ភ្នំពេញៈ ប្រាំមួយឆ្នាំបន្ទាប់ពីប្រជាពលរដ្ឋរាប់រយនាក់នៅបុរីកីឡាត្រូវបានបណ្តេញចេញពីលំនៅឋានរបស់ខ្លួនទាំងបង្ខំ និងឃើញផ្ទះរបស់ពួកគេត្រូវបានបំផ្លាញក្នុងរយៈពេលមិនដល់មួយថ្ងៃក្រុមប្រជាពលរដ្ឋទាំងនោះនៅតែកំពុងបន្តធ្វើការតវ៉ាដើម្បីស្វែងរកសំណងសមរម្យនៅឡើយ។
ថ្លែងមកកាន់កាសែតភ្នំពេញ-ប៉ុស្តិ៍ បន្ទាប់ពីពិធីពុទ្ធសាសនាមួយដែលប្រារព្ធធ្វើនៅពីក្រោយអគារដែលនៅសល់ចុងក្រោយកាលពីម្សិលមិញ ប្រជាពលរដ្ឋទាំងនោះបានអំពាវនាវឲ្យអាជ្ញាធរ និងក្រុមហ៊ុនអភិវឌ្ឍន៍ផ្តល់សំណងសមស្របដល់ពួកគេទៅតាមការសន្យាដោយអះអាងថាកន្លែងតាំងលំនៅថ្មី នៅជាយរាជធានីគឺឆ្ងាយពេកហើយសំណងមិនមានលក្ខណៈគ្រប់គ្រាន់។
សាលារាជធានីបានដាក់ឱសានវាទទៅលើប្រជាពលរដ្ឋចំនួន ១១ គ្រួសារនៅចុងខែធ្នូ ប៉ុន្តែពួកគេនឹងមិនទទួលយកសំណងនោះទេ។ ភ្លាមៗបន្ទាប់ពីឱសានវាទ ពលរដ្ឋ ២០ គ្រួសារបន្ថែមទៀតត្រូវបានផ្តល់ឲ្យនូវសំណង ខណៈ ១០ គ្រួសារទៀតត្រូវបានអះអាងថាមិនមានសិទ្ធិ។
អគារចុងក្រោយដែលមានសំរាមជុំវិញហើយឆ្កែ ឆ្មា មាន់ រត់ជុំវិញនោះអាចនឹងត្រូវវាយកម្ទេចចោលនាពេលខាងមុខឆាប់ៗនេះ បន្ទាប់ពីប្រជាពលរដ្ឋទាំងនោះដែលមានជម្លោះជាមួយក្រុមហ៊ុនអភិវឌ្ឍន៍ ផានអ៊ីមិច អស់រយៈពេលជាង ១០ ឆ្នាំមកហើយចាកចេញពីទីនោះ។ កាលពីថ្ងៃទី ៣ ខែមករាឆ្នាំ ២០១២ ជម្លោះនេះមានស្ថានភាពធ្ងន់ធ្ងរឡើងនៅពេលអាជ្ញាធរបានប្រើហិង្សាបណ្តេញប្រជាពលរដ្ឋរាប់រយគ្រួសារចេញពីតំបន់បុរីកីឡា។
អ្នកស្រី សុខ ស្រីអូន ដែលជាតំណាងពលរដ្ឋចំនួន ២០ គ្រួសារដែលត្រូវបានផ្តល់ឲ្យនូវសំណងថ្លែងថាអ្នកស្រីនៅមានការចងចាំយ៉ាងច្បាស់។ «ខ្ញុំតែងតែចាំថ្ងៃនោះ។ ក្នុងអំឡុងពេលនោះខ្ញុំភ័យខ្លាំងណាស់ចំពោះកម្លាំងសមត្ថកិច្ចដែលមកកម្ទេចផ្ទះរបស់យើង»។ «ពួកគេមិនបានផ្តល់ព័ត៌មានណាមួយដល់យើងថាពួកគេនឹងមកកម្ទេចផ្ទះរបស់យើងទេ ដោយពួកគេបានមកធម្មតា នៅពេលព្រឹកហើយបានចាប់ផ្តើមកម្ទេច។ យើងបានបាត់បង់របស់របរទាំងអស់របស់យើង»។
អ្នកស្រី ស្រីអូន បានថ្លែងថាសាលារាជធានីបានប្រាប់ពួកគេអំពីចំនួនផ្តល់សំណងហិរញ្ញវត្ថុទៅពលរដ្ឋទាំង ១០ គ្រួសារនោះគឺ ៣០០០ ដុល្លារ។ អ្នកស្រីបន្តថានេះមិនគ្រប់គ្រាន់សម្រាប់ទិញដី ផ្ទះ នៅក្នុងតំបន់ ឬសម្រាប់ប្រកបរបររស់នៅបាននោះទេ។
អ្នកស្រី ស្រីអូន ក៏បានលើកឡើងផងដែរថា មន្ត្រីសាលារាជធានីបានបំភិតបំភ័យក្រុមប្រជាពលរដ្ឋ ១១ គ្រួសារ។ «ពួកគេបានគំរាមកំហែងថា ប្រសិនបើពួកយើងមិនទទួលយកដំណោះស្រាយ នោះ... អាជ្ញាធរនឹងយកកម្លាំងប្រដាប់អាវុធមកបណ្តេញយើងចេញ»។
លោក ឡុង ចាន់ឌី ដែលជាតំណាងសហគមន៍មួយទៀតដែលត្រូវបានបណ្តេញចេញនៅពេលផ្លូវរថភ្លើងថ្មីត្រូវបានសាងសង់ក៏បានចូលរួមខួបនេះដែរដើម្បីបង្ហាញអំពីការគាំទ្ររបស់លោក។ «យើងស្នើសុំឲ្យពលរដ្ឋទាំងអស់នៅបុរីកីឡាទទួលបានសំណងសមស្រប»។
លោក មាន ចាន់យ៉ាដា ប្រធានគណៈកម្មាធិការដោះស្រាយករណីនេះបានបដិសេធធ្វើអធិប្បាយ និងបានបង្វែរសំណួរទៅអ្នកនាំពាក្យសាលារាជធានីភ្នំពេញ លោក មេត មាសភក្តី ដែលមិនអាចទាក់ទងសុំអត្ថាធិប្បាយបាន៕ PS