Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្រីមុំ ​មិន​ដែល​ទៅ​លេង​ផ្ទះ​សោះ​ ចាប់​តាំងពី​មាន​រឿង​ក្តីក្តាំ​ដែល​គេ​ជឿ​ថា ​ជា​រឿង​នយោបាយ

អ្នកស្រី សៀន ហយ ម្ដាយ​របស់​អ្នកនាង ខុម ចាន់តារាទី ហៅ​ ស្រីមុំ ពេល​ផ្ដល់​បទសម្ភាស​ដល់​ភ្នំពេញ​ប៉ុស្ដិ៍​កាលពី​ថ្ងៃ​អាទិត្យ​។
អ្នកស្រី សៀន ហយ ម្ដាយ​របស់​អ្នកនាង ខុម ចាន់តារាទី ហៅ​ ស្រីមុំ ពេល​ផ្ដល់​បទសម្ភាស​ដល់​ភ្នំពេញ​ប៉ុស្ដិ៍​កាលពី​ថ្ងៃ​អាទិត្យ​។ ហុង មិនា

ស្រីមុំ ​មិន​ដែល​ទៅ​លេង​ផ្ទះ​សោះ​ ចាប់​តាំងពី​មាន​រឿង​ក្តីក្តាំ​ដែល​គេ​ជឿ​ថា ​ជា​រឿង​នយោបាយ

កំពង់សៀម/ខេត្តកំពង់ចាមៈ ចាប់​តាំងពី​មាន​ការ​បញ្ចេញ​ខ្សែអាត់​សំឡេង​សន្ទនា​គ្នា​ដែល​ត្រូវ​​បាន​គេ​អះអាង​ថា​ជា​សំឡេង​របស់​អ្នកនាង ខុម ចាន់តារាទី ហៅ​ ស្រីមុំ និង​លោក​ កឹម សុខា ប្រធាន​ស្តីទី​គណបក្ស​សង្គ្រោះជាតិ​កាលពី​ចុង​ខែ​កុម្ភៈ​ឆ្នាំ ២០១៦ មក ស្រីមុំ មិន​ដែល​​ទៅ​លេង​ផ្ទះ​នៅ​ក្នុង​ភូមិ​កល្ពាក ឃុំ​ស្រក ស្រុក​កំពង់សៀម​ម្តង​ណា​ទេ​ធ្វើឲ្យ​ក្រុម​គ្រួសារ​មាន​ការ​នឹក​រឭក​យ៉ាង​ខ្លាំង​ខណៈ​ដែល​មជ្ឈដ្ឋាន​ជាច្រើន​បាន​ចាត់​ទុក​ការ​បញ្ចេញ​ខ្សែអាត់​សំឡេង​ដែល​ក្រោយ​មក​មាន​ការ​ចាប់​ឃុំ​ខ្លួន​មនុស្ស​រហូត​ដល់​ ៥ ​​នាក់ និង​តំណាងរាស្ត្រ​គណបក្ស​ប្រឆាំង​ចំនួន​ ៣ ​រូប​ទៀត​កំពុង​តែ​ប្រឈម​មុខ​ចំពោះ​តុលាការ​នេះ​ថា​ជា​រឿង​នយោបាយ​។

ម្តាយ​ ស្រីមុំ អ្នកស្រី សៀន ហយ អាយុ ៥៨ ឆ្នាំ​បាន​រៀបរាប់​ប្រាប់​ភ្នំពេញ​ប៉ុស្តិ៍​ទាំង​ទឹកភ្នែក​រលីង​រលោង​កាលពី​ថ្ងៃ​អាទិត្យ​ថា​ក្រុមគ្រួសារ​ចង់​ជួប​កូនស្រី​ដើម្បី​សួរ​សុខទុក្ខ​តែ​មិន​ដឹង​ជួប​តាម​ណា​ទេ​ចាប់​តាំង​ពី​នាង​មិន​ដែល​មក​លេង​ផ្ទះ​សោះ​អស់​រយៈពេល​ជាង​កន្លះ​ឆ្នាំ​មក​ហើយ​។ អ្នកស្រី​ថា​៖ ​«ស្រីមុំ​អត់​ដែល​តេ​មក​លេង​សោះ​បាត់​ដំណឹង​រហូត​តាំង​ពី​ជួប​នៅ​ភ្នំពេញ។ មុន​មាន​រឿង​នេះ​​ ស្រីមុំ ​ឧស្សាហ៍​តេ​មក​លេង​ដែរ​តែ​ឥឡូវ​អត់​សោះ»។

ខ្សែអាត់​សំឡេង​សន្ទនា​ដែល​​ត្រូវ​បាន​គេ​អះអាង​ថា​ជា​សំឡេង​របស់​លោក​ កឹម សុខា និង​ ស្រីមុំ ត្រូវ​បាន​គេ​ផ្សព្វផ្សាយ​កាលពី​ចុង​ខែ​កុម្ភៈ​ឆ្នាំ ២០១៦។ នៅ​ពេល​នោះ​ ស្រីមុំ បាន​បដិសេធ​ថា​ នាង​ពុំ​ដែល​មាន​ទំនាក់​ទំនង​​ស្នេហា​ជាមួយ​លោក​ កឹម សុខា ​ទេ​ហើយ​បាន​ទៅ​ពឹងពាក់​អង្គការ​សិទ្ធិមនុស្ស​អាដហុក​ឲ្យ​ជួយ​ការពារ​នាង​តាម​ផ្លូវ​ច្បាប់​នៅ​ពេល​ដែល​ក្រសួង​មហាផ្ទៃ​បាន​កោះ​ហៅ​នាង​ទៅ​សួរ​ពី​ខ្សែអាត់​សំឡេង​នេះ។

នៅ​ពេល​ទៅ​ឆ្លើយ​បំភ្លឺ​នៅ​ក្រសួង​មហាផ្ទៃ​ដោយ​មាន​ការ​ជួយ​ជ្រោមជ្រែង​ផ្នែក​ផ្លូវ​ច្បាប់​ពី​អង្គការ​អាដហុក ស្រីមុំ ក៏​នៅ​តែ​បដិសេធ​ថា​នាង​ពុំ​មាន​ទំនាក់​ទំនង​ស្នេហា​ជាមួយ​លោក​ កឹម សុខា​ ​នោះ​ដែរ​​។

ប៉ុន្តែ​នៅ​ពេល​ក្រោយ​មក ស្រីមុំ បាន​​ប្រែ​ក្រឡាស់​សម្តី​របស់​ខ្លួន​ដោយ​​បាន​ឆ្លើយ​ប្រាប់​តុលាការ​ថា​នាង​មាន​ទំនាក់​ទំនង​ស្នេហា​ជាមួយ​លោក​ កឹម សុខា។

ពាក់ព័ន្ធ​នឹង​រឿង​នេះ​នៅ​ពេល​ក្រោយ​មក​ធ្វើឲ្យ​មាន​ការ​ចាប់​ឃុំ​ខ្លួន​មេឃុំ​ស្រក​លោក​ ស៊ាង ចែត មកពី​គណបក្ស​ប្រឆាំង និង​​មន្ត្រី​អង្គការ​សិទ្ធិ​មនុស្ស​អាដហុក​ ៤ ​រូប​ក្រោម​ការ​ចោទប្រកាន់​ពី​បទ​សូកប៉ាន់​សាក្សី និង​​អគ្គលេខាធិការរង គជប​ មួយ​រូប​ក្រោម​ការ​ចោទប្រកាន់​ពី​បទ​សមគំនិត​សូកប៉ាន់​សាក្សី​ខណៈ​ដែល​លោក សុខា និង​តំណាង​រាស្ត្រ​គណបក្ស​ប្រឆាំង​ពីរ​រូប​ទៀត​ក៏​កំពុង​តែ​ប្រឈម​មុខ​ចំពោះ​តុលាការ​ផង​ដែរ។

ស្រីមុំ មាន​បងប្អូន ៤ នាក់​ប្រុស ៣ នាក់ និង​រូបនាង​ជា​កូនពៅ​ក្នុង​គ្រួសារ​ដែល​រស់នៅ​ក្នុង​ជីវភាព​សមរម្យ​ដោយ​ឪពុកម្តាយ​ជា​​កសិករ​ដាំ​ដំឡូង ស្វាយចន្ទី និង​ធ្វើ​ស្រូវ​បន្តិចបន្តួច។

អ្នកស្រី​ ហយ បាន​រៀបរាប់​ប្រាប់​ភ្នំពេញ​ប៉ុស្តិ៍​ខណៈ​កំពុង​អង្គុយ​លើ​គ្រែ​ក្រោម​ផ្ទះ​​ឈើ​របស់​អ្នកស្រី​ថា ស្រីមុំ បញ្ចប់​ការ​សិក្សា​ត្រឹម​ថ្នាក់​ទី ៤ និង​ធ្លាប់​បម្រើ​ការងារ​នៅ​ក្នុង​រោងចក្រ​តែ​ដោយសារ​មិន​សូវ​បាន​កម្រៃ​ច្រើន​អ្នកស្រី​បាន​បញ្ជូន​ ស្រីមុំ ​ទៅ​ភ្នំពេញ​តាមរយៈ​បងប្អូន​ដើម្បី​រៀន​អ៊ុតសក់ និង​ផាត់មុខ​កាលពី​នាង​មាន​អាយុ ២០ ឆ្នាំ​។ ក្រោយ​ពី​រៀន​ចេះ​ពី​ការ​ធ្វើ​ការងារ​ផ្នែក​ផាត់មុខ នាង​សម្រេច​ចិត្ត​ត្រឡប់​មក​ស្រុក​វិញ​ដើម្បី​បើក​ហាង​អ៊ុតសក់​ផ្ទាល់​ខ្លួន​នៅ​លើ​ផ្ទះ​តែ​ម្តង​ដោយ​ពុំ​មាន​សង់​តូប​ ឬ​ហាង​នៅ​មុខ​ផ្ទះ​នោះ​ទេ។

អ្នកស្រី​ថា​៖ «មក​វិញ​បើក​ហាង​បាន​ ១ ឆ្នាំ​ដែរ​តែ​បិទ​វិញ​ទៅ​ព្រោះ​មិន​សូវ​ដាច់​គេ​ត្រូវការ​តែ​ពេល​មាន​កម្មវិធី​មង្គលការ ១ ឆ្នាំ​ដាច់​បាន​បី​ដង​ម្តងៗ​រក​លុយ​បាន​ ២០ ​ម៉ឺន​រៀល»។

បើ​តាម​អ្នកស្រី ហយ ស្រីមុំ ធ្លាប់​រៀបការ​ម្តង​រួច​មក​ហើយ​ជាមួយ​បុរស​រស់នៅ​ភូមិ​ផ្សេង​គ្នា​តែ​ក្នុង​ឃុំ​ជាមួយ​គ្នា «​ពេល​នោះ​ការ​បាន​ប៉ុន្មាន​ខែ​ហើយ​មិន​ចុះ​សម្រុង​គ្នា​ក៏​លែងលះ​គ្នា​ទៅ​កាលពី ២ ឬ ៣ ឆ្នាំ​មុន​ហ្នឹង​ភ្លេច​បាត់​ហើយ»។

អ្នកស្រី ហយ មិន​ដែល​បាន​ដឹង​ទាល់​តែ​សោះ​ថា ស្រីមុំ មាន​ទំនាក់​ទំនង​ស្នេហា​ជាមួយ​លោក​ កឹម សុខា ហើយ​ ស្រីមុំ ក៏​មិន​ដែល​បាន​ប្រាប់​អ្នកស្រី​ពី​បញ្ហា​នេះ​ដែរ។

អ្នកស្រី​ក៏​បាន​បដិសេធ​ដែរ​ថា​ អ្នកស្រី​​មិន​ដែល​បាន​ទទួល​ប្រាក់​ពី​អង្គការ​អាដហុក​ម្តង​ណា​ឡើយ។ «ខ្ញុំ​អត់​មាន​ទទួល​លុយ​ពី​អង្គការ​អាដហុក​សោះ​ឡើយ​គឺ​អត់​ទទួល​សោះ​និយាយ​មាន​មុខ​ថ្ងៃ​ថ្មើរ​ហ្នឹង​មាន​​តែ​លុយ​ខ្ញុំ​ចេញ​សោហ៊ុយ​ធ្វើ​ដំណើរ​ទៅមក»។

តាម​សេចក្តី​រាយការណ៍​អង្គការ​អាដហុក​ធ្លាប់​បាន​ផ្តល់​សេវា​ថ្លៃ​ធ្វើ​ដំណើរ​ ថ្លៃ​ស្នាក់​នៅ​ថ្លៃ​អាហារ​ដល់​ ស្រីមុំ អស់​ប្រមាណ​​ជាង​ ២០០ ​ដុល្លារ​ក្នុង​អំឡុង​ពេល​​ដែល​ ស្រីមុំ ​បាន​ពឹងពាក់​អង្គការ​នេះ​ឲ្យ​ជួយ​គាំពារ​នាង​តាម​ផ្លូវ​ច្បាប់​ទើប​មន្ត្រី​អង្គការ​នេះ​ចំនួន​ ៤ ​រូប​ត្រូវ​បាន​ចោទប្រកាន់​ពី​បទ​សូកប៉ាន់​សាក្សី។

ក្នុង​ទឹកមុខ​ក្រៀមក្រំ​អង្គុយ​លើ​ម៉ូតូ ឪពុក​ ស្រីមុំ លោក តែម ខុំ អាយុ ៦១ ឆ្នាំ ថ្លែង​ថា៖ «ពេល​នាង​មាន​ការងារ​ធ្វើ​ខ្ញុំ​សប្បាយ​ចិត្ត​ណាស់​តែ​ពេល​មាន​រឿង​នេះ​មាន​តែ​អាណិត​កូន ខ្ញុំ​ចង់​ឱ្យ​គេ​រក​យុត្តិធម៌​ឱ្យ​កូន»។

អ្នកភូមិ​ក្នុង​ឃុំ​ស្រក​ទើប​តែ​ដឹង​ថា ស្រីមុំ ​មាន​ស្នេហា​លួចលាក់​ជាមួយ​លោក​ កឹម សុខា នៅ​ពេល​ដែល​ឃើញ​ទូរទស្សន៍​ផ្សព្វផ្សាយ និង​តាម​បណ្តាញ​សង្គម​ហ្វេសប៊ុក​ប៉ុណ្ណោះ​ហើយ​ពួកគាត់​មិន​ហ៊ាន​សន្និដ្ឋាន​ថា​រឿង​នេះ​ជា​រឿង​ពិត ឬ​ក៏​ជា​រឿង​នយោបាយ​ដែល​ត្រូវ​បាន​គេ​បង្កើត​ឡើង​នោះ​ទេ។

លោក​ ស៊ាង ចែត ត្រូវ​បាន​ចោទ​ប្រកាន់​ពី​បទ​សូកប៉ាន់​សាក្សី​ដោយសារ​តែ​លោក​បាន​យក​លុយ​របស់​សប្បុរសជន​ខ្មែរ​នៅ​បរទេស​ចំនួន ​៥ ​លាន​រៀល​ទៅ​ប្រគល់​ឲ្យ​ម្តាយ​ ស្រីមុំ ប៉ុន្តែ​ម្តាយ​ ស្រីមុំ មិន​បាន​ទទួល​យក​លុយ​នោះ​ទេ​ហើយ​លោក​ក៏​បាន​ផ្ញើ​លុយ​នោះ​ទៅ​ឲ្យ​ម្ចាស់​គេ​វិញ​។ នេះ​បើ​តាម​ភរិយា​របស់​លោក​។

ដៃ​ឱប​កូនប្រុស​ពៅ​អាយុ ៤ ឆ្នាំ អ្នកស្រី ស្រេង សុខខឿន ត្រូវ​​​ជា​ភរិយា​របស់​លោក ស៊ាង ចែត បាន​ថ្លែង​ទាំង​ទឹក​មុខ​ក្រៀមក្រំ​ថា​គ្រួសារ​​អ្នកស្រី​ និង​គ្រួសារ​ ស្រីមុំ ​ជា​បងប្អូន​សាច់ថ្លៃ​នឹង​គ្នា និង​​រាប់អាន​ជិតស្និទ្ធ​នឹង​គ្នា​មិន​គួរ​ណា​គាត់​ជាប់​ពន្ធនាគារ​ដោយសារ​រឿង​នេះ​សោះ។

អ្នកស្រី​ថ្លែង​ថា ជា​រឿង​អយុត្តិធម៌​បំផុត​ដែល​តុលាការ​ចោទ​ប្តី​អ្នកស្រី​ពី​បទ​សូកប៉ាន់​សាក្សី។

អ្នកស្រី​ថា៖ «កាល​នោះ​ឮ​ថា​ម្តាយ​ ស្រីមុំ ​ក្រ​អ៊ីចឹង​មាន​អង្គការ​ខ្មែរ​នៅ​ក្រៅ​ប្រទេស​ចង់​ឧបត្ថម្ភ​គាត់​ ៥ ​លាន​រៀល​ហើយ​ប្តី​ខ្ញុំ​ហៅ​ម្តាយ​ ស្រីមុំ ​មក​ផ្ទះ​លេង និង​ប្រាប់​ពី​រឿង​លុយ​តែ​ម្តាយ​ ស្រីមុំ ​ថា​អត់​​យក​ទេ​ហើយ​ឆ្លើយ​ថា​ព្រោះ​រឿង​ស្ងប់​ហើយ​អ៊ីចឹង​ប្តី​ខ្ញុំ​ឱ្យ​គេ​វិញ​ទៅ»។

អ្នកស្រី​ចាត់​ទុក​ថា​ករណី​នេះ​ជា​រឿង​នយោបាយ និង​អំពាវនាវ​ឱ្យ​តុលាការ​ដោះលែង​ប្តី​អ្នកស្រី​វិញ​ដើម្បី​មក​ជួប​ប្រពន្ធ​កូន និង​រក​ប្រាក់​​ផ្គត់ផ្គង់​គ្រួសារ។

អ្នកស្រី​ថា៖ ​«ជីវភាព​ខ្វះខាត​មិន​មាន​អ្នក​រក​ប្រាក់​​ផ្គត់ផ្គង់​គ្រួសារ​ធ្វើឲ្យ​ប៉ះពាល់​កូន​រៀន​ផង​ជំពាក់​លុយ​ធនាគារ​ផង...»។ បើ​តាម​អ្នកស្រី​សង្កេត​មិន​ដែល​ឃើញ​ ស្រីមុំ ​មក​លេង​ផ្ទះ​ម្តង​ណា​ឡើយ​ចាប់​តាំងពី​មាន​រឿង​នោះ​កើត​ឡើង​។

នៅ​ពេល​សួរ​ថា តើ​លោក កឹម សុខា ពិត​ជា​ជាប់​ពាក់ព័ន្ធ​ជាមួយ​ ស្រីមុំ មែន ឬ​អត់ អ្នកស្រី​ឆ្លើយ​ថា «ខ្ញុំ​មិន​ដឹង​ទេ»។

ភរិយា និង​កូនប្រុស​ពៅ​អាយុ ៤ ឆ្នាំ របស់​លោក​មេឃុំ ស៊ាង ចែត កំពុង​អង្គុយ​នៅ​ក្រោម​ផ្ទះ​របស់​ខ្លួន​កាលពី​ថ្ងៃ​អាទិត្យ​​។
ភរិយា និង​កូនប្រុស​ពៅ​អាយុ ៤ ឆ្នាំ របស់​លោក​មេឃុំ ស៊ាង ចែត កំពុង​អង្គុយ​នៅ​ក្រោម​ផ្ទះ​របស់​ខ្លួន​កាលពី​ថ្ងៃ​អាទិត្យ​​។ ហុង មិនា

អ្នកស្រី សៀន ហយ បញ្ជាក់​ថា​អ្នកស្រី​ពិតជា​បាន​ទៅ​ជួប​លោក ស៊ាង ចែត ពិតមែន​តែ​អ្នកស្រី​បដិសេធ​មិន​ទទួល​លុយ​នោះ​ទេ។

អ្នកភូមិ​ល្ពាក​ភាគច្រើន​បាន​​សម្តែង​ការ​សោកស្តាយ​ចំពោះ​​​ការ​ចាប់​ឃុំ​ខ្លួន​លោក​ ស៊ាង ចែត និង​សរសើរ​មិន​ដាច់​ពី​មាត់​ពី​ទង្វើ​ល្អ​របស់​មេឃុំ​គណបក្ស​ប្រឆាំង​រូប​នេះ​ដែល​តែងតែ​ជួយ​ពលរដ្ឋ​ក្រីក្រ។ ពី​ផ្ទះ​មួយ​ទៅ​ផ្ទះ​មួយ​ពួកគេ​ថ្លែង​ដូចៗ​គ្នា​ថា «មេឃុំ​គាត់​ល្អ​ណាស់​ពេល​ត្រូវការ​ជំនួយ​ ឬ​ទៅ​ចុះ​បញ្ជី​នៅ​ឃុំ​ម្តងៗ​គាត់​មិន​ដែល​​​យក​លុយ​​ទេ​ទោះបី​អ្នក​ខ្លះ​ឱ្យ​ថ្លៃ​​ទឹកប៊ិក​ក៏ដោយ​តែ​បើ​មេឃុំ​មុន​វិញ​ដឹង​តែ​យក​លុយ​ហើយ​»​។

អ្នកស្រី​ ឡាយ ចាន់ណា អាយុ ២៨ ឆ្នាំ​ដែល​ត្រូវ​ជា​បងប្អូន​សាច់ថ្លៃ​នឹង​គ្រួសារ​ ស្រីមុំ ថ្លែង​ថា​ពី​មុន​ ស្រីមុំ ​ធ្លាប់​មក​លេង​ស្រុក​ដែរ​តែ​ចាប់​តាំងពី​ឮ​គេ​ផ្សព្វផ្សាយ​ថា ស្រីមុំ ជា​ស្រី​កំណាន់​របស់​លោក​ កឹម សុខា​ មក​មិន​ដែល​ឃើញ​មក​ទេ។

អ្នកស្រី​ថា៖ «ស្រីមុំ ​ម៉ែ​វា​បញ្ជូន​ទៅ​ភ្នំពេញ​យូរ​ដែរ​ហើយ​ខ្ញុំ​មិន​សូវ​ចាប់​អារម្មណ៍​ព្រោះ​គេ​អ្នក​ឡូយឆាយ ស្លៀកពាក់​សិចស៊ី​របៀប​អ្នក​ភ្នំពេញ​ហើយ​គេ​មិន​សូវ​ហៅ​យើង​ផង​ពេល​មក​លេង​ម្តងៗ»។

អ្នកភូមិ​ម្នាក់​គឺ​អ្នកស្រី អូន អាត សុំ​មិន​អត្ថាធិប្បាយ​ពី​រឿង ស្រី មុំ និង​លោក កឹម សុខា ទេ។ តែ​អ្នកស្រី​ថា​មេឃុំ ស៊ាង ចែត ​បាន​ជួយ​ក្រុម​គ្រួសារ​អ្នកស្រី​ច្រើន​មិន​អាច​កាត់ថ្លៃ​បាន​នោះ​ទេ។

អ្នកស្រី​ថា៖​ «ពេល​ឪពុក​ខ្ញុំ​ស្លាប់​ក្នុង​អាយុ ៥៦ ឆ្នាំ​លោក ស៊ាង ចែត ជួយ​ទិញ​ក្តារមឈូស​តម្លៃ ៣៥ ម៉ឺនរៀល នំ​បញ្ចុក ២០០ គីឡូ ទឹកសុទ្ធ ៥០ កេស និង​លុយ ៤៥ ម៉ឺនរៀល។ គាត់​ជា​មនុស្ស​ចិត្តល្អ​ណាស់​រួសរាយ​រាក់ទាក់​ហើយ​ចូលចិត្ត​ជួយ​អ្នក​ភូមិ​ដែល​ក្រីក្រ​ដល់​ពេល​គាត់​ជាប់គុក​អ៊ីចឹង​អាណិត​ណាស់​តែ​មិន​ដឹង​ធ្វើ​ម៉េច»។

ពលរដ្ឋ​ម្នាក់​ទៀត​ឈ្មោះ អែន ចាន់ អាយុ ៣៤ ឆ្នាំ​ថ្លែង​ថា៖ ​«ពេល​ម្តាយ​ខ្ញុំ​ខូច​គាត់​ធ្លាប់​ជួយ​​ទិញ​ក្តារមឈូស អង្ករ ៣០ គីឡូ លុយ ៥០ ម៉ឺន និង​ទឹកសុទ្ធ។ ក្នុង​ឃុំ​នេះ​គ្មាន​​អ្នក​ណា​ស្អប់​គាត់​ទេ គាត់​ដើរ​ជួយ​គេ​គ្រប់​គ្នា​អ្នក​ខ្លះ​អត់​អង្ករ​ទៅ​យក​ផ្ទះ​គាត់ គាត់​ឱ្យ ៥ ឬ ១០ ​គីឡូ​អី​ទៅ​ទោះ​គាត់​មិន​នៅ​តែ​ប្រពន្ធ​​ឱ្យ​ជំនួស»។

ទាក់ទង​នឹង​រឿង​ដែល​តុលាការ​ចោទប្រកាន់​លោក​ ស៊ាង ចែត ពី​បទ​សូកប៉ាន់​សាក្សី​អ្នកស្រី​ថា៖ ​«គាត់​មិន​ចង់​បាន​ទេ​លុយ​ប៉ុណ្ណឹង ៥០០ ដុល្លារ​អី​ព្រោះ​គាត់​ជួយ​គេ​គ្រប់​មនុស្ស»។

លោក ម៉េង លី អាយុ ២៣ ឆ្នាំ​ត្រូវ​ជា​កូនប្រុស​ទី ២ លោក​ ស៊ាង ចែត ចាត់​ទុក​ការ​ចោទ​ប្រកាន់​ និង​ការ​ចាប់​ឃុំ​ខ្លួន​ឪពុក​របស់​លោក​ថា​ជា​រឿង​អយុត្តិធម៌​។

លោក​ថា៖ «ធ្វើ​អ៊ីចឹង​វា​មិន​សម​ទេ​គ្រាន់​តែ​លុយ​ប៉ុណ្ណឹង​ហើយ​គាត់​ជា​អ្នក​ដែល​គេ​ពឹងពាក់​សោះ​តែ​មកពី​គាត់​ជា​គណបក្ស​ប្រឆាំង​ទើប​គេ​គាបសង្កត់​គាត់​តាំងពី​ជាប់​ឆ្នោត​មក​គាត់​ល្បីល្បាញ​ក្នុង​ភូមិ»។ «ឪពុក​ខ្ញុំ​ធ្លាប់​និយាយ​ថា​មាន​គេ​គំរាមកំហែង​ថា​កុំ​ឱ្យ​លេចធ្លោ​ជួយ​អ្នកក្រ​ពេក គេ​ឱ្យ​បញ្ឈប់​សកម្មភាព​នេះ​ទៅ​គេ​នឹង​ឱ្យ​លុយ​ខ្លះ​ហើយ​កូន​មាន​ប៉ុន្មាន​ចូល​ធ្វើ​ប៉ូលិស​ទៅ​គេ​នឹង​ជួយ»​។

គណៈកម្មការ​វត្ត​ព្រះកែវ​ឧទ្យានល្ពាក​លោកតា ជា ហម អាយុ ៦៤ ឆ្នាំ​ថ្លែង​ថា​បន្ទាប់ពី​លោក​ ស៊ាង ចែត ក្លាយ​ជា​មេឃុំ​មក​មាន​ការ​អភិវឌ្ឍ​ច្រើន​ក្នុង​ភូមិ​ដូចជា​ការ​កសាង​ផ្លូវ និង​ជួយ​ពលរដ្ឋ​រងគ្រោះ និង​ចូល​​បច្ច័យ​ក្នុង​វត្ត​ជា​ហូរហែ។

លោក​ថា៖ «​ពេល​យើង​មាន​ការ​ ឬ​ចង់​បោះ​ត្រា​លើ​លិខិត​ស្នាម​អ៊ីចឹង​គាត់​មិន​ទារ​លុយ​កាក់​ពី​យើង​ទេ​គឺ​គាត់​​យក​តាម​ច្បាប់​បើ​ពី​លើ​កំណត់​ប៉ុន​ណា​យក​ប៉ុណ្ណឹង។ ពេល​បាត់​គាត់​អ៊ីចឹង​អ្នក​ភូមិ​ចេះ​តែ​នឹក​សោកស្តាយ​»​​។

កាលពី​ម្សិលមិញ​ភ្នំពេញ​ប៉ុស្តិ៍​មិន​អាច​ទាក់ទង​ ស្រីមុំ ដើម្បី​សុំ​ធ្វើ​អធិប្បាយ​​បាន​ទេ។ ប៉ុន្តែ​លោក គឹម វាសនា មេធាវី​ការពារ​ក្តី​ឱ្យ​ ស្រីមុំ បាន​ឲ្យ​ដឹង​ថា ស្រីមុំ ​កំពុង​ស្នាក់នៅ​ភ្នំពេញ និង​ក៏​ឧស្សាហ៍​ទូរស័ព្ទ​ទៅ​លេង​ឪពុក​ម្តាយ​របស់​នាង​ផង​ដែរ​។

លោក​ថា៖ «គាត់​ (ស្រីមុំ) នៅ​ភ្នំពេញ​ហើយ​សុខ​សប្បាយ​ធម្មតា​ទេ​ ខ្ញុំ​ឧស្សាហ៍​ជួប​គាត់​ដែរ​ម្តាយ​គាត់​ធ្លាប់​ទូរស័ព្ទ​មក​លេង​កូន​គាត់​ច្រើន​ដង​ដែរ តែ​ជួន​កាល​គាត់​មិន​ហ៊ាន​និយាយ​គ្រាន់​តែ​ ស្រីមុំ មិន​ដែល​ទៅ​លេង​ស្រុក​ទេ​ព្រោះ​កំពុង​មាន​បញ្ហា​គាត់​ខ្ជិល​ទៅ​។

លោក​បន្ត​ថា​៖ ​«លើក​មុន​ឪពុក​គាត់​មក​ពេទ្យ​ គាត់​បាន​ទៅ​​មើល​ដែរ​តើ»។

យ៉ាង​ណា​ក៏ដោយ​ លោក​សុំ​មិន​អត្ថាធិប្បាយ​ពី​ទីកន្លែង​ដែល​ ស្រីមុំ ​កំពុង​ស្នាក់នៅ​ ឬ​ កំពុង​រស់នៅ​ជាមួយ​អ្នក​ណា​នោះ​ទេ​។

ទោះ​យ៉ាងណា ស្រីមុំ ត្រូវ​បាន​គេ​ឃើញ​ចុង​ក្រោយ​នៅ​ពេល​ចូល​ខ្លួន​ទៅ​បំភ្លឺ​នៅ​សាលា​ដំបូង​រាជធានី​ភ្នំពេញ​កាលពី​ខែ​មិថុនា​ដោយ​ជិះ​រថយន្ត​ទំនើប​ឡិចស៊ីស​ ៤៧០ ៕

0

Comments

Please, login or register to post a comment

ព័ត៌មានពាក់ព័ន្ធ