.jpg)
ស្ត្រីជាប់ចោទ នៅពេលចាប់ខ្លួនបញ្ជូនមកតុលាការភ្នំពេញ កាលពីខែកក្កដា ឆ្នាំ២០១៧។ ហេង ជីវ័ន
ភ្នំពេញៈ ស្ត្រីដែលចោទលោកនាយករដ្ឋមន្ត្រី ហ៊ុន សែន ថា ជាអ្នកសម្លាប់លោកបណ្ឌិត កែម ឡី ត្រូវបានតុលាការកាត់ទោសដាក់ពន្ធនាគារមួយឆ្នាំ និងពិន័យប្រាក់ ១ លានរៀលចូលថវិការដ្ឋ ដែលការសម្រេចនេះ បានធ្វើឡើងនៅក្នុងសវនាការប្រកាសសាលក្រមនៅថ្ងៃទី ១១ ខែមករា ឆ្នាំ ២០១៨។
អ៊ី ឋាវរៈ ចៅក្រមជំនុំជម្រះសាលាដំបូងរាជធានីភ្នំពេញ បានថ្លែងក្នុងសវនាការថា៖ «ផ្តន្ទាទោសជនជាប់ចោទ ហ៊ិន វ៉ាន់ស្រីពៅ អាយុ ៣៧ ឆ្នាំ ដាក់ពន្ធនាគារ ១ឆ្នាំ និងពិន័យជាប្រាក់១លានរៀល ចូលថវិការដ្ឋពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា តាមមាត្រា៤៩៤ និង៤៩៥ នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញ កាលពីថ្ងៃទី ៩ ខែកក្កដា ឆ្នាំ២០១៧ បើកផ្លូវប្តឹងទាស់និងប្តឹងឧទ្ធរណ៍តាមកំណត់ច្បាប់»។
សាលក្រមនេះ ធ្វើឡើងក្រោយពីមានការជំនុំជម្រះកាលពីថ្ងៃទី ២៥ ខែធ្នូ ឆ្នាំ ២០១៧។
នៅក្នុងសវនាការអ្នកស្រី ហ៊ិន វ៉ាន់ស្រីពៅ បានថ្លែងប្រាប់តុលាការថា គាត់មិនបានញុះញង់ទេ តែបាននិយាយចោទប្រកាន់លោកនាយករដ្ឋមន្ត្រីមែន។ ទោះយ៉ាងណា គាត់អះអាងថា គាត់និយាយដោយអចេតនា ដោយសារតែគាត់ខឹងមួយឆាវជាមួយនឹងអ្នកលេងហ្វេសប៊ុកដែលចេះតែបញ្ចេញមតិជេរប្រមាថគាត់។
ក្រោយស្តាប់ការប្រកាសសាលក្រម ជនជាប់ចោទ វ៉ាន់ស្រីពៅ បានថ្លែងថា នាងមិនប្តឹងឧទ្ធរណ៍ទេ ប៉ុន្តែមិនបានបង្ហាញពីការយល់ឃើញរបស់នាង លើសាលក្រមនេះទេ។ នាងមិនមានមេធាវី ឬសាច់ញាតិមកសួរសុខទុក្ខនៅពេលសវនាការទេ។
ហ៊ិន វ៉ាន់ស្រីពៅ ត្រូវបានចាប់ខ្លួន ដោយកងកម្លាំងប្រឆាំងភេរវកម្មនិងឧក្រិដ្ឋកម្មឆ្លងដែន របស់ក្រសួងមហាផ្ទៃកាលពីថ្ងៃទី១២ ខែកក្កដា ឆ្នាំ ២០១៧ បន្ទាប់ពីនាងបានចោទប្រកាន់តាមបណ្តាញហ្វេសប៊ុករបស់នាង ដែលដាក់ឈ្មោះថា ហេង លក្ខិណា ដោយអះអាងថា លោក ហ៊ុន សែន និងសមាជិកគ្រួសារ បានសម្លាប់លោកបណ្ឌិត កែម ឡី។
លោក កែម ឡី ត្រូវបានខ្មាន់កាំភ្លើងបាញ់សម្លាប់ទាំងកណ្ដាលថ្ងៃ កាលពីថ្ងៃទី ១០ ខែកក្កដា ឆ្នាំ ២០១៦ នៅស្ដារម៉ាតស្ថានីយ៍ប្រេងឥន្ធនៈកាល់តិច ស្តុបបូកគោ។ មានតែជនល្មើសម្នាក់គត់ ដែលមជ្ឈដ្ឋានជាច្រើនហៅថា ជាឃាតករ «សិប្បនិម្មិត» ឈ្មោះ ជួប សម្លាប់ ត្រូវបានចាប់ខ្លួនភ្លាមៗនិងត្រូវកាត់ទោសដាក់ពន្ធនាគារមួយជីវិត។
ការកាត់ទោសលើអ្នកចោទប្រកាន់លោក ហ៊ុន សែន ថាជាអ្នកពាក់ព័ន្ធនឹងការបាញ់សម្លាប់លោក កែម ឡីនេះ ជាករណីទី៣ហើយ។ ករណីទីមួយ គឺការផ្ដន្ទាទោសលោកស្រី ថាក់ ឡានី សមាជិកព្រឹទ្ធសភាពីគណបក្ស សម រង្ស៊ី ដែលតុលាការបានចោទពីបទ«ញុះញង់ឲ្យប្រព្រឹត្តបទល្មើសជាអាទិ៍» ហើយកាត់ទោសលោកស្រី ដាក់ពន្ធនាគារ១ឆ្នាំកន្លះ និងពិន័យប្រាក់៨លានរៀល។
ករណីទី២ គឺការកាត់ទោសលោក គឹម សុខ អ្នកវិភាគនយោបាយ ដោយដាក់ពន្ធនាគាររយៈពេល១ ឆ្នាំកន្លះដូចគ្នា និងបង្គាប់ឲ្យសងសំណង ៨០០ លានរៀល ទៅឲ្យប្រធានគណបក្សប្រជាជន លោក ហ៊ុន សែន ពាក់ព័ន្ធនឹងការចោទគណបក្សនេះថា នៅពីក្រោយឃាតកម្មលោក បណ្ឌិត កែម ឡី។
លោក Phil Robertson នាយករងនៃអង្គការឃ្លាំមើលសិទ្ធិមនុស្សអន្តរជាតិ Human Rights Watch ប្រចាំអាស៊ីបានថ្លែងតាមសារអេឡិចត្រូនិក ថ្ងៃនេះថា ការដែលជំរុញឲ្យមានការថ្លែងដូច្នេះ ដោយសារតែការកាត់ទោសករណីឃាតកម្មលោក កែម ឡី ដែលមានជនជាប់ចោទ ជួប សម្លាប់ នោះ មិនបានធ្វើឡើងឲ្យចប់សព្វគ្រប់ ពោលគឺបានបន្សល់ទុកអ្នកសមគំនិតមិនត្រូវបានកាត់ទោស ហើយរដ្ឋាភិបាល ប្រញាប់ប្រញាល់បិទបញ្ចប់សំណុំរឿងនេះ។
លោកថ្លែងថា៖ «ឥឡូវនេះ តាមរយៈករណី ហ៊ិន វ៉ាន់ស្រីពៅនេះ យើងឃើញថា សេរីភាពនៃការបញ្ចេញមតិ មិនត្រូវបានគេការពារទេ ពេលនិយាយពាក់ព័ន្ធនឹងរឿងការសម្លាប់លោក កែម ឡី។ បើសិនលោកនាយករដ្ឋមន្ត្រី ហ៊ុន សែន និងរដ្ឋាភិបាល មិនពាក់ព័ន្ធនឹងការសម្លាប់លោក កែម ឡី ទេ ហេតុអ្វីពួកគេទៅខ្វល់ខ្វាយនឹងពលរដ្ឋសាមញ្ញដែលលេងហ្វេសប៊ុកនិយាយពីរឿងនេះធ្វើអ្វី?»៕ រាយការណ៍បន្ថែមដោយ Andrew Nachemson
