.jpg)
អ្នកចូលរួមបោះឆ្នោតព្រឹទ្ធសភា ដាក់សន្លឹកឆ្នោតនៅក្នុងហិបឆ្នោត នៅឯមណ្ឌលបោះឆ្នោត ស្ថិតក្នុងរាជធានីភ្នំពេញ កាលពីថ្ងៃម្សិលមិញ។ ស្រេង ម៉េងស្រ៊ុន
ភ្នំពេញៈ គណៈកម្មាធិការជាតិរៀបចំការបោះឆ្នោតកាលពីម្សិលមិញ បានអះអាងថា ការបោះឆ្នោតបានដំណើរការដោយបរិយាកាសល្អប្រសើរគ្មានអំពើហិង្សាកើតឡើង និងភាពមិនប្រក្រតីនោះទេ ខណៈដែលលទ្ធផលបណ្ដោះអាសន្ននៃ ចំនួនអ្នកបោះឆ្នោតជ្រើសតាំងសមាជិកព្រឹទ្ធសភាមានរហូតដល់ ១១ ៦៧០ ស្មើនឹងជាង ៩៩ ភាគរយនៃចំនួនអ្នកបោះឆ្នោតសរុបចំនួន ១១ ៦៩៥ នាក់។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតថ្លែងក្នុងសន្និសីទកាសែត ក្រោយពីបិទការិយាល័យបោះឆ្នោតកាលពីម្សិលមិញថា ការបោះឆ្នោតជ្រើសតាំងសមាជិកព្រឹទ្ធសភាបានប្រព្រឹត្តដោយបរិយាកាសរលូន ខណៈមណ្ឌលបោះឆ្នោតខ្លះបានបិទការិយាល័យមុនការកំណត់។
លោក នីថា ថ្លែងថា៖ «ចំនួនអ្នកទៅបោះឆ្នោតគឺស្មើនឹង ៩៩,៧៩ % ដោយចាត់ទុកថា វាបានបង្ហាញពីការយកចិត្តទុកដាក់របស់អង្គបោះឆ្នោតក៏ដូចជាគណបក្សនយោបាយ»។
បើទោះបីជា គ.ជ.ប នឹងប្រកាសលទ្ធផលផ្លូវការនៅថ្ងៃទី ៣ ខែមីនា ឆ្នាំ ២០១៨ ក៏ដោយ ក៏គណបក្សប្រជាជនកម្ពុជាបានផ្ដល់ព័ត៌មានតាមប្រព័ន្ធផ្សព្វផ្សាយក្នុងស្រុកឲ្យដឹងថា គណបក្សប្រជាជន បានទទួលជ័យជម្នះ កាន់កាប់អាសនៈទាំងស្រុងនៅក្នុងព្រឹទ្ធសភាដែលមាន ៥៨ កៅអី។
គណបក្សប្រជាជនកម្ពុជា ទទួលបានសន្លឹកឆ្នោតចំនួន ១១ ២០២ នៃលទ្ធផលសរុបអ្នកបានទៅបោះឆ្នោតចំនួន ១១ ៦៧០ សន្លឹក។
ការបោះឆ្នោតបានប្រព្រឹត្តទៅចាប់ពីម៉ោង ៧ ព្រឹក រហូតដល់ម៉ោង ៣ រសៀល កាលពីថ្ងៃម្សិលមិញ ដែលមានអង្គបោះឆ្នោត ជាសមាជិករដ្ឋសភា និងក្រុមប្រឹក្សាឃុំ-សង្កាត់ មកពី គណបក្សចំនួន ៤ ទៅបោះឆ្នោតនៅក្នុងការិយាល័យបោះឆ្នោតចំនួន ៣៣ កន្លែង នៅទូទាំងប្រទេស។
គណបក្សនយោបាយដែលបានចូលរួមបោះឆ្នោតកាលពីម្សិលមិញគឺ គណបក្សប្រជាជនកម្ពុជា លេខរៀងទី ១ គណបក្សយុវជនកម្ពុជា លេខរៀងទី ២ គណបក្សខ្មែររួបរួមជាតិ លេខរៀងទី ៣ និងគណបក្សរាជានិយម ហ៊្វុនស៊ិនប៉ិច លេខរៀងទី ៤។
អតីតគណបក្សសង្គ្រោះជាតិ ដែលមានអង្គបោះឆ្នោតដែលជាតំណាងរាស្ត្រនិងក្រុមប្រឹក្សា ឃុំ-សង្កាត់ចំនួន ៥ ០៦២ នាក់ ហើយត្រូវបានបែងចែកទៅឲ្យគណបក្សដទៃដែលក្រោយពីតុលាការកំពូលរំលាយចោលកាលពីចុងឆ្នាំ ២០១៧ បានចេញសេចក្ដីថ្លែងភ្លាមៗនៅថ្ងៃបោះឆ្នោតកាលពីម្សិលមិញ ដោយបានបដិសេធទាំងស្រុងចំពោះលទ្ធផលបោះឆ្នោត ដោយអះអាងថា មិនស្របច្បាប់ និងផ្ទុយពីស្មារតីរដ្ឋធម្មនុញ្ញ និងអំពាវនាវដល់អង្គការសហប្រជាជាតិ កុំទទួលស្គាល់លទ្ធផលនៃការបោះឆ្នោតជ្រើសតាំងព្រឹទ្ធសភានេះ។
មន្ត្រីការិយាល័យបោះឆ្នោត គូសសន្លឹកឆ្នោតរាប់ក្រោយពីការបោះឆ្នោតត្រូវបានបញ្ចប់កាលពីម្សិលមិញ។ ស្រេង ម៉េងស្រ៊ុន
លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោតថ្លែងប្រាប់ក្រុមអ្នកកាសែត បន្ទាប់ពីបានចុះត្រួតពិនិត្យទីតាំងការិយាល័យបោះឆ្នោតស្ថិតក្នុងវិទ្យាល័យ ហ៊ុន សែន ប៊ុនរ៉ានី វត្តភ្នំ កាលពីម្សិលមិញថា ការបោះឆ្នោតជ្រើសរើសព្រឹទ្ធសភានៅថ្ងៃទី ២៥ ខែ កុម្ភៈ ឆ្នាំ ២០១៨ នេះគឺប្រព្រឹត្តទៅដោយរលូន បើទោះបីជាមិនមានអ្នកសង្កេតការណ៍មកពីស្ថានទូតអាមេរិក ឬ សហភាពអឺរ៉ុបក៏ដោយ ការបោះឆ្នោតបានប្រព្រឹត្តទៅដោសេរី និងយុត្តិធម៌។
លោក ស៊ិក ប៊ុនហុក ថ្លែងថា៖ «ខ្ញុំបានប្រាប់ហើយថា ការបោះឆ្នោតនេះសំខាន់រឿង ២ គឺត្រូវធ្វើឲ្យឯករាជ្យ អព្យាក្រឹតដើម្បីធានាការបោះឆ្នោតប្រព្រឹត្តទៅសេរី ត្រឹមត្រូវ និងយុត្តិធម៌។ ត្រង់រឿងមិនមែនពាក់ព័ន្ធជាមួយនឹងមជ្ឈដ្ឋានណាសង្កេតការណ៍ ឬមិនសង្កេតការណ៍ទេ ពីព្រោះការបោះឆ្នោតនេះ ច្បាប់កំណត់ឲ្យខ្ញុំធ្វើតាមច្បាប់ ហើយយើងកើតមកពីស្ថាប័នសភា មិនមែនកើតមកពីសហរដ្ឋអាមេរិក ឬកើតមកពី EU ហ្នឹងទេ។ EU ចូលរួមឬមិនចូលរួមជាសិទ្ធិរបស់គេ គេទទួលស្គាល់ ឬមិនទទួលស្គាល់ជាសិទ្ធិរបស់គេ»។
លោក ប៊ុនហុក ថ្លែងបន្តថា៖ «កំណើត NEC កើតចេញពីសភា មិនមែនកើតចេញពីខាងក្រៅណាទេ គឺជាតំណាងឆន្ទៈប្រជាពលរដ្ឋ សភាគឺជាឆន្ទៈប្រជាពលរដ្ឋ គេបោះឆ្នោតឲ្យមក ហើយឆន្ទៈប្រជាពលរដ្ឋគេបោះឆ្នោតឲ្យតាមរយៈសភា។ សភាគេឲ្យ NEC ធ្វើអ្វី? ឲ្យ NEC លម្អៀង? ឲ្យ NEC អយុត្តិធម៌? ឲ្យ NEC ធ្វើតាមអ្វី? ខ្ញុំមានត្រីវិស័យរបស់ខ្ញុំសម្រាប់ដើរ ព្រោះខ្ញុំកើតពីពលរដ្ឋខ្មែរទូទាំងប្រទេស គេឲ្យខ្ញុំមក ឆន្ទៈប្រជាពលរដ្ឋ យើងត្រូវយល់ ធ្វើអ្វីក៏ដោយ យើងត្រូវគោរពច្បាប់ទម្លាប់»។
លោក ប៊ុនហុក ថ្លែងថា បន្ទាប់ពីប្រកាសលទ្ធផលបឋម គ.ជ.ប នឹងប្រកាសលទ្ធផលផ្លូវការនៅថ្ងៃទី ៣ ខែមីនា ឆ្នាំ ២០១៨ ហើយទោះបីអាមេរិក និងអឺរ៉ុបព្យួរជំនួយសម្រាប់ គ.ជ.ប ក្ដី ក៏វាមិនប៉ះពាល់ដល់ដំណើរការរបស់ស្ថាប័នឯករាជ្យមួយនេះដែរ។
លោកថ្លែងថា៖ «ការប្រកាសមិនទទួលស្គាល់ការបោះឆ្នោតព្រឹទ្ធសភារបស់អតីតគណបក្សសង្គ្រោះជាតិ គឺជារឿងរបស់ពួកគាត់»។
លោកថា៖ «មិនមែនកម្ពុជាអត់ជំនួយរបស់បរទេសធ្វើមិនកើតនោះទេ...គឺនៅតែមានដំណើរការរៀបចំដំណើរការបោះឆ្នោតហ្នឹងបាន ពីព្រោះយើងបានគ្រោងថវិកាគ្រប់គ្រាន់សម្រាប់ការបោះឆ្នោត។ ប្រទេសជប៉ុន និងចិនបានជួយ នឹងបន្តជួយដល់ គ.ជ.ប»។
លោកស្រី ឡោក ខេង តំណាងរាស្ត្រ មកពីគណបក្សប្រជាជនកម្ពុជា មណ្ឌលរាជធានីភ្នំពេញ ថ្លែងក្រោយការបោះឆ្នោតដោយអះអាងថា ពេញចិត្តចំពោះដំណើរការប្រព្រឹត្តទៅនៃការបោះឆ្នោត។
លោកស្រី ខេង ថ្លែងថា៖ «ក្នុងនាមខ្ញុំជាតំណាងរាស្រ្តម្នាក់ ខ្ញុំមើលឃើញថាការបោះឆ្នោតនេះគឺត្រឹមត្រូវ សេរី និងយុត្តិធម៌ ហើយក្រុមប្រឹក្សាទាំងអស់ដែលសុទ្ធតែជាតំណាងឲ្យប្រជាពលរដ្ឋនៅក្នុងមូលដ្ឋានគឺគាត់សប្បាយ រីករាយ និងចូលរួម ដូច្នេះចំណែកមតិអ្នកផ្សេងថា មិនគាំទ្រ មិនត្រឹមត្រូវ អាហ្នឹងគឺម្នាក់ៗមានមតិ ហើយមានគំនិតផ្សេងៗគ្នា តែបច្ចុប្បន្ន ខ្ញុំមើលឃើញថា សភាពការណ៍ក្នុងប្រទេសយើង គឺប្រជាពលរដ្ឋរស់នៅដោយសុខស្រួល មិនខ្វល់ខ្វាយនឹងអ្វីទាំងអស់ គាត់ខ្វល់ខ្វាយតែនឹងរឿងសុវត្ថិភាព សុខភាព និងមុខរបរសេដ្ឋកិច្ចរបស់គាត់ដើម្បីផ្គត់ផ្គង់ក្នុងគ្រួសាររបស់គាត់»។
លោកស្រីបន្ថែមថា៖ «ខ្ញុំថាការដែលគ្មានគណបក្សសង្គ្រោះជាតិ ឬក៏គណបក្សប្រឆាំង គឺមិនមានបញ្ហាព្រោះមានគណបក្សដល់ទៅ ៤ ដែលបានចូលរួម នោះគឺយើងអនុវត្តតាមរដ្ឋធម្មនុញ្ញត្រឹមត្រូវហើយ ដោយយើងអនុវត្តតាមរបបប្រជាធិបតេយ្យ សេរីពហុបក្ស។ គាត់មិនទទួលស្គាល់អាហ្នឹង គឺជារឿងរបស់គាត់ ក៏ប៉ុន្តែប្រជាពលរដ្ឋដែលគាំទ្រគណបក្សប្រជាជន ហើយក្រុមក្រុមប្រឹក្សាដែលចូលរួមការបោះឆ្នោត គឺជាការបង្ហាញការគាំទ្រមួយធំណាស់»។
លោកស្រី សុខ ណារី ចៅសង្កាត់រងទី ១ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ មកពីគណបក្សប្រជាជនកម្ពុជា បានសម្ដែងការសោកស្ដាយដោយសារគ្មានគូប្រជែងដែលខ្លាំងដូចមុន បន្ទាប់ពីគណបក្សសង្គ្រោះជាតិ ត្រូវបានតុលាការកំពូលប្រកាសរំលាយចោល។
លោកស្រីថ្លែងថា៖ «ខ្ញុំចង់ឲ្យមានការចូលរួមដូចគ្នា ដើម្បីឲ្យវាមានប្រជាធិបតេយ្យសម្រាប់ការបោះឆ្នោត ឲ្យវាមានអ្នកប្រឆាំង មានអ្នកមិនប្រឆាំង។ តែបើអត់មាន [បក្សប្រឆាំង] ក៏នៅតែមានប្រជាធិបតេយ្យដែរ ព្រោះមានគណបក្សប្រជែងផ្សេងដែរបានចូលរួម គ្រាន់តែពួកគាត់មានសំឡេងអីតិចតួច»។
លោកហែម សារ៉ាឌី អាយ ៧០ ឆ្នាំ ជាអតីតសមាជិកក្រុមប្រឹក្សាសង្កាត់កាកាបទី ១ ខណ្ឌពោធិ៍សែនជ័យ របស់គណបក្សសង្គ្រោះជាតិ ដែលបច្ចុប្បន្នបានចុះចូលជាមួយគណបក្សប្រជាជនកម្ពុជា បានថ្លែងថា មុនឈានមកដល់ការបោះឆ្នោត ថ្នាក់លើបានណែនាំឲ្យសម្ដែងការស្មោះត្រង់ចំពោះគណបក្សតាមរយៈការបោះឆ្នោតជូន គណបក្សប្រជាជនកម្ពុជាតែមួយប៉ុណ្ណោះ។
លោក សារ៉ាឌី ថ្លែងថា៖ «ការបោះឆ្នោតលើកនេះគ្មានការប្រកួតប្រជែងខ្លាំងដូចមុនទេ ពីមុនយើងមានគណបក្សធំៗប្រកួតប្រជែងបើសង្គ្រោះជាតិនៅនឹងមានការប្រកួតប្រជែងខ្លាំងដើម្បីយកឈ្នះ យកចាញ់ យកប្រៀបលើគូប្រជែងមួយ»។
ទោះជាយ៉ាងណាលោកបញ្ជាក់ថា លោកបានសម្រេចចិត្តចុះចូលជាមួយបក្សកាន់អំណាចដោយសារតែដឹងពីការប៉ុនប៉ងធ្វើ «បដិវត្តន៍ពណ៌» របស់គណបក្សនេះ។
យោងតាមសេចក្ដីប្រកាសព័ត៌មានរបស់ គ.ជ.ប ឲ្យដឹងថា មានអ្នកសង្កេតការណ៍ជាតិចំនួន ២៧៦ នាក់ត្រូវបានគេដាក់ពង្រាយឲ្យឃ្លាំមើលការបោះឆ្នោតព្រឹទ្ធសភា ខណៈមានស្ថានទូតបរទេសតែ ២ ប៉ុណ្ណោះដែលបានដាក់អ្នកសង្កេតការណ៍របស់ពួកគេ។
គណបក្សយុវជនកម្ពុជា ដែលបានចូលរួមក្នុងការបោះឆ្នោតកាលពីម្សិលមិញ បានចេញសេចក្ដីថ្លែងការណ៍ក្រោយចេញពីលទ្ធផលបឋមរបស់ គជប ដោយគាំទ្រទាំងស្រុងនូវលទ្ធផលបោះឆ្នោតជ្រើសតាំងព្រឹទ្ធសភា ហើយបានចាត់ទុកថា ការបោះឆ្នោតបានប្រព្រឹត្តទៅដោយត្រឹមត្រូវ និងយុត្តិធម៌៕
