ភ្នំពេញៈ សាលាឧទ្ធរណ៍នៅថ្ងៃទី ៨ មករានេះ បានជំនុំជម្រះជនជាប់ចោទប្រុសស្រី ២ នាក់ពាក់ព័ន្ធនឹងការជួញដូរគ្រឿងញៀនជាង ១៥ ក្រាមប្រពឹត្តកាលពីឆ្នាំមុននៅភ្នំពេញ ជាសំណុំរឿងដែលតុលាការថ្នាក់ក្រោមផ្តន្ទាទោសដាក់ពន្ធនាគារម្នាក់ៗពី២ឆ្នាំដល់៣ឆ្នាំ។
តាមកំណត់ហេតុនគរនបាលបុរសឈ្មោះឆាយ លីហ៊ួ អាយុ៣៤ឆ្នាំ និងស្រ្តីឈ្មោះវង្សលីណាហៅស្រីតូចអាយុ២៨ឆ្នាំ ត្រូវបានចាប់ខ្លួនកាលពីថ្ងៃទី ១១ ខែ មករា ឆ្នាំ ២០១៧ នៅផ្ទះសំណាក់នាគ ២ ក្នុងសង្កាត់មិត្តភាពខណ្ឌ ៧មករា បន្ទាប់ពីពួកគេណាត់ជួបគ្នាដោះដូរគ្រឿងញៀននៅទីនោះ។
បន្ទាប់ពីឃាត់ខ្លួនសមត្ថកិច្ច បានដកហូតថ្នាំញៀនពីឈ្មោះឆាយ លីហ៊ួ បានម្សៅក្រាម ៥,៧២ ក្រាម និងឈ្មោះវង្ស លីណាចំនួន ១០,៣៣ ក្រាមដែលមានបរិមាណធាតុសុទ្ធ ២៦,៥៦ ភាគរយនិងបានរកឃើញទឹកនោមអ្នកទាំងពីរមានសារធាតុញៀនផងដែរ។
សំណុំរឿងនេះត្រូវសាលាដំបូងរាជធានីភ្នំពេញប្រកាសផ្ដន្ទាទោសថ្ងៃទី ២៨ ខែកក្កដា ឆ្នាំ ២០១៧ ឲ្យឆាយ លីហ៊ួ ជាប់ពន្ធនាគារ ២ ឆ្នាំ ៦ ខែ ចោទបទ «ជួញដូរគ្រឿងញៀនខុសច្បាប់» ពិន័យប្រាក់ ៥ លានរៀលខណៈឈ្មោះវង្សលីណា ដាក់ពន្ធនាគារ៣ឆ្នាំនិងពិន័យប្រាក់ ៧ លានរៀលចូលថវិការដ្ឋ។
ប៉ុន្តែជនជាប់ចោទឆាយ លីហ៊ួ ឆ្លើយក្នុងសវនាការពីម្សិលមិញថា គាត់មិនបានជួញដូរគ្រឿងញៀនទេតែថាគាត់ត្រូវមិត្តភក្ដិហៅទៅជក់ទេ។ ឯឈ្មោះវង្ស លីណា ថានាងប្រើប្រាស់ថ្នាំញៀន៣ឆ្នាំហើយថាថ្ងៃឃាត់ខ្លួននោះគឺគាត់ទៅទិញថ្នាំញៀន។
ទោះយ៉ាងណា លីណា បានសារភាពពីការជក់និងបានអង្វរចៅក្រមឲ្យបន្ថយទោសខណៈថានាងមានកូន៤នាក់ដែលកំពុងផ្ញើម្តាយក្មេក។
លោក ឆាយ វិបុល មេធាវីចាត់តាំងការពារសិទ្ធិឲ្យជនជាប់ចោទសន្និដ្ឋានថា កូនក្តីលោក បានបដិសេធតាំងពីដំណាក់កាលដំបូងព្រោះគាត់ថា គាត់គ្រាន់តែប្រើប្រាស់ថ្នាំញៀនទេ។ ឯកូនក្តីលោកម្នាក់ទៀតគាត់មានកូនដល់ទៅ៤នាក់ ដូច្នេះសូមក្រុមប្រឹក្សាជំនុំជម្រះបន្ថយទោសដល់ពួកគេតាមការស្នើសុំរបស់គាត់ផង។
ក្រោយជំនុំជម្រះលោកចៅក្រមប្លង់ សំណាង ប្រធានក្រុមប្រឹក្សាជំនុំជម្រះ ថ្លែងថា សាលដីការឿងនេះប្រកាសនៅថ្ងៃទី ២២ មករាខាងមុខ៕