Search form

Login - Register | FOLLOW US ON

Logo of Phnom Penh Post newspaper Phnom Penh Post - អាជ្ញាធរ​ឃាត់​ខ្លួន​សកម្មជន​បរិស្ថាន ១០ នាក់

លោក អាឡិច (អង្គុយ​កណ្តាល) និង​សកម្មជន​បរិស្ថាន​ផ្សេង​ទៀត នៅ​មុន​ពេល​ចាប់​ខ្លួន​តាម​ផ្លូវ​ទៅ​អារ៉ែង កាល​ពី​ម្សិល​មិញ។
លោក អាឡិច (អង្គុយ​កណ្តាល) និង​សកម្មជន​បរិស្ថាន​ផ្សេង​ទៀត នៅ​មុន​ពេល​ចាប់​ខ្លួន​តាម​ផ្លូវ​ទៅ​អារ៉ែង កាល​ពី​ម្សិល​មិញ។ រូបថត សហការី

អាជ្ញាធរ​ឃាត់​ខ្លួន​សកម្មជន​បរិស្ថាន ១០ នាក់

កោះកុងៈ សកម្មជន​បរិស្ថាន​ប្រមាណ ១០ នាក់​រួម​ទាំង​ប្រធាន​អង្គការ​មាតា​ធម្មជាតិ ផង​នោះ ត្រូវ​បាន​កម្លាំង​អាជ្ញាធរ ខេត្ត​កោះកុង ធ្វើ​ការ​ឃាត់​ខ្លួន ខណៈ​ដែល​ពួក​គេ និង​ប្រជា​សហគមន៍ បាន​បិទ​ផ្លូវ រារាំង​ក្រុម​អាជ្ញាធរ​ខេត្ត មិន​ឲ្យ​ចូល​ទៅ​កាន់​តំបន់​គម្រោង​សង់​ទំនប់​វារី​អគ្គិសនី​អារ៉ែង កាល​ពី​ម្សិល​មិញ។

លោក ស៊ីម សំណាង អាយុ ២៨​ឆ្នាំ ដែល​ជា​បុគ្គលិក​អង្គការ​មាតា​ធម្មជាតិ និង​មគ្គុទ្ទេសក៍​ទេសចរណ៍​នៅ​តំបន់​អារ៉ែង បាន​ឲ្យ​ដឹង​ថា លោក Alex Gonzales-Davidson អ្នក​គ្រប់​គ្រង​អង្គការ​មាតា​ធម្មជាតិ រួម​នឹង​សមាជិក​បី​នាក់​យុវជន​មហា​នគរ និង​បណ្តាញ​យុវជន ៦ នាក់ និង​សហគមន៍​ម្នាក់ ត្រូវ​បាន​កម្លាំង​អាជ្ញាធរ ស្រុក​ថ្មបាំង និង ខេត្ត​កោះកុង ប្រមាណ​ជា ៥០ នាក់​ធ្វើ​ការ​ឃាត់​ខ្លួន នៅ​វេលា​ម៉ោង​ជាង ១ រសៀល​ថ្ងៃ​ចន្ទ​ម្សិល​មិញ ដោយ​សារ​តែ​ពួ​គេ​បិទ​ផ្លូវ​មិន​ឲ្យ​អាជ្ញាធរ​ធ្វើ​ដំណើរ​ចូល​ទៅ​តំបន់​អារ៉ែង​ជួប​ពលរដ្ឋ។

លោក សំណាង បាន​បញ្ជាក់​ថា៖ «មុន​នេះ​យើង​ឃើញ​មាន ប៉ូលិស ទាហាន​មាន​កាំភ្លើង​តែ​ប្រហែល​ជា ២០ នាក់​ទេ។

ក្រោយ​មក​ចេះ​តែ​ច្រើន​ឡើងៗ ប្រហែល​ជា ៥០ នាក់ ហើយ​ក៏​មាន​ការ​ចាប់​ឃាត់​ខ្លួន​តែ​ម្តង»។ លោក​បាន​បន្ត​ថា អ្នក​ទាំង​អស់​នោះ​ត្រូវ​បាន​នាំ​ទៅ​សាលា ស្រុក​ថ្មបាំង។ លោក​បាន​ប្រាប់​ឈ្មោះ​អ្នក​ដែល​ត្រូវ​បាន​ចាប់​ខ្លួន​ផ្សេង​ទៀត​ថា មាន​លោក ឌឹម គុនឌី លោក ហេង សំណាង លោក ម៉ាឡៃ និង​អ្នក​ផ្សេង​ទៀត។ លោក សំណាង មិន​ត្រូវ​បាន​ឃាត់​ខ្លួន​នោះ​ទេ ដោយ​សារ​តែ​លោក បាន​លុប​រូបថត​នៅ​កន្លែង​កើត​ហេតុ​ចោល និង​ចេញ​ទៅ​តំបន់​អារ៉ែង​មុន​បន្តិច។ លោក សំណាង បាន​ថ្លែង​ថា៖ «សហគមន៍​មិន​ឲ្យ​ចូល​ទៅ​ទេ។ មិន​ទាន់​សិក្សា​ពី​ផល​ប៉ះពាល់​ត្រឹម​ត្រូវ​ផង តែ​អាជ្ញាធរ​ទៅ​និយាយ​ពី​រឿង​សំណង​ទៅ​ហើយ»។

សកម្មជន​បរិស្ថាន និង​ប្រជា​សហគមន៍​រារាំង​អាជ្ញាធរ​មិន​ឲ្យ​ទៅ​អារ៉ែង​កាល​ពី​ម្សិល​មិញ។
សកម្មជន​បរិស្ថាន និង​ប្រជា​សហគមន៍​រារាំង​អាជ្ញាធរ​មិន​ឲ្យ​ទៅ​អារ៉ែង​កាល​ពី​ម្សិល​មិញ។ រូបថត សហការី

ប្រជា​សហគមន៍​ជន​ជាតិ​ដើម​ជង ឈ្មោះ ជុច រីម អាយុ ២៧​ឆ្នាំ បាន​ឲ្យ​ដឹង​ថា ក្រុម​ទាហាន ប៉េអឹម ប៉ូលិស និង​អាជ្ញាធរ​ខេត្ត បាន​ធ្វើ​ដំណើរ​ចូល​ទៅ​តំបន់​អារ៉ែង ក្នុង ភូមិ​ប្រឡាយ ឃុំ​ប្រឡាយ ស្រុក​ថ្មបាំង ប៉ុន្តែ​ត្រូវ​បាន​ប្រជា​សហគមន៍​បណ្តាញ​យុវជន​មក​ពី ភ្នំពេញ និង​បុគ្គលិក​អង្គការ​មាតា​ធម្មជាតិ ប្រមាណ ៣០ នាក់​ស្ទាក់​ផ្លូវ។ លោក រីម បាន​បញ្ជាក់​ថា៖ «លោក អាឡិច បាន​ដាក់​ឡាន​គាត់​មួយ​បាំង​កន្លះ​បិទ​ផ្លូវ ជាមួយ​នឹង​ពលរដ្ឋ​ដើម្បី​កុំ​ឲ្យ​អាជ្ញាធរ​ប៉ូលិស ទាហាន និង​ប៉េអឹម​ចូល​ទៅ​បាន»។ លោក​បន្ត​ថា នៅ​មុន​ពេល​ឃាត់​ខ្លួន​អាជ្ញាធរ​បាន​ឲ្យ​អ្នក​តវ៉ា​បិទ​ផ្លូវ​ទាំង​អស់​ដោយ​ឈរ​ជា​ក្រុម ដែល​រួម​មាន ក្រុម​សហគមន៍ ក្រុម​បណ្តាញ​យុវជន មក​ពី​ភ្នំពេញ និង​ក្រុម​ការងារ​អង្គការ​មាតា​ធម្មជាតិ។ លោក​បញ្ជាក់​ថា នៅ​ពេល​នោះ សហគមន៍​ក៏​មិន​ខ្លាច​ដែរ​គឺ​នៅ​តែ​ជំទាស់​នឹង​គម្រោង​សាងសង់​ទំនប់​វារី​អគ្គិសនី​របស់​ក្រុមហ៊ុន​ចិន ស៊ីណូហាយដ្រូ នេះ​ដដែល។

ទោះ​យ៉ាង​ណា លោក ភុន លីវីរៈ អភិបាល​រង ខេត្ត​កោះកុង ដែល​ដឹក​នាំ​កម្លាំង​ចុះ​ទៅ អារ៉ែង នោះ​បាន​ថ្លែង​ថា មាន​តែ​មនុស្ស​ចំនួន ៩ នាក់​ប៉ុណ្ណោះ ដែល​ត្រូវ​បាន​នាំ​ខ្លួន​យក​ទៅ​សួរ​នាំ​ពី​រឿង​បិទ​ផ្លូវ​នោះ។ លោក​បញ្ជាក់​ថា៖ «មិន​មែន​ជា​ការ​ចាប់​ខ្លួន​នោះ​ទេ។ អត់​មាន​ដាក់​ខ្នោះ​នោះ​ទេ គឺ​គ្រាន់​តែ​អញ្ជើញ​ពួក​គាត់ ទៅ​សួរ​យ៉ាង​ម៉េច​បាន​បិទ​ផ្លូវ?»។ លោក​បន្ត​ថា លោក អាឡិច ជា​អ្នក​បំផុស​បំផុល​ពលរដ្ឋ​ឲ្យ​បិទ​ផ្លូវ ហើយ​គាត់​ត្រូវ​បាន​បញ្ជូន​ទៅ​ស្នងការដ្ឋាន​នគរបាល​ខេត្ត។ ចំណែក​សកម្មជន​របស់​គាត់​កំពុង​សាក​សួរ នៅ​នគរបាល ស្រុក​ថ្មបាំង។ លោក​អភិបាល​រង​ក៏​បាន​ឲ្យ​ដឹង​ផង​ដែរ​ថា លោក អាឡិច និង​សកម្មជន​បាន​ដាក់​ប៉ុស្តិ៍​ឆែក​ឆេរ ពលរដ្ឋ​ដែល​ចេញ​ចូល​ផ្លូវ​នោះ វា​នាំ​ឲ្យ​មាន​ការ​រំខាន​ដល់​ការ​ធ្វើ​ដំណើរ។ ប្រជា​ពលរដ្ឋ​បាន​ត្អូញ​ត្អែរ​ពី​រឿង​នោះ ហើយ​កម្លាំង​អាជ្ញាធរ ក៏​ចុះ​ត្រួត​ពិនិត្យ​មើល និង​ចុះ​សួរ​សុខ​ទុក្ខ​ពលរដ្ឋ​ផង។ ទោះ​ជា​យ៉ាង​ណា លោក​មិន​បាន​ដឹង​ថា តើ​នៅ​ពេល​ណា​ទើប​អ្នក​ទាំង ៩ នាក់​នោះ នឹង​ត្រូវ​គេ​ដោះ​លែង​វិញ​នោះ​ទេ។

លោក អ៊ិន គង់ជិត អ្នក​សម្រប​សម្រួល​អង្គការ​លីកាដូ ខេត្ត​កោះកុង បាន​ចាត់​ទុក​ការ​ឃាត់​ខ្លួន​នេះ​ថា ជា​ការ​សង​សឹក​របស់​អាជ្ញាធរ​ចំពោះ​សកម្ម​ជន ដែល​មិន​ចង់​ឲ្យ​មាន​ការ​សង់​ទំនប់។ លោក​បាន​បញ្ជាក់​ថា៖ «អាជ្ញាធរ​បាន​គុំ​នឹង​លោក អាឡិច និង​សកម្មជន​ផ្សេង​ទៀត​យូរ​ហើយ ដោយ​សារ​តែ​ពួក​គេ​ប្រឆាំង​នឹង​ក្រុមហ៊ុន​និង​បិទ​ផ្លូវ​រារាំង​អាជ្ញាធរ​មិន​ឲ្យ​ចូល​ទៅ អារ៉ែង»៕

0

Comments

Please, login or register to post a comment