Search form

Login - Register | FOLLOW US ON

Logo of Phnom Penh Post newspaper Phnom Penh Post - ហេង ពៅ ​ថា​គង់​​តែ​អយុត្តិធម៌​សុំ​ជម្រះ​ក្ដី​ឲ្យ​ឆាប់

Content image - Phnom Penh Post
លោក ហេង ពៅ ពេល​ត្រូវ​នាំ​ឡើង​តុលាការ​កំពូល​កាល​ពី​ថ្ងៃទី ២៧ ខែ​មីនា ឆ្នាំ ២០១៧។ ផា លីណា

ហេង ពៅ ​ថា​គង់​​តែ​អយុត្តិធម៌​សុំ​ជម្រះ​ក្ដី​ឲ្យ​ឆាប់

ភ្នំពេញៈ ដោយ​នៅ​តែ​គិត​ថា​ប្រព័ន្ធ​តុលាការ​នៅ​កម្ពុជា​មិន​អាច​រក​យុត្តិធម៌​ឲ្យ​ខ្លួន​បាន អតីត​ស្នងការ​នគរបាល​រាជធានី​ភ្នំពេញ​លោក​ ហេង ពៅ បាន​ទទូច​ឲ្យ​តុលាការ​កំពូល​លើក​សំណុំ​រឿង​លោក​មក​ជំនុំជម្រះ​ឲ្យ​ឆាប់​ចប់ ខណៈ​សំណុំ​រឿង​មួយ​ក្នុង​ ២ ​ករណី​ត្រូវ​លើក​ពេល​សវនាការ​ពី​ម្សិលមិញ​ដោយសារ​គ្មាន​មេធាវី​។

ក្នុង​ការ​ជំនុំជម្រះ​ពី​បទ​រក្សា​ទុក​ប្រាក់​ដុល្លារ​ក្លែងក្លាយ និង​បទ​បង្ខាំង​មនុស្ស​ខុស​ច្បាប់​ដែល​មាន​ជនរងគ្រោះ​ឈ្មោះ ចាន់ សៀក លោក​ ហេង ពៅ អាយុ​ ៦០ ​ឆ្នាំ​បាន​​ថ្លែង​ក្នុង​សវនាការ​ថា​លោក​ចង់​ឲ្យ​តុលាការ​ជំនុំជម្រះ​រឿង​ក្តី​លោក​ឲ្យ​បាន​ឆាប់​ចប់ ​បើ​ទោះ​ជា​ករណី​ចោទ​គាត់​ពី​បទ​បង្ខាំង​មនុស្ស​ខុស​​ច្បាប់​មាន ឬ​គ្មាន​មេធាវី​ក៏ដោយ​។

លោក​ ហេង ពៅ ដែល​កំពុង​មាន​ទោស​ជាប់​ពន្ធនាគារ​ ១០៣ ​ឆ្នាំ​​ហើយ​នោះ​បាន​ថ្លែង​ថា​ទោះ​មាន​ ឬ​គ្មាន​មេធាវី​ក៏​ការ​កាត់ក្តី​នៅ​តែ​មិន​មាន​យុត្តិធម៌​ដដែល​ជា​ដដែល​ទេ​។

លោក​ថា​នៅ​រាល់​សវនាការ​លោក​តែង​សុំ​តុលាការ​ឲ្យ​ចេញ​ដីកា​អនុញ្ញាត​ឲ្យ​លោក​អាច​ដក​លុយ​ពី​ធនាគារ​ដើម្បី​ជួល​មេធាវី​ ប៉ុន្តែ​តុលាការ​នៅ​តែ​មិន​អនុញ្ញាត​ហើយ​បន្ត​ចាត់​តាំង​មេធាវី​មក​ឲ្យ​លោក​ដដែល​។

ក្នុង​សំណុំ​រឿង​នេះ​លោក​ធ្លាប់​បដិសេធ​មិន​ទទួល​មេធាវី​ចាត់​តាំង​ម្ដង​ហើយ​ដោយ​សុំ​តុលាការ​លើក​ពេល​ជំនុំ​ជម្រះ ព្រោះ​លោក​ថា​មេធាវី​នោះ​មិន​អាច​ជឿ​ទុក​ចិត្ត​បាន​។

លោក​ប្រាប់​ចៅក្រម​ថា​៖ «​ខ្ញុំ​ចង់​ជួល​មេធាវី ហើយ​ខ្ញុំ​សុំ​តុលាការ​ឲ្យ​ចេញ​ដីកា​មួយ​ដើម្បី​អនុញ្ញាត​ឲ្យ​ខ្ញុំ​ដក​លុយ​ពី​ធនាគារ​មក​ជួល​មេធាវី ប៉ុន្តែ​តុលាការ​នៅ​តែ​មិន​អនុញ្ញាត​...​។ ​បើ​ខ្ញុំ​មាន​លុយ​ជួល​មេធាវី​គឺ​គាត់​ធ្វើការ​ឲ្យ​ខ្ញុំ​អស់​ពី​សមត្ថភាព​»​។

នៅ​ក្នុង​សារ​ណា​ដែល​លោក​ ហេង ពៅ ​ដាក់​នៅ​តុលាការ​បញ្ជាក់​​ថា​កាលពី​លោក​ ម៉ក់ ជីតូ ជា​ប្រធាន​ការិយាល័យ​ព្រហ្មទណ្ឌ​គឺ​គាត់​បាន​ជំរិត​មនុស្ស​ទារ​ប្រាក់​ហើយ​លោក​បាន​ដឹង​រឿង​នេះ​ និង​បាន​ប្រាប់​ថ្នាក់​លើ​រហូត​លោក ស ខេង ចេញ​បញ្ជា​ឲ្យ​លោក​សួរ​ចម្លើយ​ឈ្មោះ​​ យូ រ៉ាន់ ដែល​ជា​​មេចោរ​ទៀត​ផង​។

យ៉ាង​ណា​ក្ដី​លោក​ ម៉ក់ ជីតូ អគ្គស្នងការរង​នគរបាល​ជាតិ​បាន​ប្រាប់​ភ្នំពេញ​ប៉ុស្តិ៍​ពី​ម្សិលមិញ​ថា​៖ «​ករណី​នេះ​ជា​ការ​ចោទប្រកាន់​មិន​ពិត​ទេ​។ ​ចំពោះ​ការ​ចោទ​ថា​​យក​ប្រាក់​ដុល្លារ​ក្លែងក្លាយ​ទៅ​ដាក់​នោះ​ក៏​ដូច​គ្នា​ដែរ ព្រោះ​អ្វីៗ​ធ្វើ​ឡើង​សុទ្ធ​តែ​មាន​គណៈកម្មការ​...»​។

តាម​អង្គហេតុ​កាលពី​ថ្ងៃ​ទី​ ៣១ ​ខែ​កញ្ញា​ ២០០៦ នៅ​សង្កាត់-ក្រុង​តាខ្មៅ ខេត្ត​កណ្តាល សមត្ថកិច្ច​ក្រសួង​មហាផ្ទៃ​បាន​សម្រុក​ចូល​ផ្ទះ​ឃាត់​ខ្លួន​លោក​ ហេង ពៅ ​និង​ប្រពន្ធ​កូន​ ៤ ​នាក់​រួម​នឹង​មនុស្ស​ ៣ ​នាក់​ទៀត​នាំ​មក​សាកសួរ​។ ​ក្នុង​ការ​ឆែកឆេរ​ផ្ទះ​របស់​លោក​ ហេង ​ពៅ ​នោះ​សមត្ថកិច្ច​ដែល​ដឹកនាំ​ដោយ​លោក​ ម៉ក់ ជីតូ បាន​រកឃើញ​ប្រាក់​ដុល្លារ​ក្លែងក្លាយ​ក្រដាស​ ១០០ ​ចំនួន​ ៣ ​ម៉ឺន​ដុល្លារ​នៅ​លើ​តុ​ក្រៅ​ផ្ទះ​។ លុះ​ថ្ងៃ​បន្ទាប់​សមត្ថកិច្ច​បាន​ចូល​ឆែកឆេរ​ផ្ទះ​លោក​ ហេង ពៅ ​ម្តង​ទៀត​ក៏​បាន​រកឃើញ​ និង​ដកហូត​ប្រាក់​ដុល្លារ​សុទ្ធ​ ៣០ ​ម៉ឺន​ដុល្លារ​ដែល​ទុក​ក្នុង​ទូដែក​។ ​

ប៉ុន្តែ​លោក​ចៅក្រម​ស៊ើបសួរ​នៃ​សាលា​ដំបូង​ខេត្ត​កណ្តាល​ប្រាប់​លោក​ថា​តុលាការ​មិន​បាន​ចេញ​ដីកា​ឲ្យ​ឆែកឆេរ​លើក​ទី​ ២ ​ទេ​។

សំណុំ​រឿង​នេះ​ត្រូវ​សាលា​ដំបូង​រាជធានី​ភ្នំពេញ​ផ្តន្ទាទោស​លោក​ ហេង ពៅ ​នៅ​ថ្ងៃ​ ១៨ ​កញ្ញា​ឆ្នាំ​ ២០០៧ ដាក់​ពន្ធនាគារ​ ១៤ ​ឆ្នាំ​ចោទ​ពី​បទ​ «​រក្សា​ទុក​ប្រាក់​ដុល្លារ​ក្លែងក្លាយ​» ​និង​មួយ​ទៀត​ចោទ​​បទ «​បង្ខាំង​មនុស្ស​ខុស​ច្បាប់​» ​ដាក់​ពន្ធនាគារ​ ៥ ​ឆ្នាំ​។

លោក​ ហេង ពៅ ​ឆ្លើយ​ក្នុង​សវនាការ​ពី​ម្សិលមិញ​ថា​រឿង​នេះ​អយុត្តិធម៌​ណាស់ ដែល​អ្នក​ចូល​ឆែក​ផ្ទះ​លោក​គឺជា​សត្រូវ​ស្លាប់​រស់​ជាមួយ​គ្នា​។ លោក​ ពៅ ​ថា​ពេល​​សមត្ថកិច្ច​ចូល​ផ្ទះ​នោះ​គឺ​លោក​ ម៉ក់ ជីតូ ​បែរ​ជា​នៅ​ក្រៅ​ផ្ទះ ហើយ​រកឃើញ​ដុល្លារ​ក្លែងក្លាយ​លើ​តុ​កុំព្យូទ័រ​ជំនួយការ​លោក​ទៅ​វិញ​។

លោក​ថា​៖ «​គេ​មិន​ដែល​យក​លុយ​ទៅ​ដាក់​ក្រៅ​ផ្ទះ​ទេ​បើ​ទោះ​ជា​លុយ​នោះ​ក្លែងក្លាយ​ក៏ដោយ​។

ទោះ​យ៉ាង​ណា​ខ្ញុំ​ស្នើ​ដល់​តុលាការ​ចេញ​ដីកា​ឲ្យ​លោក​ ម៉ក់ ជីតូ ​យក​លុយ​ ៣០ ​ម៉ឺន​ដុល្លារ​របស់​ខ្ញុំ​ដែល​បាន​ពី​លក់​ផ្ទះ​មក​តម្កល់​នៅ​តុលាការ​វិញ គាត់​មិន​អាច​ដកហូត​លុយ​នោះ​ខុស​ច្បាប់​បាន​ទេ​»​។

លោក​ព្រះរាជអាជ្ញា​ ចាន់តារារស្មី ​​តំណាង​មហាអយ្យការ​សន្និដ្ឋាន​ថា​៖ «​រឿង​នេះ​តាម​អង្គហេតុ​ និង​អង្គច្បាប់​បញ្ជាក់​ថា​ជន​ជាប់ចោទ​មាន​ភ័ស្តុតាង​គ្រប់គ្រាន់​...​ខ្ញុំ​សូម​តម្កល់​សាលដីកា​នៅ​ដដែល​»​។

លោក​ នូ ចន្ថា មេធាវី​ចាត់តាំង​ការពារ​សិទ្ធិ​ឲ្យ​លោក​ពៅ​ក្នុង​រឿង​ប្រាក់​ដុល្លារ​ក្លែង​សន្និដ្ឋាន​ថា​កូន​​ក្តី​លោក​ពុំ​បាន​រក្សា​លុយ​ក្លែង​ដូច​ការ​ចោទ​ទេ ហើយ​បើ​លុយ​នោះ​ក្លែងក្លាយ​ក៏​មិនមែន​ធ្វើ​កោសល្យវិច័យ​នៅ​ក្រសួង​មហាផ្ទៃ​ដែរ ឯ​អ្នក​មាន​ជំនាញ​គួរ​ទៅ​ធនាគារ​។

លោក​ថា​កូនក្តី​លោក​ថា​លោក​ ម៉ក់ ជីតូ ​ជា​សត្រូវ​គ្នា​ដូច្នេះ​ភ័ស្តុតាង​នោះ​មិន​អាច​យក​ជា​ការ​បាន​ទេ​។ ​ម្យ៉ាង​ពេល​ឆែកឆេរ​លើក​ទី​ ២ ​គ្មាន​ដីកា​ទេ​ដែល​ជា​ការ​ខុស​ច្បាប់​។ លោក​ថា​៖ «...​ខ្ញុំ​សូម​តុលាការ​ដោះលែង​កូនក្តី​ខ្ញុំ​វិញ​»​។

ក្រោយ​ជំនុំជម្រះ​លោក​ចៅក្រម​​ ស៊ឹង បញ្ញាវុឌ្ឍ ​ប្រធាន​ក្រុមប្រឹក្សា​ជំនុំជម្រះ​ថ្លែង​ថា​សាលដីកា​នេះ​ប្រកាស​នៅ​ថ្ងៃ​ទី​ ២៧ ​កញ្ញា​៕

0

Comments

Please, login or register to post a comment