Search form

Login - Register | FOLLOW US ON

Logo of Phnom Penh Post newspaper Phnom Penh Post - សាលា​រាជធានី​ផ្ទេរ​រថយន្ត​ពន្លត់​អគ្គិភ័យ ៣ គ្រឿង​ដល់​នគរបាល

សាលា​រាជធានី​ផ្ទេរ​រថយន្ត​ពន្លត់​អគ្គិភ័យ ៣ គ្រឿង​ដល់​នគរបាល

20140214_07
រថយន្តពន្លត់អគ្គិភ័យ នៅពេលធ្វើអន្តរាគមន៍ពន្លត់អគ្គិភ័យ ក្នុងខណ្ឌ៧មករាកន្លងមក ហេង ជីវ័ន

ភ្នំពេញៈ សាលា​រាជធានី​ភ្នំពេញ កាល​ពី​ព្រឹក​ម្សិលមិញ​បាន​រៀបចំ​ពិធី​ប្រគល់​រថយន្ត​ពន្លត់​អគ្គិភ័យ​ចំនួន ៣ គ្រឿង ដែល​ជា​ជំនួយ​របស់​អង្គការ JICA ទៅ​ឲ្យ​ការិយាល័យ​បង្ការ​និង​ពន្លត់​អគ្គិភ័យ នៃ​ស្នងការដ្ឋាន​នគរបាល រាជធានី​ដើម្បី​បង្កើន​សមត្ថភាព​ក្នុង​ប្រតិបត្តិការ​សង្គ្រោះ​និង​ពន្លត់​អគ្គិភ័យ។

លោក ប៉ា សុជាតិវង្ស អភិបាល​រាជធានី​ភ្នំពេញ បាន​ថ្លែង​នៅ​ក្នុង​ពិធី​នោះ​ថា គ្រោះ​អគ្គិភ័យ​គឺជា​គ្រោះ​មហន្តរាយ​មួយ ដែល​បាន​គំរាម​កំហែង​រាជធានី​ភ្នំពេញ​ជា​រៀង​រាល់​ខែ រាល់​ឆ្នាំ ដោយ​បាន​បំផ្លាញ​ទ្រព្យ​សម្បត្តិ​របស់​ប្រជា​ពលរដ្ឋ​ជាច្រើន និង​បង្ក​ឲ្យ​មាន​អ្នក​រង​របួស និង​ស្លាប់​មួយ​ចំនួន​ទៀត។

លោក សុជាតិវង្ស បាន​បន្ត​ថា រថយន្ត​ពន្លត់​អគ្គិភ័យ​ទាំង​បី​គ្រឿង​ដែល​ជា​ជំនួយ​របស់​អង្គការ JICA ជប៉ុន នេះ និង​ជួយ​សម្រួល​ដល់​ក្រុម​ភ្នាក់ងារ​ពន្លត់​អគ្គិភ័យ​នៃ​អង្គភាព​ពន្លត់​អគ្គិភ័យ​រាជធានី​ភ្នំពេញ ក្នុង​ការ​ប្រតិបត្តិការ សង្គ្រោះ​និង​ទប់​ស្កាត់​គ្រោះ​អគ្គិភ័យ​ក្នុង​រាជធានី​មួយ​នេះ​ឲ្យ​កាន់​តែ​មាន​ប្រសិទ្ធភាព​ថែម​ទៀត។

លោក​អភិបាល​រាជធានី​បាន​បញ្ជាក់​ថា៖ «ការ​កើត​មាន​គ្រោះ​អគ្គិភ័យ​វា​មិន​មែន​ជា​រឿង​ចៃដន្យ​នោះ​ទេ...សំណង់​មិន​រៀបរយ ការ​ត​បណ្តាញ​អគ្គិសនី​មិន​ស្រប​តាម​បទដ្ឋាន​បច្ចេកទេស ជា​ហេតុ​ផល​ចម្បង​ដែល​នាំ​ឲ្យ​កើត​គ្រោះ​អគ្គិភ័យ ក្នុង​រាជធានី​ភ្នំពេញ»។

ជាមួយ​គ្នា​នេះ​ដែរ​លោក ប៉ា សុជាតិវង្ស បាន​អំពាវនាវ ដល់​ប្រជា​ពលរដ្ឋ​ក៏​ដូចជា​សមត្ថកិច្ច​ពាក់​ព័ន្ធ​ទាំង​អស់ ត្រូវ​បង្កើន​ការ​ប្រុង​ប្រយ័ត្ន​ខ្ពស់ និង​បណ្ដុះ​ការ​អប់រំ​ក្រើន​រំលឹក​គ្នា​កុំ​ឲ្យ​មាន​ទម្លាប់​ធ្វេស​ប្រហែស អុជ ភ្លើង​ទាន​ធូប ឬ​ចង្ក្រាន​ចោល​ហើយ​ដើរ​ចោល​ផ្ទះ ដែល​នាំ​ឲ្យ​មាន​គ្រោះ​អគ្គិភ័យ​កើត​ឡើង។

លោក នេត វន្ថា ប្រធាន​ការិយាល័យ​បង្ការ​និង​ពន្លត់​អគ្គិភ័យ​រាជធានី​ភ្នំពេញ បាន​ថ្លែង​ថា ចំពោះ​ប្រជា​ពលរដ្ឋ រស់​នៅ​ក្នុង​ខណ្ឌ​ចំនួន ៤ រួម​មាន​ខណ្ឌ ចំការមន ដូនពេញ ទួលគោក និង​ខណ្ឌ ៧ មករា មាន​ការ​យល់​ដឹង​ខ្ពស់​អំពី​រឿង​អគ្គិភ័យ ដោយ​ឡែក​ប្រជា​ពលរដ្ឋ​នៅ​តាម​ជាយ​ក្រុង​និង​តាម​តំបន់​សំណង់​មិន​រៀបរយ​ការ​យល់​ដឹង នៅ​មាន​កម្រិត​ទាប​នៅ​ឡើយ ចំពោះ​បញ្ហា​គ្រោះ​អគ្គិភ័យ​នេះ។

លោក​បាន​បន្ត​ថា កន្លង​មក​នៅ​តំបន់​ដែល «មិន​រៀបរយ» នៅ​ពេល​មាន​អគ្គិភ័យ​កើត​ឡើង​ម្តងៗ ក្រុម​ការងារ​ពន្លត់​អគ្គិភ័យ ជួប​ការ​លំបាក​ក្នុង​ការ​សង្គ្រោះ គ្រប់​គ្រង និង​ទប់​ស្កាត់​ខ្លាំង​ណាស់ ព្រោះ​ផ្លូវ​តូច​ចង្អៀត។

យោង​តាម​របាយ​ការណ៍​របស់​ការិយាល័យ​នគរបាល​បង្ការ និង​ពន្លត់​អគ្គិភ័យ​រាជធានី​ភ្នំពេញ ក្នុង​ឆ្នាំ ២០១៣ កន្លង​ទៅ​នេះ អគ្គិភ័យ​ក្នុង​រាជធានី​ភ្នំពេញ បាន​កើត​ឡើង​ចំនួន ១០៥ លើក ស្ថិត​នៅ​ក្នុង​ខណ្ឌ ទាំង ៩ ដែល​បាន​បណ្តាល​ឲ្យ​មនុស្ស​ស្លាប់ ៦ នាក់ និង​របួស ៦ នាក់។ ដោយ​ឡែក​នៅ​ក្នុង​ដើម​ឆ្នាំ ២០១៤ នេះ​វិញ គិត​ត្រឹម​ខែ មករា ក្នុង​រាជធានី​ភ្នំពេញ មាន​គ្រោះ​អគ្គិភ័យ​ចំនួន ៨ លើក​ស្ថិត​នៅ​ក្នុង​ខណ្ឌ ចំការមន ពោធិ៍​សែន​ជ័យ ៧ មករា ដូនពេញ សែនសុខ ទួលគោក និង​ខណ្ឌ មាន​ជ័យ ក្នុង​នោះ​បាន​បណ្តាល​ឲ្យ​មនុស្ស​ចំនួន ២ នាក់​ស្លាប់ ឯ ២ នាក់ ទៀត​រង​របួស​ស្រាល៕

0

Comments

Please, login or register to post a comment