.jpg)
លោក ហ៊ុន ម៉ាណែត និងថ្នាក់ដឹកនាំកងយោធពលខេមរភូមិន្ទ ចូលរួមក្នុងក្រុងពាលី បើកការប្រកួតកីឡាកងយោធពលខេមរភូមិន្ទនៅកោះពេជ្រ កាលពីម្សិលមិញ។
ភ្នំពេញៈ សាលារាជធានីភ្នំពេញបានប្រកាសប្រាប់ប្រជាពលរដ្ឋនៅក្នុងរាជធានីថានៅយប់ថ្ងៃពុធនេះកងទ័ព និងសម្ភារយោធានឹងត្រូវចល័តនៅតាមដងផ្លូវសាធារណៈមួយចំនួនសូមកុំឲ្យប្រជាពលរដ្ឋមានការព្រួយបារម្ភឬភ្ញាក់ផ្អើលដោយកងទ័ព និងសម្ភារយោធាទាំងនោះត្រូវទៅចូលរួមប្រកួតកីឡាកងយោធពលខេមរភូមិន្ទនៅកោះពេជ្រនៅថ្ងៃស្អែក។
លោក ឃួង ស្រេង អភិបាលរាជធានីភ្នំពេញបានលើកឡើងក្នុងសេចក្ដីប្រកាសព័ត៌មានមួយកាលពីថ្ងៃចន្ទថាកងពលតូចថ្មើរជើងលេខ ៧០ និងកងកម្លាំងអង្គរក្សលោកនាយករដ្ឋមន្ត្រី ហ៊ុន សែន នឹងធ្វើការចល័តចេញពីបន្ទាយនៅផ្លូវជាតិលេខ ៣ នៅវេលាម៉ោង ១២ កន្លះយប់ និងបញ្ជាការដ្ឋាននៅក្រុងតាខ្មៅនៅវេលាម៉ោង ១ យប់ថ្ងៃទី ១០ ខែមករានេះដើម្បីចូលរួមក្នុងកម្មវិធីប្រកួតកីឡាកងយោធពលខេមរភូមិន្ទនៅថ្ងៃស្អែកនៅកោះពេជ្រ។
កងពលតូចថ្មើរជើងលេខ ៧០ នឹងត្រូវដឹកជញ្ជូនតាមផ្លូវជាតិលេខ ៣ ឆ្លងកាត់តាមផ្លូវវេងស្រេងបត់ទៅមហាវិថី ម៉ៅ សេទុង និងធ្វើដំណើរតាមមហាវិថីសុធារស ឆ្ពោះទៅកោះពេជ្រ និងកងកម្លាំងនៃបញ្ជាការដ្ឋានកងអង្គរក្សលោកនាយករដ្ឋមន្ត្រីនឹងត្រូវដឹកតាមផ្លូវជាតិលេខ ២១ ឆ្លងកាត់ផ្លូវជាតិលេខ ២ និងមហាវិថីនរោត្ដមឆ្ពោះទៅកោះពេជ្រ។
លោក ស្រេង បានបញ្ជាក់ក្នុងសេចក្តីប្រកាសនោះដូច្នេះថា៖ «...ក្រុមរៀបចំកីឡាកងយោធពលខេមរភូមិន្ទនឹងរៀបចំកម្មវិធីប្រកួតកីឡាកងយោធពលខេមរភូមិន្ទនាថ្ងៃទី ១០ មករានៅមជ្ឈមណ្ឌលសន្និបាត និងពិព័រណ៍កោះពេជ្រ។ ក្រុមការងាររៀបចំកីឡាកងយោធពលខេមរភូមិន្ទមានការតាំងពិព័រណ៍យុទ្ធោបករណ៍នៃកងយោធពលខេមរភូមិន្ទដោយត្រូវចល័តសម្ភារបម្រើការងារយោធាសម្រាប់បម្រើឲ្យការតាំងពិព័រណ៍...»។
លោក អ៊ូ ចាន់រ័ត្ន អតីតតំណាងរាស្ត្រគណបក្សប្រឆាំងបានចាត់ទុកការរៀបចំពិធីនេះថាជាការគំរាមកំហែងមួយរបស់រដ្ឋាភិបាលកុំឲ្យពលរដ្ឋដែលគាំទ្របក្សប្រឆាំងតវ៉ាប្រឆាំងរដ្ឋាភិបាលបន្ទាប់ពីមានការរំលាយគណបក្សសង្គ្រោះជាតិ ។ «ស្ថានភាពបែបនេះសាលារាជធានីប្រកាសមិនឲ្យព្រួយបារម្ភក៏ពលរដ្ឋមានការភ័យខ្លាចដែរនៅពេលបង្ហាញកាំភ្លើង និងអាវុធនេះជាការគំរាមកំហែងហើយរដ្ឋាភិបាលមិនគួរបន្តគំរាមកំហែងបន្តទៅទៀតទេ ហើយវាគ្មានប្រយោជន៍ក្នុងការធ្វើបែបនេះទេ។ ការធ្វើនេះគឺជារូបភាពដើម្បីគំរាមកំហែងកុំឲ្យពលរដ្ឋដែលគាំទ្រគណបក្សប្រឆាំងងើបតវ៉ាប្រឆាំងរដ្ឋាភិបាល។ គេបានគំរាមតាមផ្លូវច្បាប់ វាគ្រប់គ្រាន់ហើយដោយបានកែច្បាប់ និងវិសោធនកម្មច្បាប់ដើម្បីគាបសង្កត់វាគ្រប់គ្រាន់ហើយ...»៕
