ភ្នំពេញៈ អតីតមន្ត្រីជាន់ខ្ពស់គណបក្សហ៊្វុនស៊ិនប៉ិចដែលត្រូវបានបញ្ចប់មុខតំណែងលើសំណុំរឿងទំនាស់ផ្ទៃក្នុងដ៏ចម្រូងចម្រាសបានព្រមានពីការបែកបាក់គណបក្សមួយនេះកាន់តែខ្លាំងសាជាថ្មី បើសម្ដេចក្រុមព្រះ នរោត្តម រណឫទ្ធិ នៅតែបន្តស្ដាប់មន្ត្រីដែលតែងតែអែបអប ញុះញង់ឲ្យព្រះអង្គសាងកំហុសម្ដងហើយម្ដងទៀតនោះ។
ការព្រមានបែបនេះបានធ្វើឡើង បន្ទាប់ពីអតីតមន្ត្រីជាន់ខ្ពស់គណក្សហ៊្វុនស៊ិនប៉ិចចំនួន ៦ រូបក្នុងចំណោម ៧ រូបត្រូវបានសម្តេចក្រុមព្រះនរោត្តម រណឫទ្ធិ ប្រធានគណបក្ស ហ៊្វុនស៊ិនប៉ិចបានបណ្តេញពួកគេចេញពីគណបក្ស កាលពីចុងខែមករាបានដាក់ពាក្យប្តឹងទៅសាលាដំបូងរាជធានីភ្នំពេញកាលពីថ្ងៃទី ១២ ខែកុម្ភៈ ដើម្បីប្រឆាំងនឹងសេចក្តីសម្រេចរបស់គណបក្សនេះដោយចាត់ទុកថាធ្វើឡើងដោយ «អយុត្តិធម៌»។
យ៉ាងណាក្តីបន្ទាប់ពីចាកចេញពីវិមានរដ្ឋសភាកាលពីថ្ងៃពុធ សម្ដេចក្រុមព្រះនរោត្តម រណឫទ្ធិ មានបន្ទូលថា បញ្ហានៃការបញ្ចប់មុខតំណែងមន្ត្រីទាំង ៧ រូបកាលពីពេលថ្មីៗនេះគឺត្រូវដោះស្រាយដោយផ្ទៃក្នុង មិនគួរបញ្ជូនទៅតុលាការនោះទេ។
ព្រះអង្គមានបន្ទូលថា៖ «ខ្ញុំនរោត្តម រណឫទ្ធិ ជាប្រធាន ខ្ញុំមិនដែលដេញអ្នកណាទេ ប៉ុន្តែខ្ញុំចុះហត្ថលេខាមែន គេឲ្យខ្ញុំចុះហត្ថលេខាខ្ញុំត្រូវចុះ ដើម្បីឲ្យគណបក្សហ៊្វុនស៊ិនប៉ិចដែលជាគណបក្សរាជានិយមតែមួយគត់នៅព្រះរាជាណាចក្រកម្ពុជាចេះរួបរួមគ្នា...»។
ព្រះអង្គបន្ថែមថា៖ «ជាសិទ្ធិរបស់ខ្ញុំ ខ្ញុំមានឱកាសមួយចង់ជម្រាបអ្នកកាសែតទាំងអស់ អ្នកណាចង់ប្ដឹងអ្នកណា ឲ្យប្ដឹងទៅស្រេចតែគេចង់ប្ដឹង ក៏ប៉ុន្តែខ្ញុំមានយោបល់មួយដែលក្នុងឋានៈខ្ញុំជាប្រធាននៃគណបក្សហ៊្វុនស៊ិនប៉ិចអត់ឲ្យមានការបែកបាក់គ្នាទេ។ មានបញ្ហាអ្វី យើងដោះស្រាយបញ្ហាផ្ទៃក្នុងកុំមានបញ្ហាអ្វីឡើងទៅតុលាការ»។
អតីតមន្ត្រីជាន់ខ្ពស់ទាំង ៦ នាក់របស់គណបក្សហ៊្វុនស៊ិនប៉ិចដែលត្រូវបញ្ចប់មុខតំណែងរួមមាន លោក សេង ហាក់ស្រ៊ុន, លោក មៀច សំរួល, លោក កាន់ វុឌ្ឍី, លោក សួន ផល្លី, លោក គឹម រ៉ាវី និង លោក ណុប ផន។
លោក មៀច សំរួល អតីតប្រធានចលនាយុវជនគណបក្សហ៊្វុនស៊ិចប៉ិច និងជាឧបការីផ្ទាល់របស់សម្ដេចក្រុមព្រះដែលត្រូវបានបក្សបញ្ចប់មុខតំណែងថ្លែងប្រាប់ភ្នំពេញប៉ុស្ដិ៍ពីម្សិលមិញថា៖ «កន្លងមកព្រះអង្គតែងមានបន្ទូលថា ចង់ឲ្យរួបរួមសាមគ្គី ប៉ុន្តែដោយសារជឿលើមន្ត្រីមួយចំនួនធ្វើឲ្យមានការយល់ខុសពីមួយទៅមួយ»។
លោកចោទជាសំណួរថា៖ «ហេតុអីបានជាទៅដកសមាជិកដែលអត់មានកំហុសខុសឆ្គង ដែលកន្លងមកគ្នាខំតស៊ូជួយគណបក្សលះបង់ទាំងកម្លាំងចិត្ត កម្លាំងកាយ មានទាំងលុយកាក់អីជាច្រើន ដើម្បីឲ្យគណបក្ស [រីកចម្រើន] ហើយការដកគេផុយៗ ដោយគ្រាន់តែមានការស្នើពីមន្ត្រីមួយចំនួនដែលញុះញង់ចាក់រុក ហើយគាត់ស៊ីញ៉េហ្នឹងគឺជាការទទួលខុសត្រូវក្នុងនាមជាប្រធានបក្ស?»។
លោកថ្លែងថា៖ «បើសិនជាសម្ដេចព្រះប្រធាននៅតែប្រកាន់គោលជំហរក្នុងការសម្របសម្រួល ការផ្សះផ្សា ឬបង្រួបបង្រួមសាមគ្គី ការបែកបាក់គឺអត់មាន តែបើសិនព្រះអង្គនៅតែបន្តសកម្មភាពជឿទៅលើមន្ត្រីដែលខិលខូច មន្ត្រីដែលញុះញង់ មន្ត្រីដែលអែបអប លូនក្រាប...» នោះការបែកបាក់នឹងកើតឡើងកាន់តែធ្ងន់ធ្ងរ។
លោក គឹម រ៉ាវី អតីតប្រធានក្រុមការងារគណបក្សហ៊្វុនស៊ិនប៉ិចប្រចាំខេត្តសៀមរាបដែលមានឈ្មោះក្នុងពាក្យបណ្ដឹងដែរនោះយល់ស្របថា ហ៊្វិនស៊ិនប៉ិចនឹងមានការបែកបាក់ធ្ងន់ធ្ងរដូចក្នុងអតីតកាល។
លោកថា ហ៊្វុនស៊ិនប៉ិចគួររៀនពីយុទ្ធសាស្ត្រឈ្នះៗរបស់គណបក្សកាន់អំណាច។ «បើមានមនុស្ស ២ នាក់ដឹកនាំរបៀបនេះហើយធ្វើរបៀបនេះ អយុត្តិធម៌របៀបនេះ គ្មានការលើកទឹកចិត្តដល់អ្នកធ្វើ អត់មានរីកចម្រើនទេ»។
ប៉ុន្តែលោក ញេប ប៊ុនជិន អ្នកនាំពាក្យ និងជាអនុប្រធានគណបក្សហ៊្វុនស៊ិនប៉ិច បានច្រានចោលថានឹងគ្មានការបែកបាក់ណាមួយដូចអតីតកាលទេ។ «គណបក្សហ៊្វុនស៊ិនប៉ិចអត់មានការបែកបាក់ដូចការគិតឃើញរបស់មនុស្ស ៣ ឬ ៤ នាក់ហ្នឹងទេ ពីព្រោះនេះជាកម្លាំងមួយដែលសេសសល់យើងនិយាយមែនទែនទៅគឺជាមាសសុទ្ធអ្នកដែលមិនសុទ្ធដូចយើងដេញជម្រះ មាសទឹកសុទ្ធអ៊ីចឹងពាំសំណគឺទៅអស់ហើយ វានៅសល់តែមាសសុទ្ធទេ»។
លោកបណ្ឌិត ឡៅ ម៉ុងហៃ អ្នកវិភាគនយោបាយយល់ថា៖ «វានឹងមិនអាចមានសន្ដិភាព និងសណ្តាប់ធ្នាប់នៅក្នុងស្ថាប័នណាមួយបានទេរាល់ពេលដែលថ្នាក់ដឹកនាំរបស់ខ្លួនមិនមានក្រមសីលធម៌ដឹកនាំរឹងមាំ ហើយនឹងមិនអាចមានក្រមសីលធម៌គ្រប់គ្រងរឹងមាំបានទេ នៅពេលដែលស្ថាប័ន និងថ្នាក់ដឹកនាំរបស់ស្ថាប័ននោះមិនឈរលើការពិត និងយុត្តិធម៌»៕ NS