Search form

Login - Register | FOLLOW US ON

Logo of Phnom Penh Post newspaper Phnom Penh Post - អត្រា​បុរស​រួមភេទ​ជាមួយ​បុរស​ មាន​ការ​កើនឡើង

Content image - Phnom Penh Post
ទិដ្ឋភាព​នៅ​ក្នុង​សន្និសីទ​កាសែត​ស្ដីពី​អ្នក​ស្រឡាញ់​ភេទ​ដូច​គ្នា​នា​ពេល​កន្លង​មក។ ហុង មិនា

អត្រា​បុរស​រួមភេទ​ជាមួយ​បុរស​ មាន​ការ​កើនឡើង

ភ្នំពេញៈ ការ​សិក្សា​ថ្មី​មួយ​បាន​រកឃើញ​ថា​ចំនួន​បុរស​ដែល​រួមភេទ​ជាមួយ​បុរស (MSM) នៅ​កម្ពុជា​បាន​កើនឡើង ៥០ ភាគរយ​ខ្ពស់​ជាង​ការ​ប៉ាន់ស្មាន​កាល​ពី​លើក​មុន​ហើយ​ការ​ប៉ាន់ស្មាន​ក៏​បាន​កំណត់​ថា​អត្រា​ឆ្លង​មេរោគ​អេដស៍​ក្នុង​ចំណោម​សហគមន៍​នេះ​បាន​កើនឡើង​ផង​ដែរ​ក្នុង​រយៈពេល​ប្រាំ​មួយ​ឆ្នាំ​ចុង​ក្រោយ​នេះ។

ដោយ​បាន​ចេញ​ផ្សាយ​កាលពី​ខែ​មុន​នៅ​ក្នុង​ទស្សនាវដ្ដី American Journal of Epidemiology and Infectious Disease ការសិក្សា​នេះ​បាន​ផ្តោត​លើ​ការ​សិក្សា​យ៉ាង​ទូលំ​ទូលាយ​បំផុត​នៅ​ក្នុង​សហគមន៍​ក្រុម​បុរស​ស្រឡាញ់​ភេទ​ដូច​គ្នា​នៅ​កម្ពុជា​រហូត​មក​ទល់​ពេល​នេះ​ដោយ​បាន​សិក្សា​នៅ​ក្នុង​ខេត្ត​ក្រុង​ចំនួន ១១ រួម​ទាំង​ទីក្រុង​ភ្នំពេញ​ផង​ដែរ។

ក្រុម​អ្នក​ចេញ​របាយការណ៍​នេះ​បាន​ប៉ាន់​ប្រមាណ​ថា​មាន​ ១៨ នាក់​ក្នុង​ចំណោម​បុរស​មួយ​ពាន់​នាក់​ដែល​មាន​អាយុ​លើស​ពី ១៥ ឆ្នាំ​រស់នៅ​ក្នុង​ទីក្រុង​បាន​រួមភេទ​ជាមួយ​បុរស​ដូច​គ្នា​ខណៈ​ដែល​មាន​ចំនួន ៥ នាក់​ក្នុង​ចំណោម​មួយ​ពាន់​នាក់​រស់នៅ​តាម​ទីជនបទ​បាន​រួមភេទ​ជាមួយ​បុរស​ភេទ​ដូច​គ្នា​ដែរ។

ពួកគេ​បាន​គណនា​បន្ថែម​ទៀត​ថា​ បុរស​ដែល​រួមភេទ​ជាមួយ​បុរស​ដូច​គ្នា​មាន​ប្រហែល ៣១០០០ នាក់​នៅ​កម្ពុជា​បាន​កើនឡើង​ប្រមាណ ៥០ ភាគរយ​ពី​ការ​ព្យាករ​កាល​ពី​ឆ្នាំ ២០០៨ ដែល​មាន​តែ ២១៣០០ នាក់​ប៉ុណ្ណោះ។

អ្នក​ដឹកនាំ​ការ​ស្រាវជ្រាវ​នេះ​គឺ​លោក​វេជ្ជបណ្ឌិត Siyan Yi សន្មត​ថា​ការ​រកឃើញ​ពី​កំណើន​នេះ​អាច​ជា​វិធីសាស្ត្រ​មួយ​ធ្វើ​ឱ្យ​ប្រសើរ​ឡើង​ទៅ​ដល់​តំបន់​មួយ​ចំនួន​ដែល​មាន​ក្រុម​បុរស​ស្រឡាញ់​បុរស​ដូច​គ្នា​ដោយ​មិន​ទាន់​ទទួល​បាន​ការ​គាំទ្រ។

នៅ​ក្នុង​សេចក្តី​អធិប្បាយ​តាមរយៈ​អ៊ីមែល​លោក Marie-Odile Edmond ប្រធាន​អង្គការ UNAIDS ប្រចាំ​ប្រទេស​កម្ពុជា​បាន​ថ្លែង​ថា​មាន​តែ ៦៥ ភាគរយ​ប៉ុណ្ណោះ​ក្នុង​ចំណោម​បុរស​ស្រឡាញ់​ភេទ​ដូច​គ្នា​ទាំង​អស់​ចំនួន ៣១០០០ នាក់​ដែល​យើង​អាច​ឈោង​ចាប់​បាន​ហើយ​ពួកគេ​មាន​ហានិភ័យ​ខ្ពស់​ពី​ការ​ឆ្លង​មេរោគ​អេដស៍។

លោក Edmond សរសេរ​ថា៖ «ក្រៅ​ពី​ចំនួន​នេះ​គឺ​ពួកគេ​មិន​បាន​កំណត់​អត្តសញ្ញាណ​របស់​ខ្លួនឯង​ថា​ជា​បុរស​ស្រឡាញ់​ភេទ​ដូចគ្នា​នោះ​ទេ​ពួកគេ​មិន​បង្ហាញ​ទេ​ហើយ​ពួកគេ​ប្រឈម​ហានិភ័យ​ទៅ​នឹង​ការ​ឆ្លង​មេរោគ​អេដស៍​ដោយសារ​តែ​យើង​មិន​ដឹង​ ឬ​គេ​មិន​បង្ហាញ​ជាដើម»។

លោក Edmond ក៏​បាន​ទទួល​ស្គាល់​ផង​ដែរ​ថា​ការ​រកឃើញ​ពី​ការ​សិក្សា​នេះ​គឺថា​ប្រេវ៉ាឡង់​របស់​មេរោគ​អេដស៍​នៅ​ក្នុង​ចំណោម​បុរស​ស្រឡាញ់​ភេទ​ដូចគ្នា​បាន​កើនឡើង​ពី ២,១ ភាគរយ​ក្នុង​ឆ្នាំ ២០១០ ដល់ ២,៣ ភាគរយ​នៅ​សព្វ​ថ្ងៃ​នេះ។

លោក Edmond សរសេរ​ថា៖ «​វា​នៅ​តែ​ខ្ពស់​ហើយ​ពិត​ណាស់​គឺ​យើង​មិន​បាន​គ្រប់គ្រង​ដើម្បី​ធ្វើ​ឲ្យ​ចំនួន​នេះ​ថយ​ចុះ​នោះ​ទេ»។ លោក​បាន​កត់សម្គាល់​ថា​អត្រា​នៃ​ការ​ឆ្លង​មេរោគ​នេះ​គឺ​នៅ​មាន​កម្រិត​ទាប​នៅ​ឡើយ​បើ​ប្រៀបធៀប​ទៅ​នឹង​សហគមន៍​បុរស​រួមភេទ​ជាមួយ​បុរស​នៅ​ក្នុង​តំបន់​នេះ។

លោក​វេជ្ជបណ្ឌិត Yi បាន​ថ្លែង​កាលពី​ថ្ងៃ​អង្គារ​ថា​នៅ​មាន​តម្រូវការ​ជាច្រើន​ទៀត​ដែល​ត្រូវ​ធ្វើ​ដើម្បី​អប់រំ​ដល់​ក្រុម​បុរស​ស្រឡាញ់​ភេទ​ដូច​គ្នា​នៅ​ប្រទេស​កម្ពុជា​លើ​ការ​អនុវត្ត​ដែល​មាន​សុវត្ថិភាព​ដូចជា​ការ​ប្រើ​ស្រោម​អនាម័យ​ជា​ដើម​ហើយ​ក្នុង​ចំណោម​អ្នក​ឆ្លើយ​សំណួរ​ទាំងអស់​នៅ​ក្នុង​របាយការណ៍​នៃ​ការ​សិក្សា​នេះ​បាន​បង្ហាញ​ថា​គឺ​មាន​តិច​ជាង ៧០ ភាគរយ​ដែល​តែងតែ​ប្រើ​ស្រោម​អនាម័យ​បាន​ជាប់លាប់​ក្នុង​ការ​រួមភេទ​កាលពី​ខែ​មុន។

លោក​ក៏​បាន​កត់សម្គាល់​ថា​តម្រូវការ​ជាច្រើន​ទៀត​ដែល​ត្រូវ​ធ្វើ​ដើម្បី​ប្រឆាំង​នឹង​ការ​រើសអើង​ប្រឆាំង​នឹង​ការ​ផ្តល់​សេវា​ថែទាំ​សុខភាព​សម្រាប់​ក្រុម​បុរស​រួមភេទ​ជាមួយ​បុរស។

លោក​វេជ្ជបណ្ឌិត Yi បាន​ថ្លែង​ថា៖ «យើង​បាន​រកឃើញ​ថា​ក្រុម​បុរស​ស្រឡាញ់​បុរស​ជាច្រើន​ត្រូវ​ទទួល​រង​ការ​រើសអើង​ដោយ​អ្នក​ផ្តល់​សេវា​ថែទាំ​សុខភាព»។ «នេះ​អាច​ជា​ឧបសគ្គ​មួយ​ដល់​ការ​ថែទាំ​សុខភាព និង​ការ​អប់រំ​ពី​មេរោគ​អេដស៍»។

លោក ស្រ៊ន ស្រ៊ុន ស្ថាបនិក​អង្គការ​សិទ្ធិ​មនុស្ស NGO CamASEAN បាន​ធ្វើការ​ជាមួយ​ក្រុម​បុរស​ស្រឡាញ់​ភេទ​ដូច​គ្នា​នៅ​គ្រប់​ទាំង ២៥ ខេត្ត​ក្រុង។ លោក​បាន​ថ្លែង​កាលពី​ថ្ងៃ​អង្គារ​ថា​ការ​រើសអើង​គឺ​មាន​ច្រើន​នៅ​ក្នុង​ចំណោម​អ្នក​ផ្តល់​សេវា​ថែទាំ​សុខភាព។

លោក ស្រ៊ុន បាន​និយាយ​ថា៖ «អ្នក​ផ្តល់​សេវា​ថែទាំ​សុខភាព​តែងតែ​សួរ​ថា​ «តើ​អ្នក​រួមភេទ​ជាមួយ​បុរស​យ៉ាង​ដូចម្តេច? ជា​ជាង​ការ​ព្យាយាម​ដើម្បី​ព្យាបាល​ពួកគេ»។ «ពួកគេ​បាន​និង​កំពុង​បំផ្លាញ​ភាព​ឯកជន​ក្រុម​បុរស​ស្រឡាញ់​បុរស»។

តំណាង​ក្រសួង​សុខាភិបាល​មិន​បាន​ឆ្លើយតប​ទៅ​នឹង​សំណើ​សុំ​ការ​អត្ថាធិប្បាយ​ទេ៕ NS

0

Comments

Please, login or register to post a comment