ភ្នំពេញៈ សាលាដំបូងភ្នំពេញសម្រេចមិនប្រកាសសាលក្រមរឿងរក្សាសារធាតុគីមី សម្រាប់ផលិតអាវុធ នុយក្លេអ៊ែរ ដោយសម្រេចចាត់ជារបៀបដើម្បីបន្តស៊ើបអង្កេតលើវត្ថុចាប់យក និងរង់ចាំលទ្ធផលកោសល្យវិច័យលើវត្ថុតាង។
លោក សេង លាង ប្រធានក្រុមប្រឹក្សាជំនុំជម្រះ បានប្រកាសសាលក្រមកាលពីម្សិលមិញ ដោយសម្រេចចាត់របៀប ឬ ស៊ើបអង្កេតឡើងវិញ លើសំណុំរឿងរក្សាទុកសារធាតុគីមីសម្រាប់ផលិតអាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម។
សំណុំរឿងនេះមានជនជាប់ចោទ ៤ នាក់ មានឈ្មោះជា យូ ដែលជាប់ពីបទរក្សាទុកសារធាតុខាងលើ ចំណែកឈ្មោះ ចាន់ ធឿន, ទិត រស្មី និង ឌី វីបុល ជាប់ពីបទសមគំនិតតាមមាត្រា ២៧ នៃច្បាប់ស្តីពីការហាមឃាត់អាវុធគីមី អាវុធនុយក្លេអ៊ែរជីវសាស្ត្រ និងអាវុធវិទ្យុសកម្ម និងមាត្រា ២៩ នៃក្រមព្រហ្មទណ្ឌ។
លោក សេង លាង បានថ្លែងថា ការចាត់របៀបនេះគឺ «ដើម្បីស៊ើបសួរបន្ត និងស្នើសុំឲ្យធ្វើកោសល្យវិច័យលើវត្ថុចាប់យកពិនិត្យភ័ស្តុតាង»។
លោកចៅក្រមបានចាត់តាំងខ្លួនឯងធ្វើជាចៅក្រមស៊ើបបន្តនេះ។
លោកមេធាវី សុក សំអឿន អ្នកជំនាញផ្នែកច្បាប់ថ្លែងថា បើចៅក្រមជំនុំជម្រះចាត់តាំងខ្លួនឯងជាចៅក្រមស៊ើបនោះ មិនខុសនីតិវិធីទេ ប្រសិនបើការស៊ើបអង្កេតគ្រាន់តែពិនិត្យលើអ្វីដែលបានចាប់យករួចហើយ។
ជនជាប់ចោទទាំង ៤ ត្រូវបានចាប់ខ្លួននៅថ្ងៃ ៣០ សីហា ២០១៦ នៅភោជនីយដ្ឋានរាត្រីពន្លឺថ្មីសង្កាត់ កាកាប ខណ្ឌពោធិ៍សែនជ័យ។
សមត្ថកិច្ចសង្ស័យសារធាតុរាវ ២ លីត្រ គឺជាសារធាតុគីមី «អ៊ុយរ៉ាញ៉ូម» សម្រាប់ផលិតអាវុធគីមី។ ប៉ុន្តែជនជាប់ចោទប្រាប់សវនាការថា ជាអាស៊ីតសម្រាប់ដេញមាស (សម្រាប់ពិនិត្យមាសសុទ្ធ ឬ មិនសុទ្ធ) ហើយពួកគេត្រូវបានគេបញ្ចុះបញ្ចូលឲ្យរកអ្នកទិញអាស៊ីតនេះដោយទទួលបានប្រាក់កម្រៃជើងសាចាប់ពី ១០ ម៉ឺនដុល្លារ រហូតដល់ជាង ១ លានដុល្លារ។
យោងតាមសមត្ថកិច្ចសារធាតុចាប់យកនៅពេលនេះកំពុងស្ថិតនៅក្រសួងការពារជាតិហើយមិនទាន់ត្រូវបានពិសោធនៅឡើយ ដោយសារគ្មានឧបករណ៍៕