Search form

Login - Register | FOLLOW US ON

Logo of Phnom Penh Post newspaper Phnom Penh Post - អភិបាល​ខេត្ត​បញ្ជា​ឲ្យ​ស៊ើប​រឿង​ មន្ត្រី​ឲ្យ​វៀតណាម ​ចូល​កាប់​ឈើ

Content image - Phnom Penh Post
ឈើ​ហុប​ខ្មែរ​ដែល​ត្រូវ​ឈ្មួញ​វៀតណាម​ចូល​មក​កាប់​។ រូបថត ហ្វ្រេសញូ

អភិបាល​ខេត្ត​បញ្ជា​ឲ្យ​ស៊ើប​រឿង​ មន្ត្រី​ឲ្យ​វៀតណាម ​ចូល​កាប់​ឈើ

មណ្ឌលគិរីៈ មន្ត្រី​នគរបាល​ម្នាក់ និង​មន្ត្រី​យោធា​ម្នាក់​ដែល​កំពុង​ឈរ​ជើង​នៅ​ប៉ុស្តិ៍​របៀង​ការពារ​ព្រំដែន​ក្បាលដំរី​ក្នុង​ស្រុក​ពេជ្រាដា​ត្រូវ​បាន​ចៅហ្វាយ​ខេត្ត​មណ្ឌលគិរី​ដាក់​បញ្ជា​ឲ្យ​ស៊ើបអង្កេត​រឿង​សង្ស័យ​ថា​បាន​ឃុបឃិត​គ្នា​បើក​ដៃ​ឲ្យ​ជនជាតិ​វៀតណាម​ចូល​មក​កាប់​ឈើ​។

លោក​ ស្វាយ សំអ៊ាង អភិបាល​ខេត្ត​មណ្ឌលគិរី​ បាន​ឲ្យ​ដឹង​កាលពី​ម្សិលមិញ​ថា លោក​បាន​កោះ​ហៅ​មេបញ្ជាការ​របស់​ពួកគេ​ដោយ​ដាក់​បទបញ្ជា​ឲ្យ​មេ​អង្គភាព​នីមួយៗ​ធ្វើការ​ស៊ើបអង្កេត និង​ចាត់​វិធានការ​លើ​កូនចៅ​របស់​ខ្លួន​ដែល​កំពុង​ឈរជើង​នៅ​តាម​បន្ទាត់​ព្រំដែន​ខាង​លើ និង​តាម​ខ្សែបន្ទាត់​ព្រំដែន​ដទៃ​ទៀត ដើម្បី​ឈាន​ទៅ​រក​ការ​រឹតបន្តឹង និង​លុប​បំបាត់​បទល្មើស​ព្រៃឈើ​ឆ្លងដែន និង​បទល្មើស​ផ្សេងៗ​ទៀត​ឲ្យ​ខាង​តែ​បាន និង​ចាត់​វិធានការ​​ហៅ​មន្ត្រី​ខិលខូច​មួយ​ចំនួន​មក​អប់រំ​ណែនាំ​ទៅ​តាម​វិន័យ​របស់​អង្គភាព​។

លោក​បញ្ជាក់​ថា​៖ «​ខ្ញុំ​បាន​ដាក់​បទបញ្ជា​ទៅ​ហើយ ប៉ុន្ដែ​លទ្ធផល​យ៉ាង​ណា​ខ្ញុំ​មិន​ទាន់​ដឹង​ទេ​។ ប្រសិន​បើ​រកឃើញ​ថា​ពួកគាត់​បាន​ប្រព្រឹត្ត​កំហុស​ឆ្គង​ណា​មួយ​ពិតប្រាកដ​មែន យើង​នឹង​ពិន័យ​តាម​ច្បាប់​។ ការ​ដែល​ខ្ញុំ​ដាក់​បញ្ជា​ឲ្យ​ស៊ើបអង្កេត​នេះ​គឺ​ដឹង​តាម​ព័ត៌មាន​ដែរ ប៉ុន្ដែ​ខ្ញុំ​មិន​មាន​ភ័ស្ដុតាង​ច្បាស់លាស់​ទេ អ៊ីចឹង​បាន​ជា​ខ្ញុំ​ថា​ឲ្យ​ស៊ើប​សិន​»​។

លោក អ៊ុក សំណាង ​ស្នងការ​ខេត្ត​មណ្ឌលគិរី​បាន​ឲ្យ​ដឹង​ថា​លោក​ទើប​តែ​ទទួល​បាន​បទបញ្ជា​ពី​លោក​អភិបាលខេត្ត​ដែរ​ហើយ​លោក​ក៏​បាន​កោះ​ហៅ​មន្ត្រី​ដែល​ពាក់ព័ន្ធ​នឹង​ការ​សង្ស័យ​មក​សួរនាំ ប៉ុន្ដែ​មិន​ទាន់​ចេញ​ជា​លទ្ធផល​ទេ​។

លោក​បន្ត​ថា​ ករណី​នេះ​បើ​លោក​រកឃើញ​ថា​លោក មុន ភីនី ពិតជា​ឃុបឃិត​បើក​ឲ្យ​មាន​ជំនួញ​ឈើ​ឆ្លងដែន​តាម​ប៉ុស្តិ៍​ក្បាល​ដំរី​នេះ​មែន​លោក​នឹង​ចាត់​វិធានការ​តាម​វិន័យ​របស់​កងកម្លាំង​។

លោក កែវ សុភគ៌ ប្រធាន​មន្ទីរ​បរិសា្ថន​ខេត្ត​មណ្ឌលគិរី​បាន​ឲ្យ​ដឹង​ថា​ ឈើ​ហុប​ចំនួន ១៥ ដើម​ដែល​ត្រូវ​បាន​បង្ក្រាប​នេះ​ គឺជា​ប្រភេទ​ឈើ​ផ្ចឹក និង ​ប្រភេទ​ឈើ​ស្រឡៅ​បង្ក្រាប​ដោយ​កម្លាំង​ដែន​ជម្រក​សត្វ​ព្រៃ​ស្រែពក និង​កម្លាំង​នគរបាល​ដែល​បម្រើការ​ក្នុង​ដែន​ជម្រក ប៉ុន្ដែ​ពុំ​មាន​ការ​ចូលរួម​សហការ​ពី​កម្លាំង​យោធា និង​ នគរបាល​នៅ​ប៉ុស្តិ៍​ក្បាលដំរី​ នោះ​ទេ​។

លោក​បញ្ជាក់​ថា៖ «​ឥឡូវ​​នេះ​មន្ត្រី​នគរបាល និង​យោធា​ទាំង​ពីរ​នាក់​នេះ​ត្រូវ​បាន​ថ្នាក់​លើ​ដក​យក​មក​បញ្ឈរជើង​ចោល​នៅ​នឹង​កន្លែង​ធ្វើការ​របស់​ពួកគាត់​សិន ហើយ​ពួកគាត់​អាច​នឹង​រកឃើញ​កំហុស​ផ្សេង​ទៀត ខណៈ​ដែល​តុលាការ​កំពុង​ធ្វើការ​លើ​រឿង​នេះ​»​។

លោក​បន្ថែម​ថា​ជាក់ស្ដែង​កាលពី​អំឡុង​ដើម​ខែ​ កញ្ញា ​ពួកគេ​បាន​អនុញ្ញាត​ឲ្យ​ជនជាតិ​វៀតណាម​ចូល​មក​កាប់ និង​ ដឹក​ជញ្ជូន​ឈើ​ចេញ​ទៅ​ប្រទេស ​វៀតណាម​ ចំនួន​ ២ ​រថយន្ត​កែច្នៃ និង​សេសសល់​ឈើ​ហុប​ចំនួន​ ១៥ ដើម​ត្រៀម​ដឹក​ចេញ​ទៅ ​វៀតណាម តែ​ត្រូវ​បាន​​ក្រុម​មន្ត្រី​បរិស្ថាន​នៃ​ដែន​ជម្រក​សត្វ​ព្រៃ​ស្រែ​ពក​បង្ក្រាប​បាន​កាលពី​ថ្ងៃ​ទី​ ៣ ខែ​កញ្ញា ​ឆ្នាំ ២០១៧ ហើយ​ឈើ​នៅ​សេសសល់​ដែល​មន្ត្រី​ជំនាញ​បង្ក្រាប​នេះ​គឺ​មាន​ចម្ងាយ​តែ ​៥០០ ម៉ែត្រ ពី​ប៉ុស្តិ៍​ក្បាលដំរី​ប៉ុណ្ណោះ​។

លោក កែវ សុភគ៌ បង្ហើប​ថា​លោក មុន ភីនី មាន​តួនាទី​ជា​មេប៉ុស្តិ៍​ស្ដីទី​ការពារ​ព្រំដែន​ក្បាលដំរី និង​លោក កែវ សុភ័ក្រ មាន​តួនាទី​ជា​មេបញ្ជាការ​កង​អនុសេនា​តូច​លេខ ១ បាន​លួច​ឃុបឃិត​ជាមួយ​ជនជាតិ​វៀតណាម​បើក​ឲ្យ​មាន​ការ​កាប់​ឈើ​ក្នុង​ដែន​ជម្រក​សត្វព្រៃ​ស្រែពក​ជារឿយៗ​។

លោក មុន ភីនី និង​លោក កែវ សុភ័ក្រ មិន​អាច​ទាក់ទង​ដើម្បី​សុំ​ការ​បំភ្លឺ​បាន​ទេ​ កាលពី​ថ្ងៃ​ម្សិលមិញ​៕

0

Comments

Please, login or register to post a comment

ព័ត៌មានពាក់ព័ន្ធ