ភ្នំពេញៈ សាលាឧទ្ធរណ៍កាលពីម្សិលមិញបានប្រកាសសាលដីកាសម្រេចតម្កល់ទោស ២ នាក់ប្តីប្រពន្ធឲ្យជាប់ពន្ធនាគារម្នាក់ ៨ ឆ្នាំ និង ៦ ឆ្នាំដដែល ពាក់ព័ន្ធបទចោទជួញដូរគ្រឿងញៀនយ៉ាម៉ាចំនួន ៥២៤ គ្រាប់ និងម៉ាទឹកកកចំនួន ៣៣ កញ្ចប់នៅភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុងកាលពីឆ្នាំ ២០១៦។
លោក យន់ ណារ៉ុង ចៅក្រមប្រឹក្សាជំនុំជម្រះបានអានសាលដីកាកំបាំងមុខជនជាប់ចោទទាំង ២ នាក់ថាឈ្មោះ សៅ សុខណា និងប្តីឈ្មោះ សុយ ប៉ូឡូញ ត្រូវបានជំនុំជម្រះពាក់ព័ន្ធបទជួញដូរគ្រឿងញៀនកាលពីថ្ងៃទី ២២ មករាហើយក្រុមប្រឹក្សាជំនុំជម្រះសម្រេចថាតម្កល់សាលក្រមនៅដដែល និងបន្តឃុំខ្លួនជនជាប់ចោទបន្តទៀត។
តាមកំណត់ហេតុនគរបាលបង្ហាញថាក្នុងអំឡុងខែមិថុនា និងខែកក្កដាឆ្នាំ ២០១៦ ស្ត្រីជាប់ចោទ សៅ សុខណា អាយុ ៤៨ ឆ្នាំបានទិញថ្នាំញៀនពីស្ត្រីឈ្មោះ គុជ វលក្ខណ៍ ដើម្បីយកទៅចែកចាយបន្ត និងលើកចុងក្រោយក្នុងអំឡុងខែសីហាឆ្នាំដដែលស្ត្រីជាប់ចោទត្រូវនគរបាលស្រុកមណ្ឌលសីមា ខេត្តកោះកុងឃាត់ខ្លួន។
កំណត់ហេតុបង្ហាញបន្តថាបន្ទាប់ពីឃាត់ខ្លួនសមត្ថកិច្ចបានទៅឆែកឆេរនៅផ្ទះស្ត្រីជាប់ចោទក្នុងភូមិ-ឃុំខាងលើក៏រកឃើញថ្នាំញៀនប្រភេទយ៉ាម៉ាចំនួន ៥២៤ គ្រាប់លាក់ទុកក្នុងទូ និងកញ្ឆាក្រៀមមួយចំនួនទៀតហើយនគរបាលក៏ឃាត់ខ្លួនប្តីឈ្មោះ សុយ ប៉ូឡូញ អាយុ ៤៩ ឆ្នាំដែលនៅក្នុងផ្ទះជាមួយគ្នា។
សំណុំរឿងនេះត្រូវសាលាដំបូងខេត្តកោះកុងប្រកាសសាលក្រមនៅថ្ងៃទី ១៣ ខែកញ្ញា ឆ្នាំ ២០១៧ សម្រេចផ្តន្ទាទោសស្ត្រីជាប់ចោទដាក់ពន្ធនាគារ ៨ ឆ្នាំ និងពិន័យប្រាក់ ១០ លានរៀល រីឯប្តីដាក់ពន្ធនាគារ ៦ ឆ្នាំ និងពិន័យប្រាក់ ១០ លានរៀលចោទពីបទ «ជួញដូរ និងរក្សាទុកគ្រឿងញៀនខុសច្បាប់» តាមបញ្ញត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿង ញៀន៕