Search form

Login - Register | FOLLOW US ON

Logo of Phnom Penh Post newspaper Phnom Penh Post - អង្គការ​អភិរក្សសត្វ​​ លែងអណ្តើកហ្លួង​​ ២៥ ក្បាល​​នៅ​ខេត្ត​កោះ​កុង​

Content image - Phnom Penh Post
អណ្តើកហ្លួង ព្រលែងក្នុង​ដែនទឹកធម្មជាតិ​ ខេត្ត​កោះកុង នៅថ្ងៃ១៣ ខែវិច្ឆិកា ឆ្នាំ ២០១៧។ ហេង ជីវ័ន

អង្គការ​អភិរក្សសត្វ​​ លែងអណ្តើកហ្លួង​​ ២៥ ក្បាល​​នៅ​ខេត្ត​កោះ​កុង​

កោះកុង: សត្វ​អណ្តើកហ្លួង ២៥​​ ក្បាល ត្រូវ​បាន​ក្រុម​អភិរក្ស​សត្វ ​ព្រលែងនៅ​ក្នុងទឹក​ តាម​ដង​ព្រែក​ស្រែអំបិល ស្ថិត​ក្នុង​ខេត្ត​កោះ​កុង នា​​ព្រឹកមិញ​នេះ​ ខណៈដែល​សត្វ​ប្រភេទ​នេះ ជា​ប្រភេទ​រងគ្រោះ​និង​ជិត​ផុត​ពូជ​បំផុត​នៅ​លើ​ពិភព​លោក​។ នេះ​បើ​តាម​ការ​ប្រកាសព័ត៌មាន​របស់​សមាគម​អភិរក្សសត្វ​ព្រៃ​ (WCS) ថ្ងៃ​នេះ​។

លោក សោម ស៊ីថា ទី​ប្រឹក្សា​បច្ចេក​ទេស​គម្រោង​អភិរក្ស​ខេត្ត​កោះ​កុង​នៃសមាគម​អភិរក្សសត្វ​ព្រៃ​ (​WCS) បាន​ឲ្យ​ដឹង​ថា ខណៈពេលដែល​រដ្ឋាភិបាល​បាន​សម្រេច​ហាម​ឃាត់​ការ​បូម​ខ្សាច់​ នៅ​តំបន់ព្រែក​ស្រែ​អំបិល​ កាលពីពេល​ថ្មីៗនេះ​ ជា​រឿង​ល្អ​មួយ​សម្រាប់​ការ​ងារ​អភិរក្ស​សត្វ​អណ្តើក​​ហ្លួង ដោយសារ​​វា​បាន​​ជួយ​​ការ​ពារ​​និង ថែ​រក្សា​​ប្រព័ន្ធ​​ព្រែក​​នេះ​ ដែល​​ជា​​ទី​​ធម្មជាតិ​ និង​ជា​កន្លែង​ពងកូន​តែ​មួយ​គត់​របស់​អណ្តើក​ហ្លួងកម្ពុជា​។

លោក​បន្ត​ថា ៖ «យើង​នឹង​អាច​តាម​ដាន​បម្លាស់​ទី​ ស្វែង​យល់​អំពី​ទី​ជម្រក​ និង​ការ​រស់​រាន​នៃ​អណ្តើក​ហ្លួង​ដែល​លែង​ទៅ​ក្នុង​ធម្មជាតិ​នេះ​»។

លោក អ៊ុក​ វិបុល​ ប្រធាន​នាយក​ដ្ឋាន​អភិរក្ស​ជល​ផល​នៃ​រដ្ឋ​បាល​ជល​ផល​ ឲ្យ​ដឹងដែរ​​ថា រដ្ឋបាល​ជលផល​ និង​អង្គការ WCS កំពុង​ធ្វើការ​អភិរក្ស​សត្វ​អណ្តើកហ្លួងនេះអស់​ពេល​ជិត​ ២០ ​ឆ្នាំ​​ហើយ​។

លោកថ្លែង​ថា ៖ «ក្រៅពី​សកម្មភាព​អភិរក្ស​ដូច​ជា​ការ​ការពារ​សំបុក​ ការ​ការ​ពារ​ទី​ជម្រក​ និង​ការ​អប់រំ​ផ្សព្វ​ផ្សាយ​ជាដើម​ យើង​បាន​កសាង​មជ្ឈ​មណ្ឌល​អភិរក្ស​ប្រភេទ​សត្វ​ល្មូន​នៅ​ខេត្ត​កោះ​កុង ​ដើម្បី​ធ្វើការ​ចិញ្ចឹម​ ថែរក្សា​ និង​បង្កាត់​ពូជ​អណ្តើក​ជា​ដើម​»។

តាម​សេចក្តី​ប្រកាសព័ត៌មាន​របស់​អង្គការ WCS អណ្តើកហ្លួង មាន​វត្តមាន​តែ​នៅ​ប្រទេស​ ឥណ្ឌូនេស៊ី​ ម៉ាឡេស៊ី​ និង​ថៃ​ ហើយ​ចំនួន​វា​នៅ​លើ​សកល​លោក​មាន​តិច​ជាង ​៥០០ ​ក្បាល​ប៉ុណ្ណោះ​។ ចំណែ​កនៅ​កម្ពុជា សត្វ​អណ្តើក​នេះក៏បាន​ចាត់ជាប្រភេទកំពុង​រងគ្រោះ​ថ្នាក់​ផងដែរ​ ហើយ​ត្រូវ​បាន​ដាក់​ជា​ប្រភេទ​ល្មូន​តំណាង​ឲ្យ​ប្រទេស​កម្ពុជា​ ដោយ​ព្រះរាជ​ក្រឹត្យ​កាលពី​ឆ្នាំ ​២០០៥៕

0

Comments

Please, login or register to post a comment