.jpg)
សម្ដេចក្រុមព្រះក្នុងពេលយាងទៅរដ្ឋសភាថ្មីៗនេះ។ ផា លីណា
ភ្នំពេញៈ សម្ដេចក្រុមព្រះនរោត្តម រណឫទ្ធិ ព្រះប្រធានគណបក្សហ៊្វុនស៊ិនប៉ិចកាលពីម្សិលមិញបានទទួលស្គាល់ថាទ្រង់ពិតជាបានស្នើសុំចិនឲ្យជួយគណបក្សទ្រង់មែន ហើយក៏បានឆ្លើយតបនឹងព្រះអង្គម្ចាស់ស៊ីសុវត្ថិចក្រីនុពលដែលព្រមានប្ដឹងរំលាយគណបក្សរបស់ទ្រង់ថាជា «សិទ្ធិរបស់គេ» ខណៈព្រះអង្គថា ការសុំជំនួយពីចិនក៏ជា «សិទ្ធិ» របស់ព្រះអង្គដូចគ្នា ហើយឲ្យ ឬមិនឲ្យស្រេចតែចិន។
ក្នុងជំនួបទ្វេភាគីរវាងសម្ដេចក្រុមព្រះ នរោត្តម រណឫទ្ធិ និងលោក វ៉ាង វៃគួង ប្រធានវិទ្យាស្ថានវិទ្យាសាស្ត្រសង្គមនៃសាធារណរដ្ឋប្រជាមានិតចិនកាលពីថ្ងៃទី ២៥ ខែធ្នូឆ្នាំមុនទ្រង់បានស្នើជំនួយពីចិនដើម្បីគាំទ្រគណបក្សដែលព្រះអង្គថាក្រីក្រជាអ្វីដែលមជ្ឈដ្ឋានមួយចំនួនថាផ្ទុយនឹងច្បាប់ស្ដីពីគណបក្សនយោបាយ។
ព្រះអង្គម្ចាស់ស៊ីសុវត្ថិ ចក្រីនុពល កាលពីសប្ដាហ៍មុនប្រកាសថាប្រសិនបើចិនពិតជាជួយឧបត្ថម្ភតាមសំណើរបស់សម្តេចក្រុមព្រះពិតមែននោះទ្រង់នឹងត្រូវប្តឹងទៅតុលាការកំពូលដើម្បីរំលាយគណបក្សនេះ។
សម្ដេចក្រុមព្រះនរោត្តម រណឫទ្ធិ ថ្លែងប្រាប់ក្រុមអ្នកកាសែតបន្ទាប់ពីពិធីសូត្រមន្ត និងរាប់បាត្រក្នុងព្រះបរមរាជវាំងកាលពីព្រឹកម្សិលមិញថា ពិតជាបានស្នើសុំចិនមែន ព្រោះបក្សធ្លាក់ខ្លួនក្រជាងគេ។ ក៏ប៉ុន្តែព្រះអង្គថា ស្រេចតែចិនគេឲ្យ គេមិនឲ្យស្រេចតែគេ។
ឆ្លើយតបនឹងការព្រមានប្ដឹងរំលាយបក្សទ្រង់នោះព្រះអង្គតបថាជា «សិទ្ធិរបស់គេ»។
ព្រះអង្គសង្កត់ធ្ងន់ថា៖ «អានេះជាសិទ្ធិរបស់ខ្មែរម្នាក់ៗ ប៉ុន្តែខ្ញុំជម្រាបហើយ អម្បាញ់មិញនេះថាជាសិទ្ធិរបស់ខ្ញុំដែលជាប្រធាននៃគណបក្សហ៊្វុនស៊ិនប៉ិចដែលក្រជាងគេនេះ សុំចិនហើយបើចិនគេយល់ថា ខ្ញុំធ្វើនេះគឺវាផ្ទុយនឹងនិយាយហើយនិយាយទៀត ច្បាប់របស់គេមាន។ ទេចិនគេឆ្លើយមកវិញថាគេមិនឲ្យទៅ វាចប់គ្នាត្រឹមហ្នឹងហើយ»។
កាលពីថ្ងៃ ២៨ ធ្នូ កន្លងទៅព្រះអង្គម្ចាស់ស៊ីសុវត្ថិចក្រីនុពលដែលជាសែរាជវង្សមួយអង្គផងដែរបានព្រមានប្ដឹងគណបក្សហ៊្វុនស៊ិនប៉ិចដោយយោងលើច្បាប់ស្ដីពីវិសោធនកម្មច្បាប់ស្ដីពីគណបក្សនយោបាយត្រង់មាត្រា ២៩ ដែលហាមមិនឲ្យទទួលវិភាគទាន ទោះតាមរូបភាពណាក៏ដោយពីស្ថាប័នបរទេសក្រុមហ៊ុន បរទេស ជនបរទេស ឬអង្គការដែលមានប្រភពហិរញ្ញប្បទានពីបរទេស។
ទន្ទឹមនឹងនេះទ្រង់ក៏ព្រមានឲ្យមហាជនធ្វើបាតុកម្មនៅមុខស្ថានទូតចិនប្រចាំភ្នំពេញផងដែរ។ ព្រះអង្គសរសេរបន្ថែមថា៖ «ចាំមើលសិន (ប្រសិនបើ!!!) ប្រទេសចិនពិតជាជួយឧបត្ថម្ភតាមសំណើរបស់សម្តេចក្រុមព្រះពិតមែននោះ ខ្ញុំនឹងដឹកនាំមហាជនធ្វើបាតុកម្ម មុខស្ថានទូតចិនប្រចាំនៅព្រះរាជាណាចក្រកម្ពុជា។ ត្រូវប្តឹងទៅតុលាការកំពូលដើម្បីរំលាយគណបក្សនេះដូចគណបក្សនេះធ្លាប់ប្តឹងរំលាយគណបក្សសង្គ្រោះជាតិដែរ តើទៅរួចទេ បើហ៊្វុនស៊ិនប៉ិចជាដៃគូរបស់...!!!»។
គណបក្សហ៊្វុនស៊ិនប៉ិចកាលពីថ្ងៃទី ២៧ ធ្នូបានចេញសេចក្ដីថ្លែងការណ៍មួយថាគណបក្សកុម្មុយនីស្តចិនធ្លាប់បានផ្តល់ជំនួយជាម៉ាស៊ីន ជីកអណ្ដូងម៉ាស៊ីនបូមទឹក គ្រឿងម៉ាស៊ីនកសិកម្ម និងឧបករណ៍ផ្សេងៗទៀតតាមរយៈគណបក្សហ៊្វុនស៊ិនប៉ិចក្នុងរាជរដ្ឋាភិបាលចម្រុះតែបានបដិសេធចំពោះការទទួលជំនួយហិរញ្ញវត្ថុពីចិន។
លោក សុខ ឥសាន អ្នកនាំពាក្យគណបក្សប្រជាជនធ្លាប់អះអាងថា ការអំពាវនាវរបស់សម្ដេចក្រុមព្រះនរោត្តម រណឫទ្ធិ ក្នុងការសុំជំនួយពីប្រទេសចិនគ្រាន់តែជា «សកម្មភាពល្អ» ដើម្បីពង្រឹងទំនាក់ទំនង សាមគ្គីភាព មិត្តភាព មិនមែនដូចអតីតមេបក្សប្រឆាំងដែលជាផែនការបរទេសដើម្បីផ្តួលរំលំរាជរដ្ឋាភិបាលស្របច្បាប់ទេ។
រីឯលោក ខៀវ សុភ័គ អ្នកនាំពាក្យក្រសួងមហាផ្ទៃក៏ធ្លាប់អះអាងដែរថានឹងគ្មានការស៊ើបអង្កេតលើគណបក្សហ៊្វុនស៊ិនប៉ិចដែរ បើទោះជាមានការទទូចពីមជ្ឈដ្ឋានមួយចំនួនដោយលើកឡើងថាគ្មាន «ភ័ស្តុតាង»៕
