Search form

Login - Register | FOLLOW US ON

Logo of Phnom Penh Post newspaper Phnom Penh Post - សហគមន៍​និង​ចលនា​មាតា​ធម្មជាតិ បញ្ឈប់​វៀតណាម​បូម​ខ្សាច់​នៅ​កោះកុង

Content image - Phnom Penh Post
កប៉ាល់​ចូក​ខ្សាច់​ ​និង​សាឡង់​ដឹក​ជញ្ជូន​ខ្សាច់នៅ​ព្រែក​ អណ្តូង​ទឹក​ ស្ថិត​ក្នុង​ស្រុក​បទុម​សាគរ ខេត្ត​កោះកុង។ រូបថត ចលនា​មាតា​ធម្មជាតិ​

សហគមន៍​និង​ចលនា​មាតា​ធម្មជាតិ បញ្ឈប់​វៀតណាម​បូម​ខ្សាច់​នៅ​កោះកុង

កោះកុងៈ សកម្ម​ជន​មក​ពី​ចលនា​មាតា​ធម្មជាតិ និង​សហគមន៍​ប្រមាណ​ជាង​ ១០០ ​នាក់​កាល​ពី​ម្សិល​មិញ​បាន​ធ្វើ​យុទ្ធនា​ការ​បណ្តេញ​សាឡង់​បូម​ខ្សាច់​របស់​វៀតណាម​ចំនួន​ពីរ​ក្រុមហ៊ុន​ដែល​បាន​ធ្វើ​សកម្ម​ភាព​បូម​ខ្សាច់​ក្នុង​ទឹក​ដីខ្មែរ​នៅ​ព្រែក​ អណ្តូង​ទឹក​ ស្ថិត​ក្នុង​ស្រុក​បទុម​សាគរ ខេត្ត​កោះកុង។

លោក​ សាន់ ម៉ាឡា​ សកម្មជន​យុវជន​មក​ពី​អង្គការ​ចលនា​មាតា​ធម្មជាតិ​បាន​ឲ្យ​ដឹង​ថា ក្រុមហ៊ុន​វៀតណាម​ចំនួន​ពីរ​ឈ្មោះ​ International Rainbow និង​ Direct Access បាន​ធ្វើ​សកម្ម​ភាព​បូម​ខ្សាច់​លើ​ព្រែក​អ​ណ្តូង​ទឹក​យ៉ាង​គគ្រឹក​គគ្រេង​ដោយ​ប្រើ​ប្រាស់​កប៉ាល់​ចូក​ខ្សាច់​ចំនួន​ ១៧ ​គ្រឿង​និង​សាឡង់​ដឹក​ជញ្ជូន​ខ្សាច់​ចំនួន​ ៤១ ​គ្រឿង​ ដោយ​មិន​គិត​ពី​ផល​ប៉ះ​ពាល់​បរិស្ថាន​បន្ដិច​ណា​ឡើយ។

លោក​ថ្លែង​ថា​ សកម្ម​ជន​និង​សហគមន៍​បាន​ប្រើ​ប្រាស់​ទូក​ចំនួន​ ១២ ​គ្រឿង​ជិះ​បើក​បណ្តេញ​អ្នក​បើកបរ​សាឡង់​របស់​ក្រុមហ៊ុន​ឲ្យ​បញ្ឈប់​ពី​សកម្ម​ភាព បើ​ទោះ​បី​ជា​ក្រុមហ៊ុន​ថា មាន​អាជ្ញា​ប័ណ្ណ​ពី​រដ្ឋាភិបាល​ក៏​ដោយ​ តែ​ក្រុម​ហ៊ុន​ធ្វើ​សកម្ម​ភាព​បូម​ដោយ​មិន​គិត​ពី​ផល​ប៉ះ​ពាល់​បរិស្ថាន​នោះ​ទេ។

លោក​ថា៖ «យើង​ធ្លាប់​ប្តឹង​ទៅ​អាជ្ញា​ធរ​ជា​ច្រើន​លើក​ច្រើន​សា​មក​ហើយ​ តែ​ហាក់​បី​ដូច​ជា​គ្មាន​អ្នក​អើពើ ទើប​យើង​នាំ​គ្នា​ចេញសកម្ម​ភាព​បណ្តេញ​ពួក​គេ​ដោយ​ខ្លួន​ឯង​ ព្រោះ​ ក្រុមហ៊ុន​នោះបូម​ខុស​បច្ចេកទេស​ដល់​ទៅ​ ១៦ ​ម៉ែត្រ»។

សាឡង់​បូមខ្សាច់នេះ ត្រូវ​បាន​សកម្មជនបញ្ឈប់​ការ​បូម​ខ្សាច់ ម្សិលមិញ​​។ រូបថត សហ​ការី
សាឡង់​បូមខ្សាច់នេះ ត្រូវ​បាន​សកម្មជនបញ្ឈប់​ការ​បូម​ខ្សាច់​ ម្សិលមិញ​​។ រូបថត សហ​ការី

លោក វ៉ៃ វណ្ណនីម ជា​អ្នក​ភូមិ​មួយ​រូប​រស់​នៅ​ឃុំ​អណ្តូង​ទឹក​ ស្រុក​បទុម​សាគរ​ បាន​និយាយ​ថា​ អ្នក​ភូមិ​ដែល​រស់​នៅ​ពឹង​លើ​ការ​នេសាទ​មាន​ការ​ព្រួយ​បារម្ភ​យ៉ាង​ខ្លាំង ព្រោះ​ឃើញ​ក្រុមហ៊ុន​ហាក់​​ដូច​ជា​ធ្វើ​សកម្មភាព​យ៉ាង​គគ្រឹក​គគ្រេង​នាំគ្នា​បូម​ខ្សាច់​នាំ​ឲ្យ​បាក់​ច្រាំង ហើយ​ទឹក​ឡើង​កខ្វក់​នៅ​ទីនោះ។

លោក​ថា៖ «យើង​រស់​នៅទីនេះ​មិន​ចង់​ឃើញ​ការ​បូម​ខ្សាច់​នាំ​ឲ្យ​ខូច​បរិស្ថាន​នោះ​ទេ​គេ​គិត​តែ​ពី​ចំណេញ​ការ​រក​ស៊ី​ តែ​មិន​គិត​ដល់​បរិស្ថាន​អ្វីសោះ»។​

ការ​បណ្តេ​ញ​ចេញ​របស់​ក្រុម​យុវជន​ កាល​ពី​ម្សិល​មិញ ​មិន​ទាន់​មាន​អំពើ​ហិង្សា​ណា​មួយ​នោះ​ទេ​ តែ​មាន​សមត្ថកិច្ច​ជា​ច្រើន​នាក់​បាន​ចុះ​ទៅ​ដល់់​កន្លែង​កើត​ហេតុ​ដើម្បី​រក្សា​សណ្តាប់​ធ្នាប់​និង​ចៀស​វាង​ការ​ខូច​ខាត​ទ្រព្យ​សម្បត្តិ​របស់​ក្រុមហ៊ុន​ណា​មួយ។​

លោក​ ពេជ​ ស៊ី​យ៉ុន​ ប្រធាន​មន្ទីរ​រ៉ែ​និង​ថាម​ពល​ខេត្ត​កោះ​កុង​មិន​អាច​សុំ​ការ​បំភ្លឺ​បាន​ទេ​ដោយ​លោក​ឲ្យ​ទាក់​ទង​ទៅ​អ្នក​នាំ​ពាក្យ​ក្រសួង​រ៉ែ​ និង​ថាមពល។

លោក​ឌិត ​ទី​ណា​ អ្នក​នាំ​ពាក្យ​ក្រសួង​រ៉ែ​ និង​ថាម​ពល​មិន​អាច​សុំ​ការ​អត្ថា​ធិ​ប្បាយ​បាន​នៅ​ឡើយ​ទេ​កាល​ពី​ម្សិល​មិញ៕

0

Comments

Please, login or register to post a comment