កណ្ដាលៈ ឧកញ៉ាម្នាក់ដែលជាប់ពាក់ព័ន្ធក្នុងជម្លោះដីធ្លីនៅម្ដុំព្រលានយន្តហោះដ៏ធំថ្មីក្នុងខេត្តកណ្តាលបានបញ្ជាក់កាលពីម្សិលមិញថា លោកស្រីពិតជាត្រូវបានស្ថានទូតអាមេរិកលុបចោលទិដ្ឋាការកាលពីសប្ដាហ៍មុន បន្ទាប់ពីមានកិច្ចសម្ភាសន៍ ប៉ុន្តែបានការពារការអះអាងរបស់លោកស្រីជុំវិញជម្លោះដីនេះដែលលោកស្រីថា នៅសល់ដីនៅតំបន់នោះប្រហែល ៤០០ ហិកតា។
លោកស្រី សៀង ចាន់ហេង បានថ្លែងនៅគេហដ្ឋានលោកស្រីនាក្រុងតាខ្មៅថា អ្នកភូមិបានរើចូលលើដីលោកស្រីនៅស្រុកកណ្តាលស្ទឹងជាង ៥ ឆ្នាំ បន្ទាប់ពីលោកស្រីបានទិញដីនេះដំបូង ដោយបានបដិសេធចំពោះការអះអាងរបស់អ្នកភូមិដែលថា ពួកគេបានរស់នៅលើដីនេះតាំងពីទសវត្សរ៍ ៨០ និង ៩០ ។
លោកស្រី ចាន់ហេង បានបន្តថា៖ «ពួកគេតែងចោទប្រកាន់ខ្ញុំថាមានដោយសារប្លន់ទ្រព្យសម្បត្តិគេ និងបោកប្រជាជន»។ «...ពួកគេចោទប្រកាន់ខ្ញុំថា ទទួលបានកម្មសិទ្ធិដីពីការឃុបឃិតជាមួយគេ»។
ដីរាប់ពាន់ហិកតាក្នុងស្រុកកណ្តាលស្ទឹងបានផ្ទុះឡើងជាវិវាទចាប់តាំងពីរដ្ឋាភិបាលប្រកាសបង្កើតព្រលានយន្តហោះធំមួយ និងការអភិវឌ្ឍចម្រុះទំនើបលើដី ២៦០០ ហិកតានៅទីនោះ។
បើតាមព័ត៌មានថា មន្ត្រីជាន់ខ្ពស់មួយចំនួនមានកម្មសិទ្ធិដីក្នុងតំបន់នោះ រួមមានរដ្ឋមន្ត្រីទេសចរណ៍លោក ថោង ខុន ឧត្តមសេនីយ៍ឯក ដួង ហេង អភិបាលរងរាជធានីភ្នំពេញ កើត ឆែ និងស្នងការរាជធានីភ្នំពេញលោក ជួន សុវណ្ណ ដែលបានជាប់នៅក្នុងជម្លោះដីធ្លីជាមួយក្រុមហ៊ុនមួយចំនួន។
ទោះយ៉ាងណាក្តីជម្លោះដែលអូសបន្លាយយូរអង្វែងបំផុតគឺរវាងពលរដ្ឋក្នុងភូមិដែលហៅថាតំបន់ ៩២,៩៣ និង ៩៤ និងលោកស្រី ចាន់ហេង។
អួង ស៊ីម ជាកសិករ និងជាគ្រួសារមួយក្នុងចំណោមគ្រួសារ ២៩២ ដែលថាបានទៅនៅតំបន់នោះជាង ២០ ឆ្នាំមុនគឺនៅមុនពេលក្រុមហ៊ុន Heng Development Co. ថាជាកម្មសិទ្ធិលើដីនេះថ្លែងថា៖ «គាត់និយាយអ្វីក៏ដោយដែលគាត់ចង់បាន»។
បន្ទាប់ពីឈ្នះក្តីនៅតុលាការក្នុងឆ្នាំ ២០០៦-២០០៧ និងទទួលបានកម្មសិទ្ធិដីបណ្តោះអាសន្នពីអាជ្ញាធរ អ្នកភូមិបានថ្លែងថាភ្លាមៗនោះអាជ្ញាធរមិនអើពើចំពោះអ្នកភូមិទេ។
ស៊ីម បន្តថា៖ «ពលរដ្ឋមិនទទួលយកអ្វីដែលគាត់និយាយដោយសារកាលពីមុនគាត់អះអាងកម្មសិទ្ធិតែ ៤២ ហិកតា។ គាត់មិនមានប្លង់ដីដែលត្រួតស៊ីគ្នាជាមួយដីរបស់យើង...ហើយប្រសិនបើក្រុមហ៊ុនណាមកវាស់វែងដីរបស់យើង យើងនឹងមិនអនុញ្ញាតទេ»។
ទោះយ៉ាងណាលោកស្រី ចាន់ហេង បានអះអាងថាសាលក្រមត្រូវបានផ្លាស់ប្តូរ បន្ទាប់ពីការវាស់វែងបង្ហាញថា អ្នកភូមិរស់នៅលើដីលោកស្រីដូចមានក្នុងប្លង់ដីដែលលោកស្រីមាន។
លោកស្រី ចាន់ហេង ក៏បានថ្លែងដែរថាលោកស្រីជាជនរងគ្រោះនៃការរំលោភយកដីធ្លី បន្ទាប់ពីតុលាការកំពូលសម្រេចកាលពីឆ្នាំ ២០០៤ ថាដី ១០០០ ហិកតានៅស្រុកកណ្តាលស្ទឹង និងតាខ្មៅជារបស់ឧកញ៉ាម្នាក់ទៀតដែលថា គាត់បានទិញដីនេះកាលពីពេលមុន ។
លោកស្រី ចាន់ហេង បានថ្លែងថា៖ «ខ្ញុំត្រូវតែទាមទារវាពីព្រោះវាជាកម្លាំងញើសឈាមរបស់ខ្ញុំ»។ «ខ្ញុំមានការឈឺចាប់ ហើយខ្ញុំបានខ្ចីលុយ [គេទិញដីនោះ]»។
លោកស្រីបានបញ្ជាក់ថា៖ «បើកាត់ទូទាត់ទៅដីខ្ញុំនៅសល់ប្រហែល ៤០០ ហិកតា»។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត មិនអាចទាក់ទងសុំអត្ថាធិប្បាយកាលពីម្សិលមិញ។
ភ្លាមៗបន្ទាប់ពីកាសែតភ្នំពេញប៉ុស្តិ៍សរសេររឿងអំពីជម្លោះដីធ្លីអូសបន្លាយ ស្ថានទូតអាមេរិកក៏បានលុបចោលទិដ្ឋាការលោកស្រីសម្រាប់ដំណើរទៅអាមេរិកនាពេលខាងមុខ។ នេះបើតាមការថ្លែងរបស់លោកស្រី ចាន់ហេង។
លោកស្រី ចាន់ហេង បានថ្លែងថា៖ «ពួកគេបានសម្ភាសខ្ញុំរយៈពេលមួយម៉ោង ដូចអ្នកកំពុងសម្ភាសខ្ញុំឥឡូវនេះ អំពីថា តើខ្ញុំយកដីប្រជាពលរដ្ឋឬអត់អំពីថាតើប្រជាពលរដ្ឋដាក់ពាក្យបណ្តឹងដូចម្តេច និងរឿងដទៃៗទៀត?»។
លោកស្រីថា៖ «បន្ទាប់ពីខ្ញុំបញ្ចប់ការនិយាយ ពួកគេឆ្លើយថា សុំទោស ហើយថា ពួកគេលុបចោលទិដ្ឋាការខ្ញុំ»។
នៅពេលទាក់ទងពីម្សិលមិញអ្នកនាំពាក្យស្ថានទូត លោក Arend Zwartjes បានបដិសេធមិនធ្វើអត្ថាធិប្បាយ។
រដ្ឋាភិបាលអាមេរិកលុបចោលទិដ្ឋាការផ្អែកលើមូលហេតុមួយចំនួនរួមមាន អំពើក្លែងបន្លំ ឬការមិនបង្ហាញពិរុទ្ធភាពណាមួយកាលពីអតីតកាល។
លោកស្រី ចាន់ហេង បានជាប់ពាក់ព័ន្ធនឹងការក្លែងបន្លំកម្មសិទ្ធិដីធ្លីនៅក្នុងខេត្តកំពង់ឆ្នាំងកាលពីឆ្នាំមុនដែលលទ្ធផលរកឃើញត្រូវបានបង្ហាញនៅក្នុងអត្ថបទរបស់កាសែតភ្នំពេញ ប៉ុស្តិ៍៕ PS