.jpg)
គ្រោងផ្ទះដែលអាជ្ញាធរថាពលរដ្ឋសង់នៅលើដីក្រុមហ៊ុនវៀតណាម។ រូបថត សហការី
មណ្ឌលគិរីៈ អាជ្ញាធរស្រុកកែវសីមាបានដាក់កំហិតឲ្យពលរដ្ឋចំណាកស្រុករុះរើផ្ទះ និងតង់ ៨៨ ខ្នងដែលសង់ខុសច្បាប់ចេញពីដីសម្បទានសេដ្ឋកិច្ចរបស់ក្រុមហ៊ុនវៀតណាមប៊ិនភឿក ១ ក្នុងរយៈពេល ១ សប្តាហ៍។
ពលរដ្ឋចំណាកស្រុកប្រមាណជា ៦០ នាក់មកពីខេត្តកំពង់ចាម ក្រចេះ ត្បូងឃ្មុំ និងព្រៃវែងជាដើមបាននាំគ្នាលួចសង់ផ្ទះ និងតង់ឈើជាង ៨០ នៅក្នុងដីសម្បទានសេដ្ឋកិច្ចក្រុមហ៊ុនប៊ិនភឿក ១ ដែលស្ថិតនៅក្នុងភូមិឃុំស្រែព្រះ ស្រុកកែវសីមា។
បន្ទាប់ពីទទួលបានព័ត៌មានពីការសាងសង់ផ្ទះ និងតង់ដោយខុសច្បាប់នោះមកលោក នួន សារ៉ន អភិបាលស្រុកកែវសីមា និងសមត្ថកិច្ចពាក់ព័ន្ធបានចុះទៅពិនិត្យកាលពីម្សិលមិញ និងពន្យល់ប្រាប់ពលរដ្ឋចំណាកស្រុកទាំងនោះពីបញ្ហាផ្លូវច្បាប់ ការទន្ទ្រានយកដីខុសច្បាប់ និងការផ្តល់ដីសម្បទានសេដ្ឋកិច្ចជាដើម។
ប៉ុន្តែលោក នួន សារ៉ន មិនអាចធ្វើអត្ថាធិប្បាយបន្ថែមបានទេដោយលោកថាជាប់រវល់។ ទោះយ៉ាងណាលោកបាននិយាយប្រាប់ពលរដ្ឋតាមរយៈខ្សែវីដេអូឃ្លីបថា៖ «បើអត់មានដី,បងប្អូនត្រូវធ្វើលិខិតស្នើសុំពីអាជ្ញាធរមូលដ្ឋានរបស់បងប្អូនរស់នៅ...មកដល់ដំណាក់កាលនេះហើយអ្នកណាក៏យល់ពីច្បាប់ដែរ។ បញ្ហាពិសេសដីដែលបងប្អូនមកនៅនេះបងប្អូនមានដឹងថាដីនេះជាដីក្រុមហ៊ុនទេ?»។
លោកបន្តថា ក្រុមហ៊ុនវិនិយោគសម្បទានសេដ្ឋកិច្ចគឺមានច្បាប់ត្រឹមត្រូវពីរាជរដ្ឋាភិបាលដើម្បីដាំកៅស៊ូ ហើយក្រុមហ៊ុនបង់ពន្ធជូនរដ្ឋាភិបាលវិញ។
លោកអភិបាលបានបញ្ជាក់ថា៖ «គាត់ [ក្រុមហ៊ុន] មិនមែនមានសិទ្ធិមកចូលរំលោភកាន់កាប់តាមអំពើចិត្តទេ។ គាត់មានច្បាប់ទម្លាប់។ ករណីនេះបងប្អូនមកសង់លើដីក្រុមហ៊ុន។ ១ ទៀតបើក្រៅដីក្រុមហ៊ុនដូចជាដីសាធារណៈរបស់រដ្ឋ បងប្អូនទាំងអស់ កងកម្លាំងរួមទាំងខ្ញុំ ក៏គ្មានសិទ្ធិចូលកាប់ធ្វើផ្ទះធ្វើចម្ការដែរ»។
លោក សុក រដ្ឋា អ្នកសម្របសម្រួលអង្គការអាដហុកខេត្តមណ្ឌលគិរីបានឲ្យដឹងថាអាដហុកនឹងចុះអង្កេតករណីនេះដើម្បីឲ្យដឹងថា តើពលរដ្ឋគាត់ក្រីក្រខ្វះដីពិតប្រាកដ ឬមានបុគ្គល និងអ្នកមានអំណាចណាជាអ្នកនៅពីក្រោយរឿងនេះ។
លោកក៏បានបន្ថែមផងដែរថា បើគ្មានដីធ្វើកសិកម្ម និងសង់លំនៅឋានមែនពលរដ្ឋត្រូវដាក់ពាក្យស្នើសុំពីអាជ្ញាធរមូលដ្ឋានរបស់ខ្លួនហើយអាជ្ញាធរក៏គួរតែធ្វើការណែនាំពីរបៀបក៏ដូចជានីតិវិធីរដ្ឋបាលក្នុងការដាក់ពាក្យស្នើសុំដីសម្បទានសង្គមកិច្ចផងដែរ ព្រោះថាចំណេះដឹងពលរដ្ឋមួយចំនួននៅមានកម្រិត។
លោក រដ្ឋា ថ្លែងថា៖ «បើអាចអាជ្ញាធរគួរតែចៀសវាងប្រើអំពើហិង្សាលើពលរដ្ឋ និងបណ្តេញចេញទោះគាត់មានការខុសឆ្គងយ៉ាងណាដោយ។ អាជ្ញាធរគួរមានវិធានការអប់រំ និងធ្វើកិច្ចសន្យាដែលមិនគួរប្រើវិធានការក្តៅ ដូចជាចាប់ចងប៉ះពាល់ដល់រាងកាយពលរដ្ឋទេ»៕
