មណ្ឌលគីរី៖ ក្រុមជនជាតិវៀតណាម ចំនួន ៨ នាក់ដែលបានធ្វើសកម្មភាពឈូសឆាយ និង កាប់បំផ្លាញព្រៃឈើក្នុងតំបន់អូរផ្លាយ ភាគខាងកើត ដែនជម្រកសត្វព្រៃស្រែពក ស្ថិតក្នុងភូមិសាស្ត្រឃុំ ក្រងតេះ ស្រុកពេជ្រាដា ខេត្តមណ្ឌលគិរី កាលពីថ្ងៃពុធសប្ដាហ៍មុន ត្រូវបានតុលាការសម្រេចឃុំខ្លួនក្នុងពន្ធនាគារបណ្ដោះអាសន្ន ក្រោមបទចោទប្រកាន់ «កាប់បំផ្លាញព្រៃឈើដោយខុសច្បាប់» ។
លោក ម៉ម វណ្ណដា អ្នកនាំពាក្យនៃស្ថាប័នអយ្យការអមសាលាដំបូងខេត្តមណ្ឌលគិរី បានប្រាប់ ភ្នំពេញ ប៉ុស្តិ៍ ថា៖ «ពួកគេត្រូវបាន លោក ស៊ុយ សុភា ចៅក្រមស៊ើបសួរ សម្រេចឲ្យឃុំខ្លួនជាបណ្ដោះអាសន្ត ដោយចោទប្រកាន់ពីបទ ឈូសឆាយនិងកាប់បំផ្លាញព្រៃឈើដោយគ្មានលិខិតអនុញ្ញាត»។
កាលពីថ្ងៃទី ១០ ខែមករា ឆ្នាំ ២០១៨ បន្ទាប់ពីទទួលបានសេចក្ដីរាយការណ៍ពីអ្នកភូមិ និង អាជ្ញាធរមូលដ្ឋាន ឃុំក្រងតេះ ស្រុកពេជ្រាដា ស្ដីពីការឈូសឆាយដីព្រៃ និង កាប់បំផ្លាញព្រៃឈើក្នុងតំបន់ អូរផ្លាយ ក្រុមកម្លាំងសមត្ថកិច្ចចម្រុះខេត្តមណ្ឌលគិរី បានចុះទៅពិនិត្យដល់ទីតាំងកើតហេតុ ហើយបានប្រទះឃើញជនសង្ស័យជនជាតិវៀតណាមទាំង ៨ នាក់ កំពុងប្រព្រឹត្តិបទល្មើសជាក់ស្ដែង ដោយប្រើគ្រឿងចក្រឈូសឆាយ និងកាប់បំផ្លាញព្រៃឈើក្នុងតំបន់ខាងលើ។
ភ្លាមៗនោះ ក្រុមសមត្ថកិច្ចបានធ្វើការចាប់ឃាត់ខ្លួនពួកគេនៅនឹងកន្លែង ដោយរឹបអូសវត្ថុតាងមួយចំនួន រួមមានរណាយន្តចំនួន ២ គ្រឿង ប៊ុលដូស្ស៊ឺ បីគ្រឿង ដែលមានបិទស្លាកសញ្ញាក្រុមហ៊ុនដួងស្រួចគ្រុប និង កំណាត់ឈើដែលទើបកាប់និងអារកាត់ជាកំណាត់ៗក្នុងពេលថ្មីៗចំនួន ៧ គំនរ ដែលមានចំនួនជាច្រើនរយកំណាត់។ នេះបើយោងតាមរបាយការណ៍ដែលផ្ដល់ដោយខណ្ឌរដ្ឋបាលព្រៃឈើខេត្តមណ្ឌលគិរី កាលពីថ្ងៃព្រហស្បត្តិ៍។
នៅថ្ងៃម្សិលមិញ លោកអ៊ុំ សុវណ្ណសុភៈ នាយខណ្ឌរដ្ឋបាលព្រៃឈើខេត្តមណ្ឌលគិរី បានប្រាប់ ភ្នំពេញ ប៉ុស្តិ៍ថា ក្នុងអំឡុងពេលសាកសួរដោយក្រុមមន្ត្រីជំនាញនៃរដ្ឋបាលព្រៃឈើ ក្រុមជនសង្ស័យជនជាតិវៀតណាមទាំង ៨ នាក់នោះ បានអះអាងថា ពួកគេជាកម្មករដែលត្រូវបានជួលដោយក្រុមហ៊ុនដួងស្រួចគ្រុប និងថា ក្រុមហ៊ុននេះមានដីសប្បទានសង្គមកិច្ចមួយកន្លែង ដែលស្ថិតនៅក្នុងឃុំក្រងតេះ និង ឃុំស្រែអំពូម ស្រុកពេជ្រាដា ដែលមានអាជ្ញាប័ណ្ណចេញដោយអាជ្ញាធរខេត្តមណ្ឌលគិរី ហើយថា ពួកគេឈូសឆាយដីព្រៃក្នុងតំបន់កើតហេតុខាងលើ ដើម្បីធ្វើផ្លូវចូលទៅកាន់ដីសម្បទានរបស់ពួកគេតែប៉ុណ្ណោះ។
លោកបានបញ្ជាក់ថា៖« យើងបានធ្វើការទំនាក់ទំនង ទៅខាងភាគីក្រុមហ៊ុនឲ្យនាំយកសំណៅឯកសារដើមមកធ្វើការពិនិត្យផ្ទៀងផ្ទាត់ ប៉ុន្តែរហូតមកទល់ពេលនេះ ភាគីក្រុមហ៊ុននៅពុំទាន់បានបញ្ជូនឯកសារណាមួយមកកាន់ស្ថាប័នជំនាញយើងនៅឡើយទេ ខណៈជនសង្ស័យទាំងអស់ត្រូវបានកសាងសំណុំរឿងចោទប្រកាន់ពីបទ ឈូសឆាយ និង កាប់បំផ្លាញព្រៃឈើដោយគ្មានការអនុញ្ញាត និង បានបញ្ជូនទៅកាន់តុលាការចាត់ការបន្តតាមនីតិវិធីច្បាប់»។
លោក ស្វាយ សំអ៊ាង អភិបាលខេត្តមណ្ឌលគិរី បានបញ្ជាក់ប្រាប់ភ្នំពេញ ប៉ុស្តិ៍តាមប្រព័ន្ធទូរស័ព្ទនៅថ្ងៃរសៀលម្សិលមិញនេះថា៖ «ខ្ញុំមិនធ្លាប់ផ្ដល់ដីសម្បទានសង្គមកិច្ចនៅកន្លែងណាមួយទៅឲ្យក្រុមហ៊ុនដួងស្រួចគ្រុបនោះទេ»។
លោក ស៊ុយ សុភា ចៅក្រមស៊ើបសួរលើករណីខាងលើនេះ បានប្រាប់ភ្នំពេញប៉ុស្តិ៍ថា នៅថ្ងៃច័ន្ទនេះ លោកនិងសហការីរបស់លោក នឹងបើកការស្រាវជ្រាវ និងស៊ើបអង្កេតបន្ថែមទៀត លើករណីខាងលើនេះ ដើម្បីរកឲ្យឃើញថា តើក្រុមហ៊ុនដួងស្រួចគ្រុប ពិតជាមានការពាក់ព័ន្ធនឹងករណីក្រុមជនសង្ស័យជនជាតិវៀតណាមទាំង៨នាក់ឬមួយយ៉ាងណា ហើយមានមន្ត្រីពាក់ព័ន្ធណាខ្លះទៀត ដែលជាប់ពាក់ព័ន្ធនិងករណីនេះ។
លោក សុភា បានបន្ថែមថា៖ «ក្រុមហ៊ុនដួងស្រួចគ្រុប មានជាប់ពាក់ព័ន្ធករណីប្រព្រឹត្តិបទល្មើសខាងលើនេះឬមួយយ៉ាងណានោះ យើងនៅមិនទាន់ដឹងច្បាស់ទេ ប៉ុន្តែក្នុងជំហ៊ានដំបូងនេះ គឺ យើងចាំបាច់ត្រូវសម្រេចធ្វើការឃុំខ្លួនក្រុមជនសង្ស័យ ដើម្បីសម្រួលនៅក្នុងការស៊ើបអង្កេត»។
ប៉ុន្មានឆ្នាំចុងក្រោយនេះ ក្រុមហ៊ុនដួងស្រួចគ្រុប បានរងនូវការចោទប្រកាន់ពីសកម្មជនព្រៃឈើថា បានញុះញង់ឲ្យពលរដ្ឋចូលកាប់បំផ្លាញព្រៃឈើរដ្ឋយ៉ាងអនាធិបតេយ្យ ហើយខ្លួនជាអ្នកប្រមូលទិញក្នុងតំលៃទាប។
កាលពីដើមឆ្នាំ ២០១៧ ក្រុមហ៊ុន ដួង ស្រួចគ្រុប ក្រោយពីទទួលបាន អាជ្ញាប័ន្តប្រមូលឈើ (ដួល) នៅក្នុងដីគម្រោងសម្បទានដីសង្គមកិច្ចចំនួនជាង ៦,១៣១ ហិកតា ដែលមានទីតាំងស្ថិតនៅស្រុកលំផាត់ និងស្រុកបរកែវ ខេត្តរតនគិរី ក្រុមហ៊ុននេះ បានរងការចោទប្រកាន់ថា បានបំផុសបំផុលអ្នកភូមិ ឲ្យចូលទៅកាប់បំផ្លាញព្រៃឈើក្នុងតំបន់ ដែនជម្រកសត្វព្រៃលំផាត់ ។
គេក៏នៅចាំផងដែរថា កាលពីព្រឹកថ្ងៃទី២៧ ខែកុម្ភៈ ឆ្នាំ២០១៦ នៅទីតាំងឃ្លាំងស្តុកឈើរបស់ក្រុមហ៊ុននេះ ដែលស្ថិតនៅភូមិក្តីដូប ឃុំស្រយ៉ង់ជើង ស្រុកគូលែន ខេត្តព្រះវិហារ ត្រូវបានអគ្គីភយ័ឆាបឆេះ ឈើប្រណិតនិងឈើដែលប្រមូលទិញពីប្រជាពលរដ្ឋអស់ប្រមាណប្រមាណ៥០០ម៉ែតគូប។
ករណីនោះត្រូវបានគេសង្ស័យថា ជាការដុតបំផ្លាញភស្តុតាងឈើខុសច្បាប់ព្រោះវាបានកើតឡើងក្រោយពេល លោកនាយករដ្ឋមន្ត្រី ហ៊ុន សែន នៅថ្ងៃទី១៥មករាឆ្នាំ២០១៦ បានបង្កើតក្រុមចំរុះបង្ក្រាបបទល្មើសព្រៃឈើដឹកនាំដោយលោកនាយឧត្តមសេនីយ៍សៅសុខាមេប៉េអឹមលើផ្ទៃប្រទេស៕