ភ្នំពេញៈ លោក មាជ សុវណ្ណារ៉ា មន្ត្រីរបស់អតីតគណបក្សសង្គ្រោះជាតិ និងអ្នកជាប់ពន្ធនាគារ ១៤ នាក់ទៀតបានសរសេរសំបុត្រចេញពីពន្ធនាគារជូនពរលោកនាយករដ្ឋមន្ត្រី ហ៊ុន សែន ក្នុងថ្ងៃខួបអាពាហ៍ពិពាហ៍ថ្ងៃទី ៥ មករាដែលបានបង្ហាញនូវចេតនាចង់បានការអនុគ្រោះឲ្យមានសេរីភាពក្នុងសង្គមវិញ។
ក្នុងលិខិតរបស់លោកដែលចុះកាលបរិច្ឆេទទី ៥ មករា បានសរសេរថាលោកស្ទើរតែភ្លេចថ្ងៃខួបកំណើតភរិយាកូនស្រីពៅជាទីស្រឡាញ់របស់លោក ប៉ុន្តែលោកមិនភ្លេចថ្ងៃ «ពិសេសរបស់សម្តេចទាំង ២ គឺនៅថ្ងៃទី ៥ ខែមករានេះដែលប្រែពីថ្ងៃធ្លាប់តស៊ូលំបាកលំបិនជាមួយគ្នាមកជាថ្ងៃជ័យសិរីមង្គលរហូតមកដល់ពេលនេះ»។
ដោយប្រៀបធៀបរូបលោក និងអ្នកជាប់ឃុំជាមួយគ្នា ១៤ នាក់ទៀតថាជាអ្នកទោសមនសិការលិខិតរបស់លោក មាជ សុវណ្ណារ៉ា បានបន្តថា៖ «ជាអ្នកទោសមនសិការប្រៀបបីដូចជាបក្សីកម្សត់កំពុងជាប់ទ្រុងរង់ចាំអ្នកមានបុណ្យ យើងទាំង ១៥ នាក់គ្មានអ្វីជាប់នឹងខ្លួនឡើយមានតែនាំគ្នាបន្តក់លោហិតម្នាក់មួយតំណក់ៗនៅក្នុងគុកដ៏ងងឹតនេះដើម្បីជាបច្ច័យសម្រាប់ការបួងសួងដល់ទេវតាឆ្នាំថ្មី និងវត្ថុស័ក្តិសិទ្ធិក្នុងលោកឲ្យតាមជួយថែរក្សា និងជ្រោមជ្រែងសម្តេចទាំង ២...»។
លោក ឈឹម គឹមទ្រី ជំនួយការផ្ទាល់របស់លោក មាជ សុវណ្ណរ៉ា ថ្លែងបញ្ជាក់កាលពីម្សិលមិញថាលិខិតនេះពិតជាលិខិតរបស់លោក សុវណ្ណារ៉ា មែន ដែលលោកសរសេរចេញពីពន្ធនាគារក្នុងគោលបំណងសុំឲ្យមានការលើកលែងទោស។
លោក គឹមទ្រី និយាយថា៖ «គាត់ចង់និយាយថាសម្តេចលោកមានសេរីភាព និងមានពេលប្រារព្វខួបហើយពួកគាត់ក៏ចង់មានឱកាសដូចគ្នាដែរ។ តាមពិតទៅគោលបំណងរបស់គាត់ចង់ឲ្យមានការលើកលែងទោស ប៉ុន្តែគាត់មិនអាចនិយាយត្រង់ៗពេកទេ ប៉ុន្តែយើងអាចយល់បានពីខ្លឹមសារលិខិតរបស់គាត់។ គាត់ចង់បានដំណោះស្រាយព្រោះគាត់នៅក្នុងពន្ធនាគារ ៣ ឆ្នាំហើយ»។
លោក មាជ សុវណ្ណារ៉ា ត្រូវបានចាប់ខ្លួនកាលពីខែវិច្ឆិកាឆ្នាំ ២០១៤ ពាក់ព័ន្ធនឹងការធ្វើបាតុកម្មនៅទីលានប្រជាធិបតេយ្យកាលពីខែកក្កដាឆ្នាំ ២០១៤ ដែលរងការបង្ក្រាបពីអាជ្ញាធរ។
នៅខែកក្កដាឆ្នាំ ២០១៥ លោកត្រូវបានតុលាការកាត់ទោសដាក់ពន្ធនាគាររយៈពេល ២០ ឆ្នាំពីបទដឹកនាំកុបកម្ម ចំណែកសកម្មជនបក្សសង្គ្រោះជាតិ ១០ នាក់ផ្សេងទៀតត្រូវបានកាត់ឲ្យជាប់ចន្លោះពី ៧ ទៅ ២០ ឆ្នាំក្នុងរឿងដូចគ្នា។ នៅខែឧសភាឆ្នាំ ២០១៦ សកម្មជនបក្សប្រឆាំង ៣ នាក់ទៀតត្រូវបានកាត់ឲ្យជាប់ម្នាក់ៗ ៧ ឆ្នាំក្នុងព្រឹត្តិការណ៍ដូចគ្នា។ អង្គការការពារសិទ្ធិមនុស្សចាត់ទុកអ្នកទាំងនេះជាអ្នកទោសនយោបាយ។
ទោះយ៉ាងណាក្តីមន្ត្រីរដ្ឋាភិបាលថ្លែងថាលិខិតរបស់លោក មាជ សុវណ្ណារ៉ា គ្រាន់តែជាការបង្ហាញមនោសញ្ចេតនាតែប៉ុណ្ណោះ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថាលោកមិនបានឃើញលិខិតរបស់លោក មាជ សុវណ្ណារ៉ា ទេ។ ប៉ុន្តែលោកថាបើសិនជាលិខិតជូនពរនោះគេមិនគួរបកស្រាយឲ្យលើសពីខ្លឹមសារដើមទេ។ «ខ្ញុំគិតថាយើងគិតតែត្រឹមកម្រិតខ្លឹមសារដែលមានក្នុងលិខិតហ្នឹងបានហើយ។ គាត់សរសេរគាត់ជូនពរអីជាមនោសញ្ចេតនារបស់គាត់ជាមួយសម្តេចតេជោ យើងមិនអាចទៅថាជំនួសគាត់បានទេ»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីថ្លែងថាលោកមិនដឹងថា តើការសរសេរលិខិតនេះអាចនាំទៅដល់ការលើកលែងទោសឬយ៉ាងណាទេគឺអាស្រ័យលើលោកនាយករដ្ឋមន្ត្រី។
លោកថា លោកមិនយល់ថាអ្វីទៅជាអ្នកទោសមនសិការហើយថាលោក មាជ សុវណ្ណារ៉ា «មិនមែនជាអ្នកទោសនយោបាយទេ ហើយកម្ពុជាមិនមានអ្នកទោសនយោបាយទេ។ ពួកគេត្រូវបានចាប់ដាក់ពន្ធនាគារដោយសារតែទង្វើរបស់ពួកគេដែលប្រឆាំងនឹងច្បាប់»។
លោក សុក សំអឿន អ្នកជំនាញផ្នែកច្បាប់យល់ថាការសរសេរលិខិតតែម្យ៉ាងនេះប្រហែលមិនអាចជួយឲ្យលោក សុវណ្ណារ៉ា រួចខ្លួនឡើយ។
លោកនិយាយថា៖ «ខ្ញុំមិនគិតថាលិខិតនេះអាចជួយអ្វីបានទេ បើសិនជាគ្មានអ្នកណាទៅជួយបញ្ចុះបញ្ចូលគាត់ដូចជាមិត្តភក្តិ ឬអ្នកដែលស្និទ្ធនឹងសមាជិកគ្រួសារសម្តេច ហ៊ុន សែន ឬពីស្ថានទូត»។
លោក សុក សំអឿន បន្ថែមថារឿងនេះប្រហែលអាចដោះស្រាយបានតាមស្ថានការណ៍នយោបាយ ឬតាមរយៈសម្ពាធពីទំនាក់ទំនងការបរទេសដោយលោកអះអាងថា «បើការកាត់ទោសដោយសារវាជារឿងនយោបាយត្រូវដោះស្រាយតាមនយោបាយរឿងនយោបាយមិនអាចដោះស្រាយបានដោយប្រព័ន្ធតុលាការទេ»។
ដោយឡែកលោក អ៊ូ វីរៈ អ្នកវិភាគនយោបាយ និងជាប្រធានវេទិកាអនាគតបានថ្លែងថាលោកមិនឃើញមានអ្វីដែលគួរឲ្យភ្ញាក់ផ្អើលទេចំពោះការសរសេរសំបុត្រជូនពរនេះ ប៉ុន្តែលោកមិនយល់ថាមូលហេតុអ្វីដែលនាំឲ្យមានការសរសេរលិខិតនេះ។
ទោះយ៉ាងណាលោកថាការដោះលែងអ្នកទោសនយោបាយបាយគួរតែកើតមាន។ «វាជាពេលដែលត្រូវធ្វើឲ្យប្រាកដថា មិនមានប្រតិកម្មធ្ងន់ៗ ឬការដាក់ទណ្ឌកម្មពីសហគមន៍អន្តរជាតិ ការដោះលែងអ្នកទោសនយោបាយគឺជារឿងដែលគួរធ្វើ។ គួរតែមានភាពស្ងប់ស្ងាត់នៅពេលនេះ។ ការដោះលែងអ្នកទោសមុនពេលបោះឆ្នោតមិនមែនជារឿងថ្មីទេគឺធ្លាប់កើតមានរួចមកហើយកាលពីបោះឆ្នោតលើកមុនៗ។ យើងគួរតែវិលទៅរកភាពប្រក្រតីវិញ»៕