.jpg)
ភ្នំពេញៈ អតីតគ្រូបង្រៀនម្នាក់បានបដិសេធចំពោះមុខចៅក្រមសាលាឧទ្ធរណ៍ខណៈកំពុងនៅក្នុងសវនាការពីម្សិលមិញថា ខ្លួនមិនបានក្លែងឯកសារដូចការចោទទេ ប៉ុន្តែទទួលស្គាល់ថាបានចូលរួមផ្តិតមេដៃក្នុងការស្នើសុំដីជាមួយពលរដ្ឋ ១០២ នាក់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពតមែនកាលពីឆ្នាំ ២០១៦។
ខណៈចៅក្រមផ្តល់សិទ្ធិឲ្យបំភ្លឺក្នុងសវនាការ ជនជាប់ចោទថ្លែងថា គាត់ឈ្មោះ អ៊ឹង លី អាយុ ៥៤ ឆ្នាំរួមនឹងពលរដ្ឋដទៃទៀតបាននាំគ្នាចាប់យកដីធ្វើលំនៅឋាន និងដាំដំណាំបានផលទៅហើយក៏ស្រាប់តែមានក្រុមហ៊ុនមួយមកចរចាទិញដីដោយឲ្យ ១ ហិកតា ៣០០ ដុល្លារ តែពួកគាត់មិនព្រមលក់។
ជនជាប់ចោទបន្តថាដោយសារចង់បានដីកាន់កាប់ស្របច្បាប់ពួកគាត់បានផ្តិតមេដៃដើម្បីធ្វើសំណើទៅអភិបាលខេត្តដោយមានស្នាមមេដៃ ១០២ នាក់ស្នើសុំដីទំហំ ៥ ហិកតាក្នុងមួយគ្រួសារ។ ប៉ុន្តែក្នុងនោះគាត់ស្គាល់មុខប្រហែលតែ ៣០ ភាគរយទេ ក្រៅពីនោះមិនដឹងគេមកពីណាឡើយ។
ជនជាប់ចោទបញ្ជាក់ថា៖ «រឿងនេះខ្ញុំបានចូលរួមផ្តិតមេដៃមែន តែអក្សរសរសេរលើសំណើនោះមិនមែនជាអក្សរខ្ញុំទេ។ បន្ទាប់មកតុលាការចេញដីកាប្រាប់ខ្ញុំនៅថ្ងៃអាទិត្យទៀត បើយ៉ាងហោចណាស់ក៏ត្រូវប្រាប់មុន ១ អាទិត្យដែរដើម្បីឲ្យខ្ញុំអាចរៀបចំឯកសារឡើងតុលាការ។ ខ្ញុំមិនបានធ្វើមេខ្លោងក្នុងរឿងនេះទេ សូមតុលាការដោះលែងខ្ញុំ។ ពេលគេចាប់ខ្ញុំគេវាយខ្ញុំសន្លប់ហើយចងដៃជើងទៀត»។
ទោះយ៉ាងណាតាមអង្គហេតុបង្ហាញថារឿងនេះជនជាប់ចោទជាមេខ្លោងហើយក្នុងសំណើមានសរសេរអាសយដ្ឋានរបស់អ្នកស្នើដីខុសច្បាប់ដើម។ ក្នុងពាក្យបណ្តឹងចោទថាជនជាប់ចោទបាននាំមនុស្សច្រើននាក់ និងមានម៉ូតូ ២០ គ្រឿងដើម្បីជួបជុំគ្នា ព្រោះជនជាប់ចោទប្រាប់ពលរដ្ឋថា ថ្ងៃនោះមានលោក ហ៊ុនម៉ាណែត និងលោក ហ៊ុន តូ ចុះទៅចែកអំណោយ។
សំណុំរឿងនេះត្រូវសាលាដំបូងខេត្តកំពតផ្តន្ទាទោសដាក់គុក ១ ឆ្នាំកន្លះ និងពិន័យប្រាក់ ២ លានរៀលរួមឲ្យសងទៅដើមបណ្តឹងដើម្បីជួសជុលការខូចខាត ១០ លានរៀលផងកាលពីថ្ងៃទី ៣១ ខែតុលា ឆ្នាំ ២០១៧។
ក្នុងសវនាការនោះដែរលោកព្រះរាជអាជ្ញា លី លន់ តំណាងមហាអយ្យការសន្និដ្ឋានថា៖ «រឿងនេះជនជាប់ចោទសារភាព ហើយតុលាការខេត្តបានដាក់ទោសគាត់ ១ ឆ្នាំកន្លះ។ ខ្ញុំសូមក្រុមប្រឹក្សាពិចារណាតាមច្បាប់»។
លោក មួង សុគន្ធ មេធាវីការពារសិទ្ធិឲ្យជនជាប់ចោទសន្និដ្ឋានថា ក្នុងរឿងនេះកូនក្តីលោកមិនបានក្លែងឯកសារដូចការចោទទេ ហើយក៏មិនមែនមេខ្លោងដែរ។ គាត់គ្រាន់តែជាសមាជិកម្នាក់ក្នុងចំណោម ១០២ នាក់ប៉ុណ្ណោះ ហើយគាត់ស្គាល់មនុស្សតែ ៣០ ភាគរយទេក្នុង ១០២ នាក់នោះ។
លោកថា៖ «ចំពោះតុលាការបង្គាប់ឲ្យសងទៅដើមបណ្តឹង ១០ លានរៀលជួសជុលការខូចខាតនោះខ្ញុំថា ដើមបណ្តឹងដូចជាគ្មានអ្វីខូចខាតទេ ព្រោះគាត់ប្តឹងរឿងក្លែងឯកសារ។ យោងមាត្រា ៣៥១ នៃក្រមនីតិវិធីព្រហ្មទណ្ឌ និងមាត្រា ៣៨ នៃច្បាប់រដ្ឋធម្មនុញខ្ញុំសូមតុលាការដោះលែងកូនក្តីខ្ញុំឲ្យមានសេរីភាពវិញ»។
ក្រោយជំនុំជម្រះលោក ប៉ុល សំអឿន ប្រធានក្រុមប្រឹក្សាជំនុំជម្រះប្រាប់ថាសាលដីកានេះនឹងប្រកាសនៅថ្ងៃទី ២៨ ខែកុម្ភៈ ខាងមុខនេះ៕
