើយ​​​ដោយ​ឧត្តម​ស្នងការ​។

លោកស្រី មូរ សុខហួរ តំណាងរាស្រ្ត​បក្ស​ប្រឆាំង​បាន​ថ្លែង​ពេល​ជួប​លោក​ Edgar ​កាលពី​ថ្ងៃ​ចន្ទ​ថា​៖ «​ឧបសគ្គ​​​ចំពោះ​ការ​ចូលរួម​ដោយ​យុត្តិធម៌​ និង​​សមភាព​​ពី​បក្ស​នានា​គួរ​ត្រូវ​បាន​លុប​ចោល​ដើម្បី​ឲ្យ​ការ​​បោះឆ្នោត​​សេរី​ និង​យុត្តិធម៌​»។

លោកស្រី សុខហួរ បន្ថែម​ថា​ការ​អប់រំ​អ្នក​បោះឆ្នោត​​​គួរ​​​ចាប់ផ្តើម​ធ្វើ​ឡើង​ដោយ​ គ.ជ.ប​ និង​អង្គការ​ពាក់ព័ន្ធ​​ហើយ​អ្នក​សង្កេតការណ៍​គួរ​​បណ្តុះបណ្តាល​នៅ​ពាក់​កណ្តាល​ខែ​​មីនា​ដោយ​លោកស្រី​ថា​​បទប្បញ្ញត្តិ​ថ្មី​ស្តីពី​យុទ្ធនាការ​ និង​អ្នក​បោះឆ្នោត​នឹង​មាន​ «​លក្ខណៈ​ស្មុគស្មាញ​»។

លោក សម គន្ធាមី នាយក​អង្គការ​ឃ្លាំ​មើល​ការ​បោះឆ្នោត​ Nicfec ​យល់​ស្រប​ថា គ.ជ.ប. ​គួរ​​ផ្តោត​​លើ​ការ​អប់រំ​អ្នក​បោះឆ្នោត​ ប៉ុន្តែ​បាន​ថ្លែង​ថា​លោក​ «​មិន​បារម្ភ​ខ្លាំង​​»​ទេ​អំពី​សុក្រឹតភាព​នៃ​បញ្ជី​ឈ្មោះ​នោះ​។

ទោះ​យ៉ាង​ណា​​​លោក គន្ធាមី ថា​អឺរ៉ុប​​​អាច​មាន​ឥទ្ធិពល​សំខាន់​​​នៅ​ក្នុង​​​ដំណើរការ​បោះឆ្នោត​។

លោក​ថា​៖ «​ពួកគេ​អាច​ដាក់​សម្ពាធ​​ គ.ជ.ប. ព្រោះ​ពួកគេ​ជា​​ម្ចាស់​ជំនួយ​ធំ​មួយ​​»៕ PS

0

Comments

Please, login or register to post a comment