ភ្នំពេញៈ សំណុំរឿងអតីតគ្រូបង្រៀនម្នាក់ក្នុងចំណោមពលរដ្ឋ ១០២ គ្រួសារដែលផ្ដិតមេដៃសុំដីតែត្រូវបានប្ដឹងថាក្លែងឯកសារនោះត្រូវបានសាលាឧទ្ធរណ៍ បើកសវនាការនៅថ្ងៃ ២២ កុម្ភៈនេះ បន្ទាប់ពីត្រូវតុលាការថ្នាក់ក្រោមកាត់ក្ដីឲ្យជាពន្ធនាគារ ១ ឆ្នាំកន្លះនិងឲ្យសងសំណង ១០ លានរៀលទៅដើមបណ្ដឹង ។
បុរសជនជាប់ចោទឈ្មោះ អ៊ឹង លី អាយុ ៥៤ ឆ្នាំ បានឆ្លើយក្នុងបន្ទប់សវនាការថា រឿងការដែលគាត់ជាប់ឃុំដល់សព្វថ្ងៃនេះ ដោយសារកាលពីឆ្នាំ ២០១៦ មានអ្នកភូមិ ១០២ គ្រួសារបាននាំគ្នាផ្តិតមេដៃសុំដីពីអាជ្ញាធរខេត្តកំពត ដើម្បីកសាងលំនៅឋាន និង ដាំដំណាំហើយគាត់ក៏ផ្តិតមេដៃនឹងគេដែរ។
ជនជាប់ចោទបន្តថា ការធ្វើលិខិតស្នើសុំដីនោះក៏ត្រូវមេភូមិឈ្មោះ ប្រាក់ នាគ ប្តឹងលោកទៅសាលាដំបូងខេត្ត ហើយតុលាការបានចេញដីកានៅថ្ងៃអាទិត្យចាប់ខ្លួនលោកតែម្តង។
លោកបំភ្លឺដល់ចៅក្រមពីម្សិលមិញថា៖ «អ្វីដែលតុលាការចេញដីកាឲ្យចាប់ខ្លួនខ្ញុំនេះ វាហាក់ខុសនីតិវិធី ព្រោះចំថ្ងៃអាទិត្យហើយឲ្យខ្ញុំបង្ហាញខ្លួននៅថ្ងៃចន្ទ។វារហ័សពេកយ៉ាងហោចក៏ត្រូវទុកពេលឲ្យខ្ញុំរៀបចំឯកសារដើម្បីឡើងតុលាការ១អាទិត្យមុនដែរ»។
លោក មួង សុគន្ធ ជាមេធាវីការពារសិទ្ធិឲ្យជនជាប់ចោទបានសន្និដ្ឋានថា ករណីនេះបើពិនិត្យលើឯកសារនិងចម្លើយរបស់កូនក្តីលោកថា អក្សរដែលសរសេរលើពាក្យស្នើសុំដីនោះមិនមែនជាអក្សររបស់គាត់ទេ តែគាត់បានផ្តិតមេដៃមែន។
ក្នុងរឿងក្តីនេះត្រូវសាលាដំបូងខេត្តកំពតផ្តន្ទាទោសដាក់ពន្ធនាគារជនជាប់ចោទ១ឆ្នាំកន្លះកាលថ្ងៃទី ៣១ ខែតុលា ឆ្នាំ ២០១៧ និងបង្គាប់ឲ្យសងការខូចខាតដល់មេភូមិ ១០ លានរៀល។
លោកមេធាវីថ្លែងថា៖ «ការបង្គាប់ឲ្យកូនក្តីលោកសងការខូចខាតនេះហាក់មិនសមហេតុផល។ ព្រោះដើមបណ្តឹងគ្មានអ្វីខូចខាតទេ គាត់ប្តឹងតែរឿងក្លែងឯកសារប៉ុណ្ណោះ»។
ក្រោយពីជំនុំជម្រះ លោក ប៉ុល សំអឿន ប្រធានក្រុមប្រឹក្សាជំនុំជម្រះថ្លែងថាសាលដីការឿងនេះនឹងប្រកាសនៅថ្ងៃ ២៨ កុម្ភៈ ខាងមុខ ៕