ស្វាយរៀងៈ អាជ្ញាធរស្រុករមាសហែកកាលពីម្សិលមិញបានចុះបិទវេទិកាសាធារណៈមួយដែលរៀបចំឡើងដោយសម្ព័ន្ធសហគមន៍កសិករកម្ពុជា CCFC ដោយបញ្ជាក់ថា CCFC មិនបានសុំច្បាប់ពីអាជ្ញាធរមូលដ្ឋាន ខណៈដែលប្រជាពលរដ្ឋក្នុងតំបន់នេះក៏ធ្លាប់នាំគ្នាឡើងមកតវ៉ានៅភ្នំពេញសុំឲ្យរដ្ឋាភិបាលជួយអន្តរាគមន៍ដោះស្រាយវិវាទដីធ្លីរបស់ពួកគាត់។ នេះបើតាមលោក ម៉ឺន រតនា អគ្គលេខាធិការរង CCFC។
លោក ម៉ឺន រតនា បានឲ្យដឹងថាវេទិកានេះធ្វើឡើងនៅឃុំអំពិល ស្រុករមាសហែកដោយមានសមាជិកចូលរួមជាង ៤០ នាក់ក្រោមប្រធានបទស្ដីពីការទទួលបានសេវាកិច្ចការគាំពារសង្គមហៅកាត់ ប.ស.ស គឺមានន័យថាក្រុមរបស់លោកពន្យល់ឲ្យពលរដ្ឋដែលធ្វើការងារក្នុងសេដ្ឋកិច្ចក្រៅប្រព័ន្ធទាំងអស់ឲ្យទៅចុះឈ្មោះជាមួយអង្គការ សមាគមណាមួយដើម្បីមានឱកាសបានទៅចុះឈ្មោះយកប័ណ្ណ ប.ស.ស ដូចនិយោជកដទៃទៀតដែរ។
លោកបន្តថាដោយមន្ត្រីនគរបាលឃុំ និងស្រុកប្រហែល ៥ នាក់បានមកសួររកលិខិតអនុញ្ញាតពីក្រសួងមហាផ្ទៃ និងពីអាជ្ញាធរខេត្តស្វាយរៀង ប៉ុន្ដែភ្លាមៗនោះក្រុមការងារលោកមិនមានលិខិតនោះទេ។ តែលោកថាលោកបានដាក់លិខិតជូនដំណឹងដល់អាជ្ញាធរខេត្ត និងអាជ្ញាធរមូលដ្ឋានរួចរាល់ហើយកាលពីសប្ដាហ៍មុន។ «ប៉ុន្ដែមន្ត្រីខេត្តហាក់មានការយឺតយ៉ាវក្នុងការជូនដំណឹងនេះ ហើយអាជ្ញាធរមូលដ្ឋាន បែរជាឆ្លើយថាមិនដឹងរឿងទៅវិញ ខណៈអាជ្ញាធរស្រុកបានមករារាំងពួកយើង។ ខ្ញុំថា វាមិនមែនជាបញ្ហាអ្វីធ្ងន់ធ្ងរទេ ដោយគ្រាន់តែអាជ្ញាធរខេត្តជូនដំណឹងឲ្យអាជ្ញាធរមូលដ្ឋានយឺតយ៉ាវ ហើយចំណុចនេះ ដែលខ្ញុំក៏មិនចង់មានរឿងវែងឆ្ងាយដែរ ក៏សម្រេចរំសាយកម្មវិធីនេះចោលតែម្ដង»។
លោក សួន សីហា តំណាងសហគមន៍ប្រចាំខេត្តស្វាយរៀងឲ្យដឹងថា សមត្ថកិច្ចបានចុះមកបិទវគ្គបណ្ដុះបណ្ដាលដែលមានប្រជាពលរដ្ឋចូលរួមជាង ៤០ នាក់ដោយរកលេសថា មិនមានលិខិត និងច្បាប់អនុញ្ញាត។
លោកបញ្ជាក់ថា៖ «ក្នុងអំឡុងពេលអាជ្ញាធរចុះមកនេះ ពលរដ្ឋ និងអាជ្ញាធរបានជជែកគ្នាទាំងមាត់តូច មាត់ធំដាក់គ្នាខ្លាំងៗដែរ ព្រោះអាជ្ញាធរហាមមិនឲ្យពលរដ្ឋថតរូប និងរត់ទៅដណ្ដើមទូរស័ព្ទពីពលរដ្ឋ និងលុបរូបថតនោះចោលវិញផងដែរ ប៉ុន្ដែមិនមានហិង្សាអ្វីធ្ងន់ធ្ងរនោះទេ»។
លោក សម សំអុល អធិការស្រុករមាសហែកបានបដិសេធធ្វើអធិប្បាយជុំវិញករណីនេះដោយលោកថា កំពុងជាប់រវល់។
ប៉ុន្ដែលោក ញ៉ាញ ផែន នាយប៉ុស្ដិ៍អំពិលថ្លែងថាអាជ្ញាធរនឹងមិនបិទកម្មវិធីការជួបជុំនេះទេ បើសិនពួកគាត់បានសុំច្បាប់ត្រឹមត្រូវ ឬក៏ជូនដំណឹងដល់អាជ្ញាធរមូលដ្ឋាន ប៉ុន្តែនេះអាជ្ញាធរមូលដ្ឋានគ្រប់ជាន់ថ្នាក់មិនបានដឹងទេ។ លោកថា៖ «ខ្ញុំដឹងហើយថា អង្គការគាត់បានចុះបញ្ជីនៅក្រសួងមហាផ្ទៃត្រឹមត្រូវ ប៉ុន្ដែពេលដែលគាត់ធ្វើបេសកកម្មហ្នឹងមិនបានសុំច្បាប់ត្រឹមត្រូវហើយក៏ខុសពីច្បាប់ទើបតែបង្កើតថ្មីនេះទៀត។ ពេលយើងទៅពន្យល់ចឹងទៅពួកគាត់ក៏រំសាយហើយក៏អត់មានជជែកគ្នាអីដែរ»។
លោក ថេង សារឿន ប្រធាន (CCFC) បានលើកឡើងថាសកម្មភាពរបស់អាជ្ញាធរនេះគឺជាការរំខានការងារ និងមានចេតនាមិនចង់ឲ្យពលរដ្ឋមានឱកាសបានជួបជុំជាមួយក្រុមការងារលោក ព្រោះលោកបានដាក់លិខិតមួយទៅអាជ្ញាធរខេត្ត និងមានលិខិតពីក្រសួងមហាផ្ទៃរួចរាល់ហើយ។
លោកបន្តថា លោកជំរុញឲ្យអាជ្ញាធរមូលដ្ឋានបញ្ឈប់សកម្មភាពគំរាមកំហែងគ្រប់រូបភាពនិងចូលរួមដោះស្រាយបញ្ហា និងករណីទំនាស់ដីធ្លីដោយសន្តិវិធីជាមួយពលរដ្ឋដើម្បីឲ្យប្រជាពលរដ្ឋមានការយល់ដឹងពីបញ្ហាសង្គម និងឆាប់បានដីធ្លី សម្រាប់បង្កបង្កើនផលចិញ្ចឹមជីវិត ខណៈពេលនេះជីវភាពរបស់ពួកគាត់កំពុងតែលំបាកខ្លាំង។ «វាគឺជាលេសរបស់អាជ្ញាធរដែលមិនចង់ឲ្យមានការជួបជុំរបស់ប្រជាពលរដ្ឋ ហើយប្រជាពលរដ្ឋក៏មិនពេញចិត្តនឹងទង្វើរបស់អាជ្ញាធរដែរ ព្រោះវាជាការបិទសិទ្ធិខ្លាំងបំផុត។ មួយវិញទៀតអាជ្ញាធរមូលដ្ឋាន ហាក់ដូចជាព្រួយបារម្ភយ៉ាងខ្លាំងចំពោះករណីជួបជុំរបស់ប្រជាពលរដ្ឋ ហើយក៏បរាជ័យក្នុងការដោះស្រាយបញ្ហាវិវាទដីធ្លីរហូតដល់ពលរដ្ឋខ្លួនឯងខំស្វះស្វែងរកដំណោះស្រាយពីអាជ្ញាធរថ្នាក់ជាតិ»។
លោក ម៉ែន វិបុល អភិបាលខេត្តស្វាយរៀងមិនអាចទាក់ទងសុំអធិប្បាយបានទេ។
កាលពីថ្ងៃទី ១៣ ខែមីនាពលរដ្ឋនៅខេត្តស្វាយរៀងចំនួន ៤ នាក់ដែលបានមកដាក់ញត្តិនៅភ្នំពេញសូមឲ្យស្ថាប័នពាក់ព័ន្ធជួយអន្តរាគមន៍ដោះស្រាយបញ្ហាដីធ្លីត្រូវបានអាជ្ញាធរកោះហៅទៅសួររកអ្នកនៅពីក្រោយខ្នង និងបានចោទប្រកាន់ការប្រមូលផ្ដុំរបស់ពួកគេថា អាចក្លាយជាបដិវត្តន៍ពណ៌ ឬចលនាសង្គ្រោះជាតិ។
ក្នុងនោះដែរពលរដ្ឋ ២៦ សហគមន៍មកពីខេត្តចំនួន ៤ ប្រមាណ ៣០០ នាក់កាលពីថ្ងៃទី ១២ មីនា បានមកប្រមូលផ្តុំគ្នានៅភ្នំពេញ ដោយយកញត្តិពាក់ព័ន្ធនឹងវិវាទដីធ្លីទៅដាក់នៅទីស្តីការគណៈរដ្ឋមន្ត្រី និងក្រសួងរៀបចំដែនដី នគរូបនីយកម្ម និងសំណង់ ខណៈពលរដ្ឋជាង ៣០០ នាក់ផ្សេងទៀតមកពីខេត្តស្វាយរៀងត្រូវបានអាជ្ញាធរហាមឃាត់៕