.jpg)
ភ្នំពេញៈសភាព្រហ្មទណ្ឌសាលាឧទ្ធរណ៍នៅព្រឹកថ្ងៃ ១៣ កុម្ភៈ នេះ បានប្រកាសសាលដីកាតម្កល់ទោសជនជាប់ចោទម្នាក់ឲ្យជាប់ពន្ធនាគារ ៦ ឆ្នាំដដែល បន្ទាប់ពីបើកសវនាការ កាលពីថ្ងៃទី ២៥ មករា ពាក់ព័ន្ធនឹងសំណុំរឿងគ្រឿងញៀន ១០១ ក្រាម ប្រព្រឹត្តកាលពីឆ្នាំមុន។
លោកស្រីចៅក្រម ចាន់ ម៉ាឌីណា ប្រធានក្រុមប្រឹក្សាជំនុំជម្រះថ្លែងថា សំណុំរឿងនេះមានជនជាប់ចោទឈ្មោះ អ៊ែលតាហ្វា ហើយការដែលឧទ្ធរណ៍សម្រេចតម្កល់សាលដីកាដូចនេះ ក្រោយពេលក្រុមប្រឹក្សាជំនុំជម្រះបានពិភាក្សាគ្នារួច។
តាមកំណត់ហេតុនគរបាលបានបង្ហាញថា កាលពីយប់ថ្ងៃទី៦ខែកុម្ភៈឆ្នាំមុន នគរបាលខណ្ឌដង្កោបានដាក់ប៉ុស្តិ៍ត្រួតពិនិត្យអាវុធជាតិផ្ទុះនៅតាមផ្លូវម្តុំវត្ត សំបួមាស ក្នុងខណ្ឌ ដង្កោ រាជធានីភ្នំពេញ។ ពេលនោះក៏បានហៅម៉ូតូជនសង្ស័យត្រួតពិនិត្យក៏រកឃើញថ្នាំញៀន៦កញ្ចប់ស្មើទម្ងន់១០១,៥២ក្រាមហើយក៏ឃាត់ខ្លួនតែម្តង។
សំណុំរឿងនេះត្រូវសាលាដំបូងរាជធានីភ្នំពេញ ប្រកាសសាលក្រម នៅថ្ងៃទី ១១ សីហា ឆ្នាំមុន ដោយផ្តន្ទាទោសជនជាប់ចោទឈ្មោះ អ៊ែល តាហ្វា អាយុ ២៦ ឆ្នាំ ដាក់ពន្ធនាគារ ៦ ឆ្នាំ និង ពិន័យប្រាក់ ១០ លានរៀលចោទបទ «ជួញដូរគ្រឿងញៀនខុសច្បាប់តាមបញ្ញត្តិមាត្រា ៤០ ច្បាប់ស្តីពី ការត្រួតពិនិត្យគ្រឿងញៀន»។
ជនជាប់ចោទឆ្លើយក្នុងសវនាការព្រឹកមិញថាគ្រឿងញៀននេះត្រូវមិត្តភ័ក្តិគាត់ហុចថង់ខ្មៅឲ្យហើយប្រាប់ថាក្នុងថង់នោះជាគ្រឿងក្រអូបឲ្យយកទៅឲ្យគេហើយមិត្តភ័ក្តិនោះឲ្យលុយគាត់ ៤០ ដុល្លារ។
កាលពីថ្ងៃជំនុំជម្រះជនជាប់ចោទសារភាពប្រាប់ចៅក្រមថាគាត់ដឹងកំហុសហើយគាត់ឃើញគេឲ្យលុយ៤០ដុល្លារក៏យកទៅព្រោះគាត់អត់លុយចាយ។ យ៉ាងណាគាត់សូមតុលាការបន្ថយទោសដល់គាត់២ឆ្នាំផង។
ទោះយ៉ាងណា នៅថ្ងៃជំនុំជម្រះនោះដែរ លោកព្រះរាជអាជ្ញា សរ យសថាវរៈ តំណាងមហាអយ្យការសន្និដ្ឋានថា ជនជាប់ចោទមិនសុខចិត្ត នឹងការផ្តន្ទាទោសពីតុលាការថ្នាក់ក្រោមដែលដាក់ទោសគាត់ ៦ ឆ្នាំ។ ប៉ុន្តែ គាត់ត្រូវបានសមត្ថកិច្ចឆែរឃើញថ្នាំញៀនជាក់ស្តែង។
លោកយល់ថា ការសម្រេចរបស់តុលាការថ្នាក់ក្រោមត្រឹមត្រូវហើយ។ ដូច្នេះ លោកសូមតម្កល់សាលក្រមទុកជាបានការដដែល ៕
