.jpg)
មន្ត្រីគ.ជ.ប លើកបង្ហាញលេខរៀងគណបក្សនយោបាយដែលចាប់ឆ្នោតបានលេខរៀងសម្រាប់ការបោះឆ្នោតព្រឺទ្ធសភា។ រូបថត ស៊ុទ្ធ គឹមសឿន
ភ្នំពេញៈ គណៈកម្មាធិការជាតិរៀបចំការបោះឆ្នោត (គ.ជ.ប) នៅព្រឹកមិញនេះ បានរៀបចំពិធីចាប់ឆ្នោតយកលេខរៀងគណបក្សនយោបាយសម្រាប់ការបោះឆ្នោតព្រឹទ្ធសភា ដោយគណបក្សប្រជាជនកម្ពុជាទទួលបានលេខរៀងទី ១ ខណៈគណបក្សមួយចំនួនទៀតដូចជា គណបក្សយុវជនកម្ពុជាទទួលបានលេខទី ២, គណបក្សខ្មែររួបរួមជាតិទទួលបានលេខរៀងទី ៣ និង គណបក្សហ្វ៊ុនស៊ិនប៉ិចទទួលបានលេខរៀងទី ៤។
លោក ស៊ិក ប៊ុនហុក ប្រធាន គ.ជ.ប បានថ្លែងថា ការបោះឆ្នោតជ្រើសតាំងសមាជិកព្រឹទ្ធសភាមាន ៦២ អាសនៈ សម្រាប់អាណត្តិទី ៤ នឹងធ្វើឡើងនៅថ្ងៃទី ២៥ ខែកុម្ភៈ ឆ្នាំ២០១៨។
គណបក្សនយោបាយ ដែលចូលរួមប្រកួតប្រជែងសម្រាប់ការបោះឆ្នោតនេះមានចំនួន៤គណបក្សរួមមាន គណបក្សប្រជាជនកម្ពុជា គណបក្សរាជានិយមហ្វ៊ុនស៊ិនប៉ិច គណបក្សយុវជនកម្ពុជា និងគណបក្សខ្មែររួបរួមជាតិ។
លោកបន្តថា ការបោះឆ្នោតជ្រើសរើសសមាជិកព្រឹទ្ធសភាខុសពីការបោះឆ្នោតជ្រើសរើសតំណាងរាស្ត្រ។
ការបោះឆ្នោតជ្រើសរើសសមាជិកព្រឹទ្ធសភា មានអង្គបោះឆ្នោតតែតំណាងរាស្ត្រក្នុងតំណែង ១២៣រូប និងសមាជិកក្រុមប្រឹក្សាឃុំ-សង្កាត់ក្នុងតំណែង ១១,៥៧២ គឺការបោះឆ្នោតជ្រើសសមាជិកព្រឹទ្ធសភាមិនមានការចូលរួមពីប្រជាពលរដ្ឋទូទៅនោះឡើយ៕
