Search form

Login - Register | FOLLOW US ON

Logo of Phnom Penh Post newspaper Phnom Penh Post - អាជ្ញាធរ​រារាំង​ការ​ដើរ​ដង្ហែ​ទាមទារ​ឲ្យ​ដោះលែង​អ្នក​ការពារ​ធម្មជាតិ

អ្នកភូមិ​ស្រែក​តវ៉ា​នៅ​ខាង​មុខ​សាលា​ដំបូង​ខេត្ត​កោះកុង​កាលពី​ម្សិលមិញ​។
អ្នកភូមិ​ស្រែក​តវ៉ា​នៅ​ខាង​មុខ​សាលា​ដំបូង​ខេត្ត​កោះកុង​កាលពី​ម្សិលមិញ​។ រូបថត សហការី

អាជ្ញាធរ​រារាំង​ការ​ដើរ​ដង្ហែ​ទាមទារ​ឲ្យ​ដោះលែង​អ្នក​ការពារ​ធម្មជាតិ

កោះកុងៈ មាន​ការ​ប៉ះទង្គិច​គ្នា​មួយ​ប្រាវ​រវាង​អាជ្ញាធរ​​ក្រុង​ខេមរភូមិន្ទ​ និង​​​ពលរដ្ឋ​ជាង ៣០ នាក់​ដែល​បាន​ដើរ​ដង្ហែ​ក្បួន​តវ៉ា​ទាមទារ​ឲ្យ​ដោះលែង​យុវជន​ចលនា​មាតា​ធម្មជាតិ​ ៣ នាក់​នៅ​ចំណុច​ក្បែរ​ផ្សារ​ដង​ទង់​ស្រប​ពេល​ដែល​សាលាក្រុង​បាន​ចេញ​លិខិត​​ព្រមាន​ចាត់​វិធានការ​ផ្លូវ​ច្បាប់​ទៅលើ​ប្រជាពលរដ្ឋ​​ទាំង​នោះ​។

ប្រជាពលរដ្ឋ​ម្នាក់​ដែល​ចូលរួម​ការ​តវ៉ា​នោះ​អ្នកស្រី ផាវ ញើង បាន​ឲ្យ​ដឹង​ថា​ពួកគាត់​បាន​តវ៉ា​នៅ​មុខ​សាលា​ដំបូង​ខេត្ត និង​បាន​ដើរ​ក្បួន​តាម​ទីសាធារណៈ​មួយ​ចំនួន​ក្រោម​តំណក់​​ភ្លៀង និង​កម្តៅ​ថ្ងៃ​ដើម្បី​​​ទាមទារ​ឲ្យ​មាន​ការ​ដោះលែង​យុវជន​ចលនា​មាតា​ធម្មជាតិ ៣ នាក់​ប៉ុន្តែ​នៅ​ព្រឹក​ថ្ងៃ​ម្សិលមិញ​ពេល​ដែល​ពួកគាត់​ដើរ​តវ៉ា​នៅ​ក្បែរ​​ផ្សារ​ដងទង់​ស្រាប់តែ​អាជ្ញាធរ​​​ប្រមាណ ២០ នាក់​បាន​មក​​រារាំង និង​បម្រុង​ចាប់​ខ្លួន​ពួកគាត់​ដាក់​ឡាន​បណ្តាល​ឲ្យ​មាន​ការ​ប្រទាញ​ប្រទង់​គ្នា​រយៈពេល​ខ្លី។

អ្នកស្រី​ថា៖ «គេ​​ចាប់​អូស​ពួកយើង​ហើយ​គេ​​ប្រុង​ចាប់​អ្នក​​តវ៉ា​ម្នាក់​ដែរ​តែ​យើង​អូស​ដៃ​បាន​មក​វិញ​ហើយ​កូន​ខ្ញុំ​ត្រូវ​​មួយ​ដៃ​របស់​ប៉ូលិស​ដែរ​ក្មេង​យំ​ឡើង​គាំង​ពីរ​បី​នាក់​​ដែរ​។ តែ​អត់​អី​ទេ​យើង​មក​ដល់​មុខ​តុលាការ​​វិញ​​ហើយ ហើយ​តវ៉ា​រហូត​ដល់​មាន​ការ​ដោះលែង​អ្នក​ទាំង​ ៣ »។

ការ​ប៉ះទង្គិច​គ្នា​នេះ​ធ្វើ​ឡើង​ស្រប​ពេល​ដែល​សាលាក្រុង​ខេមរភូមិន្ទ​បាន​ចេញ​សេចក្តី​ជូន​ដំណឹង​ជា​លើក​ទី​ ២ កាលពី​ថ្ងៃ​ពុធ​ស្តីពី​ការ​ហាមឃាត់​ការ​ប្រមូល​ផ្តុំ​របស់​​ប្រជាពលរដ្ឋ​​នៅលើ​ចិញ្ចើម​ផ្លូវ​សាធារណៈ​មុខ​របង​សាលា​ដំបូង​ខេត្ត​បន្ទាប់ពី​បាន​​ចេញ​សេចក្តី​ជូន​ដំណឹង​ម្តង​ហើយ​កាលពី​ថ្ងៃ​ទី​ ២០ ​ខែ​សីហា។

លិខិត​របស់​លោក​អភិបាល​​ក្រុង ធូ វិបុល បាន​លើក​ឡើង​ថា​ប្រជាពលរដ្ឋ​ទាំងនោះ​រស់នៅ​ស្រុក​កោះកុង ស្រែ​អំបិល បទុមសាគរ និង​គិរីសាគរ​បាន​មក​ស្នាក់​នៅ​មុខ​សាលា​ដំបូង​ខេត្ត​​តាំងពី​ថ្ងៃ​ទី​ ១៩ ខែ​សីហា​មក​ដោយ​​បាន​​ធ្វើឲ្យ​បាត់បង់​សណ្តាប់ធ្នាប់​សាធារណៈ​អនាម័យ​បរិស្ថាន​ និង​សោភណភាព​ក្នុង​ក្រុង​ខេមរភូមិន្ទ។

លិខិត​ដដែល​​បាន​តម្រូវ​ឲ្យ​ពលរដ្ឋ​រំសាយ​ការតវ៉ា​ចាប់ពី​ថ្ងៃ​ជូន​ដំណឹង​​នេះ​ហើយ​ត្រូវ​សុំ​ការ​អនុញ្ញាត​ច្បាប់​ពី​​អាជ្ញាធរ​ជា​មុន​យ៉ាង​តិច ០២ ថ្ងៃ​រាល់​ការ​ដង្ហែ​ក្បួន​ ឬ​ធ្វើ​សកម្មភាព​ប្រមូល​ផ្តុំ​ហាម​ផ្សព្វផ្សាយ​ ឬ​ចែក​ខិត្តប័ណ្ណ​ផ្សេងៗ​ដែល​មាន​លក្ខណៈ​ញុះញង់​បង្ក​ភាព​អនាធិបតេយ្យ​ហាម​ចង​តង់​ដាំបាយ​ ឬ ធ្វើ​ម្ហូប​អាហារ​ផ្សេងៗ​ជាដើម​ដោយ​ត្រូវ​ប្រមូល​ផ្តុំ​ការ​ជួបជុំ​នៅ​វេទិកា​តារាង​បាល់ទាត់​ខេត្ត​តាម​ការ​កំណត់​របស់​អាជ្ញាធរ​ក្រុង។ «ក្នុង​ករណី​រឹងរូស​អាជ្ញាធរ​ក្រុង​នឹង​ចាត់​វិធានការ​តាម​ផ្លូវ​ច្បាប់​ជា​ធរមាន»។

ប្រជាពលរដ្ឋ​បាន​ចាប់ផ្តើម​តវ៉ា​បន្ទាប់ពី​អាជ្ញាធរ​បាន​ចាប់​ខ្លួន​យុវជន​អង្គការ​មាតា​ធម្មជាតិ​ ៣ នាក់​ឈ្មោះ​សាន់ ម៉ាឡា ទ្រី សុវិគា និង​ ស៊ឹម សំណាង កាលពី​ថ្ងៃ​ទី​ ១៧ ខែ​សីហា​ហើយ​បញ្ជូន​ទៅ​តុលាការ​តាម​បណ្តឹង​របស់​អាជ្ញាធរ​ឃុំ និង​ក្រុមហ៊ុន​បូមខ្សាច់ Direct Access ក្រោម​​​បទ​ចោទ «គំរាម​កំហែង​ថា​នឹង​ធ្វើឲ្យ​ខូចខាត​ដែល​ភ្ជាប់​នឹង​បញ្ជា​អ្វី​មួយ​»​។

ពួកគេ​ត្រូវ​បាន​​ចាប់​ខ្លួន​ក្រោយពី​បាន​តវ៉ា​យ៉ាង​​សកម្ម​ប្រឆាំង​នឹង​កប៉ាល់​​បូម​ខ្សាច់​ជាង​ ៥០ ​គ្រឿង​របស់​ក្រុមហ៊ុន​វៀតណាម​នៅ​ឃុំ​អណ្តូង​ទឹក ស្រុក​បទុមសាគរ ខណៈ​ដែល​អាជ្ញាធរ​ និង​មន្ត្រី​ក្រសួង​បរិស្ថាន​បាន​​បញ្ជាក់​ថា​ក្រុមហ៊ុន​ទាំងនោះ​បាន​ធ្វើ​អាជីវកម្ម​ក្នុង​​តំបន់​ដែល​កំណត់​ដោយ​ក្រសួង។

អភិបាល​រង​ក្រុង​ខេមរភូមិន្ទ លោក ប៉ែន ប៊ុនឈួយ ថ្លែង​ថា៖ «បើ​សិន​ជា​គាត់​សុំ​ច្បាប់​មក​ថា​ទិសដៅ​គាត់​​ទៅ​ណា​? មាន​គ្នា​ប៉ុន្មាន​នាក់​? អាហ្នឹង​យើង​អត់​ហាម​ឃាត់​ទេ​ក្នុង​នាម​អាជ្ញាធរ​ក្រុង​យើង​នៅ​តែ​ការ​ពារ​គាត់​មក​ដល់​ទឹកដី​ខ្ញុំ​ហើយ​ត្រូវ​គោរព​ច្បាប់​ខ្លះ​ផង​មិន​អាច​បង្ក​លក្ខណៈ​ដើរ​ស្រែក​ដើរ​តាម​ផ្លូវ​អ៊ីចឹង​ទៅ​វា​បាត់​សណ្តាប់​ធ្នាប់​»។

អ្នក​សម្រប​សម្រួល​អង្គការ​សិទ្ធិ​មនុស្ស​លីកាដូ​ប្រចាំ​ខេត្ត​កោះកុង លោក អ៊ិន គង់ជិត យល់​ថា​ការ​រារាំង​​ប្រជាសហគមន៍​នេះ​អាច​ជា​កង្វល់​មួយ​របស់​អាជ្ញាធរ​ដែល​ខ្លាច​ពលរដ្ឋ​ផ្សេង​ទៀត​ចូលរួម​ការតវ៉ា​នេះ​ដោយសារ​តែ​សាធារណជន​បាន​ដឹង​​ថា​យុវជន​មាតា​ធម្មជាតិ​ទាំង​ ៣ នាក់​ពុំ​មាន​កំហុស​ដូច​ការ​ចោទប្រកាន់។

លោក​បាន​ចាត់ទុក​ការ​​ព្រមាន និង​ការ​រារាំង​ប្រជាសហគមន៍​មិន​ឲ្យ​ដើរ​តវ៉ា​ពី​សំណាក់​អាជ្ញាធរ​នេះ​ថា​ជា​ការ​បំបិទ​សិទ្ធិ​សេរីភាព​បញ្ចេញ​មតិ​ខណៈ​ដែល​ពលរដ្ឋ​ធ្វើការ​តវ៉ា​ដោយ​សន្តិវិធី៕

0

Comments

Please, login or register to post a comment