កោះកុង៖ មន្ត្រីអង្គការសមាគមអភិរក្សសត្វព្រៃនៅកម្ពុជា (WCS) បានចាត់តាំងសមាជិកសហគមន៍ ៤ នាក់ឲ្យយាមសំបុកអណ្ដើកហ្លួងមួយសំបុក ស្ថិតនៅក្នុងប្រព័ន្ធព្រែកស្រែអំបិល ភូមិព្រះកែង ស្រុកស្រែអំបិល ខេត្តកោះកុង រហូតដល់ញាស់កូនក្រោយពីរកឃើញកាលពីដើមខែ កុម្ភៈ។
មន្ត្រីអង្គការសមាគមអភិរក្សសត្វព្រៃនៅកម្ពុជា (WCS) បានប្រាប់ឲ្យដឹងនៅព្រឹកមិញនេះថា ក្រុមអ្នកអភិរក្សរបស់រដ្ឋបាលជលផល និង អង្គការ WCS រួមទាំងប្រជាជនសហគមន៍ បានរកឃើញសំបុកអណ្តើកហ្លួង ចំនួន មួយសំបុក ដែលមានពងចំនួន ១៦ គ្រាប់នៅប្រព័ន្ធព្រែកស្រែអំបិល។
លោក អេង ម៉េងអ៊ី មន្ត្រីទំនាក់ទំនងអង្គការសមាគមអភិរក្សសត្វព្រៃនៅកម្ពុជា (WCS) និយាយថា សំបុកអណ្ដើកហ្លួងមួយនេះ ត្រូវបានរកឃើញកាលពីថ្ងៃទី០៣ ខែកុម្ភៈ ឆ្នាំ ២០១៨ កន្លងទៅនេះ ស្ថិតនៅក្នុងភូមិព្រះអង្គកែវ ស្រុកស្រែអំបិល ខេត្តកោះកុង។
លោកបានបញ្ជាក់ថា៖ «វាគឺជាសំបុកអណ្តើកហ្លួងទី ០១ ដែលត្រូវបានរកឃើញនៅក្នុងឆ្នាំ ២០១៨ នេះ។ បច្ចុប្បន្នអង្គការ WCS បានជួលសមាជិកសហគមន៍ចំនួន០៤នាក់ឲ្យយាមសំបុកអណ្តើកហ្លួងនេះរហូតដល់វាញាស់»។
អណ្តើកហ្លួង ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះ ជិតផុតពូជបំផុត និងស្ថិតក្នុងចំណោមអណ្តើកទាំង ២៥ ប្រភេទដែលកំពុង រងគ្រោះថ្នាក់ខ្លាំងជាងគេបំផុតនៅលើពិភពលោក។ ការដាក់ឈ្មោះអណ្តើក ហ្លួងយ៉ាងដូច្នេះ ពីព្រោះកាលពីមុន មានតែគ្រួសាររាជ្យវង្សប៉ុណ្ណោះ ដែលអាចសោយពងវាបាន។
ព្រះរាជក្រឹត្យ នស/រកត/០៣០៥/១៤៩ ចុះថ្ងៃទី ២១ ខែមីនា ឆ្នាំ២០០៥ បានដាក់បញ្ចូលអណ្តើកហ្លួងជាប្រភេទ សត្វល្មូនតំណាងឲ្យប្រទេសកម្ពុជា។
បើតាមការអះអាងរបស់លោក អ៊ិន ហ៊ុល មន្ត្រីរដ្ឋបាលជលផល ខេត្តកោះកុង ចាប់ពីពេលនេះរហូតដល់ខែមីនា គឺជារដូវកាលពងកូនរបស់សត្វអណ្តើកហ្លួង ក្រុមអ្នកអភិរក្សកំពុងតែសហការជាមួយប្រជាជនសហគមន៍ ដើរស្វែងរកទីតាំងសំបុកពងកូនរបស់ពួកវា និងរក្សាការពាររហូតដល់កូនវាញាស់។
លោកថ្លែងថា៖ «ក្រោយពីវាញ៉ាស់ យើងនឹងយកកូនអណ្តើកហ្លួង ទាំងនោះទៅកាន់មជ្ឈមណ្ឌលអភិរក្សប្រភេទសត្វល្មូនខេត្តកោះកុង ដើម្បីចិញ្ចឹម និងថែរក្សា រហូតដល់ពួកវាធំពេញវ័យទើបលែងទៅក្នុង ធម្មជាតិវិញ»៕