ភ្នំពេញៈ គណបក្សប្រជាធិបតេយ្យមូលដ្ឋាន (GDP) ដែលជាបក្សមានថ្នាក់ដឹកនាំមួយចំនួនជាថ្នាក់ដឹកនាំអង្គការសង្គមស៊ីវិលពីម្សិលមិញបានចេញផ្សាយគោលនយោបាយសម្រាប់ប្រកួតប្រជែងការបោះឆ្នោតជាតិនាឆ្នាំក្រោយ និងមានសុទិដ្ឋិនិយមខ្ពស់ចំពោះការប្រកួតប្រជែងជាមួយគណបក្សប្រជាជនកម្ពុជាដែលជាបក្សកាន់អំណាច ខណៈគ្មានវត្តមានគណបក្សសង្គ្រោះជាតិ។
គណបក្សដែលកើតចេញពីបញ្ញវន្តមួយក្រុមដែលមានប្រភពពីអង្គការសង្គមស៊ីវិលអះអាងថាខ្លួនបានផ្តោតសំខាន់លើវិស័យអាទិភាពចំនួន ៥ រួមមាន សេដ្ឋកិច្ច និងការងារ សិក្សាធិការ និងយុវជន សុខាភិបាល សង្គមកិច្ច ព្រមទាំងសេវាសាធារណៈ និងអភិបាលកិច្ចតាមបែបប្រជាធិបតេយ្យជាដើម។
យោងតាមគោលនយោបាយដែលផ្សព្វផ្សាយជាសាធារណៈដោយលោកបណ្ឌិត យ៉ង សាំងកុមារ ប្រធានគណៈកម្មាធិការនាយក និងសហស្ថាបនិកនៃគណបក្សប្រជាធិបតេយ្យមូលដ្ឋានបង្ហាញពីគោលនយោបាយអាទិភាពចំនួន ៥ ចំណុចដែលខ្លួននឹងយកទៅធ្វើជាគោលនយោបាយក្នុងការឃោសនាបោះឆ្នោតនាពេលខាងមុខ។
វិស័យទី ១ គណបក្សនេះអះអាងថាផ្តោតជាសំខាន់លើសេដ្ឋកិច្ច និងការងារដោយសន្យាបញ្ចេញអ្នកជំនាញចំនួន ៥ ពាន់នាក់ដើម្បីបម្រើឲ្យកសិករឲ្យទទួលបានទឹក ទុន ទីផ្សារនិង បច្ចេកទេសកសិកម្មជាដើម ជាពិសេសការទទួលបានទុនដែលមានការប្រាក់ទាបចំនួន ៥ ភាគរយក្នុង ១ ឆ្នាំពីរដ្ឋដើម្បីជំរុញផលិតផលក្នុងស្រុក។
ចំណែកវិស័យសិក្សាធិការ GDP អះអាងថាខ្លួននឹងឧបត្ថម្ភនូវប្រាក់កម្ចីចំនួន ៥ លានរៀលក្នុង ១ ឆ្នាំសម្រាប់រយៈពេល ៥ ឆ្នាំដល់យុវជនសម្រាប់យកទៅបន្តការសិក្សាគ្រប់ជំនាញ និងគ្រប់កម្រិតព្រមទាំងរៀបចំឲ្យមានសាលាមត្តេយ្យយ៉ាងតិច ១ ម៉ឺនភូមិនៅទូទាំងប្រទេស។ ឯវិស័យសុខាភិបាលបក្សនេះអះអាងថានឹងរៀបចំប្រព័ន្ធធានារ៉ាប់រងការព្យាបាល និងថែទាំសុខភាពជាសកលសម្រាប់ខ្មែរគ្រប់រូបដោយតម្រូវឲ្យមានការចូលរួមពីប្រជាពលរដ្ឋដែលមានអាយុចន្លោះពី ១៨ ឆ្នាំទៅ ៦៥ ឆ្នាំបង់តែ ៥០០ រៀលប៉ុណ្ណោះក្នុង ១ ខែ។
ក្រៅពីវិស័យទាំងនេះគណបក្សនេះបានឲ្យតម្លៃលើវិស័យសង្គមកិច្ចដោយ ផ្តោតជាសំខាន់លើស្ត្រីជនចាស់ជរា និងកម្មករ កម្មការិនីជាដើម។
GDP បន្ថែមថាស្ត្រីសម្រាលកូន ១ ដងនឹងទទួលបានការឧបត្ថម្ភពីរដ្ឋនូវទឹកប្រាក់ ៥ សែនរៀល។ ជនចាស់ជរាដែលមានអាយុចាប់ពី ៦៥ ឆ្នាំឡើងទៅក៏នឹងទទួលបានការឧបត្ថម្ភពីរដ្ឋចំនួន ១៥ ម៉ឺនរៀលក្នុង ១ ខែ ខណៈកម្មករ កម្មាការិនីនៅពេលគ្មានការងារធ្វើទទួលបានការឧបត្ថម្ភពីរដ្ឋចំនួន ៥០ ភាគរយនៃប្រាក់ខែក្នុងរយៈពេល ៥ ខែ។ ចំពោះវិស័យអាទិភាពទី ៥ ដែលជាវិស័យចុងក្រោយ GDP ផ្តោតលើ «សេវាសាធារណៈ និងអភិបាលកិច្ចតាមបែបប្រជាធិបតេយ្យ» ដោយប្រើប្រាស់នូវពាក្យស្លោកថា «តំណាងរាស្ត្រល្អ មន្ត្រីល្អ ពលរដ្ឋសកម្ម» ជាដើម។
លោក យ៉ង សាំងកុមារ បានសរសេរលើបណ្ដាញសង្គមហ្វេសប៊ុករបស់លោកថា៖ «យើងជំរុញឲ្យមានការអនុវត្តគោលនយោបាយល្អនូវវិស័យសំខាន់ៗចំនួន ៥ សម្រាប់ផលប្រយោជន៍ប្រជាជនគ្រប់រូប។ ការធ្វើនយោបាយត្រូវមានគុណតម្លៃ គោលការណ៍ និងគោលនយោបាយដោះស្រាយបញ្ហាសង្គមជាតិ។ ការធ្វើនយោបាយគ្រាន់តែដើម្បីតែផ្តួលបុគ្គលមួយក្រុមជំនួសដោយបុគ្គលមួយក្រុមទៀតទុកជារឿងអតីតកាល»។
លោក សាម អ៊ីន អគ្គលេខាធិការ និងជាអ្នកនាំពាក្យគណបក្សប្រជាធិបតេយ្យមូលដ្ឋានថ្លែងថាគណបក្សរបស់លោកបានចាប់ផ្តើមធ្វើការផ្សព្វផ្សាយនូវគោលនយោបាយមុនគេ បើទោះបីជាមិនទាន់ដល់រដូវកាលឃោសនាបោះឆ្នោតជាតិយ៉ាងណាក្ដី។
លោកថ្លែង៖ «យើងគិតថាវាជាពេលវេលាដែលល្អសម្រាប់ផ្សព្វផ្សាយឲ្យប្រជាពលរដ្ឋលោកបានដឹងលោកបានស្គាល់គណបក្សប្រជាធិបតេយ្យមូលដ្ឋានជាគណបក្សមួយដែលថ្មីបើប្រៀបធៀបនឹងគណបក្សដទៃ អ៊ីចឹងហើយប្រជាពលរដ្ឋលោកមិនទាន់បានដឹងមិនទាន់បានស្គាល់ច្រើន អ៊ិចឹងហើយយើងគិតថាយើងគួរតែចាប់ផ្តើមផ្សព្វផ្សាយឲ្យប្រជាពលរដ្ឋបានដឹងបានស្គាល់អំពីគោលនយោបាយរបស់យើង»។
លោកថាពីវិស័យទី ១ ដល់ទី ៥ ត្រូវការថវិកាជាតិតែ ២៥ ភាគរយប៉ុណ្ណោះខណៈថវិកាជាតិរបស់រដ្ឋបច្ចុប្បន្នមានជាង ៦ ពាន់លានដុល្លារអាមេរិកឯណោះ។ លោកថ្លែងថា៖ «តាមពិតគោលនយោបាយរបស់យើង យើងបានសិក្សាស្វែងយល់ពីតម្រូវការជាក់ស្ដែង និងថវិកាជាតិក្នុងពេលបច្ចុប្បន្នដែលមានប្រមាណ ៦ ពាន់លានជាងសម្រាប់ឆ្នាំ ២០១៨ នេះ អ៊ីចឹងយើងគិតថា ការវាយតម្លៃរបស់យើងថវិកាដែលយើងយកទៅប្រើប្រាស់នឹងឆ្លុះបញ្ចាំងអំពីភាពជាក់ស្តែង»។
លោកថាដើម្បីធ្វើឲ្យគោលនយោបាយមានប្រសិទ្ធភាពគឺកាត់ការចំណាយដែលលោកថា «មិនចាំបាច់» លើវិស័យការពារជាតិ និងសន្តិសុខជាតិដោយលើកឧទាហរណ៍មួយរឿងវិស័យការពារជាតិ ការបង្កឲ្យមានបញ្ហាប្រឈមតាមព្រំដែនដែលត្រូវការចំណាយទៅលើការទិញសម្ភារភ័ស្តុភារជាដើម ដែលជាចំណែកនៃការចាយវាយ «ខ្ជះខ្ជាយ» រឿងជម្លោះព្រំដែនជាមួយប្រទេសជិតខាង។
លោកថ្លែងថា៖ «តាមការសិក្សារបស់យើង យើងអាចមានលទ្ធភាពកាត់បន្ថយច្រើនពីការងារការចាយលុយខ្ជះខ្ជាយលើវិស័យការពារជាតិ ការចាយលុយខ្ជះខ្ជាយលើវិស័យសនិ្តសុខជាតិរបស់ក្រសួងមហាផ្ទៃជាដើមយើងអាចរកវិធីសាស្ត្រដើម្បីកាត់បន្ថយចំណាយទៅលើរឿងមិនចាំបាច់មួយចំនួនដើម្បីយកថវិកាមកដាក់លើវិស័យអាទិភាពទាំង ៥ ចំណុច»។
លោកថ្លែងថា៖ «ធម្មតាយើងធ្វើអ្វីមួយយើងត្រូវមានគោលដៅរបស់យើង អ៊ីចឹងក្នុងការសម្រេចគោលដៅនឹងយើងមិនអាចសម្រេចបានក្នុងពេល ១ ឆ្នាំ ២ ឆ្នាំ ឬ ៣ ឆ្នាំទេសំខាន់គឺយើងមានគោលដៅមួយច្បាស់លាស់ដើម្បីធ្វើដំណើរទៅរកគោលដៅហ្នឹង។ បើយើងនិយាយពីការកសាងស្ដង់ដារមន្ទីរពេទ្យមួយដែលល្អយើងសង្កេតឃើញមន្ទីរពេទ្យគន្ធបុប្ផាអ៊ីចឹងហើយកាលណាយើងអាចមានគំរូមួយច្បាស់លាស់ យើងដាក់ទិសដៅក្នុងការអនុវត្តកែប្រែគុណភាពវិស័យសុខាភិបាលជាពិសេសរឿងមន្ទីរពេទ្យ យើងជឿថាយើងអាចធ្វើបាន។ ជាទូទៅទស្សនវិស័យមួយៗត្រូវការពេលវេលា ១០ ឬ ២០ ឆ្នាំ»។
លោកបន្ថែមថាគណបក្សរបស់លោកបានត្រៀមខ្លួនរួចរាល់ដើម្បីប្រកួតប្រជែងជាមួយបក្សកាន់អំណាចហើយនឹងដាក់បេក្ខជនឈរឈ្មោះនៅគ្រប់មណ្ឌលទាំងអស់ទូទាំងប្រទេសសម្រាប់ការបោះឆ្នោតជាតិនាខែកក្កដាឆ្នាំនេះ។ លោកថា៖ «ធម្មតាយើងបង្កើតគណបក្សគឺយើងមានក្ដីប្រាថ្នាធំយើងចង់ចូលរួមប្រកួតប្រជែងហើយយើងចង់ក្លាយជាគណបក្សមួយដែលអាចដឹកនាំរដ្ឋាភិបាលបាននេះជាក្ដីស្រមៃរបស់យើង។ យើងជឿជាក់ថាយើងឈ្នះ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថាគណបក្សរបស់លោកស្វាគមន៍គ្រប់គណបក្សនយោបាយសម្រាប់ចូលរួមការប្រកួតប្រជែងការបោះឆ្នោតជាតិហើយបក្សរបស់លោកនឹងធ្វើមហាសន្និបាតប្រចាំឆ្នាំចំនួនបីថ្ងៃគឺពីថ្ងៃ ១៩ ដល់ ២១ មករាដើម្បីកែសម្រួលគោលនយោបាយសម្រាប់ចូលរួមប្រកួតប្រជែងហើយថាការប្រកាសគោលនយោបាយ GDP ជា «សិទ្ធិ» របស់គេក្នុងរបបប្រជាធិបតយ្យ។
លោកថ្លែងថា៖ «ឥឡូវនេះយើងត្រៀមឆ្ពោះទៅរកមហាសន្និបាត វាមិនទាន់ហួសពេលទេ។ អត់បញ្ហាព្រោះយើងមានកម្មវិធីគោលនយោបាយស្រាប់ហើយជាគោលរួចហើយគ្រាន់តែកែសម្រួលឲ្យវាស្របតាមសភាពការណ៍ថ្មីប៉ុណ្ណោះ»។
អ្នកវិភាគនយោបាយលោកបណ្ឌិត ឡៅ ម៉ុងហៃ និយាយថាគណបក្សទាំងអស់នោះលើកលែងតែគណបក្សប្រជាជនដែលកាន់អំណាចហ្នឹងគឺអត់បានទទួលអាសនៈនៅក្នុងរដ្ឋសភាទេ ដូច្នេះបក្សប្រជាធិបតេយ្យមូលដ្ឋានក៏មិនប្រាកដថាអាចទទួលបានកៅអីរដ្ឋសភាដែរ។
លោកថាការបោះឆ្នោតខាងមុខនឹងមិនអាចមានភាពសេរី និងយុត្តិធម៌បានទេ ហើយថាពលរដ្ឋមួយចំនួនដែលធ្លាប់បោះឆ្នោតឲ្យគណបក្សប្រឆាំងអាចនឹងមិនទៅបោះឆ្នោតនោះទេ។
លោកថ្លែងថា៖ «បើសិនជាខ្ញុំជាបេក្ខជននៃគណបក្សណាមួយហើយដោយសារខ្ញុំគោរពប្រតិបត្តិតាមគោលការណ៍ប្រជាធិបតេយ្យ ខ្ញុំថាក្នុងកាលៈទេសៈបែបនេះហើយបន្តទៅមុខទៀតការបោះឆ្នោតនឹងមិនសេរី និងយុត្តិធម៌ទេ។ ដូច្នេះខ្ញុំពិបាកចូលរួមនឹងប្រកួតប្រជែងក្នុងការបោះឆ្នោតនោះហើយ»៕