ត្បូងឃ្មុំៈ មន្ត្រីសហគមន៍និងពលរដ្ឋប្រមាណជាង ៣០០ នាក់ កាលពីម្សិលមិញ បានចោទថា អាជ្ញាធរស្រុកមេមត់ថា បានរារាំងពួកគេមិនឲ្យប្រារព្ធទិវាសិទ្ធិនារីអន្តរជាតិ ៨ មីនា ដោយមិនប្រាប់ហេតុផលច្បាស់លាស់ បើទោះជាពួកគេបានសុំច្បាប់និងមានការយល់ព្រមហើយក៏ដោយ ។
លោក ផុន សុផល ប្រធានសហគមន៍កសិករកម្ពុជា (CCFC) ប្រចាំខេត្តត្បូងឃ្មុំ បានប្រាប់ថា ម្សិលមិញសមាគម CCFC និងពលរដ្ឋនៅភូមិ ជ្រៃឡើង ឃុំជាំក្រវៀន បានប្រារព្ធទិវាសិទ្ធិនារីអន្តរជាតិ ៨ មីនា ប៉ុន្តែត្រូវអាជ្ញាធររារាំងមិនឲ្យធ្វើ បើទោះណាជាសហគមន៍បានជូនដំណឹង និង មានការយល់ពីអាជ្ញាធរឃុំក៏ដោយ។
លោកបញ្ជាក់ថា៖ «ពលរដ្ឋយើងជួបគ្នានិងសុំច្បាប់ត្រឹមត្រូវអស់ហើយ ហើយគាត់បានវាយត្រាក៏គាត់បានចារលើក្រដាសហ្នឹងឲ្យពលរដ្ឋចូលរួមរួចហើយ ប៉ុន្តែដោយសារមានលក្ខខណ្ឌមួយដែលយើងមើលឃើញនៅក្នុងហ្នឹងគឺឃុំក៏រៀបចំធ្វើនៅសាលាឃុំដែរ តែនៅសាលាឃុំពុំមានអ្នកចូលរួម… អ៊ីចឹងធ្វើឲ្យគាត់ហ្នឹងមករំខានយើងទៅ»។
លោក ថេង សាវឿន អគ្គលេខាធិការ(CCFC)បានថ្លែងថា ពលរដ្ឋមិនប្រារព្ធទិវាសិទ្ធិនារីអន្តរជាតិ៨មីនារួមគ្នាជាមួយអាជ្ញាធរឃុំដោយសារអាជ្ញាធរមិនទទួលយកបញ្ហា ដែលពួកគាត់ស្នើសុំធ្វើជាប្រធានបទឬដាក់របៀបវារៈក្នុងកម្មវិធី។
លោកបន្តថា ការច្រានចោលសំណើនិងរារាំងនេះ គឺជាការរើសអើងនិងមិនចង់ឲ្យពួកគាត់មានសិទ្ធិទទួលយកបទពិសោធផ្សេងៗពីអ្នកជំនាញ។ លោកថា អាជ្ញាធរហាក់ដូចជាកំពុងខ្លាចស្រមោលខ្លួនឯង ខណៈដែលពលរដ្ឋប្រមូលផ្ដុំគ្នា ហើយបែរជាភ្ជាប់ពួកគាត់នឹងទៅបដិវត្តន៍ពណ៌ឬចលនាសង្គ្រោះជាតិទៅវិញ។
លោកបន្ថែមថា៖«ពលរដ្ឋក្នុងសហគមន៍ខំបោះឆ្នោតឲ្យដែលពួកគាត់ជាម្ចាស់សិទ្ធិ ម្ចាស់អំណាច ពួកគាត់ចង់ដឹងចង់ឮ ផ្ទុយទៅវិញយើងឃើញថា នៅពេលអាជ្ញាធរ បានឡើងកាន់ការងារបែរជាមិនបំពេញការងារក៏ដូចជាមិនបម្រើសេវាកម្មប្រជាពលរដ្ឋបែរជារើសអើងនិងរឹតត្បិតសេរីភាពនៃការជួបប្រជុំដែលមានចែងនៅក្នុងច្បាប់ជាតិនិងអន្តរជាតិដែលប្រទេសកម្ពុជាយើងបានទទួលយកមកអនុវត្តនិងផ្តល់សច្ចាប័ន»។
លោក បេង រិទ្ធី នាយប៉ុស្ដិ៍រដ្ឋបាលឃុំក្ររៀន បានថ្លែងថា លោកធ្វើតាមបញ្ជាថ្នាក់លើឲ្យបិទវេទិកានោះ បើទោះជាសមាគមន៍CCFC បានសុំច្បាប់ត្រឹមត្រូវក៏ដោយ ព្រោះអាជ្ញាធរស្រុកឲ្យប្រារព្ធពិធីរួមគ្នា ប៉ុន្ដែសហគមន៍បែរជាទៅធ្វើនៅផ្ទះអ្នកភូមិផ្សេងវិញ។
លោកបន្តថា អាជ្ញាធរក៏បានប្រាប់ឲ្យពួកគេមកធ្វើនៅសាលាឃុំដែរ ប៉ុន្ដែពួកគេ បានរំសាយចេញដោយខ្លួនឯង ខណៈអាជ្ញាធរមិនអនុញ្ញាតឲ្យប្រារព្ធពិធីនៅច្រើនកន្លែងនោះ។ លោកបញ្ជាក់ថា៖«រឿងសកម្មជនចលនាសង្គ្រោះជាតិនោះ យើងមិនបានចោទប្រកាន់អ្វីពួកគាត់ទេ យើងគ្រាន់តែបិទវេទិកា…កុំទៅធ្វើកន្លែងច្រើន»។
លោក ហុង គឹមហឿន អធិការស្រុកមេមត់ បានថ្លែងថា លោកមិនបានដឹងពីមូលហេតុនៃការបិទវេទិកានេះទេ ព្រោះជាបញ្ជារបស់លោកស្នងការខេត្តប្រាប់ឲ្យចុះបិទ។ «ខ្ញុំធ្វើតាមបទបញ្ជារបស់ថ្នាក់លើ ហើយមូលហេតុអ្វីនោះ ខ្ញុំមិនបានដឹងទេ សុំលោកទៅសួរខាងស្នងការខេត្តវិញ»។
លោក ត សុធី ស្នងការរងនគរបាលខេត្តត្បូងឃ្មុំបានប្រាប់ថា លោកមិនបានបញ្ជាឲ្យបិទវេទិកានេះទេ ដោយលោកថា បើសហគមន៍បានសុំច្បាប់ពីអាជ្ញាធរមូលដ្ឋាននោះ នឹងគ្មានអ្នកណាហ៊ានទៅបិទទេ ប៉ុន្ដែប្រហែលជាមិនបានសុំច្បាប់ត្រឹមត្រូវទើបបិទបែបនេះ។
លោកបញ្ជាក់ថា៖ «អត់មានទេ ប៉ូលិសខ្ញុំ ខ្ញុំមិនអនុញ្ញាតឲ្យធ្វើបែបនេះទេ ប៉ុន្ដែអ្វីដែលសំខាន់គឺមូលដ្ឋាន ព្រោះមូលដ្ឋានគេមានសិទ្ធិឲ្យធ្វើឬមិនឲ្យធ្វើ ចំណែកខាងខ្ញុំនេះ ខ្ញុំគ្រាន់តែបញ្ជូនកម្លាំងទៅស៊ើបអង្កេត និងថតរូបផ្ញើមកខេត្តមើលទេ ខ្ញុំអត់បានបញ្ជាឲ្យបិទវេទិកាគេទេ។ អ៊ីចឹងលោកទៅសួរអាជ្ញាធរមូលដ្ឋាន ប្រហែលជាពួកគាត់ជាអ្នកបិទទេ ខ្ញុំអត់ទាន់បានមើលរបាយការណ៍ច្បាស់លាស់ទេ»។
បើតាមតំណាងសហគមន៍នៅថ្ងៃម្សិលមិញនេះ គឺពលរដ្ឋនៅឃុំជាំក្រវៀន និងសម្ព័ន្ធនៃសហគមន៍កសិករកម្ពុជា (CCFC) បាននាំគ្នារៀបចំប្រារព្ធទិវាសិទ្ធិនារីអន្តរជាតិ៨មីនា ក្រោមប្រធានបទភាពស្មើគ្នារវាងបុរសនិងស្ត្រីក្នុងសេចក្ដីសម្រេចចិត្តដែលមានប្រជាពលរដ្ឋក្នុងសហគមន៍ចូលរួមប្រមាណជាង ៣០០ នាក់ប៉ុន្តែត្រូវអាក់ខានវិញបន្ទាប់ពីអាជ្ញាធររារាំង៕