Search form

Login - Register | FOLLOW US ON

Logo of Phnom Penh Post newspaper Phnom Penh Post - CNRP ថ្កោលទោស​ការ​ចាប់​ខ្លួន​មេឃុំ និង​បាន​ហៅ​ទង្វើ​នោះ​ថា​មាន​ចរិត​ដូច​សម័យ​ខ្មែរ​ក្រហម

លោក ស៊ាង ចែត (ពាក់​វ៉ែនតា) មេឃុំ​ស្រក​ក្នុង​ពេល​កំពុង​បំពេញ​ការងារ​កន្លង​មក។
លោក ស៊ាង ចែត (ពាក់​វ៉ែនតា) មេឃុំ​ស្រក​ក្នុង​ពេល​កំពុង​បំពេញ​ការងារ​កន្លង​មក។ រូបថត ហ្វេសប៊ុក

CNRP ថ្កោលទោស​ការ​ចាប់​ខ្លួន​មេឃុំ និង​បាន​ហៅ​ទង្វើ​នោះ​ថា​មាន​ចរិត​ដូច​សម័យ​ខ្មែរ​ក្រហម

ភ្នំពេញៈ គណបក្ស​សង្គ្រោះ​ជាតិ​ថ្កោល​ទោស​ចំណាត់​ការ​របស់​អង្គភាព​ប្រឆាំង​អំពើ​ពុករលួយ​ដែល​បាន​ចាប់​ខ្លួន​លោក ស៊ាង ចែត មេឃុំ​ស្រក​មកពី​គណបក្ស​ សមរង្ស៊ី ដោយ​ចាត់​ទុក​ថា​ទង្វើ​នេះ​រំលោភ​ច្បាប់​ដែល​មាន​ចរិត​ដូច​កាល​របប​ខ្មែរ​ក្រហម និង​ស្នើ​ឱ្យ​សមត្ថកិច្ច​ដោះលែង​ដោយ​គ្មាន​លក្ខខណ្ឌ​។

ចំណាត់ការ​នេះ​ធ្វើ​ឡើង​បន្ទាប់ពី​កញ្ញា​ ខុម ចាន់តារាទី ហៅ​ ស្រី មុំ បាន​ចោទ​លោក ស៊ាង ចែត និង​មន្រ្តី​សង្គម​ស៊ីវិល​ជាច្រើន​រូប​ទៀត​ដែល​តែង​ផ្តល់​ជំនួយ​ផ្លូវ​ច្បាប់​ឱ្យ​នាង​ថា​បាន​ប្រាប់​នាង​ឱ្យ​និយាយ​​កុហក​ប្រាប់​មហាជន​ថា​នាង​មិន​មាន​ស្នេហា​ជាមួយ​លោក កឹម សុខា ​។

ការ​ថ្កោលទោស​នេះ​ធ្វើ​ឡើង​បន្ទាប់ពី​អង្គភាព​ប្រឆាំង​អំពើ​ពុករលួយ​បាន​ដឹកនាំ​កម្លាំង​ចុះ​ចាប់​ខ្លួន​លោក ស៊ាង ចែត មេ​ឃុំ​ស្រក​ ស្រុក​កំពង់សៀម ខេត្ត​កំពង់ចាម​មកពី​គណបក្ស​ សមរង្ស៊ី នៅ​វេលា​ម៉ោង ១០ និង ៣០ ​នាទី​ព្រឹក​ថ្ងៃ​ទី ២៤ ខែ​មេសា ២០១៦។

សេចក្តី​ថ្លែងការណ៍​បក្ស​សង្គ្រោះ​ជាតិ​ចេញ​ផ្សាយ​ពី​ថ្ងៃ​ម្សិលមិញ​សង្កត់​ធ្ងន់​ថា «ការ​ចាប់​ខ្លួន​លោក ស៊ាង ចែត ដោយ​គ្រាន់តែ​សំអាង​លើ​ការ​ឆ្លើយ​ដាក់​​ពី​ឈ្មោះ ខុម ចាន់តារាទី នេះ​គឺជា​ទង្វើ​រំលោភ​ច្បាប់​ដែល​មាន​ចរិត​ដូច​កាល​របប​ខ្មែរ​ក្រហម»។

គណបក្ស​សង្គ្រោះ​ជាតិ​ស្នើ​អាជ្ញាធរ​មាន​សមត្ថកិច្ច​អនុវត្ត​តួនាទី​របស់​ខ្លួន​ឱ្យ​បាន​ត្រឹមត្រូវ​ដោយ​ផ្អែក​លើ​មូលដ្ឋាន​ច្បាប់​ និង​អំពាវនាវ​ឱ្យ​ដោះ​លែង​លោក ស៊ាង ចែត ដោយ​ឥត​លក្ខខណ្ឌ​ដើម្បី​បន្ធូរបន្ថយ​ភាព​តានតឹង​ដែល​កំពុង​កើត​មាន​។

ការ​ចាប់​ខ្លួន​លោក ស៊ាង ចែត បន្ទាប់ពី​កញ្ញា​ ស្រី មុំ បាន​សរសេរ​លិខិត​ចំហ​មាន​កម្រាស់ ៤ ​ទំព័រ​បាន​ចោទ​ប្រកាន់​មន្រ្តី​សង្គម​ស៊ីវិល​ជាច្រើន​រូប​ដែល​តែង​ជួយ​ផ្តល់​ជំនួយ​ផ្លូវ​ច្បាប់​ដល់​នាង​រួម​មាន​​លោក នី សុខា លោក យី សុខសាន្ត លោក ណៃ វង់ដា លោកស្រី លឹម មុនី លោកស្រី ធីតា ឃឹះ និង​លោក ស៊ឺន សាលី មន្រ្តី​អង្គការ​សិទ្ធិ​មនុស្ស​នៅ UN ព្រម​ទាំង​មេឃុំ​ស្រក លោក ស៊ាង ចែត ផង​ដែរ​ថា​បាន​បង្ខំ​នាង​ឱ្យ​ផ្តល់​ចម្លើយ​ក្លែងក្លាយ​នៅ​ពេល​ចូល​ឆ្លើយ​បំភ្លឺ​នៅ​តុលាការ។

លិខិត​ថា «​មេឃុំ​បាន​យក​លុយ​ឱ្យ​ម្តាយ​នាង​ខ្ញុំ​ចំនួន​ ៥០០ ​ដុល្លារ​ហើយ​ណែនាំ​ម្តាយ​ខ្ញុំ​កុំ​ឱ្យ​និយាយ​ការ​ពិត​ប៉ះពាល់​ដល់​លោក កឹម សុខា និង​សន្យា​ឱ្យ​នាង​ខ្ញុំ​ និង​ម្តាយ​ទៅ​រស់នៅ​ក្រៅ​ប្រទេស»។

ក្នុង​លិខិត​បន្ត​ថា​ «នាង​មិន​អាច​បិទ​បាំង​ចំពោះ​ទង្វើ​ខុស​ច្បាប់​ពី​សំណាក់​បុគ្គល​មួយ​ចំនួន​របស់​បណ្តា​អង្គការ​សមាគម​ដែល​បាន​បញ្ចុះ​បញ្ចូល​ លួងលោម បោក​បញ្ឆោត​នាង​ខ្ញុំ​ និង​ក្រុម​គ្រួសារ​នាង​ខ្ញុំ​ឱ្យ​និយាយ​ភូត​កុហក​ពី​ការ​ពិត​ជាក់ស្តែង​គឺ​នៅ​ពេល​នាង​ខ្ញុំ​ត្រូវ​បាន​សមត្ថកិច្ច​ក្រសួង​មហា​ផ្ទៃ​ហៅ​ខ្ញុំ​ទៅ​បំភ្លឺ​ពាក់ព័ន្ធ​នឹង​បណ្តឹង​របស់ ធី សុវណ្ណថា ពេល​នោះ​នាង​ខ្ញុំ​បាន​ទៅ​សុំ​អន្តរាគមន៍​ពី​សមាគម​អាដហុក​ដើម្បី​ជួយ​ការពារ​រក​យុត្តិធម៌​ដោយ​សមាគម​អាដហុក​បាន​ឱ្យ​នាង​ខ្ញុំ​សរសេរ​ពាក្យ​បណ្តឹង​បដិសេធ​ទាំង​ស្រុង​នូវ​ខ្សែ​អាត់​សំឡេង​ដែល​ទាក់ទង​ស្នេហា​រវាង​នាង​ខ្ញុំ​​ជាមួយ​លោក កឹម សុខា​»។

លិខិត​បន្ថែម​ថា​នា​ពេល​កន្លង​មក​មន្រ្តី​សមាគម​អាដហុក និង​មន្រ្តី​អង្គការ​សិទ្ធិ​មនុស្ស​ UN ឈ្មោះ ស៊ឺន សាលី បាន​ទៅ​ផ្ទះ​នាង​ដែល​កំពុង​រស់នៅ​ដើម្បី​លើក​ទឹកចិត្ត​កុំ​ឱ្យ​តក់ស្លុត ភ័យខ្លាច និង​ត្រូវ​រក្សា​ចម្លើយ​ដូច​នៅ​ក្រសួង​មហាផ្ទៃ​នៅពេល​ចូល​បំភ្លឺ​នៅ​តុលាការ​ពោល​គឺ​បដិសេធ​មិន​ទទួល​ស្គាល់​សំឡេង​ខ្សែ​អាត់។ លើស​ពី​នេះ ស្រី មុំ បាន​ដាក់​ពាក្យ​ប្តឹង​ប្រធាន​ស្តីទី​គណបក្ស​សង្គ្រោះ​ជាតិ លោក កឹម សុខា ដោយ​ទាមទារ​សំណង​ជំងឺ​ចិត្ត​ចំនួន ៣០ ម៉ឺន​ដុល្លារ និង​គូកន​ព្រម​ទាំង​ប្តឹង​មន្រ្តី​សង្គម​ស៊ីវិល​ដែល​តែងតែ​ផ្តល់​ជំនួយ​ផ្លូវ​ច្បាប់​ផង​ដែរ។

ពាក្យ​បណ្តឹង​ដែល​ចុះ​ហត្ថលេខា​ដោយ​កញ្ញា​ ស្រី មុំ ចុះ​ថ្ងៃ​ទី​ ២២ ខែ​មេសា បាន​រៀបរាប់​ថា៖ «ឆ្លង​កាត់​ដំណើរ​រឿង​នេះ​នាង​ខ្ញុំ​ខូចខាត​កិត្តិយស​សេចក្តី​ថ្លៃថ្នូរ​យ៉ាង​ធ្ងន់ធ្ងរ ពេលវេលា និង​បាត់បង់​ការងារ​ដោយ​ឈ្មោះ កឹម សុខា បាន​សន្យា​ជាច្រើន​ជាមួយ​នាង​ខ្ញុំ​មាន​ដូចជា​សន្យា​ផ្តល់​ប្រាក់​ចំនួន​ ៣ ​ពាន់​ដុល្លារ ទិញ​ផ្ទះ និង​សន្យា​ទិញ​របស់របរ​ដែល​នាង​ត្រូវការ​តែ​រហូត​មក​ទល់​ពេល​នេះ​គាត់ (កឹម សុខា) មិន​បាន​ប្រគល់​ឱ្យ​នាង​ខ្ញុំ​ទេ»។

ក្រៅពី​ដាក់​ពាក្យ​ប្តឹង​ទាមទារ​សំណង​ជំងឺ​ចិត្ត​កញ្ញា​ ស្រី មុំ ក៏​បាន​ស្នើ​ឱ្យ​តុលាការ​ជួយ​រក​យុត្តិធម៌​ឱ្យ​នាង និង​ផ្តន្ទាទោស​លោក កឹម សុខា ​និង គូ​កន​ព្រម​ទាំង​ជន​ពាក់ព័ន្ធ​តាម​ផ្លូវ​ច្បាប់​។

បន្ទាប់ពី​ស្រីមុំ​ចោទ​មន្រ្តី​សង្គម​ស៊ីវិល​សមាគម​អាដហុក​បាន​បញ្ចេញ​វីដេអូឃ្លីប​មួយ​នៅពេល​ ស្រីមុំ ​ទៅ​ពឹងពាក់​សមាគម​ឱ្យ​ជួយ​​អន្តរាគមន៍​ដែល​ពេល​នោះ​នាង​បដិសេធ​ថា​មិន​ធ្លាប់​មាន​ស្នេហា​ជាមួយ​លោក កឹម សុខា។

វីដេអូ​ដែល​មាន​រយៈពេល​ជិត​ ១៧ ​នាទី ស្រីមុំ ​បាន​និយាយ​ថា​ «ខ្ញុំ​ចង់​និយាយ​ថា​ខ្ញុំ​អត់​ដែល​មាន​ទំនាក់​ទំនង​អី​មួយ​គាត់​ទេ​ (កឹម ​សុខា) គ្រាន់តែ​ពេល​គាត់​ខល​ទៅ​គឺ​ទាក់ទង​នឹង​រឿង​កាត់​សក់​នៅ​ហាង​ខ្ញុំ​ហើយ​សួរ​ថា​មាន​ជាង​កាត់​សក់​ទំនេរ​អត់? ហើយ​ខ្ញុំ​ថា​មាន​ទំនេរ​​អញ្ជើញ​មក​កាត់​សក់​មក​តែ​ខ្ញុំ​គ្រាន់​តែ​ជា​ជាង​កាត់​សក់​ទេ​បើ​ថា​រឿង​ទំនាក់​ទំនង​ជាមួយ​គាត់​គឺ​អត់​មាន​ទំនាក់​ទំនង​ស្នេហា​អី​ជ្រៅជ្រះ​ជាមួយ​គាត់​ដែរ»។

ជាមួយ​គ្នា​នេះ​ដែរ​កញ្ញា ធី សុវណ្ណថា បាន​ធ្វើ​សន្និសីទ​កាសែត​កាលពី​ថ្ងៃ​ទី​ ២៣ ខែ មេសា នៅ​សណ្ឋាគារ​សាន់វេ​ដោយ​ថា​នឹង​ប្តឹង​លោក កឹម សុខា ទាមទារ​សំណង​ជំងឺ​ចិត្ត​ចំនួន ១ ​លាន​ដុល្លារ​ពី​បទ​បរិហារកេរ្តិ៍។

បន្ទាប់ពី​លេច​ធ្លាយ​លិខិត​របស់​ ស្រី មុំ ចំនួន​ ៤ ទំព័រ​ក្រសួង​យុត្តិធម៌​បាន​ថ្កោល​ទោស​ចំពោះ​ទង្វើ​ល្មើស​ច្បាប់​របស់​អង្គការ​សង្គម​ស៊ីវិល​ទាំងអស់​នោះ និង​អំពាវនាវ​ដល់​អាជ្ញាធរ​មាន​សមត្ថកិច្ច​ស្រាវជ្រាវ​ឱ្យ​បាន​ច្បាស់លាស់ និង​ចាត់​វិធានការ​ច្បាប់​ឱ្យ​បាន​ម៉ឺងម៉ាត់​បំផុត។ សេចក្តី​ថ្លែងការណ៍​បាន​លើក​ឡើង​ថា​ «ក្រសួង​មាន​ការ​សោកស្តាយ​ចំពោះ​ទង្វើ និង​សកម្មភាព​របស់​សង្គម​ស៊ីវិល​ដែល​ខ្លួន​គួរ​តែ​មាន​តួនាទី​ការពារ​សិទ្ធិ​សេរីភាព​របស់​ប្រជាពលរដ្ឋ​ប៉ុន្តែ​ផ្ទុយ​ទៅ​វិញ​នាំ​គ្នា​ប្រព្រឹត្ត​អំពើ​ល្មើស​ច្បាប់​ដែល​ប៉ះពាល់​ធ្ងន់ធ្ងរ​ដល់​សេចក្តី​ថ្លៃថ្នូរ​របស់​កញ្ញា ខុម ចាន់តារាទី»​។

ប្រធាន​ផ្នែក​ស៊ើប​អង្កេត​នៃ​សមាគម​ការពារ​សិទ្ធិ​មនុស្ស​អាដហុក​លោក នី សុខា ដែល​រង​ការ​ចោទប្រកាន់​នេះ​ប្រាប់​ភ្នំពេញ​ប៉ុស្តិ៍​ថា​កន្លង​មក​សមាគម​អាដហុក​មិន​ដែល​នាំ​ឱ្យ​ ស្រី មុំ និយាយ​កុហក​នៅ​តុលាការ​នោះ​ទេ​តែ​ប្រាប់​នាង​ឱ្យ​និយាយ​ទៅ​តាម​អ្វី​ដែល​ ស្រីមុំ ​ជួប​ប្រទះ និង​ដូច​អ្វី​ដែល​ ស្រីមុំ ធ្លាប់​អះអាង​នៅ​ក្រសួង​មហាផ្ទៃ​ថា​មិន​ជាប់​ពាក់ព័ន្ធ​ស្នេហា​ជាមួយ​លោក កឹម សុខា។

លោក​បាន​បញ្ជាក់​ថា​ដំបូង​ឡើយ ស្រីមុំ បាន​ទៅ​សមាគម​អាដហុក​ដោយ​ផ្ទាល់​ហើយ​បាន​រៀបរាប់​ដដែលៗ​ថា​នាង​មិន​មាន​ស្នេហា​ជាមួយ​លោក កឹម សុខា នោះ​ទេ​ពេល​នោះ​អាដហុក​ក៏​សម្រេច​ចិត្ត​ផ្តល់​មេធាវី​ការពារ​ក្តី​ឱ្យ​នាង​បាន​ដោយ​ចាត់​ទុក​ថា​នាង​គឺជា​ជនរងគ្រោះ។​

លោក​ថា៖ «នៅពេល​គាត់​មក​ពឹងពាក់​យើង យើង​គ្រាន់​តែ​ផ្តល់​ការ​ការពារ​ផ្នែក​សិទ្ធិ​មនុស្ស​ទេ​យើង​មិន​បាន​ទៅ​បញ្ចេះ​ណែនាំ​គាត់​និយាយ​រឿង​ពិត មិន​ពិត​យ៉ាង​ណា​ទេ​ព្រោះ​យើង​មិន​ដឹង​ការ​ពិត​ដែរ​ពីព្រោះ​យើង​ទទួល​ព័ត៌មាន​ពី​គាត់​ដោយសារ​គាត់​ (ស្រីមុំ) អះអាង​ថា​រឿង​ហ្នឹង​វា​មិន​ពិត​រហូត​គាត់​ទៅ​ឆ្លើយ​នៅ​កន្លែង​សមត្ថកិច្ច​ប៉ូលិស​ក៏​គាត់​នៅ​រក្សា​ចម្លើយ​ថា​មិន​ពិត​តែ​យើង​ធ្វើ​កន្លង​មក​មិន​សំខាន់​ពិត ឬ​មិន​ពិត​ទេ​គឺ​ធ្វើ​ពាក់ព័ន្ធ​សិទ្ធិ​មនុស្ស ការ​គំរាម​កំហែង និង​ដើម្បី​ការពារ​សុវត្ថិភាព​នាង​ប៉ុណ្ណោះ»។

យ៉ាង​ណា​ក៏ដោយ​សម្តែង​ការ​សោកស្តាយ​ដែល​ ស្រីមុំ ចោទ​ប្រកាន់​មន្រ្តី​សង្គម​ស៊ីវិល​ដែល​ខំ​ជួយ​ផ្តល់​សេវា​ផ្នែក​ច្បាប់​ដល់​នាង​ទៅ​វិញ​។

ប្រធាន​អង្គការ​សីលកា​លោកស្រី ធីតា ឃឹះ ថ្លែង​ថា​គាត់​មិន​បាន​ណែនាំ​ ស្រី មុំ ឱ្យ​និយាយ​អ្វី​នោះ​ទេ​តែ​លោកស្រី​ថា​មូលហេតុ​ដែល​អង្គការ​បាន​ចេញ​មុខ​ការពារ​ ស្រីមុំ ដោយ​គិត​ថា​គាត់​ជា​ស្រី​ទន់​ខ្សោយ​កំពុង​រង​ភាព​អយុត្តិធម៌​ប៉ុណ្ណោះ​។

លោកស្រី​បញ្ជាក់​ថា​៖ «ខ្ញុំ​ទើប​ជួប​គាត់​ជា​លើក​ទី​ពីរ​នៅ​មុន​ពេល​គាត់​ឡើង​តុលាការ​អ៊ីចឹង​មាន​រឿង​អី​ដែល​ខ្ញុំ​ទៅ​ប្រាប់​គាត់​ឱ្យ​ឆ្លើយ​ម៉េច​នោះ​ហើយ​ខ្ញុំ​មិនមែន​ជា​មេធាវី​ទេ​ហើយ​ខ្ញុំ​ជួប​គាត់​ដើម្បី​ស្វែងយល់​ពី​ស្ថានភាព​មាន​ការ​វិវត្ត​ដល់​ណា​ហើយ​តែ​ប៉ុណ្ណឹង​»។

បើ​តាម​លោកស្រី ធីតា ឃឹះ «មាន​គេ​ប្រាប់​ខ្ញុំ​ថា ស្រីមុំ ​អាច​ជា​អ្នក​បន្លំ​ខ្លួន​ដើម្បី​ធ្វើ​ជា​អន្ទាក់​ឱ្យ​សង្គម​ស៊ីវិល​ជាប់​តែ​យើង​ការពារ​គាត់​ក្នុង​នាម​សិទ្ធិ​ស្រ្តី​មិន​ពាក់ព័ន្ធ​រឿង​ឯកជន​គាត់​ជាមួយ​លោក កឹម សុខា ទេ»។ ក្រោយពី​មាន​ហេតុការណ៍​នេះ​លោកស្រី​យល់​ថា​រឿង​នេះ​អាច​មាន​គេ​រៀបចំ​ទុក​ជា​មុន​។

ចំណែក​លោក ស្រី ចំរើន ដែល​អះអាង​តំណាង​ឲ្យ​ក្រុម​និស្សិត​បាន​ដឹកនាំ​ក្រុម​យុវជន​ប្រមាណ​ ៥០ នាក់​ដែល​តាម​គម្រោង ១០០០ នាក់​បាន​ដាក់​ញត្តិ​ទៅ​រដ្ឋសភា​ស្នើ​ឱ្យ​ចាត់​វិធានការ​លើ​លោក កឹម សុខា ដែល​លោក​ថា​បាន​ធ្វើ​ឲ្យ​ប៉ះពាល់​ដល់​សភា​ជាតិ និង​ដាក់​ញត្តិ​មួយ​ទៅ​ស្ថានទូត​សហរដ្ឋ​អាមេរិក​ឱ្យ​ជួយ​អន្តរាគមន៍​ទៅ​លោក កឹម សុខា ចេញ​មក​បកស្រាយ​ជា​សាធារណៈ។

បើ​ទោះ​ជា​មាន​មតិ​ខ្លះ​បាន​លើក​ឡើង​ថា​ក្រោយ​ពី​មាន​ករណី​នេះ​លោក កឹម សុខា លួច​ចេញ​ទៅ​ក្រៅ​ប្រទេស​ស្ងាត់ៗ​មិន​ហ៊ាន​ត្រឡប់​ចូល​ស្រុក​វិញ​ក៏ដោយ​តែ​លោក អេង ឆៃអ៊ាង បាន​ប្រាប់​ថា​លោក កឹម សុខា បាន​វិល​មក​ដល់​កម្ពុជា​វិញ​ហើយ​កាលពី​ព្រឹក​ម្សិលមិញ​៕

0

Comments

Please, login or register to post a comment

ព័ត៌មានពាក់ព័ន្ធ