Search form

Login - Register | FOLLOW US ON

Logo of Phnom Penh Post newspaper Phnom Penh Post - CNRP មាន​បេក្ខភាព​​ស្ត្រី​តិច​ជាង CPP

Content image - Phnom Penh Post
ស្ត្រី​ជា​ច្រើន​ចូលរួម​​ការ​ប្រារព្ធ​ពិធី​សិទ្ធិ​នារី​អន្តរជាតិ ៨ មីនា​នៅ​គណបក្ស​សង្គ្រោះ​ជាតិ​កាលពី​ម្សិលមិញ​។ រូបថត ហ្វេសប៊ុក

CNRP មាន​បេក្ខភាព​​ស្ត្រី​តិច​ជាង CPP

ភ្នំពេញៈ គណបក្ស​ប្រឆាំង​បាន​តែងតាំង​បេក្ខភាព​ស្ត្រី​​ចំនួន​ ៩០ ​រូប​​សម្រាប់​ការ​បោះឆ្នោត​ឃុំ សង្កាត់​នៅ​ខែ​មិថុនា​ទូទាំង​ប្រទេស​ដែល​មាន​​ចំនួន ១៦៤៦​ ឃុំ​ សង្កាត់​ ខណៈ​គណបក្ស​កាន់​អំណាច​បាន​តែងតាំង​បេក្ខភាព​ស្ត្រី​ជាង​ ២៥ ​ភាគរយ​។

លោកស្រី កេត្យា វលក្ខណ៍ ទីប្រឹក្សា​ចលនា​ស្រ្តី​នៃ​គណបក្ស​សង្គ្រោះ​ជាតិ​បាន​ឲ្យ​ដឹង​កាលពី​ម្សិលមិញ​​ថា​គណបក្ស​សង្គ្រោះ​ជាតិ​​មាន​ស្រ្តី​ចំនួន ​៩០ រូប​ដែល​ឈរ​ឈ្មោះ​​ជា​បេក្ខនារី​​សម្រាប់​មេឃុំ​សង្កាត់​​នៅ​ក្នុង​ការ​បោះឆ្នោត​​ឃុំ​សង្កាត់​ថ្ងៃ​ទី​ ៤ ខែ​មិថុនា។ ​

លោកស្រី​បាន​ថ្លែង​ថា​ផ្អែក​តាម​ចំនួន​នេះ​ប្រសិន​បើ​ប្រៀបធៀប​​ទៅ​នឹង​​ការ​បោះឆ្នោត​ឃុំ​ សង្កាត់​​អាណត្តិ​មុន​​ទាំង​គណបក្ស​ សម រង្ស៊ី ​និង​គណបក្ស​សិទ្ធិ​មនុស្ស​មាន​ស្រ្តី​ឈរ​​ឈ្មោះ​សម្រាប់​មេឃុំ​ចៅ​សង្កាត់​​តិច​ជាង​ ១០ ​នាក់​ហើយ​​ចលនា​​ស្រ្តី​​របស់​គណបក្ស​សង្គ្រោះ​ជាតិ​បាន​ជំរុញ​ និង​ពង្រឹង​លទ្ធភាព​ស្រ្តី​ឲ្យ​ខ្លាំង​ជាង​មុន។

លោកស្រី កេត្យា វលក្ខណ៍ បាន​ថ្លែង​ថា​៖ «​យើង​គិត​ថា​មាន​​​ ១៦៤៦ ​ឃុំ​សង្កាត់​មាន​ស្រ្តី​ ៩០ ​​រូប​​ [ឈរ​] លេខ​ ១​ គឺ​​មិន​មាន​​តុល្យភាព​​នឹង​បុរស​ទេ​ ប៉ុន្តែ​​បើ​យើង​ធៀប​នឹង​ឆ្នាំ​ ២០១២ យើង​​បាន​ធ្វើ​មួយ​ជំហានៗ​​រហូត​ដល់​​ឥឡូវ​នេះ​​យើង​ទទួល​បាន​បេក្ខភាព​លេខ​ ១ ​​​ដែល​មាន​ស្រ្តី​ ៩០ នាក់​»។ ​​

លោកស្រី​បាន​បន្ថែម​ថា​ ស្រ្តី​ទាំង​នោះ​​ដែល​ឈរ​ជា​បេក្ខនារី​​មេឃុំ​សង្កាត់​​មិន​ត្រូវ​បាន​បង្ខំ​ឲ្យ​ឈរ​ឈ្មោះ​​​ទេ ប៉ុន្តែ​ពួកគេ​ស្ម័គ្រចិត្ត​ឈរ​ឈ្មោះ​ដោយ​ខ្លួនឯង​​។

នៅក្នុង​វីដេអូ​ឃ្លីប​​បង្ហោះ​កាលពី​ម្សិលមិញ ​អតីត​ប្រធាន​គណបក្ស​សង្គ្រោះ​ជាតិ​លោក សម រង្ស៊ី បាន​ថ្លែង​ថា​វា​ជា​​​គោលដៅ​របស់​​គណបក្ស​​សង្គ្រោះជាតិ​ដែល​ចង់​​ជំរុញ​​ និង​ផ្តល់​ឱកាស​​ដល់​ស្ត្រី​​ច្រើន​ជាង​មុន​ឲ្យ​ចូលរួម​សកម្ម​ក្នុង​ការ​ដឹកនាំ​ប្រទេស​ និង​សង្គម​​ពី​ថ្នាក់​មូលដ្ឋាន​​រហូត​​​ដល់​ថ្នាក់​ជាតិ​។

លោក រង្ស៊ី ថ្លែង​ថា​៖ «​​នេះ​ជា​និមិត្តរូប​នៃ​ការ​ផ្តល់​តម្លៃ​ដល់​ស្រ្តី​យ៉ាង​ច្បាស់​ហើយ​នៅ​ក្នុង​បញ្ជី​បេក្ខជន​យើង​សង្ឃឹម​ថា​នឹង​មាន​ស្រ្តី​ច្រើន​ជាប់​ឆ្នោត​ជា​មេឃុំ​ ចៅ​សង្កាត់​​ និង​ក្រុម​ប្រឹក្សា​​ឃុំ​ សង្កាត់​​ផង​ដែរ​រហូត​ដល់​យ៉ាង​ហោច​ណាស់​​ ៥០០ [មេឃុំ សង្កាត់​​ និង​​ក្រុម​ប្រឹក្សា​ឃុំ​ សង្កាត់​]។ ​

លោក សម រង្ស៊ី បាន​បន្ថែម​ថា​៖ «​​ខ្ញុំ​សូម​សរសើរ​បេក្ខនារី​ទាំងអស់​ដែល​ហ៊ាន​​ឈរ​ឈ្មោះ​ [ជា​មេឃុំ​ ចៅ​សង្កាត់​] ​ដើម្បី​ឲ្យ​ប្រជាពលរដ្ឋ​បោះឆ្នោត​ឲ្យ​​ហើយ​ដើម្បី​ឲ្យ​ស្រ្តី​ទាំង​នោះ​ក្លាយ​ជា​មេដឹកនាំ​ក្នុង​សង្គម​របស់​យើង​»។​

លោក​​បន្ថែម​ថា​មាន​តែ​ប្រទេស​ប្រជាធិបតេយ្យ​​ប៉ុណ្ណោះ​​ដែល​មាន​ការ​គោរព​​សិទ្ធិ​មនុស្ស​ត្រឹមត្រូវ​ជាពិសេស​​សិទ្ធិ​ស្រ្តី​ហើយ​ប្រទេស​ផ្តាច់ការ​ទាំង​សិទ្ធិ​របស់​ស្រ្តី​ និង​បុរស​ត្រូវ​បាន​រំលោភ​បំពាន​។

ប៉ុន្តែ​អ្នក​នាំពាក្យ​​របស់​គណបក្ស​ប្រជាជន​កម្ពុជា ​លោក សួស យ៉ារ៉ា មិន​បាន​ផ្តល់​ចំនួន​ជាក់​លាក់​​នៃ​បេក្ខនារី​​ឈរ​ឈ្មោះ​​មេឃុំ​ចៅ​​សង្កាត់​​របស់​គណបក្ស​ប្រជាជន​កម្ពុជា​នោះ​ទេ​​ដោយ​​គ្រាន់​តែ​បញ្ជាក់​ថា​គណបក្ស​ប្រជាជន​មាន​​បេក្ខនារី​ជាង​ ២៥ ​ភាគរយ​ឈរ​ឈ្មោះ​ជា​មេឃុំ​ ចៅ​សង្កាត់​។ ​

លោក សួស យ៉ារ៉ា បន្ត​ថា​៖ «​​ជាង​ ២៥ ​ភាគរយ​​គឺជា​គោលដៅ​របស់​​យើង​។ ​នៅក្នុង​ដំណាក់កាល​ដែល​យើង​ដើរ​មួយ​ជំហានៗ​ វា​ជា​ដំណើរ​វិវត្ត​ល្អ​។ ​យើង​ហៅ​ថា​ជា​ជំហាន​វិជ្ជមាន​»។

នៅពេល​ទាក់ទង​កាលពី​ម្សិលមិញ​លោក ហង្ស ពុទ្ធា ​អ្នក​នាំពាក្យ​របស់​គណៈកម្មាធិការ​​ជាតិ​រៀបចំ​​ការ​បោះឆ្នោត​បាន​ថ្លែង​ថា​ លោក​មិន​ទាន់​ទទួល​បាន​ចំនួន​បេក្ខភាព​មេឃុំ​ចៅ​សង្កាត់​​ជាក់លាក់​​​ពី​គណបក្ស​ប្រជាជន និង​គណបក្ស​សង្គ្រោះ​ជាតិ​​នៅ​ឡើយ​ទេ ប៉ុន្តែ​លោក​បាន​ផ្តល់​​​ចំនួន​បេក្ខនារី​សរុប​​ពី​គណបក្ស​ទាំង​ពីរ​​ដោយ​បញ្ជាក់​ថា​គណបក្ស​ប្រជាជន​មាន​ចំនួន​បេក្ខនារី​​មេឃុំ​ ចៅ​សង្កាត់​ និង​ក្រុម​ប្រឹក្សាឃុំ សង្កាត់​សរុប​ចំនួន​ ៦០៤៥ រូប​ហើយ​គណបក្ស​សង្គ្រោះ​ជាតិ​​មាន​ចំនួន​បេក្ខនារី​​មេឃុំ​ចៅ​សង្កាត់​ និង​ក្រុម​ប្រឹក្សា​ឃុំ​ សង្កាត់​​សរុប​ចំនួន ៤០៦៣។

លោក​ ហង្ស ពុទ្ធា ក៏​បាន​បញ្ជាក់​ឲ្យ​ដឹង​ផង​ដែរ​ថា​គណបក្ស​ប្រជាជន​កម្ពុជា​មាន​បេក្ខជន​​ និង​បេក្ខនារី​សរុប​ទាំងអស់​ចំនួន​​ ២៧០៨៦ រូប​ហើយ​គណបក្ស​សង្គ្រោះ​ជាតិ​​មាន​បេក្ខជន​ និង​បេក្ខនារី​សរុប​ទាំង​អស់​​ចំនួន ២៥៣០៤​ រូប​សម្រាប់​ឈរ​ឈ្មោះ​នៅ​តាម​ឃុំ សង្កាត់​ចំនួន ១៦៤៦ ឃុំ​ សង្កាត់​នៅ​ទូទាំង​ប្រទេស​៕ ​PS

0

Comments

Please, login or register to post a comment