Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្ត្រី​ក្នុង​វិស័យ​សំណង់​ត្រូវ​គេ​រើសអើង

ស្រ្តី ៣ ​នាក់​កំពុង​ធ្វើការ​នៅក្នុង​ការដ្ឋាន​សំណង់​មួយ​កន្លែង​ក្នុង​រាជធានី​ភ្នំពេញ​កាលពី​ពេល​ថ្មីៗ​នេះ​។
ស្រ្តី ៣ ​នាក់​កំពុង​ធ្វើការ​នៅក្នុង​ការដ្ឋាន​សំណង់​មួយ​កន្លែង​ក្នុង​រាជធានី​ភ្នំពេញ​កាលពី​ពេល​ថ្មីៗ​នេះ​។ ហុង មិនា

ស្ត្រី​ក្នុង​វិស័យ​សំណង់​ត្រូវ​គេ​រើសអើង

ភ្នំពេញៈ គេ​បាន​ប៉ាន់​ប្រមាណ​ថា​ម្នាក់​ក្នុង​ចំណោម​កម្មករ​សំណង់​បី​នាក់​នៅ​កម្ពុជា​គឺជា​ស្ត្រី​ប៉ុន្តែ​ពួកគេ​មិន​ទទួល​បាន​ប្រាក់​ខែ ឬ​កិច្ច​ការពារ​ស្មើ​គ្នា​ទេ​បើ​​ធៀប​នឹង​កម្មករ​សំណង់​បុរស​។​ នេះ​បើ​យោង​តាម​ការ​រកឃើញ​​ក្នុង​ការ​ស្រាវជ្រាវ​ផ្ទៃក្នុង​បឋម​មួយ​របស់​អង្គការ Care Cambodia។

លោកស្រី​ Adriana Siddle ទីប្រឹក្សា​ផ្នែក​ការងារ​នៅ​អង្គការ​ Care Cambodia បាន​ឲ្យ​ដឹង​ថា​ការ​ស្រាវជ្រាវ​នេះ​រកឃើញ​ថា​ស្ត្រី​ទទួល​បាន​ប្រាក់​​ឈ្នួល​​ប្រមាណ​ពី​ ៣ ទៅ ៥ ដុល្លារ​ក្នុង​មួយ​ថ្ងៃ​បើ​ប្រៀប​ធៀប​​នឹង​បុរស​ដែល​ទទួល​បាន​ប្រាក់​​ឈ្នួល​ប្រមាណ​ពី​ ៥ ទៅ ៧ ដុល្លារ​។

លោកស្រី​បាន​បន្ថែម​ថា​ការ​ស្រាវជ្រាវ​នេះ​បាន​ធ្វើ​ឡើង​កាលពី​ខែ​មិថុនា​នឹង​​ជួយ​តម្រង់​ទិស​សម្រាប់​គម្រោង CARE មួយ​ដែល​ជួយ​អប់រំ​ និង​បណ្តុះ​បណ្តាល​ស្ត្រី​ ៣ ពាន់​នាក់​ក្នុង​ខណ្ឌ​ចំនួន​ប្រាំពីរ​នៅក្នុង​រាជធានី​ភ្នំពេញ​ក្នុង​រយៈពេល ៣ ឆ្នាំ​ទៅ​មុខ​ទៀត​ទាក់ទង​នឹង​ការ​យាយី​ផ្លូវ​ភេទ ការ​រើសអើង​យេនឌ័រ និង​សិទ្ធិ​របស់​ពួកគេ​ក្រោម​ច្បាប់​ការងារ​ដូចជា​ការ​ឈប់​សម្រាក​លម្ហែ​មាតុភាព។​

លោកស្រី​ឲ្យ​ដឹង​ទៀត​ថា៖ «យើង​កំពុង​សង្ឃឹម​ថា​នឹង​មើល​ឃើញ​ការ​រីក​ចម្រើន​ផ្នែក​សុវត្ថិភាព​ និង​សមភាព​នៅ​កន្លែង​ការងារ​សម្រាប់​ស្ត្រី» ។ឮ

បើ​យោង​តាម​អ្នក​គ្រប់គ្រង​គម្រោង CARE លោកស្រី​ រ័ត្ន កល្យាណ បាន​ឲ្យ​ដឹង​ថា​ពុំ​សូវ​មាន​យក​ចិត្ត​ទុក​ដាក់​ច្រើន​លើ​បញ្ហា​ប្រឈម​​របស់​ស្ត្រី​នៅក្នុង​វិស័យ​សំណង់​ទេ​ធៀប​នឹង​វិស័យ​ដទៃ​ទៀត។

លោកស្រី​បន្ថែម​ថា៖ «ស្ត្រី​ក្នុង​រោងចក្រ​កាត់​ដេរ​ស្ថិត​ក្រោម​​ប្រកាស​ស្តីពី​ប្រាក់​ឈ្នួល​អប្បបរមា​ហើយ​ភាគី​​ពាក់ព័ន្ធ​ជាច្រើន​ដូចជា [អង្គការ​ពលកម្ម​អន្តរជាតិ] កំពុង​ធ្វើការ​ដើម្បី​ពង្រឹង​ស្ដង់ដារ​ការងារ​ក្នុង​រោងចក្រ។ តែ​ស្ត្រី​ក្នុង​វិស័យ​សំណង់​ពុំ​មាន​កិច្ច​ការពារ​ទាំង​នេះ​ទេ​»​។

ការ​រកឃើញ​ពី​វិសមភាព​នេះ​ពុំ​ធ្វើ​ឲ្យ​លោក សុខ គីន ដែល​ជា​ប្រធាន​​សហព័ន្ធ​សហជីព​កម្មករ​សំណង់ និង​​ឈើ​កម្ពុជា​មាន​ការ​ភ្ញាក់ផ្អើល​ទេ​ដោយ​លោក​បាន​ថ្លែង​កាលពី​ម្សិលមិញ​ថា​កម្មករ​សំណង់​ជួប​ប្រទះ​នឹង​បញ្ហា​រើសអើង​​យេនឌ័រ​ជា​ប្រចាំ។

លោក​បន្ត​ថា៖ «ស្ត្រី​រង​ការ​រើសអើង​។ ពួកគេ​ធ្វើ​ការងារ​តែ​មួយ​តែ​មិន​បាន​ទទួល​ប្រាក់​ឈ្នួល​ដូច​បុរស​ទេ​»៕ TK

0

Comments

Please, login or register to post a comment