.jpg)
កញ្ញា ធី សុវណ្ណថា និង លោក ផែ សុវណ្ណារិទ្ធ នាពេលកន្លងមក។ រូបថតៈ ហ្វេសប៊ុក
ភ្នំពេញៈ អតីតអ្នកគាំទ្របក្សប្រឆាំង កញ្ញា ធី សុវណ្ណថា រួមនឹង លោក ស្រី ចំរើន ដែលធ្លាប់សកម្មក្នុងការវាយប្រហារលើអតីតថ្នាក់ដឹកនាំអតីតគណបក្សសង្គ្រោះជាតិ និង អ្នកផ្សេងមួយចំនួនទៀត ត្រូវបានតែងតាំងជាអនុប្រធាននៃគណៈពង្រឹងមូលដ្ឋានឃុំត្រើយស្លា ជាអ្វីដែលមន្ត្រីគណបក្សកាន់អំណាចថា ធ្វើឡើងដោយផ្អែកលើគុណសម្បត្តិពួកគេ។
យោងតាមសេចក្តីសម្រេចចុះហត្ថលេខានៅថ្ងៃទី ៩ មីនា ដោយលោកនាយករដ្ឋមន្ត្រី ហ៊ុន សេន ដែលជាប្រធាន គណបក្សប្រជាជនកម្ពុជា និង ជាប្រធានគណៈអចិន្ត្រៃយ៍គណៈពង្រឹងមូលរដ្ឋានខេត្តកណ្តាលផងនោះ បានសម្រេចតែងតាំងលោក ខូវ មករា អនុរដ្ឋលេខាធិការក្រសួងប្រៃសណីយ៍ និង ទូរគមនាគមន៍ ជាប្រធានគណៈពង្រឹងមូលដ្ឋានឃុំ ត្រើយស្លា កញ្ញា ធី សុវណ្ណថា ជាអនុប្រធានទី ១, លោក តុល ញ៉ក់ អគ្គនាយកនៃអគ្គនាយកដ្ឋានប្រៃសណីយ៍និងទូរគមនាគមន៍ជាអនុប្រធានទី ២។
ដោយឡែក លោក គង់ ពុទ្ធារ៉ា អគ្គនាយករងអគ្គនាយកដ្ឋានរដ្ឋបាល-ហិរញ្ញវត្ថុក្រសួងប្រៃសណីយ៍, លោក ឌួង ឆាយ និងភរិយាឈ្មោះ ដេត ម៉ា លីណា, លោក ហួត ចាន់យ៉ារ៉េត លោក សុខ ដារិទ្ធិ, លោក ជាង សុភ័ក្រ, លោក ពុត ហេម៉ុណ្ណា, អ្នកស្រី នឹម វណ្ណៈ, លោក គី ឡេង…អ្នកស្រី ប៉ាត់ សុធារ៉ា លោក ឧកញ៉ា ជា ចំរើន, លោក ផែ សុវណ្ណារិទ្ធ ជាអនុប្រធានធម្មតា ។ រីឯលោក ប៉ាវ ប៉េង អនុប្រធានប្រចាំការ។
ក្រៅពីនោះគេឃើញមានឈ្មោះលោក ផែ សុវណ្ណារិទ្ធ ក៏កាន់ជាប្រធានលេខាធិការដ្ឋានឃុំនេះផងដែរ ខណៈលោក ព្រាប កែវ វិថា លោក ស្រី ចំរើន, អ្នកស្រី ផែ សុគន្ធា , លោក សរ សារិន, លោក ហ៊ូ ពិសិទ្ធ ,លោក នាង បញ្ញា, លោក ឯម ឫទ្ធិ លោក តាំង ស៊ីគង់, លោក សុខ ចន្រ្ទាបុត្រ ,លោក យូ វ៉េងគី , លោក ឆិន តូ និង លោក តត គង់ ជាអនុប្រធានលេខាធិការដ្ឋាន រីឯ អ្នកស្រី យត វួចលីម ,អ្នកស្រី ហេន ឡាដែន, អ្នកស្រីដុំ ភារ៉ា អ្នកស្រី នៅ ចន្ធី និង អ្នកស្រី ឡូត ហ្វីលីព ជាសមាជិក។
កាលពីឆ្នាំមុន អតីតសកម្មជនគណបក្សសង្គ្រោះជាតិ ដែលបច្ចុប្បន្នជាសកម្មជនល្បីរបស់គណបក្សប្រជាជន កញ្ញា ធី ធ្លាប់សរសេរក្នុងបណ្តាញហ្វេសប៊ុកព្រមានប្ដឹងសមាជិកក្រុមប្រឹក្សាឃុំសង្កាត់ជាង ៥ ពាន់នាក់នៃគណបក្សប្រឆាំង ដែលជាប់ឆ្នោតពីបទសមគំនិតក្នុង «អំពើក្បត់ជាតិ» ជាមួយលោក កឹម សុខា។ ក្រោយពីនេះ នៅក្នុងឆ្នាំ ២០១៦ កញ្ញា និងក្រុមសកម្មជនរបស់ខ្លួនធ្លាប់បានធ្វើយុទ្ធនាការសុំដកលោក កឹម សុខា ពីប្រធានគណបក្សសង្គ្រោះជាតិ និងក៏ធ្លាប់បានស្នើឲ្យដកតំណែងលោក កឹម សុខា ពីអនុប្រធានរដ្ឋសភាផងដែរពាក់ព័ន្ធនឹងរឿងអាស្រូវផ្លូវភេទ។
ជាមួយនេះដែរ នៅឆ្នាំ ២០១៦ ដដែលក៏មានលេចធ្លាយសារឆ្លងឆ្លើយគ្នាដែលគេជឿថា ជាសាររបស់លោក ហ៊ុន សែន និង ធី សុវណ្ណ តាមបណ្តាញទំនាក់ទំនងសង្គម ហៅថា Line ដែលបានបង្ហាញក្នុងការសន្ទនានោះដោយប្រើពាក្យ «តានិងចៅ» លើកឡើងពីរឿងផ្ទាល់ខ្លួនមួយចំនួន ប៉ុន្តែភាគច្រើនផ្តោតលើយុទ្ធសាស្ត្របំបែកបំបាក់គណបក្សប្រឆាំង។
ចំណែក ក្រុមលោក ស្រី ចំរើន ក៏ត្រូវបានគេស្គាល់ថា ជាអ្នកចេញមុខយ៉ាងសកម្មដឹកនាំការតវ៉ាប្រឆាំងនឹងលោក កឹម សុខា ទាក់ទងនឹងរឿងអាស្រូវផ្លូវភេទផងដែរ កាលពីឆ្នាំ ២០១៦។
.jpg)
ដោយឡែក លោក ជា ចំរើន ធ្លាប់បានលាលែងពីគណបក្សប្រជាជនទៅបង្កើតគណបក្សថ្មីមួយ ប៉ុន្តែក្រោយមកបានផ្ទេរទៅឲ្យសែរាជវង្សជាអ្នកដឹកនាំជំនួសវិញ ខណៈរូបលោកនៅតែបន្ដបម្រើគណបក្សកាន់អំណាច។
អ្នកនាំពាក្យគណបក្សប្រជាជន លោក សុខ ឥសាន បានថ្លែងកាលពីម្សិលមិញថា ការតែងតាំងនេះគឺមិនប្រកាន់អតីតគណបក្សនយោបាយនោះទេ ប៉ុន្តែអាស្រ័យលើគណបក្សចុងក្រោយដែលគាត់បានបម្រើ និងផ្អែកលើគុណសម្បត្តិរបស់ពួកគាត់ដែលបានបំពេញកន្លងមក៕
