Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧទ្ធរណ៍​ជម្រះក្ដី ថាក់ ឡានី អតីត​សមាជិក​ព្រឹទ្ធសភា​បក្ស​ប្រឆាំង

Content image - Phnom Penh Post
លោក គី តិច មេធាវី​តំណាង​ឲ្យ​លោក​នាយក​រដ្ឋមន្ត្រី ហ៊ុន សែន នៅ​សាលា​ឧទ្ធរណ៍​។ រូបថត គឹម សារុំ

ឧទ្ធរណ៍​ជម្រះក្ដី ថាក់ ឡានី អតីត​សមាជិក​ព្រឹទ្ធសភា​បក្ស​ប្រឆាំង

ភ្នំពេញ: សាលា​ឧទ្ធរណ៍​កាលពី​ម្សិលមិញ​បាន​លើក​យក​រឿង​ក្ដី​ស្ត្រី​ជនជាប់ចោទ ថាក់ ឡានី អតីត​សមាជិក​ព្រឹទ្ធសភា​មកពី​គណបក្ស​ សម រង្ស៊ី ដែល​បាន​ចោទប្រកាន់​លោក ហ៊ុន សែន នាយក​រដ្ឋមន្ត្រី និង​ប្រធាន​គណបក្ស​ប្រជាជន​ជា​អ្នក​រៀបចំ​សម្លាប់​លោក បណ្ឌិត​ កែម ឡី ​ជា​អ្នក​វិភាគ​សង្គម​។

អង្គ​ជំនុំជម្រះ​បាន​បើក​សវនាការ​ប្រមាណ​ជា​ ២០ ​នាទី​ដោយ​គ្មាន​វត្តមាន​ជន​ជាប់ចោទ​ និង​មេធាវី​របស់​ជន​ជាប់ចោទ​តែ​អង្គ​សវនាការ​បាន​ចាត់​ទុក​ថា​រឿង​នេះ​អាច​ដំណើរការ​តាម​​នីតិវិធី​បាន​ហើយ​ក៏​បាន​សម្រេច​លើក​សាលដីកា​ទៅ​ប្រកាស​នៅ​ថ្ងៃ​ទី​ ២៩ ខែ​សីហា​។

សំណុំ​រឿង​នេះ​ត្រូវ​បាន​សាលា​ដំបូង​រាជធានី​ភ្នំពេញ​ប្រកាស​សាលក្រម​កាលពី​ថ្ងៃ​ទី​ ១៧ ​ខែ វិច្ឆិកា ២០១៦ ​សម្រេច​ផ្តន្ទាទោស​ឈ្មោះ​ ថាក់ ឡានី ​១ ​ឆ្នាំ​ ៦ ​ខែ​និង​ពិន័យ​ប្រាក់​ ៨ ​លាន​រៀល​រួម​បង្គាប់​ឲ្យ​ជន​ជាប់ចោទ​សង​សំណង​ជំងឺ​ចិត្ត​ទៅ​លោក​នាយក​រដ្ឋមន្ត្រី​ ហ៊ុន សែន ត្រឹម​តែ​ ១០០ ​រៀល​ប៉ុណ្ណោះ​។

លោក​នាយក​រដ្ឋមន្ត្រី​ ហ៊ុន សែន ដែល​មាន​តំណាង​លោក​មេធាវី គី តិច បាន​ដាក់​ពាក្យ​បណ្តឹង​ប្តឹង​ស្ត្រី​ជន​ជាប់ចោទ​រូប​នេះ​។

លោក​ចៅក្រម​ប្លង់ សំណាង ប្រធាន​ក្រុម​ប្រឹក្សា​ជំនុំជម្រះ​បាន​អាន​អង្គ​ហេតុ​ថា​​សំណុំ​រឿង​ជាដើម​ចម​ដែល​នាំ​ឲ្យ​លោក​នាយក​រដ្ឋមន្ត្រី​ប្តឹង​ជន​ជាប់ចោទ​ ថាក់ ឡានី ​នេះ​គឺ​នៅ​ម៉ោង​ ៨ ​កន្លះ​ព្រឹក​ថ្ងៃ​ទី​ ២៩ ​ខែ​កក្កដា​ឆ្នាំ​ ២០១៦ ​ជន​ជាប់ចោទ​ ថាក់ ឡានី ​បាន​ធ្វើ​វេទិកា​សាធារណៈ​នៅ​ភូមិ-ឃុំ​បាតាង ស្រុក​លំផាត់​ ខេត្ត​រតនគិរី​។ ​ដោយ​ក្នុង​ចំណោម​អ្នក​ចូលរួម​នោះ​ឈ្មោះ​ ថាក់ ឡានី បាន​ប្រកាស​ថា​ការ​ស្លាប់​របស់​លោក​បណ្ឌិត​ កែម ឡី គឺជា​ការ​រៀបចំ​របស់​នាយក​រដ្ឋមន្ត្រី​ ហ៊ុន សែន​។

លោក​ព្រះរាជអាជ្ញា សរ យសថាវរៈ តំណាង​​មហា​អយ្យការ​នៅក្នុង​សវនាការ​បាន​សន្និដ្ឋាន​ថា​៖ «​ខ្ញុំ​យល់​ថា​សាលក្រម​របស់​តុលាការ​ថ្នាក់​ក្រោម​សម្រេច​ផ្តន្ទាទោស​ជន​ជាប់ចោទ​ ១ ​ឆ្នាំ​ ៦ ​ខែ​នេះ​មាន​លក្ខណៈ​ត្រឹមត្រូវ​ហើយ​។ ​ដូច្នេះ​ខ្ញុំ​សូម​តម្កល់​សាលក្រម​ទុក​ជា​បាន​ការ​ដដែល​»​។

លោក​មេធាវី គី តិច មេធាវី​​ការពារ​សិទ្ធិ​ឲ្យ​លោក​នាយក​រដ្ឋមន្ត្រី​ ហ៊ុន សែន ប្រាប់​ដល់​ក្រុម​អ្នក​យក​ព័ត៌មាន​នៅ​ក្រៅ​បន្ទប់​សវនាការ​ផង​ដែរ​ថា​សំណុំ​រឿង​នេះ​បន្ទាប់ពី​សាលា​ដំបូង​រាជធានី​ភ្នំពេញ​ផ្តន្ទាទោស​មក​ជន​ជាប់ចោទ ថាក់ ឡានី មិន​សុខចិត្ត​នឹង​សាលក្រម​នោះ​ហើយ​ឲ្យ​មេធាវី​របស់​គាត់​ប្តឹង​មក​សាលា​ឧទ្ធរណ៍ តែ​ពេល​ឧទ្ធរណ៍​លើក​សំណុំ​រឿង​គាត់​មក​ជំនុំជម្រះ​បែរ​ជា​មិន​ចូល​ហើយ​ថែម​ទាំង​មិន​ឲ្យ​មេធាវី​ចូល​សវនាការ​ទៀត​ហើយ​មេធាវី​បាន​ដាក់​ពាក្យ​សុំ​លើក​ពេល​ជំនុំជម្រះ​។

លោក មេធាវី ថ្លែង​ថា​៖ «​ភ័ស្តុតាង​កាលពី​នៅ​សាលា​ដំបូង​បាន​ចាក់​ឃ្លីប​ដែល​ជំទាវ​និយាយ​ថា​សុខ​មិន​សុខ​ទៅ​សម្លាប់​លោក​ កែម ឡី​។ នេះ​បញ្ជាក់​ពី​ចេតនា​ហើយ​សម្តេច​មិន​សុខ​ចិត្ត​។ សម្តី​ ថាក់ ឡានី ​ជា​ការ​កេងប្រវ័ញ្ច​ខាង​នយោបាយ​ឲ្យ​មហាជន​ស្អប់​សម្តេច​។ ​ខ្ញុំ​សូម​ស្នើ​ក្រុម​ប្រឹក្សា​ពិចារណា​តម្កល់​សាលក្រម​របស់​តុលាការ​ថ្នាក់ក្រោម​ទុក​ដដែល​»​។

លោក​ គី តិច ថ្លែង​ថា​រហូត​មក​ដល់​សាលា​ឧទ្ធរណ៍​មេធាវី​របស់​ជន​ជាប់ចោទ​ក៏​គ្មាន​ភ័ស្តុតាង​អ្វី​បង្ហាញ​ដល់​តុលាការ​ដែរ​គឺ​គេច​មិន​ចូល​ការពារ​ទេ​។

លោក សំ សុគង់ មេធាវី​ការពារ​សិទ្ធិ​ឲ្យ​ជន​ជាប់ចោទ​បាន​ថ្លែង​ថា​បើ​ពិនិត្យ​ផ្លូវ​ច្បាប់​គឺ​សាលា​ឧទ្ធរណ៍​ត្រូវ​កោះ​ហៅ​ជន​ជាប់ចោទ​រយៈពេល​ ៣ ​ខែ​មុន​សវនាការ​ក្នុង​ករណី​ជន​ជាប់ចោទ​នៅ​ក្រៅ​ប្រទេស​។

ការ​ជូន​ដំណឹង​នេះ​ឧទ្ធរណ៍​ត្រូវ​យក​ទៅ​លំនៅឋាន​របស់​ជន​ជាប់ចោទ​នៅ​ក្នុង​ប្រទេស​កម្ពុជា​ដើម្បី​ឲ្យ​ក្រុម​គ្រួសារ​គាត់​តែ​ឧទ្ធរណ៍​ខកខាន​គោរព​ទៅ​តាម​នីតិវិធី​ច្បាប់​រហូត​បើក​សវនាការ​ដែល​កូនក្តី​មិន​ទទួល​បាន​ដីកា​កោះ​។

លោក សុគង់ ថ្លែង​ថា​៖ «​ការ​សម្រេច​ចិត្ត​របស់​សាលា​ឧទ្ធរណ៍​ជម្រះ​រឿង​នេះ​ជា​ការ​សម្រេចចិត្ត​មួយ​មិន​ស្រប​ទៅ​តាម​បញ្ញតិ្ត​ច្បាប់​ទេ​ហើយ​កូនក្តី​ខ្ញុំ​មិន​អាច​ទទួល​យក​បាន​។ មេធាវី​នឹង​ប្តឹង​ជំទាស់​ដើម្បី​ឲ្យ​សាលា​ឧទ្ធរណ៍​ជម្រះ​ឡើង​វិញ​»៕

0

Comments

Please, login or register to post a comment