.jpg)
លោក អៀង វុទ្ធី ជនជាប់ចោទមា្នក់ក្នុងចំណោម ២ នាក់នៃអង្គការសមធម៌ក្នុងឆ្នាំ ២០១២ ។ រូបថត ច័ន្ទនីដា
ភ្នំពេញៈ សាលាឧទ្ធរណ៍ នៅព្រឹកថ្ងៃសុក្រនេះ បានប្រកាសសាលដីកា ទម្លាក់បទចោទប្រកាន់ ពីបទ «បរិហារកេរ្តិ៍ជាសាធារណៈ» ទៅលើបុគ្គលិកអង្គការ សមធម៌ បីនាក់ ប្តឹងដោយអតឹតបុគ្គលិកអង្គការនេះ ដែលត្រូវបានបញ្ឈប់ពីការងារ ដោយសារធ្វើការមិនបម្រើផលប្រយោជន៍ ជនរងគ្រោះដោយសារការបណ្តេញចេញពីដីធ្លី ដែលលោកតំណាងឲ្យ។
សំណុំរឿងនេះ សាលាដំបូងរាជធានីភ្នំពេញ កាលពីថ្ងៃទី ២២ ខែសីហាឆ្នាំ ២០១៦ បានផ្ដន្ទាទោសអ្នកទាំងបីគឺ លោក អៀង វុទ្ធី ជានាយកប្រតិបត្តិនៃអង្គការសមធម៌ លោក ផែន គឹមសុង ប្រធានកម្មវិធីឃ្លាំមើលការអភិវឌ្ឍ និង លោក ឈាង ភា ប្រធានការិយាល័យរដ្ឋបាល និងធនធានមនុស្សពីបទបរិហារកេរ្តិ៍ជាសាធារណៈតាមបណ្ដឹងរបស់អតីតបុគ្គលិកម្នាក់នៃអង្គការនេះដែរ ឈ្មោះ ចាន់ វិចិត្រ។
សាលាដំបូងរាជធានីភ្នំពេញ បានបង្គាប់ឱ្យបង់ប្រាក់ពិន័យ និងសងថ្លៃខូចខាតជាច្រើនទៅដើមបណ្ដឹង។ បទបរិហារកេរ្តិ៍នេះត្រូវពិន័យពីមួយសែនរៀលដល់ដប់លានរៀល។
លោកចៅក្រម ញូង ថុល បានថ្លែងនៅក្នុងសាលដីកា ព្រឹកនេះថា ពុំមានភ័ស្ដុតាងបញ្ជាក់ពីបទបរិហារកេរ្តិ៍ទេ ដែលប្តឹងដោយលោក ចាន់ វិចិត្រ និងសម្រេចបដិសេធចោលសាលក្រមរបស់សាលាដំបូងរាជធានីភ្នំពេញ។ នេះបើយោងតាមការបញ្ជាក់របស់ អ្នកនាំពាក្យរបស់សាលាឧទ្ធរណ៍។
លោក ទូច ថារិទ្ធ អ្នកនាំសាលាឧទ្ធរណ៍បានថ្លែងថា «លោកចៅក្រមជំនុំជម្រះ ញូង ថុល បានប្រកាសថា លោក អៀង វុទ្ធី និងបុគ្គលិកឈាង ភា និងលោកផែន គឹមសុង បានឈ្នះលើបណ្តឹងរបស់លោក ចាន់ វិចិត្រ»។
បន្ទាប់ពីការប្រកាសសាលដីកា លោក អៀង វុទ្ធី គ្រាន់តែថ្លែងប្រាប់ថា លោករីករាយក្រោយទទួលបានសាលដីកា គាប់ចិត្ត។
លោកនិយាយថា «សាលាឧទ្ធរណ៍ បានទម្លាក់ចោលសាលក្រម [សាលាដំបូង]។ យើងពិតជាសប្បាយចិត្តជាមួយនឹងលទ្ធផលនេះ និងអរគុណដល់តុលាការ ដែលបានធ្វើការសម្រេចចិត្តនេះ»។
ក្នុងនាមជាបុគ្គលិក អង្គការ សមធម៌ នៅកម្ពុជា លោក ចាន់ វិចិត្រ បានធ្វើការជាមួយសហគមន៍មូលដ្ឋានក្នុងវិវាទដីធ្លីដែលទាក់ទងទៅនឹងក្រុមហ៊ុនស្ករ ស ភ្នំពេញរបស់លោក លី យ៉ុងផាត់ នៅខេត្តកំពង់ស្ពឺ។
សមាជិកសហគមន៍បានចោទប្រកាន់ថា វិចិត្រ បានចាប់ផ្តើមធ្វើការងារក្នុងនាមក្រុមហ៊ុនស្ករ ស នោះដែលនាំឱ្យគាត់ត្រូវបានបណ្តេញចេញពីអង្គការក្រៅរដ្ឋាភិបាលមួយនេះ។
លោក វិចិត្រ ដែលមិនបានចូលសវនាការ អះអាងថា លោកមិនទទួលបានការកោះហៅ ក៏មិនមានវត្តមាននៅថ្ងៃអង្គារនេះដែរ ហើយបាននិយាយថា លោកមិនដឹងពីសាលក្រមនោះទេ។ ផ្ទុយទៅវិញលោកបានគំរាមដាក់ពាក្យប្តឹងកាសែត ភ្នំពេញ ប៉ុស្តិ៍។
លោកបានមានប្រសាសន៍ថា «ខាងកាសែតភ្នំពេញ ប៉ុស្តិ៍ បានសរសេររឿងមិនមែនជាពិតសោះ ហើយកាលកន្លងមកហ្នឹងចុះហាក់បីដូចជាមួលបង្កាចបង្ខូចកេរ្តិ៍ឈ្មោះខ្ញុំ។ ឥឡូវហ្នឹង ខ្ញុំកំពុងធ្វើពាក្យបណ្តឹងនឹងកាសែតភ្នំពេញ ប៉ុស្តិ៍ ពីព្រោះបានសរសេររឿងមិនមែនជាពិត»៕
