ភ្នំពេញៈ គណបក្សរាជានិយមហ្វ៊ុនស៊ិនប៉ិច កាលពីម្សិលមិញ បានបដិសេធព័ត៌មានរបស់ប្រព័ន្ធផ្សព្វផ្សាយក្នុងស្រុកមួយចំនួនដែលបានដកស្រង់ពីប្រភពអនាមិក ថា គណបក្សនេះបានតែងតាំងជនជាតិចិនម្នាក់ធ្វើជាអនុប្រធានគណបក្ស។
សារព័ត៌មាន Rasmei News កាលពីថ្ងៃអាទិត្យ បានរៀបរាប់រឿងរ៉ាវនេះតាមប្រព័ន្ធអនឡាញដោយបានដកស្រង់សម្តីមន្ត្រីគណបក្សហ្វ៊ុនស៊ិនប៉ិចម្នាក់ដែលបានលើកឡើងថាគណបក្សនេះបានតែងតាំងជនជាតិចិនម្នាក់ឈ្មោះ Jack Kise ឲ្យកាន់តំណែងជាអនុប្រធានគណបក្សដែលទង្វើនេះគឺខុសច្បាប់បើយោងទៅលើច្បាប់ស្តីពីគណបក្សនយោបាយ។
កាលពីខែមុនប្រធានគណបក្ស សម្តេចក្រុមព្រះ នរោត្តម រណឫទ្ធិ បានស្នើសុំការគាំទ្រផ្នែកហិរញ្ញវត្ថុពីចិនបន្ទាប់ពីមានការជួបជាមួយអ្នកការទូតម្នាក់ ហើយជាថ្មីម្តងទៀតគឺវាជាការរំលោភលើច្បាប់ស្តីពីគណបក្សនយោបាយ ប៉ុន្តែភ្លាមៗដំណឹងនេះត្រូវបានអ្នកនាំពាក្យគណបក្សបដិសេធ។
កាសែតរស្មីកម្ពុជា បានបញ្ជាក់រឿងរ៉ាវ ស្រដៀងគ្នាដែលបានលេចឡើងនៅក្នុងកាសែត Khmer Times ដែរ គឺថា៖«សមាជិកជាន់ខ្ពស់គណបក្សហ្វ៊ុនស៊ិនប៉ិច ម្នាក់បានប្រាប់រស្មីកម្ពុជាកាលពីថ្ងៃទី ១៣ ខែមករាថា សម្តេចក្រុមព្រះ នរោត្តមរណឫទ្ធិ ប្រធានគណបក្សហ្វ៊ុនស៊ិនប៉ិច បានតែងតាំងលោក Jack Kise ដែលជាជនជាតិចិនឲ្យធ្វើជាអនុប្រធានគណបក្សហ្វ៊ុនស៊ិនប៉ិច»។
កាលពីម្សិលមិញសម្តេចក្រុមព្រះ នរោត្តម រណឫទ្ធិ បានច្រានចោលព័ត៌មានលេចឮនេះដោយព្រះអង្គថ្លែងថាគណបក្សមិនបានធ្វើការតែងតាំងបែបនេះទេ។
សម្តេចក្រុមព្រះនរោត្តម រណឫទ្ធិ បានថ្លែងនៅខាងក្រៅកិច្ចប្រជុំពេញអង្គរដ្ឋសភានៅថ្ងៃនេះថា៖«ខ្ញុំបានឮអំពីរឿងនេះ។ វាមិនអាចទៅរួចទេ។ យើងមិនអាចតែងតាំង[នរណាម្នាក់] បានទេ លុះត្រាតែគាត់ជាពលរដ្ឋកម្ពុជា»។
លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច បាននិយាយថា គាត់ជាទីប្រឹក្សាគណបក្សដោយសំដៅទៅលោក «Jackie» គឺជាទីប្រឹក្សាយូរមកហើយរបស់គណបក្សហើយជាពលរដ្ឋកម្ពុជាមិនមែនជាជនជាតិចិនដូចដែលប្រព័ន្ធផ្សព្វផ្សាយមួយចំនួនបានលើកឡើងនោះទេ៕ NS