Search form

Login - Register | FOLLOW US ON

Logo of Phnom Penh Post newspaper Phnom Penh Post - អាជ្ញាធរ​បន្ត​នីតិវិធី​ចាត់​ការ​សកម្មជន​ការពារ​បរិស្ថាន

Content image - Phnom Penh Post
ក្រុម​សកម្ម​ជនមាតា​ធម្ម​ជាតិ​នៅ​កោះ​កុង​តវ៉ា​ប្រឆាំង​នឹង​ការ​បូម​ខ្សាច់​កាល​ពី​ថ្ងៃ​សៅរ៍​​។ រូបថត សហ​ការី

អាជ្ញាធរ​បន្ត​នីតិវិធី​ចាត់​ការ​សកម្មជន​ការពារ​បរិស្ថាន

កោះកុងៈ បន្ទាប់​ពី​អាជ្ញាធរ​ស្រុក​បទុម​សាគរ បាន​ចេញ​លិខិត​ ២ ដង កោះ​ហៅ​ក្រុម​យុវជន​អង្គការ​ចលនា​មាតា​ធម្មជាតិ តែ​ពុំឃើញ​ពួកគេ​ចូល​ខ្លួន​ទៅ​បំភ្លឺ​នោះ អាជ្ញាធរ​នឹង​រាយការណ៍​ករណី​នេះ​ទៅ​ព្រះ​រាជ​អាជ្ញា​សាលា​ដំបូង​ខេត្ត ដើម្បី​ចាត់​ការ​បន្ត​តាម​នីតិវិធី​ច្បាប់ ខណៈ​ដែល​ក្រុម​យុវជន​ទាំង​នោះ ចាត់​ទុក​ការ​​កោះហៅ​នេះ ថា​ជា​ការ​គំរាម​កំហែង ដោយសារ​ពួកគេ តវ៉ា​ប្រឆាំង​នឹង​ការ​បូម​ខ្សាច់​​បំផ្លាញ​បរិស្ថាន​របស់​​ក្រុម​ហ៊ុន​វៀតណាម។

កាល​ពី​ថ្ងៃទី​ ១៤ ​សីហា អធិការ​នគរបាល​ស្រុក​ បទុម​សាគរ បាន​ចេញ​លិខិត​ចំនួន ២ ដង ​កោះ​ហៅ​យុវជន ៣ រូប រួម​មាន​លោក​ សាន់ ម៉ាឡា លោក ទ្រី សុវិគា និង​លោក យឺន ឌីនិត ឲ្យ​ចូល​ទៅ​បំភ្លឺ​ភ្លាម​ៗ​នៅ​ថ្ងៃ​ដដែល​វេលា​ម៉ោង ១១ ព្រឹក​និង​ម៉ោង ២ រសៀល ទៅ​តាម​ពាក្យ​​បណ្តឹង។ ប៉ុន្តែ​លិខិត​នោះ​ពុំ​បាន​បញ្ជាក់​ពី​បណ្តឹង​របស់​ភាគី​ណា​មួយ និង​បំភ្លឺ​រឿង​​អ្វី​នោះ​ទេ។

អធិការ​នគរបាល​ស្រុក​បទុម​សាគរ លោក សុខ ផន បាន​ឲ្យ​ដឹង​កាល​ពី​ថ្ងៃ​ម្សិល​មិញ​ថា អាជ្ញាធរ​បាន​ចេញ​លិខិត​កោះ ហៅ​យុវជន​ទាំង​ ៣ រូប​នោះ ចំនួន​ពីរ​ដង​ហើយ​ដើម្បី​ឲ្យ​ចូល​ទៅ​បំភ្លឺ ប៉ុន្តែពុំ​ឃើញ​ពួកគេ​មក​ទេ​ហើយ​លោក​ក៏​មិន​បាន​ប្រាប់​ពី​មូល​ហេតុ​ដែរ​ដោយ​ថា ​អាជ្ញាធរ​នឹង​ធ្វើ​ទៅ​តាម​នីតិវិធី​ច្បាប់ ហើយ​បាន​បដិសេធ​ផ្តល់​ព័ត៌មាន​លម្អិត​ចំពោះ​ករណី​នេះ។

Content image - Phnom Penh Post
សាឡង់​បូម​ខ្សាច់​​ជា​ច្រើន​គ្រឿង របស់​ក្រុម​ហ៊ុន​វៀត​ណាម​ កំពុង​ធ្វើ​សកម្ម​ភាព​បូម​ខ្សាច់​នៅ​ក្នុង​ដៃ​សមុទ្រ នៃ​ស្រុក​បទុម​សាគរ កាល​ពី​ពេល​ថ្មី​ៗ​នេះ​​។ រូប​ថត អង្គការ​មាតា​ធម្ម​ជាតិ​

ចំណែក ស្នងការ​នគរបាល​ខេត្ត​កោះ​កុង លោក សំឃិត វៀន បាន​ថ្លែង​ថា តាម​ព័ត៌មាន​ដែល​លោក​ទទួល​បាន ការ​​ប្តឹង​នេះ កើត​ឡើង​បន្ទាប់​ពី​​ក្រុម​យុវជន​ទាំង​នោះ បាន​តវ៉ា​​ឡើង​​ទៅ​លើ​សាឡង់ និង​បាន​ធ្វើ​សកម្ម​ភាព​រារាំង​ប្រតិបត្តិ​ការ​បូម​ខ្សាច់​របស់​ក្រុម​ហ៊ុន​​នោះ។​​

លោក​បញ្ជាក់​ថា តាម​នីតិវិធី​របស់​អាជ្ញាធរ ប្រ​សិន​បើ​​មាន​​ការ​កោះ​ហៅ​​ជា​ច្រើន​ដង​ហើ​យ ពុំ​ឃើញ​ពួកគេ​ចូល​ខ្លួន​ទៅ​បំភ្លឺ​នោះ មន្ត្រី​នគរ​បាល​ នឹង​រាយការណ៍​សំណុំ​រឿង​នេះ​បន្ត​ទៅ​ព្រះ​រាជ​អាជ្ញា​សាលា​ដំបូង​ខេត្ត ដើម្បី​​ចាត់​ការ​បន្តតាម​ច្បាប់។

លោកថា៖ «បើ​គាត់​មិន​ព្រម​ចូល​ខ្លួន​មក​បំភ្លឺ​តាម​បណ្តឹង​របស់​ភា​គី​ដែល​ចោទ​ប្រកាន់ តាម​នីតិវិធី​របស់​ប៉ូលិស​នឹង​សុំ​គោល​ការណ៍​ពី​ព្រះ​រាជអាជ្ញា ហើយ​រឿងនេះ​យ៉ាងណា​ទៀត​នោះ​គឺជា​នីតិវិធី​របស់​តុលាការ»។

កន្លង​មក យុវជនជា​សកម្ម​ជន​ចលនា​មាតា​ធម្មជាតិ និង​ប្រជា​សហគមន៍​នៅ​ឃុំ​អណ្តូង​ទឹក ស្រុក​បទុម​សាគរ​បាន​នាំគ្នា​តវ៉ា​ជា​ច្រើន​លើក​ច្រើន​សារ​ ទាមទារ​ឲ្យ​អាជ្ញាធរ​បណ្តេញ​សាឡង់​ចំនួន ៥៨ គ្រឿង​របស់​ក្រុមហ៊ុន​វៀតណាម​ចំនួន ២ ឈ្មោះ International Rainbow និង​ Direct Aceess ដែល​បាន​បូម​ខ្សាច់​យ៉ាង​គគ្រឹក​គគ្រេង​ធ្វើ​ឲ្យ​ប៉ះពាល់​ដល់​លំនៅឋាន​និង​ការ​នេសាទ​របស់​​ប្រជាពលរដ្ឋ​ព្រម​ទាំង​ធ្វើ​ឲ្យ​ប៉ះ​ពាល់​ដល់​ជម្រក​មច្ឆជាតិ​ផង​ដែរ។

យុវជន សាន់ ម៉ាឡា សកម្មជន​អង្គការ​មាតា​ធម្ម​ជាតិ បាន​ប្រាប់​ពីមូល​ហេតុ​ដែល​ពួកគេ​មិន​ចូល​ទៅ​បំភ្លឺ​នោះ គឺ​ដោយសារ​ពួកគេ​ពុំ​បាន​ប្រព្រឹត្ត​ខុស​ច្បាប់ ហើយ​ការ​កោះ​ហៅ​របស់​អាជ្ញាធរ​​គឺ​តម្រូវ​ឲ្យ​ចូល​ខ្លួន​ភ្លាមៗ បន្ទាប់​ពី​ចេញ​លិខិត​ ដែល​បង្ហាញ​ពី​ភាព​មិន​ប្រក្រតី។

តែ​លោក​បញ្ជាក់ពី​ជំហរ​ថា៖ «ប្រសិន​បើ​គេ​ចង់​ចាប់​ខ្លួន​យើង គឺ​យើង​មិន​រត់​ទៅ​ណា​ទេ យើង​នៅ​ឲ្យ​គេ​ចាប់ ព្រោះ​យើង​យល់​ឃើញ​ថា យើង​មិន​បាន​ធ្វើ​ខុស​ហើយ​សកម្មភាព​ដែល​យើង​កំពុង​ធ្វើ​ គឺកំពុង​ការពារ​ធនធាន​ធម្មជាតិ ប្រសិន​បើ​គេ​មិន​ពេញ​ចិត្ត គេ​មិន​សប្បាយ​ចិត្ត​នឹង​យើង ក៏​យើង​ស្វាគមន៍​រាល់​ចំណាត់​ការ​របស់​អាជ្ញាធរ​ដែរ»។

ក្រុម​ហ៊ុន​វៀត​ណាម​រំលោភ​ច្បាប់ បូម​ខ្សាច់​នៅ​អណ្តូង​ទឹក

កាល​ពី​ថ្ងៃ​សៅរ៍ យុវជន​ចលនា​មាតា​ធម្មជាតិ និង​ប្រជាសហគមន៍​ជាង ១០ នាក់ បាន​បន្ត​​ការ​តវ៉ា​​លើក​បដា​ប្រឆាំង​នឹង​ការ​បូម​ខ្សាច់ ដោយ​មាន​ដាក់​ច្រវាក់​ដៃ​ខ្លួន​ឯង ដើម្បី​រង់​ចាំ​អាជ្ញាធរ​​ចាត់​ការ​ទៅ​តាម​នីតិវិធី ប៉ុន្តែ​មក​ដល់​ថ្ងៃ​ម្សិលមិញ អាជ្ញាធរ​នៅ​ពុំ​ទាន់​មាន​វិធាន​ការណា​មួយ​ទៅ​លើ​សាឡង់​បូម​ខ្សាច់​ទាំង​នោះ​​ឡើយ។

មិន​អាច​សុំការ​អធិប្បាយ​ពី​តំណាង​ក្រុមហ៊ុន International Rainbow និង​ Direct Aceess បាន​ទេ។

អភិបាល​ស្រុក​បទុមសាគរលោក​អន ភារៈ​ធ្លាប់​បាន​ថ្លែង​​នៅ​ចំពោះ​មុខ​អ្នក​តវ៉ា​កាល​​ពី​ចុង​ខែ​សីហា​ថា ក្រុម​ហ៊ុន​​ទាំង​ពីរ​នេះមាន​អាជ្ញា​ប័ណ្ណ​ត្រឹម​ត្រូវ​ ពី​រដ្ឋាភិបាល ក្នុង​ការ​អនុញ្ញាត​ឲ្យ​បូម​ខ្សាច់ ហើយ​ការ​តវ៉ា​ និង​ការ​បណ្តេញ​សាឡង់​ពី​សំណាក់​យុវជន​និង​សហគមន៍​ធ្វើ​ឲ្យ​ប៉ះពាល់​ដល់​សេដ្ឋកិច្ច​ក្រុមហ៊ុន។

បន្ទាប់​ពី​មាន​ការ​តវ៉ា​សាឡង់​​បូមខ្សាច់​​វៀតណាម​នៅ​សល់​តែ​ ៣ ​គ្រឿង​ប៉ុណ្ណោះ​​ ហើយ​មិន​បាន​ធ្វើការ​បូម​ខ្សាច់​​ទៀត​ទេ​កាល​ពី​ម្សិល​មិញ៕​

0

Comments

Please, login or register to post a comment