Search form

Login - Register | FOLLOW US ON

Logo of Phnom Penh Post newspaper Phnom Penh Post - អាមេរិក​បន្ត​បញ្ជូន​ខ្មែរ​មក​ស្រុក ​ថ្វី​បើ ​កម្ពុជា ​ស្នើ​ធ្វើ​វិសោធនកម្ម

អាមេរិក​បន្ត​បញ្ជូន​ខ្មែរ​មក​ស្រុក ​ថ្វី​បើ ​កម្ពុជា ​ស្នើ​ធ្វើ​វិសោធនកម្ម

ភ្នំពេញៈ បើទោះ​ជា​រដ្ឋាភិបាល​កម្ពុជា​បាន​ស្នើ​ឲ្យ​ធ្វើ​វិសោធនកម្ម​កិច្ចព្រមព្រៀង​ជាមួយ​​អាមេរិក​ស្ដីពី​ការ​ធ្វើ​មាតុភូមិនិវត្តន៍​អតីត​ទណ្ឌិត​មក​កម្ពុជា​​ក្ដី​ក៏​មាន​ខ្មែរ ៧ ​នាក់​ថ្មី​ទៀត​ត្រូវ​បាន​បញ្ជូន​មក​ដល់​កម្ពុជា​កាលពី​ថ្ងៃ​ពុធ​ដែល​ជា​ការ​បន្ថែម​ចំនួន​អ្នក​និរទេស​ឲ្យ​កើន​ដល់​ ១៥ ​នាក់​សម្រាប់​ខែ​នេះ​។

អ្នក​នាំពាក្យ​ស្ថានទូត​អាមេរិក​លោក Jay Raman បាន​បញ្ជាក់​ថា​៖ «​ពលរដ្ឋ​កម្ពុជា​ ៧ ​នាក់​ត្រូវ​បាន​បញ្ជូន​មក​កម្ពុជា​​វិញ​ដោយ​ក្រសួង​មហាផ្ទៃ​របស់​​អាមេរិក​»​។

ការ​បញ្ជូន​មក​ដល់​ប្រទេស​កម្ពុជា​នេះ​គឺ​ធ្វើ​ឡើង​ពីរ​សប្តាហ៍​បន្ទាប់ពី​ពលរដ្ឋ​កម្ពុជា​ ៨ ​នាក់​ត្រូវ​បាន​បញ្ជូន​មក​ប្រទេស​កម្ពុជា​កាលពី​ថ្ងៃ​ទី​ ៣ ឧសភា​។

ការ​និរទេស​ពី​អាមេរិក​មក​កម្ពុជា​នេះ​ត្រូវ​បាន​តវ៉ា​ជាប់​ជានិច្ច​ទាំង​យុទ្ធនាការ​នៅក្នុង​ប្រទេស​កម្ពុជា​ និង​នៅ​បរទេស​ដើម្បី​ទាមទារ​ឲ្យ​បញ្ឈប់​ការ​និរទេស​អតីត​ទណ្ឌិត ខណៈ​អ្នក​ខ្លះ​លើក​ហេតុផល​ថា​ការ​និរទេស​នេះ​ជា​ការ​បំបែក​បំបាក់​អតីត​​ទណ្ឌិត​ពី​គ្រួសារ​ពួកគេ​ផង​ដែរ​។

ចាប់​តាំងពី​ការ​ចុះ​កិច្ចព្រមព្រៀង​ដ៏ចម្រូង​ចម្រាស​នេះ​កាលពី​ឆ្នាំ​ ២០០២ ​មក​កម្ពុជា​បាន​ទទួល​ពលរដ្ឋ​ខ្មែរ​អាមេរិកាំង​​ជាង​ ៥៥០ ​នាក់​ដែល​ភាគច្រើន​នៃ​ពួកគេ​ជា​អ្នក​ភៀសខ្លួន​ទៅ​នៅ​សហរដ្ឋ​អាមេរិក​ហើយ​ដែល​ត្រូវ​បាន​ផ្តន្ទាទោស​ពី​បទឧក្រិដ្ឋ​ និង​បាន​ជាប់​ពន្ធនាគារ​រួច​ហើយ​។

ក្រសួង​ការបរទេស​អាមេរិក​បាន​លើក​ឡើង​អំពី​បញ្ហា​នេះ​ជា​ដដែលៗ​ដោយ​សង្ឃឹម​ថា​នឹង​មាន​ការ​ព្យួរ​ការនិរទេស​នេះ​ហើយ​​ចរចា​កិច្ចព្រមព្រៀង​នេះ​ជាមួយ​សហរដ្ឋអាមេរិក​ឡើង​វិញ​។

កែម វីឡា ប្រធាន​មជ្ឈមណ្ឌល​គាំទ្រ​សមាហរណកម្ម​អ្នក​ដែល​ត្រូវ​បាន​បញ្ជូន​ត្រឡប់​មក​វិញ​បាន​ថ្លែង​ថា មនុស្ស​​ ៣ ​នាក់​ក្នុង​ចំណោម​អ្នក​ដែល​ត្រូវ​បាន​បញ្ជូន​ថ្មីៗ​បំផុត​ត្រូវ​បាន​ឧបត្ថម្ភ​ដោយ​មជ្ឈមណ្ឌល​របស់​លោក ខណៈ​អ្នក​ដទៃៗ​ទៀត​កំពុង​ស្វែងរក​សាច់ញាតិ​។

លោក​បាន​បន្ត​ថា​៖ «​វា​ហាក់​ដូចជា​ពិភពលោក​ថ្មី​មួយ​សម្រាប់​​ពួកគេ​...​នៅ​ពេល​ពួកគេ​មក​ដល់​ដំបូង ពួកគេ​កំពុង​ព្យាយាម​សម្រប​សម្រួល​នឹង​ស្ថានភាព​ថ្មី​»​។

កាលពី​ថ្មីៗ​នេះ​លោក​នាយក​រដ្ឋមន្ត្រី​ ហ៊ុន សែន បាន​អំពាវនាវ​​ដល់​អាមេរិក​ឲ្យ​ធ្វើ​វិសោធនកម្ម​​កិច្ចព្រមព្រៀង​បញ្ជូន​ពួកគេ​មក​​កម្ពុជា​វិញ​ក្រោម​ហេតុផល​ថា​ «​អគុណធម៌​» ​និង​ «​អសីលធម៌​» ។

ប៉ុន្តែ​បើ​តាម​វិទ្យុ​អាស៊ីសេរី​ដែល​​បាន​សម្ភាស​ជាមួយ​មន្ត្រី​ (Human Rights Watch) ថា​ករណី​នេះ​វា​មិន​អាច​ទៅ​រួច​ទេ​​ ខណៈ​ដែល​លោក​ ដូណាល់ត្រាំ ​​នៅ​ជា​ប្រធានាធិបតី ៕ PS

0

Comments

Please, login or register to post a comment