Search form

Login - Register | FOLLOW US ON

Logo of Phnom Penh Post newspaper Phnom Penh Post - ឧទ្ធរណ៍​បដិសេធ​សុំ​នៅ​ក្រៅ​ឃុំ​សកម្មជន​បរិស្ថាន

យុវជន​ ២ ​នាក់​ក្នុង​ចំណោម​ បី នាក់​ឃាត់​ខ្លួន​កន្លង​មក​។
យុវជន​ ២ ​នាក់​ក្នុង​ចំណោម​ បី នាក់​ឃាត់​ខ្លួន​កន្លង​មក​។ រូបថត សហការី

ឧទ្ធរណ៍​បដិសេធ​សុំ​នៅ​ក្រៅ​ឃុំ​សកម្មជន​បរិស្ថាន

ភ្នំពេញៈ សាលា​ឧទ្ធរណ៍​បាន​បដិសេធ​សំណើ​សុំ​នៅ​ក្រៅ​ឃុំ​បណ្តោះអាសន្ន​របស់​សកម្មជន​អង្គការ​មាតា​ធម្មជាតិ​ ៣ នាក់​ដែល​ត្រូវ​បាន​អាជ្ញាធរ​ចាប់​ខ្លួន​កាលពី​ពាក់​កណ្តាល​ខែ​សីហា​កន្លង​ទៅ​ដោយសារ​ពួកគេ​តវ៉ា​ប្រឆាំង​នឹង​ការ​បូម​ខ្សាច់។

យុវជន​ដែល​ជា​សកម្មជន​ការពារ​បរិស្ថាន​ទាំង​បី​នាក់​នោះ​មាន​ឈ្មោះ សាន់ ម៉ាឡា, ទ្រីសុវិគា និង ស៊ឹម សំណាង ត្រូវ​បាន​អាជ្ញាធរ​ស្រុក​បទុម​សាគរ​ចាប់​ខ្លួន​បញ្ជូន​ទៅ​តុលាការ​ដើម្បី​សាកសួរ​តាម​បណ្តឹង​របស់​អាជ្ញាធរ​ឃុំ និង​ក្រុមហ៊ុន Direct Access។ បន្ទាប់ពី​ការ​សាកសួរ​ពួកគេ​ត្រូវ​បាន​ព្រះរាជ​អាជ្ញា​សម្រេច​ចោទ​ប្រកាន់​ពី​បទ​គំរាម​កំហែង​ថា​នឹង​​ធ្វើឲ្យ​ខូចខាត​ដែល​​ភ្ជាប់​នឹង​បញ្ជា​អ្វី​មួយ​តាម​មាត្រា ៤២៤ ​នៃ​ក្រម​ព្រហ្មទណ្ឌ​ហើយ​បញ្ជូន​ទៅ​ឃុំ​ខ្លួន​បណ្តោះអាសន្ន​នៅ​ពន្ធនាគារ​ខេត្ត​។

មន្ត្រី​បច្ចេកទេស​ជាន់​ខ្ពស់​ឃ្លាំមើល​សិទ្ធិ​មនុស្ស​​នៃ​អង្គការ​លីកាដូ​លោក អំ សំអាត បាន​មាន​ប្រសាសន៍​ថា​ប្រធាន​ចៅក្រម​ជំនុំជម្រះ​សាលា​ឧទ្ធរណ៍​លោក ភូ ពៅស៊ុន បាន​សម្រេច​​តម្កល់​សាលក្រម​សាលា​ដំបូង​ខេត្ត​កោះកុង​ដោយ​មិន​អនុញ្ញាត​ឲ្យ​យុវជន​ទាំងនោះ​នៅ​ក្រៅ​ឃុំ​បណ្តោះអាសន្ន​ឡើយ​បើ​ទោះ​ជា​​​ក្រុម​មេធាវី​ និង​ក្រុម​គ្រួសារ​របស់​ពួកគេ​ដាក់​ស្នើ​នូវ​លក្ខខណ្ឌ​ត្រឹមត្រូវ​តាម​នីតិវិធី​ច្បាប់​ក៏ដោយ។

លោក​​ថា៖ «យើង​មាន​ការ​​​សោកស្តាយ​​ចំពោះ​ការ​សម្រេច​របស់​សាលា​ឧទ្ធរណ៍​ព្រោះ​បទល្មើស​នេះ​ជា​បទល្មើស​មជ្ឈឹម​អ៊ីចឹង​គួរ​តែ​មាន​ការ​អនុញ្ញាត​ឲ្យ​នៅ​ក្រៅ​ឃុំ​បាន​ព្រោះ​ទី១ គាត់​មាន​លំនៅ​ពិតប្រាកដ ទី​២​គាត់​ធានា​ថា​នឹង​ចូល​​គ្រប់​ដំណាក់កាល​នៃ​នីតិវិធី​របស់​តុលាការ​ និង​អាជ្ញាធរ​ដែល​​ចាត់​តាំង​ដោយ​តុលាការ​ ទី​៣ គាត់​មាន​មុខរបរ​ច្បាស់លាស់​»។

លោក​បាន​បន្ត​ថា​ក្រុម​មេធាវី​​ការពារ​ក្តី​ឲ្យ​ពួកគេ​នឹង​បន្ត​ដាក់​ពាក្យបណ្តឹង​សុំ​នៅ​ក្រៅ​ឃុំ​ជាថ្មី​ម្តង​ទៀត​ទៅ​សាលា​ដំបូង​ខេត្ត​​កោះកុង​នៅ​ដើម​ខែ​តុលា​ខាង​មុខ​។

ប្រធាន​ចៅក្រម​ជម្រះ​សាលា​ឧទ្ធរណ៍​លោក ភូ ពៅស៊ុន មិន​អាច​សុំ​ការ​អត្ថាធិប្បាយ​បាន​ទេ​។

កាលពី​ថ្ងៃ​ទី​ ៣១ ខែ​សីហា ចៅក្រម​ស៊ើបសួរ​សាលា​ដំបូង​ខេត្ត​កោះកុង​កញ្ញា ឈុន ដាវី ធ្លាប់​បាន​បដិសេធ​សំណើ​សុំ​នៅ​ក្រៅ​ឃុំ​របស់​សកម្មជន​ទាំង​បី​នេះ​ម្តង​មក​ហើយ​ដោយ​លើក​ហេតុផល​ថា​ដើម្បី​​ធានា​រក្សា​ជន​ត្រូវ​ចោទ​ទុក​ជូន​តុលាការ​ចាត់ការ​តាម​នីតិវិធី​ច្បាប់ និង​ដើម្បី​បញ្ចប់​បទល្មើស​ ឬ​បង្ការ​បទល្មើស​កុំ​ឲ្យ​កើត​មាន​ជាថ្មី​។

គួរ​បញ្ជាក់​ថា​សកម្មជន​ទាំង​បី​នាក់​នេះ​ត្រូវ​បាន​​ចាប់​ខ្លួន​ក្រោយពី​បាន​តវ៉ា​យ៉ាង​​​សកម្ម​ប្រឆាំង​នឹង​​​ការ​បូម​ខ្សាច់​របស់​​ក្រុមហ៊ុន​វៀតណាម Direct Access និង​ក្រុមហ៊ុន International Rainbow នៅ​ឃុំ​អណ្តូង​ទឹក​ ស្រុក​បទុមសាគរ​ខណៈ​ដែល​អាជ្ញាធរ​ និង​មន្ត្រី​ក្រសួង​​បរិស្ថាន​បាន​បញ្ជាក់​ថា​ក្រុមហ៊ុន​ទាំង​នោះ​បាន​ធ្វើ​អាជីវកម្ម​ត្រឹមត្រូវ​ក្នុង​តំបន់​ដែល​កំណត់​ដោយ​ក្រសួង។

ក្រោយ​ការ​ចាប់​ខ្លួន​ប្រជាពលរដ្ឋ និង​ក្រុម​យុវជន​ប្រមាណ​ជាង ១០០ នាក់​បាន​ប្រមូល​ផ្តុំ​តវ៉ា​មុខ​តុលាការ​ជាច្រើន​ថ្ងៃ និង​បាន​ដើរ​ក្បួន​តាម​ផ្លូវ​នានា​ក្នុង​ទី​រួម​ខេត្ត​ដើម្បី​ទាមទារ​ឲ្យ​ដោះលែង​សកម្មជន​ទាំង​បី​នាក់​នេះ៕

0

Comments

Please, login or register to post a comment

ព័ត៌មានពាក់ព័ន្ធ