Search form

Login - Register | FOLLOW US ON

Logo of Phnom Penh Post newspaper Phnom Penh Post - អតីត​មន្ត្រី​បក្ស​ប្រឆាំង​ចុះ​ចូល​នឹង​បក្ស​កាន់​អំណាច​ច្រើន​ឡើង

Content image - Phnom Penh Post
អ្នកធ្វើដំណើរ​ឆ្លង​កាត់​ទី​ស្នាក់​ការ​កណ្តាល​គណបក្ស​សង្រ្គោះ​ជាតិ ដែល​ទើប​តែ​ត្រូវ​បាន​រំលាយ។ ហុង មិនា

អតីត​មន្ត្រី​បក្ស​ប្រឆាំង​ចុះ​ចូល​នឹង​បក្ស​កាន់​អំណាច​ច្រើន​ឡើង

ភ្នំពេញៈ ក្រោយ​គណបក្ស​សង្គ្រោះ​ជាតិ​ត្រូវ​បាន​រំលាយ​សម្ទុះ​ចុះ​ចូល​ជាមួយ​គណបក្ស​ប្រជាជន​កម្ពុជា​នៃ​អតីតមន្ត្រី​សង្គ្រោះ​ជាតិ​មាន​ការ​កើនឡើង ខណៈ​អតីតមន្ត្រី​ជាន់​ខ្ពស់​នៃ​គណបក្ស​ប្រឆាំង​មួយ​នេះ​បាន​គេច​ខ្លួន និង​បិទ​ទូរស័ព្ទ​។

គិត​មក​ត្រឹម​ថ្ងៃ​ទី​ ២០ ខែ​វិច្ឆិកា​ម្សិលមិញ​ចំនួន​អតីត​មន្ត្រី​គណបក្ស​សង្គ្រោះ​ជាតិ​ដែល​ត្រូវ​បាន​រំលាយ​ហើយ​បាន​ចុះចូល​ជាមួយ​គណបក្ស​ប្រជាជន​កម្ពុជា​មាន​ចំនួន​សរុប​ ៣៩០ ​នាក់​ក្នុង​នោះ​ក្រុមប្រឹក្សា​ឃុំ​សង្កាត់​ ៣៥៦ ​នាក់​ដែល​មាន​មេឃុំ​ចៅសង្កាត់​ ៣៣ ​នាក់​ជំទប់​ទី​មួយ​ ៣៣ ​នាក់​ជំទប់​ទី​ពីរ​ ៦៩ ​នាក់ សមាជិក​ ២២១ ​នាក់​ក្រុម​ប្រឹក្សា​ស្រុក​ក្រុង​ ៣០ ​នាក់​ក្រុមប្រឹក្សា​ខេត្ត​ ៣ ​នាក់​តំណាងរាស្ត្រ​ ១ ​នាក់​មកពី​ ២៤៤ ​ឃុំ​សង្កាត់​។ នេះ​បើ​តាម​តួលេខ​របស់​លោក អ៊ក គឹមហាន ប្រធាន​នាយកដ្ឋាន​សរុប​នៃ​គណបក្ស​ប្រជាជន​កម្ពុជា​ដែល​គ្រប់គ្រង​លើ​តួលេខ​របស់​អ្នក​ចុះចូល​។

តាម​សារព័ត៌មាន ហ្វ្រេសញូវ លោក​នាយក​រដ្ឋមន្ត្រី ហ៊ុន សែន បាន​ថ្លែង​ថា ការ​ចុះ​ចូល​ដែល​ទទួល​បាន​តំណែង​អាច​ធ្វើ​ឡើង​ត្រឹម​ថ្ងៃ​ ២៤ ខែ​វិច្ឆិកា​ប៉ុណ្ណោះ​។ ​

លោក​ថា​៖ «​ការ​ស្ម័គ្រ​ចិត្ត​ចុះ​ចូល​ជាមួយ​គណបក្ស​ប្រជាជន​កម្ពុជា​មាន​ត្រឹម​ថ្ងៃ​ទី​ ២៤ ខែ​វិច្ឆិកា ប៉ុណ្ណោះ​ព្រោះ​ការ​រៀបចំ​បញ្ជី​ក្រុម​ប្រឹក្សា​ឃុំ​សង្កាត់​ថ្មី ដើម្បី​បញ្ជូន​ទៅ​កាន់ គ.ជ.ប នឹង​ត្រូវ​បិទ​ត្រឹម​ថ្ងៃ​ទី​ ២៤ ខែ​វិច្ឆិកា ប្រសិន​បើ​ចាប់​ពី​ថ្ងៃ​ទី​ ២៥ ខែវិច្ឆិកា​ទៅ​ការ​ចុះ​ចូល​នៅ​តែ​បន្ត​ដដែល ប៉ុន្តែ​មិន​ផ្តល់​តួនាទី​អ្វី​នោះ​ទេ​»​។

លោក សុខ ឥសាន អ្នក​នាំពាក្យ​គណបក្ស​ប្រជាជន​បាន​ថ្លែង​ថា​ការ​ចុះចូល​មាន​សម្ទុះ​ខ្លាំង​ក្រោយ​ពេល​តុលាការ​កំពូល​រំលាយ​គណបក្ស​សង្គ្រោះ​ជាតិ ដោយ​មន្ត្រី​ទាំង​នោះ​យល់​ពី​ផែនការ​លក់​ខ្លួន​ឲ្យ​ជនបរទេស និង​រំលោភ​លទ្ធិប្រជាធិបតេយ្យ​។ ​

លោក​ថ្លែង​ថា​៖ «​មិនមែន​ឧត្តមគតិ​ខ្លួន​ផង ធ្វើ​តែ​តាម​គេ​ញាក់​ពី​ក្រោយ​មក​អាហ្នឹង​បងប្អូន​មាន​ការ​ភ្ញាក់រឭក ការ​ប្រកួត​ប្រជែង​មិន​ធ្វើ​តាម​លទ្ធិប្រជាធិបតេយ្យ​ទេ​»​។

ភ្នំពេញ​ប៉ុស្តិ៍​ព្យាយាម​ទាក់ទង​អតីត​មន្ត្រី​គណបក្ស​សង្គ្រោះ​ជាតិ​ជាង​ ១០ ​នាក់​កាលពី​ម្សិលមិញ​ដើម្បី​សុំ​អត្ថាធិប្បាយ ប៉ុន្តែ​លេខ​ទូរស័ព្ទ​ភាគច្រើន​មិន​អាច​ទាក់ទង​បាន​។ ​

លោក​ ជា ជីវ អតីត​ប្រធាន​គណៈកម្មាធិការ​ប្រតិបត្តិ​គណបក្ស​សង្គ្រោះ​ជាតិ​ខេត្ត​បាត់ដំបង​បាន​ថ្លែង​ថា​ក្រោយ​ពេល​រំលាយ​គណបក្ស​ប្រឆាំង​​មាន​មន្ត្រី​ ១០ ​នាក់​ក្នុង​ខេត្ត​នេះ​រួម​ទាំង​មេឃុំ​ម្នាក់​ផង​បាន​ចុះ​ចូល​ជាមួយ​គណបក្ស​កាន់​អំណាច​។

លោក ជា ជីវ ថ្លែង​ថា​៖ «​កាលពី​មុន​គាត់​គិត​ថា នឹង​មាន​ការ​ដោះស្រាយ​សម្រប​សម្រួល​នយោបាយ ហើយ​វា​អត់​វិធានការ​ច្បាប់​ណា​មួយ​ដែល​ធ្វើឲ្យ​មាន​ការ​រំលាយ​បក្ស​ទេ​។ គាត់​មាន​សង្ឃឹម និង​ជំនឿ​។ ​តែ​ក្រោយ​ថ្ងៃ​ ១៦ ខែ​វិច្ឆិកា វិធីសាស្ត្រ​របស់​គណបក្ស​កាន់​អំណាច​ផ្លាស់ប្តូរ បត់បែន គាត់​ឲ្យ​រុះរើ​ស្លាក​គណបក្ស​ផ្តល់​តួនាទី​ក្រុមប្រឹក្សា​ដល់​អ្នក​ចុះចូល ហើយ​ទី​ ២ ​ពាក់ព័ន្ធ​នឹង​ការ​ប្រជុំ​របៀប​រដ្ឋបាល​។ គាត់​ប្រើ​អភិបាលស្រុក អភិបាលក្រុង​អញ្ជើញ​ក្រុមប្រឹក្សា​។ គាត់​ហៅ​ប្រជុំ​ហើយ​និយាយ​បញ្ចុះបញ្ចូល​ដាក់​សម្ពាធ​...»​។

លោក​បន្ត​ថា​​ អតីតមន្ត្រី​ជាន់​ខ្ពស់​គណបក្ស​លោក​ភាគច្រើន​បាន​គេច​ខ្លួន​ទៅ​នៅ​កន្លែង​មាន​សុវត្ថិភាព​៕

0

Comments

Please, login or register to post a comment

ព័ត៌មានពាក់ព័ន្ធ